دهێتە چاڤەڕێ‌ كرن ل دەست مەها بهێت تیما تەپا پێی یا یانەیا دهۆك دەست ب بەرهەڤییان بۆ وەرزێ‌ نوو 2023- 2024 یێ‌ خولا ئیراقێ‌ یا پیشەكاران بكەت، ب دانانا بەرنامەكێ‌ رێكخستی یێ‌ راهێنانێ‌ و ب هیڤی و گەشبینی ژبۆ باشترین شێوە پشكداری خولێ‌ بیت.
ل دۆر ڤێ‌ یەكێ‌ جاسم محەمەد حاجی سەرپەرشتێ‌ تیما تەپا پێی یا یانەیا دهۆك بۆ رۆژنامەیا ئەڤرۆ گۆت: بڕیارە دووماهییا حەفتیا بهێت خرڤەبوونا تیما مە ب ئامادەبوونا هەمی یاریزانێن گرێبەست دگەل هاتییە گرێدان و نووكرن و ل دەستپێكا هەیڤا بهێت دەست ب یەكا راهێنانێ‌ بكەین خوە بەرهەڤكرن بۆ وەرزێ‌ نوو یێ‌ خولا ئیراقێ‌ یا پیشەكاران، پرۆسێسا ئینانا یاریزانان بەردەوامە ل دووڤ داخوازییا كادرێ‌ راهێنانێ‌ و هەتا نوكە دانۆستاندنێ‌ دگەل دو یاریزانێن دی دكەین ژ وانا یێ‌ ئیراقی یە كو ل هێلا هێرشبرنێ‌ یاریێ‌ دكەت، بۆ وەرزێ‌ نوو دێ‌ ب پلان و شێوازەكێ‌ باشتر هێنە د ناڤ خولێ‌ دا، ژبەركو ئەڤ وەرزە ب گوهۆڕینێن مەزن دێ‌ دەستپێكەت پشتی بوویە خولا پیشەكاری و دێ‌ بهێزتر بیت، گەشبینن ب پشتەڤانییا بەردەوام یا حوكمەتا هەرێما كوردستانێ‌ و پارێزگارێ‌ دهۆكێ‌ تیما مە باشترین شێوە بهێتە د ناڤ هەڤڕكییان دا.
بۆ زانین كارگێرییا یانەیا دهۆك بۆ وەرزێ‌ نوو چەند گوهۆڕین د ناڤ كادرێ‌ راهێنانێ‌ و ئینانا هندەك یاریزانێن نوو كرینە و بڤی رەنگی، سلێمان رەمەزان كوڕێ‌ پارێزگەهێ‌ وەكو راهێنەرێ‌ تیمێ‌ بۆ وەرزێ‌ ئەڤ سالە گرێبەستا وی هاتە نووكرن، هەروەسان كادرێ‌ وی یێ‌ وەرزێ‌ بوری هەمی هاتە گوهۆڕین و ئێكێ‌ نوو ب ڤی شێوەیی هاتیە پێكئینان، حەیدەر سەباح هاریكارێ‌ راهێنەری، خالد عەتییە راهێنەرێ‌ گۆلپارێزان، تارق محەمەد راهێنەرێ‌ شیانێن لەشی، ژلایەكێ‌ دووڤە هەر ئێك ژ عەلا عەبد شرۆڤەكارێ‌ هونەری، د. چاچان جومعە شارەزایێ‌ دەرۆنی دگەل كادرێ‌ راهێنانێ‌ هاتنە دانان.
هەروەسان هەتا نوكە یانەیا دهۆك گرێبەست دگەل كۆمەكا یاریزانان ئیمزاكرییە ژ وانا: یێ بەرزیلی دومێنک ڤینیسیوس، رێباز رەحیم، رابەر جەلال، حسێن حەكیم، عومەر عەتەللا، جەبار كەریم، فیراس ئەلزامل، محەمەد سالح گۆلپارێزێ‌ یانەیا زاخۆ، پیشەكارێ‌ غانی رۆبێن ئەكوا، دیسان پرانییا یاریزانێن دهۆكێ‌ گریبەستێن خوە نووكرینە و هندەك یاریزانان گرێبەستا دو وەرز بووینە ژ وانا، رێوان ئەمین، محەمەد مەعەن، مۆزێز لۆكاس، ژیار گۆڤەند، یانگ زاكێری، د هێتە پێشبینیكرن د رۆژێن بهێت دا گرێبەستێن هەر ئێك ژ وەلید سەلمان، محەمەد سەعید، زیاد ئەحمەد، سیابەند عەگید، هەرێم نەحسین و ئەحمەد بەشار بهێنە نووكرن.

