ئه‌ڤرۆ،

د داخویانیه‌كێ‌ دا چێگرێ‌ سه‌رۆكێ‌ یانه‌یا سێمێل یا وه‌رزشی دیار كر تیما وان یا ته‌پا پێی به‌رده‌وامه‌ ل سه‌ر به‌رهه‌ڤیێن خوه‌ بۆ یاریێن بهێت یێن خولا پلا ئێكا كوردستانێ‌ و ژ ئارمانجا خوه‌ یا ده‌ربازبوونێ‌ بێ‌ هیڤی نه‌بووینه‌.

زێده‌تر په‌روه‌ر حسێن بۆ رۆژناما ئه‌ڤرۆ گۆت: ژبۆ باشترین به‌رهه‌ڤی بۆ یاریێن مایی و مفا وه‌رگرتن ژ راوه‌ستانا خولێ‌ كادرێ‌ راهێنانێ‌ و كارگێریا یانێ‌ به‌رده‌وامن ل سه‌ر دووڤچوونا تیمێ‌ و چاره‌سه‌ركرنا كێماسیان پێخه‌مه‌ت بجه ئینانا ئارمانجا خوه‌ ئه‌و ژی ده‌ربازبوون بۆ پلا نایابا كوردستانێ‌ و ئه‌م ژ ڤێ‌ ئارمانجێ‌ بێ‌ هیڤی نه‌بووینه‌ و رژدین هه‌تا دووماهی یاری ب تنێ‌ بۆ سێ‌ خالان و سه‌ركه‌فتنێ‌ بكه‌ین، ژبه‌ركو دناڤبه‌را مه‌ و تیما سه‌رێ‌ لیستێ‌ چار خالن و یاریه‌كا مه‌ كێمتره‌، مه‌ حه‌فت یاری ئه‌نجامداینه‌ و تیما هه‌ولێر هه‌شت یاری كرینه‌، ئانكو هێشتا ده‌لیڤا هه‌ڤڕكیێ‌ بۆ سه‌رێ‌ لیستێ‌ یا به‌رده‌سته‌ و دڤێت كاره‌كێ‌ زێده‌تر و زه‌حمه‌ته‌كا مه‌زن ببه‌ین پێخه‌مه‌ت هیڤیێن خوه‌ و جه‌ماوه‌رێ‌ یانه‌یا سێمێلێ‌.

ژلایه‌كێ‌ دووڤه‌ ناڤهاتی دیاركر ئه‌وان گرێبه‌ستا دو یاریزانێن گه‌نج ئیمزاكرینه‌ ئه‌و ژی نزار سه‌عید ژ یانه‌یا زانكویا جیهان و ماهر میكائیل یێ‌ یانه‌یا گاره‌ و دیسان د نوكه‌ دا دو پیشه‌كار لبن تاقیكرنێ‌ نه‌ ژبۆ ژێگرتنا ئێك ژوان و هه‌روه‌سان هێرشبه‌ره‌كێ‌ دی ژی ل باژێرێ‌ به‌غدا ئه‌م چاڤه‌رێ‌ به‌رسڤا وی نه‌ ئه‌ڤه‌ هه‌موو پێخه‌مه‌ت بشێن كێماسیێن تیمێ‌ چاره‌سه‌ر بكه‌ین و گۆت: سۆپاسیا كورێن باژێرێ‌ سێمێلێ‌ ئه‌میر حه‌جی عه‌بدی و بارزان عه‌بدولره‌حمان كو دو پشته‌ڤانێن دێرینێن یانێ‌ نه‌ پشته‌ڤانیا خوه‌ یا دارایی بۆ مه‌ دیاركرینه‌ و هیڤییا جهێن په‌یوه‌ندیدار ژی هاریكاریا یانێ‌ بكه‌ن.

ئه‌ڤرۆ، بیاف مه‌جید:

د داخویانیه‌كێ‌ دا راهێنه‌را تیما فۆتسالا یانه‌یا ئافره‌تێن دهۆكێ‌ بۆ رۆژنامه‌یا ئه‌ڤرۆ دیاركر پاشخستنا خۆلا ئیراقێ‌ بوو ده‌مێ‌ حه‌فتیه‌كێ‌ هه‌تا راده‌یه‌كی مفا گه‌هانده‌ وان ژبه‌ر كو چو به‌رهه‌ڤیێن باش نه‌بوون.

