دهۆك، لەزگین جوقی:

رێڤەبەرێ‌ نڤیسینگەها دهۆك یا كۆمسیۆنا بلندا سەربخوە یا هەلبژارتنان دیار كر، ب ریژا 97% كارتێن دەنگدانێ‌ ل سەر دەنگدەرێن پارێزگەها دهۆكێ‌ هاتینە بەلاڤكرن و 77% ژ دەنگدەرێن دهۆكێ‌ هەتا نوكە خوە ل پرۆسەیا بایۆمەتری تۆماركرینە.
خالد عەباس، رێڤەبەرێ‌ نڤیسینگەها دهۆك یا كۆمسیۆنا بلندا سەربخوە یا هەلبژارتنان بۆ رۆژناما ئەڤرۆ خویا كر، نوكە كار ل سەر تۆمارا گشتی یا دەنگدەرێن پارێزگەها دهۆكێ‌ دهێتە كرن و گۆت: «هەتا نوكە ب رێژەیا 77% ژ دەنگدەرێن پارێزگەها دهۆكێ‌ هاتینە تۆماركرن و ب رێژەیا 97% ژ دەنگدەرێن دهۆكێ‌ كارتێن خوە یێن بایۆمەتری وەرگرتینە، بەردەوام كارتێن بایۆمەتری ل سەر دەنگدەران دهێنە بەلاڤكرن و 54 تیمێن گەرۆك هاتینە پێكئینان بۆ تۆماركرنا دەنگدەرێن دهۆكێ‌ و بەلاڤكرنا كارتێن بایۆمەتری ل سەر دەنگدەران».
گۆتژی: «ل دهۆكێ‌ و زاخۆ و ئاكرێ‌ و ئامێدیی و هەموو دەڤەرداری و ناوچەداریێن پارێزگەها دهۆكێ‌ 41 بنگەه یێن هاتینە ڤەكرن بۆ تۆماركرنا دەنگدەران و بەلاڤكرنا كارتێن بایۆمەتری».

ئامێدیێ، مەحمود نهێلی:

ژ ئەنجامێ كەفتنا دو گوللە تۆپان ل گوندێ گوهەرزێ‌ یێ سەر ب ناوچەداریا دێرەلۆكێ‌ ڤە زیان گەهاندنە مالێن وەلاتیان و ترۆمبێلەك ژی كەفتە بەر توپبارانێ.
رەڤەند موسا، ئاكنجیێ گوندێ گوهەرزێ‌ بۆ رۆژناما ئەڤرۆ دیار كر، دوهی ئێڤاری 20/8/2023 تۆپخانێن سۆپایێ توركیا دو جاران سەنتەرێ گوندێ گوهەرزێ ل سنوورێ ناوچەداریا دێرەلۆكێ تۆپبارانكر و گۆت: «ئەڤە دەمێ‌ دو حەفتیانە بەردەوام تۆپ ب دەورۆبەرێن گوندێ مە دكەڤن، ئەڤ تۆپە ژ لایێ چیایێ هنداڤی مە دهێنە ئاراستەكرن و ناهێتە زانین كا یێن كیژ لایەنی نە، لێ‌ دیارە ژ لایێ تۆپخانێن سۆپایێ توركیا یێن وێ دەڤەرێ دهێنە ئاراستەكرن».
گۆتژی: «د ڤان دو حەفتیان دا پێنج گوللە تۆپ ل سەنتەرێ گوندێ گوهەرزێ كەفتینە و گەلەك زیانێن مادی گەهاندینە وەلاتیان، دو خانیێن وەلاتیان و ترۆمبێلەك ژی كەفتیە بەر تۆپبارانا دوهی و ترس و دودلی ل نك ئاكنجیێن گوندی دروستكریە».