عەلی حاجی:

د داخویانیەکا تایبەت دا سەرپەرشتێ تیما باسکێت بۆلا یانه‌یا زاخۆ ئەوا پشکدار د خولا نایابا ئێراقێ دا بۆ رۆژناما ئەڤرۆ دیار کر تیما به‌رده‌وامه‌ ل سه‌ر راهێنانێن خوه‌ و چاڤێ وان ژی ل سەرکەفتنێ یە به‌رانبه‌ر یانه‌یا نه‌فت یا به‌غدایی ژ بۆ ب دەستڤە ئینانا ئێکەم ناسناڤ د ئەڤ سالە دا، ئه‌وا بریاره‌ ل ناڤه‌راستا مه‌ها بهێت یارییا كۆپا چه‌له‌نگینیێ ل به‌غدا پایته‌ختێ ئیراقێ ئه‌نجامبده‌ت.
زێدەتر عەبدولستار عەلی گۆت: ژبۆ باشترین به‌رهه‌ڤی بۆ یارییا دووماهیێ ژ كۆپا چه‌له‌نگینیێ به‌رانبه‌ر یانه‌یا نەفت ئەوا بریارە ل 15ێ مه‌ها بهێت بهێتە ئەنجامدان، یاریزانێن مه‌ به‌رده‌وامن ل سه‌ر راهێنانێن خوه‌ بێ راوه‌ستیان و مە گڤاشتن ل یانه‌یێ کرینە بۆ ئێکلاکرنا گرێبه‌ستێن یاریزانێن پێشەکار دا کو بشێن تیمەکا رێكخستی بدانین، دیسان دەلیڤەیا زێرین ژ دەست نەدەین ژبەرکو مە دڤێت ناسناڤی ژ ده‌ستڤه‌بینن و ئەڤە باشترین دەلیڤەیە بۆ تیما مە هاتیە پێش، ب ده‌ستڤه‌ ئینانا ناساڤی دێ بیتە پالدەره‌كێ ب هێز بۆ تیما مە بۆ وەرزێ نوو یێ خولا ئێراقێ بشێن هەڤرکیێ ل سەر ناسناڤی وێ ژی بکەین.
ناڤبری گۆت ژی: کارگێریا یانه‌یا زاخۆ گلوپا کەسک بۆ مە هەلکرییە یێ کو ئەم بشێن گرێبه‌ستێ دگەل یاریزانەکێ باش ل ئێراقی ئیمزا یکەین و هەکە مە نەشیا نه‌چارین دێ گرێبه‌ستا یاریزانێ ئێک ژ وەلاتێن رۆژئاڤایێ ئاسیا ئیمزا کەین ژبەرکو یاریزانێن وان وەلاتان ب یاریزانێن پێشەکار ناهێنە هژمارتن و دێ وەکو یاریزانەکێ نافخۆیی هێنە هەژمارتن.

قەیس وەیس:
فیدراسیۆنا تەپا پێی یا ئیراقێ‌ دیار كر 850 ملیۆن دینار وەكو قۆناغا ئێكێ‌ یا سەخبیكرنا یاریگەهێن ئیراقێ‌ و هەرێما كوردستانێ‌ هاتیە تەرخانكرن ژبۆ چارەسەركرنا كێماتیێن وان بەری دەستپێكرنا وەرزێ‌ نوو یێ‌ خولا ئیراقێ‌ یا پیشەكاران و چاڤەڕێ‌ ئیمزایا سەرۆك وەزیرێن ئیراقێ‌ محەمەد شیاع ئەلسودانی نە.
ئەحمەد ئەلموسەوی پەیڤدارێ‌ راگەهاندنا فیدراسیۆنا تەپا پێی گۆت: پشتی دۆڤچوونا هەمی یاریگەهێن ئەوان یانەیێن پشكدار د خولا ئیراقێ‌ یا پیشەكاران دا راپۆرتەكا تەسەل یا پێدڤی و سەخبیرییا ئەوان یاریگەهێن ل هەمی ئیراقێ‌ ژ وانا یێن هەرێما كوردستانێ‌ پێشكێشی سەرۆك وەزیرێن ئیراقێ‌ محەمەد شیاع ئەلسۆدانی كری ب كۆژمەیێ‌ 850 ملیۆن دیناران هاتیە خەملاندن، رازیبوون ل سەر هاتیە كرن بتنێ‌ ئیمزایا وی مایە ژبۆ پارڤەكرنا ئەوی پارەیێ‌ دەستنیشانكری.
