دیدار، سالار محەمەد دۆسكی:

تارق كەریم سالح زاویتەی، ژ دایك بوویێ‌ سالا 1970ێ‌ یە، خواندنا سەرەتایی و ناڤنجی و ئامادەیا پیشەسازی ل دهۆكێ‌ ل سالا 1988ێ‌ ب دووماهی ئینایە، بەری سەرهلدانا پیرۆز شانا وان ئاشكرا دبیت و ژ دهۆكێ‌ هەتا سەرهلدانێ‌ دەردكەڤیت، تارق زاویتەیی نوكە ئەندامێ‌ لژنا ناوچا برایەتی یا مانگێشكێ‌ یا پارتی دیموكراتی كوردستانە.
تارق كەریم سالح، بەحسێ‌ چیرۆكەكا سەرنج ڕاكێش ل گەل شوفێرێ‌ رێڤەبەرێ‌ ئەمنا دهۆك دكەت و گۆت: ل سالا 1985ێ‌ ل گەل (صەدیق سەعدی زاویتە)ی بووم، و رۆژەكێ‌ چوومە (چەفریكێ‌) بوو من بەحسێ‌ مللەتێ‌ كورد كر و ئەو رەوشا وی دەمی یا خەلكێ‌ كوردستانێ‌ تێدا و خواست ل گەل بهێمە رێكخستن، و ل سالا 1986ێ‌ دەمێ‌ بوویمە قوتابیێ‌ ئامادەیا پیشەسازی، (صەدیق زاویتەی) خواست كار ل سەر بەفرەهكرنا رێكخستنێن نهێنی ل ئامادەیا پیشەسازی یا دهۆكێ‌ بكەم، و دەست ب بەلاڤەكرنا بەلاڤووكا بكەم هەر ل قوتابخانێ‌ و دیسا د ناڤا باژێری دا وەك هەڤركیەك بۆ حوكمەتا بەعس، كو پێشمەرگە دناڤ باژێری هەنە و مە دەست بكارێ‌ خوە كر، و چەندین بەلاڤووك مە دناڤا بازارێ‌ دهۆكێ‌ دا ل دەمژمێر دو و سێ‌ شەڤێ‌ ل دیواران دان، ئەڤی كاری دەنگڤەدانەكا ئێكجار مەزن هەبوو دناڤا دوژمنی دا، چونكە ئەڤ كارە ل جەرگێ‌ دهۆك دا هاتەكرن، دیسا مە ل دیوارێن ئامادەیا برایەتی دان و گەلەك جهان وپتریا دروشمێن مە دهەلاویستن ل سەر پارتی و كوردستانێ‌ بوون، و مە دگۆت گوهداری یا حزبا بەعس نەكەن و بژیت كورد بژیت پارتی دیموكراتی كوردستان و گەلەك دروشمێن دی ژی مە چێدكرن وی دەمی.
تارقی هەروەسا ئاشكراكر، كو ل ئامادەیا پیشەسازی مامۆستایێ‌ زمانێ‌ (عەرەبی) (سەدیق شەرۆ) كوردەكێ‌ گەلەك دلسوز بوو وەفادار بوو و بیرا من دهێت هەر (10) رۆژا بەعسییا مامۆستایێ‌ مە (سەدیق شەرۆ) دگرت و بەرداڤە، مە بەردەوام شانێن خوە ل ئامادەیا پیشەسازی بەرفرەه دكرن، لێ‌ ئەم ئاشكرانەبووین پشتی مە ئامادەیا پیشەسازی ل سالا 1989ب دوماهی ئینای، رۆژەكێ‌ ل مالا بووم تاخی (حەی شورتە، شوفێرێ‌ رێڤەبەرێ‌ ئەمنا دهۆك هات ناڤێ‌ وی (وەعد) بوو خەلكێ‌ گوندێ‌ زاویتە بوو هاتە مالا مە، و دامە بەر شەقا و قوتام و خواست شەلوالەكی بكەمێ‌ و دەیك و باب و خویشك و برایێن من كەسەكێ‌ هاش من نەبوو، من شەلوالەك كر و پێنەكا دی دانا من