زێده‌تر زینه‌ جه‌میل گوت: هه‌رچه‌نده‌ هه‌تا راده‌یه‌كی ژ ئاستێ‌ یاریزانێن خوه‌ رازیمه‌ لێ‌ ئاریشا مه‌ بتنێ‌ نه‌ به‌رهه‌ڤیا باش یا یاریزانان ژلایێ‌ راهێنانان ڤه‌، چونكو بتنێ‌ 10 رۆژه‌ ده‌ست ب راهێنانان كریه‌، لێ‌ بۆ باشترین به‌رهه‌ڤی مه‌ گرێبه‌ستا دو پیشه‌كارێن ئیرانی و ئێكا عه‌ره‌ب ئیمزاكریه‌ كو ب هه‌بوونا ئه‌وان باوه‌رم دێ‌ شێن ئه‌نجامه‌كێ‌ باش بوو ناڤێ‌ پارێزگه‌ها دهۆكێ‌ توماركه‌ین و ئارمانجا مه‌ هژماره‌كا ب هێز بین د خۆلا ئیراقێ‌ دا.

هه‌روه‌سان ناهاتی گوت: وه‌رزێ‌ ئه‌ڤ ساله‌ یێ‌ خۆلا ئیراقێ‌ زوربه‌یا یانه‌یان دێ‌ ئێك ئاست بن ژبه‌ر كو یاریزانێن باش یێن خولێ‌ به‌ر ب خولا سعۆدیێ‌ چووینه‌ و ئه‌ڤچه‌نده‌ ژی هه‌تا راده‌یه‌كی دێ‌ كارتێكرنێ‌ ل ئاستێ‌ هونه‌ری یێ‌ پرانیا تیمێن پشكدار كه‌ن ژبه‌ركو نه‌بوونا پێن هه‌تا شه‌ش ستێرێن ب هێز دخولێ‌ دا.

هه‌ژی گوتنێ‌ یه‌ یانه‌یا ئافره‌تێن دهۆكێ‌ وه‌كو نوونه‌را ئێكانه‌ یا پارێزگه‌هێ‌ یه‌ دخولا فوتسالا ئیراقێ‌ دا و بڕیاره‌ ل ئه‌ینیا بهێت هه‌ڤڕكیێن خولێ‌ بهێنه‌ كرن و ئافره‌تێن دهۆكێ‌ ل هۆلا گرتیا چالاكیێن وه‌رزشی دێ‌ مێڤانداریا ئه‌مانه‌ت به‌غدا كه‌ت.

ئه‌ڤرۆ،

د داخویانیه‌كێ‌ دا رێڤه‌به‌رێ‌ چالاكیێن وه‌رزشی و دیده‌ڤانی ل په‌روه‌رده‌یا گشتی یا پارێزگه‌ها دهۆكێ‌ دیاركر بریاره‌ ئه‌ڤرۆ ب پشكداریا نه‌ه په‌روه‌رده‌یێن پارێزگه‌ها دهۆكێ‌ هه‌ڤڕكیێن قاره‌مانیا فۆتسالێ‌ ل سه‌ر ئاستێ‌ كچان ل هۆلا گرتیا په‌روه‌ردا دهۆك رۆژئاڤا بهێته‌ ئه‌نجامدان

زێده‌تر ئیحسان حه‌سه‌ن زوبێر بۆ رۆژناما ئه‌ڤرۆ گۆت: ل دووڤ نه‌خشێ‌ سالانه‌ یێ‌ وه‌زاره‌تا په‌روه‌ردا هه‌رێما كوردستانێ‌ و ب هه‌ڤكاری ل گه‌ل رێڤه‌به‌ریا گشتی یا چالاكیێن وه‌رزشی و دیده‌ڤانی ئه‌ڤرۆ ب پشكداریا نه‌ه په‌روه‌رده‌یێن پارێزگه‌ها دهۆكێ‌ بۆ قۆناغا بنه‌رت ل سه‌ر ئاستێ‌ كچان ئه‌و ژی دهۆك رۆژهه‌لات، دهۆك رۆژئاڤا، سێمێل، شێخان، شنگال، ئاكرێ‌، ئامێدیێ‌، به‌رده‌ره‌ش و تلكێف ئه‌وا دێ‌ هه‌ڤڕكیێن وان ب شێوێ‌ كه‌فتنا دوجاركی بیت و یاریا ڤه‌كرنا قاره‌مانیێ‌ ئه‌ڤرۆ ل ده‌مژمێر ده‌هێ‌ سپێدی دناڤبه‌را هه‌ردو هه‌لبژارتیێن په‌روه‌ردا دهۆك رۆژهه‌لات و په‌روه‌ردا شێخان هێته‌ كرن.