ناڤهاتی گۆت ژی: پشتی ئەڤ پارە دهێتە دان رێكەفتن دگەل كۆمپانیەكا توركی دێ‌ هێتە كرن ژبۆ سەخبیركرنا هەر یاریگەهەكا كێماسی لێ‌ هەین و ئەوا هاتیە دیاركر كو كێما سدێ‌ بۆ سەخبیكرنا ئەردێ‌ یاریگەهێ‌ و سیستەمێ‌ ئاڤدانا فریزەیی و چاندنا فریزەیێ‌ ل سەر ئاستێ‌ بلند دگەل هەر پێدڤییەكا دناڤ یاریگەهێ‌ دا بیت.

عەلی حاجی:

د رێورەسمەکێ تایبەت دا ل یاریگەها زاخۆ یا نێڤدەولەتی ب ئامادەبوونا رێژەیەکا باش یا جەماوەری و دەزگایێن راگەهاندنێ، یانه‌یا زاخۆ راهێنەرێ خوە یێ قەتەری ته‌لال ئه‌لبلۆشی پێشکێش کر.
ل دەستپێکێ عەمار فەرهاد سەرۆکێ یانه‌یا زاخۆ دیار کر هاتنا راهێنەرێ قەتەری بۆ یانه‌یێ بڕیارەکا گرنگه‌ بوو ژبەرکو ئێکەم جارە راهێنه‌ره‌كێ قه‌ته‌ری بهێته‌ خولا ئیراقێ، مە راهێنەرەکێ وەسا دخواست کو بشێت خزمەتا یانه‌یێ و جەماوەری بکەت و نڤشەکێ نوو بینە د ناڤ تیمێ دا نەك بۆ بەرژەوەندیێن خوە بهێت، هەتا نوکە چو کوژمەیەکێ پارەیی نەهاتیە دەستنیشانکرن بۆ یانه‌یا زاخۆ، لێ ئەو پارەیێ دهێتە تەرخانکرن به‌رانبه‌ر یانەیێن دیتر کێمترین پارەیە ژبەرکو ئەو یانەیە گرێبه‌ستێن مەزن گرێدەن و یا مه‌ کێمترین گرێبەسته‌، لێ هەمی دەمان هەڤرکیێ ژی دگەل وان تیمان دکەین، ب وی پارەیی زاخۆ گەلەک یاریان ژی دا پشکدارە و هەڤرکەکا ب هێزە، هەڤڕکی ل سەر ناسناڤێ خولا ئێراقێ یا تەپا پێی ب زەحمەتە و پێدڤی ب پشتەڤانیەکا ماددی یا مەزن و کارەکێ ب کوم هەیە، دێ هەمی دەمان هەڤرکیێ ل سەر ناسناڤی کەین و ب کارەکێ مەحال ژی نابینن، ب هیڤی نه‌ ب رێیا گرێبه‌ستێن یاریزان و راهێنەری جارەکادی کەیف خوەشیێ ده‌ف جەماوەرێ خوە پەیدا بکەین.
ژلایێ خوه‌ڤه‌ تەلال ئه‌لبلۆشی راهێنه‌رێ نوو گۆت: پێخوه‌شحالم ئه‌ركێ راهێنه‌راتییا تیما زاخۆ وه‌ربگرم كو خودان جه‌ماوه‌ره‌كێ مه‌زنه‌ وهژماره‌ ئێكه‌ و رۆله‌كێ پێشچاڤ د سه‌رئێخستنا تیما خوه‌ هه‌بوویه‌، دێ بزاڤێ كه‌ین تیمه‌كا رێكوپێگ و بهێز درۆستبكه‌ین، گه‌شبینم بۆ وه‌رزێ نوو یاریگه‌ها زاخۆ دێ جاره‌كا دی پربیت ژ جه‌ماوه‌ری، من حه‌ز ژ گه‌شێ یانێ و جه‌ماوه‌ری كر و دبیته‌ پالده‌ر زێده‌تر خوه‌ ماندی بكه‌م بۆ ناڤێ یانه‌یێ و بلندكرنا ئاست و ئه‌نجامان.