و هاڤێتمە دترۆمبێلا ئەمنێ‌ دا و هەر من گۆتێ‌ خیرە گۆت لیستا ناڤا دەركەفت و ناڤێ‌ تە ل سەرێ‌ لیستێ‌ دهێت، و تو بەرپرسێ‌ رێكخستنێی و هەر من گۆتێ‌ هوسا نینە، ئەو نە ئەزم من بزاڤكرن ل بەر بەرزەبیت وی هەر گۆت تووی و ب ترۆمبێلا خوە برمە شێلادزێ‌ و رادەستی كەسەكێ‌ دیێ‌ ئەمنێ‌ كرم، و گۆت ڤی كەسی ببە سەر كێلەكا سنوری و بزڤرە، دووماهی زالگەها بەعسیا ل دووكەرێ‌ بوو و داخازا ناسنامێ‌ ژمن كر و من رادەست كر و ب وێ‌ بهانەیێ‌ كو دێ‌ چمە ناڤ چەمی و ئێڤاری دێ‌ زڤرم و من رەگەزناما خوە رادەستی زالگەهێ‌ كر، و بتنێ‌ چووم گەهشتمە گوندێ‌(جارمەندا) و دووڤ دا چوومە (شیڤارەزا) موختارێ‌ گوندێ‌ (شیڤارەزا) ناڤێ‌ وی (خەمو) بوو و دەركەفت جاشەكێ‌ دروست، خاران دامن و زارۆكێن وی گەلەك قەدرێ‌ من گرت، لێ‌ ب شەف خانی ژلایێ‌ (قەرەقولێ‌) ڤە هاتە دروپێچكرن و دەستەسەركرم و گەلەك پرسیار ژ من كرن و گۆت دێ‌ تە رادەستی حوكمەتا عیراقێ‌ كەین هەر پێشمەرگەك بەرامبەر (600) هزار دینارانە، چوومە دەف ئەفسەری و من خواست من بكوژیت بتنێ‌ من رادەستی عیراقێ‌ نەكەت، و بابەت من بوو شڕۆڤەكر، رازی بوو من رادەست نەكەن ب وی مەرجی سپێدێ‌ ل سنورێ‌ توركیا دەربازبیت ئەو بخوە بچیتە عیراقێ‌، سپێدێ‌ ئینامە سەر سنوری و هاتمە گوندێ‌ (جارمەندا) د خانیەكی دا نڤستم و من نەزانی ئەو خانی هەمی یێ‌ (TNT) كری بوو و سپێدێ‌ جارەكا دی هاتمە گوندێ‌(شیڤا رەزا) من گۆتە موختاری توو من بەیە (كنیانش) ببە من نەبەیی پێشمەرگە ئەڤ شەڤە دێ‌ هێتە گوندێ‌ وە پاش گازندا نەكە، موختار ترسیا دو كەس دانانە ل گەل من و برمە لقێ‌ ئێك وی دەمی بەرپرسێ‌ لقێ‌ ئێك د.(كەمال كەركووكی) بوو و (تەحسین كەمكی و محەمەد خالد بوصلی) وێرێ‌ بوون و گەلەك قەدرێ‌ من گرت و رێز ل من گرت، و پشتی (15) رۆژان ئەم ڤەگوهاستینە (روویێ‌ شین) نێزیكی گەڤەرێ‌، كورخالەتەكێ‌ من ل ئیرانێ‌ بوو و پەیوەندی ب هەڤالێت من ل (روویێ‌ شین) كر، و ئاگەهداركرن كو هەر دەمێ‌ بهێنە دەستیردانێ‌ ل ئیرانێ‌ من ژی ل گەل خوە بگەهینێ‌، ل گەل خودێ‌ ژێ‌ رازی (غازی ئالیخان و رەمەزانێ‌) برایێ‌ وی و هەشت پێشمەرگا چووینە (راژان)، وی دەمی مەكتەبا سیاسی یا پارتی دیموكراتی كوردستان ل وێ‌ دەڤەرێ‌ بوو و دووڤ دا پوستەك ژ سنوری هات و حوكمەتا ئیرانێ‌ گۆت ئەوێن ب قاچاخی هاتین دڤێت رادەستی