هه‌روه‌سان ناڤهاتی گۆت: پشتی ب دووماهی هاتنا قاره‌مانیێ‌ ژلایێ‌ لژنه‌كا تایبه‌تمه‌ند دێ‌ ژێگرتنا باشترین یاریزانێن قاره‌مانیێ‌ بۆ هه‌لبژارتیێ‌ په‌روه‌رده‌یا گشتی یا پارێزگه‌ها دهۆكێ‌ هێنه‌ داخوازكرن پێخه‌مه‌ت به‌رهه‌ڤی بۆ قاره‌مانیا هه‌رێما كوردستانێ‌ ل سه‌ر ئاستێ‌ په‌روه‌رده‌یان.

ل ڤێ‌ دووماهیێ‌ د ناڤ یاریگه‌هێن ته‌پا پێی دا ل هه‌رێما كوردستانێ‌ رێژه‌یا تۆندۆتیژیێ‌ به‌ر ب زێده‌بوونێ‌ چوویه‌، ئه‌وا بوویه‌ ئه‌گه‌ر دادڤانێن یاریان ژی ڕه‌دكرن یاریا بڕێڤه‌ببه‌ن ژبه‌ركو تووشی هێرش و تۆندۆتیژیێ‌ بووینه‌ ژلایێ‌ چه‌ند ژ یاریزانان یان هنده‌ك پشته‌ڤانێن تیمێن وه‌رزشی كو بوو ئه‌گه‌ر خول بهێته‌ راوه‌ستاندن هه‌تا ئه‌ڤ دیارده‌یا خراب نه‌مینیت.

پێنه‌ڤێت مروڤ كه‌سه‌كێ‌ چڤاكی یه‌ كو ئه‌و دناڤ كۆمه‌لگه‌هێ‌ دا دژیت و لدووڤ كاودانێن رۆژانه‌ دژیت و به‌رده‌وامیا وی ب دووماهی ناهێت هه‌كه‌ پشكداریێ‌ ل گه‌ل چالاكیێن جۆدا نه‌كه‌ت كو ئه‌ڤ پشكداریه‌ دبیته‌ ده‌ركه‌ڤتنا چه‌ندین په‌یوه‌ندیێن جوره‌ و جور ل گه‌ل كه‌سانێن دی چو ل گه‌ل خێزانێ‌ یان ژی ناسیاران یان ژی هه‌ڤالێن خوه‌ یێن كاری، دبیت هنده‌ك جاران ببیته‌ په‌یوه‌ندیێن دژاتی به‌رامبه‌ری خوه‌ هه‌تا ژ حه‌زێن خوه‌ تێربیت.

شێوازێ‌ كۆمه‌لگه‌هان ژی دبیت ژێك جوودابن ژ لایه‌نێ‌ رێكخستنێ‌ و چاوانیا كۆنترۆلكرنا ره‌فتارێ‌ پێخه‌مه‌ت راوه‌ستاندنا ئه‌وێ‌ دژاتیێ‌ كو دهێته‌ هژمارتن ئێك ژ شێوازێ‌ سه‌ره‌ده‌ریا نه‌ خواستی، له‌وما كۆمه‌لگه‌ه دشێت ئه‌ندامێن خوه‌ ب هه‌موو ئه‌گه‌ران و پێشبینیا بهێز بیخیت وه‌كو گیانێ‌ دیموكراتی یان گیانێ‌ بنده‌ستیێ‌، كه‌سانێن دی قه‌بوولبكه‌ت یان دژمناتیێ‌ دژی وان، گیانێ‌ تێگه‌هشتنێ‌ یان گیانێ‌ نه‌ قه‌بوولكرنێ‌، بزاڤێن ئاڤاكرنێ‌ یان بزاڤێن خرابكرنێ‌، ئه‌ڤچه‌نده‌ ژی د وی ده‌می دا تاوانبارێن جودا په‌یدا دكه‌ت ژ ره‌فتارێن خوه‌ كو ل دووڤ یاسایی سزایێن خوه‌ هه‌نه‌.