هه‌روه‌سان گۆت: من ئاگەهداری ل سەر هەمی گرێبه‌ستێن یاریزانان هەیە و رازیبوون ل سەر دایه‌ تایبه‌ت یاریزانێن پیشه‌كار پشتی دۆڤچوونا وی كری، هیڤییا هەر راهێنەرەکی ئه‌وه‌ گرێبه‌ستا یانه‌یا زاخۆ ئیمزابکەت ژبەر هەبوونا پێگەهێ ب هێز یێ جەماوەری و دێ تیمەکێ بەرهەڤ کەین کو وێنەیێ وێ ب تمامی ژ وه‌رزێ بۆری بهێته‌ گوهۆڕین.

بڕیارە سوبەهی تیما كچێن یانەیا ئافرەتێن دهۆكێ‌ وەكو نوونەرا پارێزگەهێ‌ ب كەڤیتە د هەڤڕكیێن قارەمانییا هەرێما كوردستانێ‌ یا فوتسالێ‌ ل سەر ئاستێ‌ تازەپێگەهشتییان ئەوا دێ‌ پشكدارییا حەفت تیمێن وەرزشی و هەولێرا پایتەخت مێڤاندارییا وێ‌ كەت.
ل دۆر دووماهی بەرهەڤیێن فوتسالا ئافرەتێن دهۆكێ‌ زنار زوبێر سەرۆك شاندێ‌ تیمێ‌ بۆ ئەڤرۆ گۆت: وەكو تاكە یانەیا پارێزگەهێ‌ دێ‌ پشكداری قارەمانییا هەرێمێ‌ بین پشتی ژ قۆناغا بەرهەڤییان و دانانا پلانان ب دووماهی هاتی ب هیڤیین مەزن و شەڕی بۆ دەستڤە ئینانا ناسناڤی كەین، ئەڤرۆ ل دەمژمێر هەشت شەڤ دێ‌ كۆمبوونا هۆنەری و پشككێشانا هێتە كرن و سوبەهی دەست ب هەڤڕكییان هێتە كرن، بەرهەڤیێن مە گەهشتبوونە كۆپیتكێ‌ و كادرێ‌ راهێنانێ‌ ژبلی دانانا پلان و تەكتیكێ‌ بۆ یاریزانان كار ل سەر دەرۆن و بەرهەڤییا وان ژی كرییە، ژ سەرجەمێ‌ 60 یاریزانان 13 باشترینێن وان هاتینە ژێگرتن، جهێ‌ كەیفخوەشیێ‌ یە هەمی یاریزانێن مە دناڤبەرا ژدایكبوویێن 2005 هەتا 2013ێ‌ دانە ئەڤە ژی گەشبینییە بۆ پاشەرۆژەكا گەش یا وەرزشا كچا ل پارێزگەها دهۆكێ‌.
هەروەسان ناڤهاتی ئەوچەندە دیار كر ئارمانجا وان نە بتنێ‌ پشكدارییە بەلكی دێ‌ شەڕی بۆ دەستڤە ئینانا ناسناڤی ژی كەن سەرباری ئەركێ‌ تیما وان ب سانەهی نابیت و گۆت: ئەڤ گەشبینیە ژبەر وێ‌ یەكێ‌ یە كو كارەكێ‌ ئەكادیمی و رێكخستی هاتیە كرن دگەل دا پشتەڤانییا بەردەوام یا د. عەلی تەتەر پارێزگارێ‌ دهۆكێ‌ ئەوێ‌ بۆ ڤێ‌ قارەمانیێ‌ بەرهەڤییا خوە دیاركری پشتەڤانییا تیما مە بكەت و ئارمانجا مە ژی ڤەگەڕاندنا هێزا فوتسالا ئافرەتێن دهۆكێ‌ یە.
بۆ زانین ئەڤرۆ دێ‌ پشككێشان هێتە ئەنجامدان و بڕیارە سوبەهی قارەمانی ب شێوەیێ‌ كۆمڤەبوون ب پشكدارییا هەشت یانە و فێرگەهـ ل سەر دو كۆمان بهێنە بەلاڤكرن، یانەیێن پشكدار، ئافرەتێن دهۆك، تلسقۆف، شارەزوور، چەمچەمال، دۆكان، هەلەبجە، رەواندۆز و فێرگەها عەباس.