مە بهێنەكرن، و یێ‌ بتنێ‌ من بوو و هاتن ئەز ل گەل چووم، (3) هەیڤان مامە ل زیندانا (ئورمیێ‌) دا وی دەمی (ئدریس بەدەل) ژی دزیندانێ‌ دابوو و هەمی رۆژان قوتان و ئەشكەنجەدان و ب كێبلێن ئاسنی دهاتمە قوتان و خوین دلشێ‌ مەدا دهات، و هەرسێ‌ هەیڤان بەردەاوم دقوتام و دبرمە ڤەكولینێ‌، هاتیمە وێ‌ دەڤەرێ‌ چ و پشتی سێ‌ هەیڤان هاتمە رەوانەكرن بۆ ئوردیگایێ‌ (خێ‌) ل سەر سنورێ‌ رووسی و پشتی حەفت رۆژان و دووڤ دا هاتمە رەوانەكرن بۆ (كەرج) وی دەمی لقێ‌ هەشت ل وێرێ‌ بوو، و بەرپرسێ‌ لقێ‌ (شەوكەت بامەرنی) بوو ومامە ل وێرێ‌ هەتا سەرهلدان رابووی گەلەك كەیفا من هات و ئێكسەر هاتمە (زێوە) (ملازم عابد ئێتیتی) ل وێرێ‌ بوو ل گەل (مەسعود سەرنی) هاتم هەتا (دیانا) دووڤ دا ب پیان د(رێزان و بارزان) را هەتا (سیریێ‌) ب پیان هاتم، و دووڤ دا ب كوستەرەكێ‌ هاتمە زاویتە و ناڤێ‌ خودانێ‌ كوستەرێ‌ (ئەمین بێسری) بوو، و پارە دگەل من نەبوون و هندەك سێف جانتێ‌ من دابوون و من گۆتێ‌ من بگەهینە زاویتە دێ‌ پارا ژ مال دەمە تە چونكی پارە من نینن، گۆت تو مرۆڤێ‌ منی بێ‌ بەرامبەر دێ‌ تە گەهینم دەمێ‌ گەهشتیمە زاویتە و دووڤدا بەردەوام بووم ل گەل هێزا (صالح شندوخی) چەندین دەڤەرا مە بەردەوامی ب خەباتا خوە یا پێشمەرگاتیێ‌ دا و چەندین شەڕێن پێشمەرگەی ل گەل PKK پشكداربووم.
تارق زاویتەیی دبێژیت: دەمێ‌ سەرهلدان دروست بووی (خالد بانی) بابێ‌ من ئاگەهداركر، كو یێ‌ ساخم ل ئیرانێ‌ و بابێ‌ من گۆتێ‌ نەخێر كورێ‌ من نەمایە و رۆژا ژ دهۆك دەركەفتیم رۆژا دووڤدا دایك و بابێن من بۆ ماوێ‌ (15) رۆژان ئەمنا دهۆكێ‌ دەستەسەركرن، و ب رێكا (وەعد زاویتەی) شوفێرێ‌ رێڤەبەرێ‌ ئەمنا دهۆك هاتنە ئازادكرن، پشتی هەیڤەكێ‌ ئەمنا دهۆكێ‌ خێزانا من ئاگەهداركر كو یێ‌ زیندانكریمە ل ئەبو غورێب و ناسناما من رادەستی وان كربوو، و دایك و بابێن من چوونە ئەبو غورێب و پرسیارا من كر لێ‌ زیندانا ئەبو غورێب گۆتێ‌ تارق ل دەف مە نینە .
تارق زاویتەی گۆتژی: ئەو شوفێرێ‌ رێڤەبەرێ‌ ئەمنا دهۆك(وەعد زاویتەی) چو جاران ژبیر ناكەم و ئەوی گەلەك مرۆڤ قورتالدكرن و كوردەكێ‌ دلسوز بوو و مخابنی ڤە هەر ئەمنێ‌ كوشت ل بەرۆشكێ‌، دیسا ئەو ئەشكەنجەدانا من ل (ئورمیێ‌) دیتی چو جاران ژ بیرناكەم و هەتا نوكە مللێت من تێشن و هێشتا كارتێكرنا وی دەمی یە.