سه‌رباری وه‌رزش ده‌ستپێكریه‌ وه‌كو ئامرازه‌ك بۆ بهێنڤه‌دان و نێزكبوون دناڤبه‌را كه‌سان دا چ ل سه‌ر ئاستێ‌ نافخۆ یان جیهانی، لێ‌ دیاردا تۆندۆتیژیا یاریگه‌هان بوویه‌ خاله‌كا كرێت ل سه‌ر پاقژیا چلۆبه‌رگێن وه‌رزشی و دبیته‌ ئه‌گه‌ر یاری بهێته‌ گوهۆڕین بۆ تۆندۆتیژی و ئێشاندن و رێكه‌ك بۆ تێكدانا مولكێ‌ گشتی و هنده‌ك جاران ژی گیان ژ ده‌ستدانێ‌.

هه‌ژی گۆتنیه‌ دیاردا تۆتندۆتیژیا یاریگه‌ها ل سه‌ر ئاستێ‌ جیهانێ‌ یا كه‌ڤنه‌، ل ئه‌مریكا باشۆر 630 مروڤان گیانێ‌ خوه‌ ژ ده‌ستدان و سه‌ده‌هان بریندار بوون د یاریا دناڤبه‌را هه‌لبژارتیێ‌ ئه‌رجه‌نتین و پیرۆ د ڤاڤارتنێن ئۆلمپیادا تۆكیۆ 1964ێ‌ پشتی دادڤانێ‌ یاریێ‌ گۆلا هه‌لبژارتیێ‌ پیرو ب بۆهانا ئۆڤسایدێ‌ نه‌ هژمارتی.

هه‌روه‌سان ل یاریگه‌ها هێسل سالا 1985 دهێته‌ هژمارتن مه‌زنترین روودانا تۆندوتیژیێ‌ د دیرۆكێ‌ دا ئه‌وا جیهان هه‌موو هه‌ژاندی كو بوویه‌ ده‌ستپێك هنده‌ك یاسایا تۆند هه‌مبه‌ری تێكده‌ران و زێره‌ڤانی ل یاریگه‌ها زێده‌تر لێبكه‌ن، دڤێ‌ روودانێ‌ دا 93 پشته‌ڤانێن یانا پۆڤانتۆس یا ئیتالی هاتنه‌ كۆشتن پشتی هێرشێن هنده‌ك ژ پشته‌ڤانێن یانا لیڤه‌رپۆل یا ئنگلته‌رایێ‌ كو بوو ئه‌گه‌ر یانه‌یێن ئنگلته‌را بۆ ماوێ‌ پێنچ سالان ژ چالاكیێن ئۆرۆپا بهێنه‌ دوورخستن.

ل دووڤ گوهۆڕینێن دناڤ چڤاكێ‌ كوردی دا په‌یدا دبیت هه‌ر ژ سه‌رهلدانا سالا 1991ێ‌ د هه‌موو ته‌خێن ژیانێ‌ و ئه‌وا هه‌رێما كوردستانا ئیراقێ‌ ب ده‌ستخوه‌ڤه‌ ئینایی ژ پێشكه‌فتنا د بۆرێ‌ وه‌رزشێ‌ و ده‌زگه‌هێن وه‌رزشی و به‌رفره‌هبوون و زێده‌بوونا یانه‌ و تیمێن وه‌رزشی كو بوو ئه‌گه‌رچالاكیێن وه‌رزشی رێژه‌كا باشتر بیت دیسان بوو ئه‌گه‌ر كارتیكرنا خوه‌ ل سه‌ر كه‌س و چڤاكێ‌ ب شێوه‌كێ‌ گشتی، لێ‌ ل گه‌ل هه‌بوونا چالاكیان و هه‌ڤڕكیێن وه‌رزشی هنده‌ك دیاردێن تۆندۆتیژیێ‌ په‌یدا دبن چ ژلایێ‌ یاریزانان، یان كارگێریان یان ژی جه‌ماوه‌رێ‌ پشته‌ڤانیا تیم و یانه‌یێن وه‌رزشی دكه‌ن، له‌وما ژبه‌ر ڤێ‌ یه‌كێ‌ یا پێدڤی یه‌ لێگه‌ریانا ئاریشه‌یێن ئه‌وان گه‌نجان بكه‌ین ئه‌وێن كارێن تۆندۆتیژیێ‌ د ناڤ یاریگه‌هێن وه‌رزشی دا دكه‌ن، ژبه‌ركو ئه‌ڤ ره‌فتارا تۆندۆتیژیێ‌ دیارده‌كا نه‌رێنی یه‌ دبیت چه‌ندین ئاریشه‌ ژێ‌ په‌یدابن چ ل سه‌ر ئاستێ‌ سیكۆلۆجیا كه‌سان یان ژی ل سه‌ر ئاستێ‌ چڤاكی تایبه‌ت جوره‌كێ‌ گه‌نجان دبنه‌ نه‌وه‌یه‌ك بۆ نه‌ته‌وه‌ و وه‌لاتان د بۆرینا سه‌رده‌مان، تشته‌كێ‌ ئاساییه‌ ل دووڤ ئه‌وێ‌ گرنگیێ‌ و چاڤدانێ‌ بشێت وه‌به‌رهێنانێ‌ ب شێوه‌كێ‌ دروست دا بكه‌ت، ده‌زگه‌هێن چڤاكی ب هه‌موو جور و شێوازێن خوه‌ ڤه‌ كار دكه‌ن ژبۆ به‌رهه‌ڤكرنا به‌رنامه‌ك و چالاك و پلانێن دروست ژبۆ كارتیكرنا ئه‌رێنی و باش ل سه‌ر گه‌نجی بكه‌ت.

