وەزارەتا دەرڤە یا ئەمریکا دیار دکەت، د ڤان دەمێن دووماهیێ دا رەوش ل باکورێ سووریێ ئالۆز بوویە، د ئەنجاما ئالۆزیان دا زیان گەهشتیە خەلکێ سڤیل و هەروەسا ئەوێ یەکێ کاریگەری ل شەرێ ل دژی داعشێ ژی کریە، ژ بەر هندێ ژی وەکو ئەمریکا ئەم ژ رەوشا نها ل باکورێ سووریێ ددلگرانین.
ماتیو میلەر پەیڤدارێ وەزارەتا دەرڤە یا ئەمریکا راگەهاند، د ڤان دەمێن دووماهیێ دا ئێرشێن تورکیا ل سەر باکورێ سووریێ و رۆژئاڤایێ کوردستانێ زێدە بووینە، ئەو یەک کاریگەریا خوە ل شەرێ ل دژی داعشێ کریە، مخابن ژ بەر ئێرشێن ڤێ دووماهیێ یێن تورکیا زیانەکا مەزن گەهشتیە وەلاتیێن سڤیل ژی، ئەو یەک ب چو رەنگەکێ ناهێتە قەبوول کرن، بەری نها ژی مە دیار کریە دڤێت هەموو ئالی پێگیریێ ب وێ ئاگربەستێ بکەن یا کو بەری نها هاتیە راگەهاندن، شەر و ئالۆزیێن ڤێ دووماهیێ ل باکورێ سووریێ دێ بنە ئەگەرێ بهێزبوونا داعشێ و گرۆپێن دی یێن تیرۆرستی و ئەو یەک د بەرژەوەندیا چو ئالیەکێ دا نینە، وەکو ئەمریکا مە دڤێت هەر کەس پێگیریێ ب ئاگربەستێ بکەت، مە دڤێت ئێرشێن تورکیا ژی بهێنە راگرتن، چونکی ئێرشێن تورکیا زیانێن مەزن بۆ خەلکێ سڤیل هەنە.
ناڤهاتی ئەو یەک ژی دیار کر، ئالۆزیێن ل سووریێ ب شەڕی و توندوتیژیێ ناهێنە چارەسەرکرن، دڤێت هەموو ئالی پێگیریێ ب ئاگربەستێ بکەن و ل ئالیێ دی کار بۆ چارەسەریا سیاسی ل سووریێ بهێتە کرن، ب تایبەتی ژی نها هندەک دەڤەر ل باکورێ سووریێ د ئارامن و نابیت جارەکا دی رەوشا وان دەڤەران ئالۆز بیت و گۆت: (ئەم دێ ب هەموو رەنگەکێ کار کەین دا ئالۆزیێن نها ب دووماهی بهێن، چونکی ئالۆزیێن ڤێ دووماهیێ کاریگەریا خوە ل هێزێن مە ژی دکەن، ئالۆزبوونا رەوشا ل باکورێ سووریێ د بەرژەوەندیا ستراتیژیا ئەمریکا دا ل دەڤەرێ نینە، ژ بەر هندێ ئەم داخواز ژ تورکیا دکەین ئێرشێن خوە بدەتە راگرتن و هەر پرسەک ژی هەیە دڤێت دوور ژ شەری و ب رێیا دانوستاندنان بهێتە چارەسەرکرن).
ل ئالیێ دی فەرماندارەکێ هێزێن سووریا دیموکرات ژی راگەهاند، هەلوەستێ ئەمریکا ل هەمبەر ئێرشێن ڤێ دووماهیێ یێن تورکیا ل سەر هێزێن وان گەلەک لاوازە، چونکی هێزێن سووریا دیموکرات هەڤپەیمانێن ئەمریکا نە و د شەرێ ل دژی داعشێ دا گەلەک قوربانی داینە، نها تورکیا هەر رۆژ ئێرشی هێزێن سووریا دیموکرات دکەت و رۆژانە شەرڤانێن وان جانێ خوە ژ دەست ددەن، دڤێت هەلوەستێ ئەمریکا ل هەمبەر ئێرشێن ڤێ دووماهیێ یێن تورکیا گەلەک توند بیت و نابیت رێ ب تورکیا بهێتە دان جارەکا دی ئێرشی هێزێن سووریا دیموکرات و وەلاتیێن سڤیل ل باکورێ سووریێ و رۆژئاڤایێ کوردستانێ بکەت.
نيشاندان