زنار تۆڤی

سترانبێژ(عائیشە یلدز) كو خەلكا چەلێ یە ل باكوورێ‌ كوردستانێ‌ و هەتا نوكە چەندین جاران بۆ گێڕانا ئاهەنگان سەرەدانا باژێرێ‌ دهۆكێ‌ كریە، د دیدارەكێ‌ دا بۆ ۆژناما ئەڤرۆ دیار كركو ئەڤە سێ‌ سالن ئەو سترانان دبێژیت و هەتا نوكە چەندین سترانێن سینگل بەلاڤ كرینە، هەروەسا ل دەستپێكێ‌ هەلبەستڤان جان كورد كێشانی هندەك هەلبەست داینێ‌ و هەتا نوكە دو سترانێن دوقۆلی گۆتینە.
ناڤهاتیێ‌ گۆت: من كلیپا خوە یا ئێكێ‌ ل سالا 2021 ێ‌ ب ناڤێ‌ ( كا ئەڤینا راست و دروست) چێكریە، ژپەیڤ و ئاوازێن شیمال فەیسەلی بوو، كلیپا دویێ‌ ل سالا 2022 ێ‌، ب ناڤێ‌ ( ئاڤیڤان) چێكریە، ژپەیڤێن سالح رۆژبەیانی و ئاوازا وێ‌ ژی یا شیمال فەیسەلی بوویە، نوكە ژی كار د تۆماركرنا هندەك سترانان دا دكەم، ئێك ژ وان ب ناڤێ‌ ( تە ئەز هێلام) پەیڤ و ئاواز یێن جان كورد كێشانی نە، هەروەسا سترانا ( ژبیر ناكەم دێم و رییا)، پەیڤ و ئاواز یێن جان كورد كێشانی بوو، سترانا ( كەلا غەریبییێ‌)، پەیڤ و ئاواز شیمال فەیسەل و عائیشە یلدز.
ل دووماهیێ‌ گۆت: ل دەستپێكێ‌ هەڤژینێ‌ من رێگربوو كو ئەز سترانان بێژم، پاشی پشتەڤانی ل كارێ‌ من كر و مالباتا من ژی هاریكاریا من كر، ئەز حەز ژ دەنگێ‌ سترانبێژێن نەمر، شاكرۆیی و حەسەن جزیری و تەحسین تاهایی و ئەیاز یوسفی و ئەردەوان زاخۆیی و مریەم خانێ‌ و عەیشە شانێ‌ دكەم، هەروەسا نوكە ئەز كار د تۆماركرنا ئەلبۆما خۆ یا ئێكێ‌ دا دكەم و من ل بەرە سالا بهێت بەلاڤ بكەم.

سەباح زوهێر:

سترانبێژ (ئاهەنگ حەمید) كو ژ باژێرێ‌ دهۆكێ‌ یە، د دیدارەكێ‌ دا بۆ رۆژناما ئەڤرۆ گۆت: نوكە ئەز مژوولی چێكرنا كلیپا خوە یا ئێكێ‌ مە، ژ پەیڤێن (دیار قەسیم) ە، نوكە ل قوناغا مۆنتاژكرنێ‌ یە، ژلایێ‌ (وار پرۆدەكشن) ژلایێ‌ دەرهێنەر (مازن ئێسیان) دهێتە چێكرن.
ئاهەنگی گۆت: ئەڤە بەرهەمێ‌ منێ‌ دویێ‌ یە لێ‌ ب شێوازێ‌ كلیپ ئێكەمین بەرهەمە و نوكە گەهشتی یە قوناغێن دووماهیێ‌ و ل دەمەكێ‌ نێزیك و رەنگە بەری جەژنێ‌ بهێتە بەلاڤكرن.

كاوین جیهاد تەحلاڤی:

هونەرمەند و ئاوازدانەرێ‌ بەرنیاس (هەلكەوت زاهر) پرۆژەیەكێ‌ هونەری ل هەموو پارێزگەهێن هەرێما كوردستانێ‌ هەیە، ئەو ژی گێڕانا چەند ئاهەنگانە بۆ سترانبێژ و مۆزیكژەنێن گەنج و بۆ وێ‌ مەرەمێ‌ ل حەفتیا بهێت دێ‌ هێتە پارێزگەها دهۆكێ‌.
هەلكەوتی بۆ رۆژناما ئەڤرۆ گۆت: ل ئێكشەمبیا بهێت ئەز دێ‌ هێمە دهۆكێ‌ و گرنگیا ڤی پرۆژەی ئەوە حەزژێكەر و گوهدارێن هونەرێ‌ كوردی ل چو جهان ژ گوهدانا ڤان گەنجان دبێ‌ بەهر نەبن، ژبەركو مە سترانبێژ گەنج یێن دەنگخۆش هەنە، ژوانا (میرا عەلی، ئیلەیدا، عەدنان تەیمور، بەشیر ئازار) و هونەرمەندا لوبنانی (حەسنا مەتەر) ژی دێ‌ دوێ‌ ئاهەنگێ‌ دا پشكدار بیت، هەروەسا ژبلی وان ئاهەنگان، بەری چەند رۆژان مە سترانەك ب ناڤێ‌ (پێكڤە ژیان) بۆ هونەرمەند عەبدولقەهار زاخۆیی تۆماركر، ئەو ستران ژ پەیڤێن ئەدیب چەلكی و ئاوازا من بوو، هەروەسا مە چەند كلیپێن دی چێكرن و نوكە زێدەتر كاری ل سەر وێ‌ چەندێ‌ دكەم هندەك دەنگێن نوو دیاركەم.