بێوار سندی، ڕێڤەبەرێ ڕاگەهاندنا گەشتوگوزارێ‌ ل ئیدارەیا سەربخوە یا زاخۆ ڕاگەهاند، ڕێڤەبەریا گشتیا گەشتوگوزارا ئیدارەیا سەربخوە یا زاخۆ ب سەرپەرشتیا گوهدار شێخۆی، دوهی 20/8/2023 ئێكەم دیدارا گەشتیاری ل دەڤەرداریا باتیفا هاتە ئەنجامدان و دبێژیت: مەرەم ژ ڤێ دیدارێ ئەوە جهێن گەشتیاری یێن دەڤەرێ‌ بۆ گەشتیاران بهێنە نیاسین.
ڕێڤەبەرێ ڕاگەهاندنا گەشتوگوزارێ‌ ل ئیدارەیا سەربخوە یا زاخۆ دیار ژی كر، نێزیكی 60 كۆمپانیێن ناڤەراست و باشوورێ‌ ئیراقێ د دیدارا گەشتیاری دا پشكدارن و گۆت: «ئەڤ دیدارا گەشتیاری بۆ دەمێ دو ڕۆژان دێ یا بەردەوام بیت و پێشانگەهەكا كارێن دەستی یێن خەلكێ باتیفا دێ هێتە نیشادان».

ئاكرێ‌، رەمەزان زەكەریا:

سنێلەكێ 15 سالیێ ئاكنجیێ گوندێ گلەشین ل سنوورێ ناوچەداریا زێلكان یا سەر ب دەڤەرداریا شێخانڤە دوهی 20/8/2023 ل رووبارێ خازر خەندقی.
عەقید ئیبراهیم فەریق، رێڤەبەرێ بەرگریا شارستانی ل ئاكرێ بۆ ئەڤرۆ گۆت: «ل سەر رووبارێ زێی خازر سنێلەكێ 15 سالی بناڤێ ئەیاد فەرهاد محەمەد عەلی د رووبارێ خازری دا ل سنوورێ ناوچەداریا زێلكان نێزیك گوندێ قایماوە خەندقی».
گۆتژی: «تەرمێ وی هاتیە دیتن و هنارتن بۆ نۆشداریا داد، هەروەسا ئەڤ سالە ئەڤە كەسێ‌ هەشتێ‌ یە د رووبارێن دەڤەرێ دا دخەندقن».

ئەڤرۆ، زنار تۆڤی:

رێڤەبەرێ گشتیێ چاندنێ ل پارێزگەها دهۆكێ دیار كر، د دەمێ‌ دو رۆژان دا 50 تەنێن مازییان بۆ دەرڤەیی هەرێما كوردستانێ هاتینە هنارتن و ل سالا بۆری پتری 250 تەنێن مازییان بۆ دەرڤەیی كوردستانێ هاتبوونە هنارتن.
ئەحمەد جەمیل، رێڤەبەرێ گشتیێ چاندنێ ل پارێزگەها دهۆكێ بۆ رۆژناما ئەڤرۆ دیار كر، گەلەك بەرهەمێن چیایی ل هەرێما كوردستانێ هەنە و كوردستان یا ناسیارە ب بەرهەمێن ناڤخوەیی و د ماوەیێ كابینا نەهێ یا حوكمەتا هەرێما كوردستانێ دا چەندین بەرهەمێن ناڤخوەیی بۆ دەرڤەی هەرێما كوردستانێ هاتینە هنارتن و گۆت: «ل ڤان دو رۆژان ژی 50 تەنێن مازییان بۆ دەرڤەی كوردستانێ‌ هاتینە هنارتن».
گۆتژی: «ئەڤ سالە رێژەكا باش یا مازییان ل چیایێن كوردستانێ هەنە و ل ڤان دو رۆژێن بۆری 50 تەنێن بەرهەمێ مازییان بۆ وەلاتێ توركیا هاتینە هنارتن، هەروەسا ڤرێكرنا مازییان بۆ وەلاتێ توركیا دێ یا بەردەوام بیت».