ل دووماهیێ‌ ئه‌م شێن بێژین كو گرنگیا مه‌زن ژلایێ‌ ڤه‌كۆله‌رێن تایبه‌تمه‌ند ژلایێ‌ كۆمه‌كا ره‌وشه‌نبیریێن جۆدا دووڤچوونا ره‌فتارێن تۆندۆتیژیێ‌ دناڤ یاریگه‌هان دا دكه‌ن، ئه‌ڤه‌ ژی وێ‌ چه‌ندێ‌ دیار دكه‌ت كو گرنگیا ڤی بابه‌تی و كارتیكرنا وێ‌ ل سه‌ر ژیانا كه‌سایه‌تی یا كه‌سان و ژیانا چڤاكی، تۆندۆتیژی دۆزه‌كه‌ دبیته‌ ئه‌گه‌ر زیانا ئێكسه‌ر دگه‌هینته‌ كه‌سی و چڤاكی برێیا تێكدانا مولكێ‌ گشتی و یێن تایبه‌ت وه‌كو ترۆمبێل و جهێن بازاركرنێ‌ و هه‌تا.

ژبه‌ر ڤێ‌ چه‌ندێ‌ دبینن یا پێدڤی یه‌ گرنگیه‌كا تایبه‌ت ل سه‌ر ئه‌ڤێ‌ ره‌فتارا نه‌رێنی بهێته‌ كرن ئه‌وا رۆژ بۆ رۆژێ‌ ل یاریگه‌هێن وه‌رزشی زێده‌تر دبیت و ئه‌ڤ دیارده‌ یا ژ هه‌ژیه‌ دووڤچوون و گه‌نگه‌شا زانستی ل سه‌ر راوه‌ستیێن ل دۆر ئه‌گه‌رێن وێ‌ و چاوانیا چاره‌سه‌ركرنا وێ‌ ژبه‌ركو دا نه‌بیته‌ ئه‌گه‌ر ژناڤبرنا ژێرخانه‌یا وه‌رزشی یان راوه‌ستاندنا قاره‌مانیان ژوانا خولێن ته‌پا پێی یان هه‌ر چالاكیه‌كا دی یا وه‌رزشی بیت.

ئه‌ڤرۆ، قه‌یس وه‌یس

ل دووڤ ده‌نگۆباسێن به‌لاڤبووی ئێكه‌تیا ته‌پا پیێ‌ یا ئیراقێ‌ هزر د مێڤانداریكرنا قاره‌مانیا عه‌ره‌بی كۆپا 2025ێ‌ و ئاسیا 2027یان 2031ێ‌ كریه‌ و پێنچ باژێر ده‌ست نیشانكرینه‌ ژوانا پارێزگه‌ها دهۆكێ‌ یه‌ و مه‌ره‌ما وان ژی راكرنا فه‌رمی یا دوورپێچا وه‌رزشی ل سه‌ر یاریگه‌هێن وێ‌.

ژێده‌رێن نێزیك ژ ئێكه‌تیا ته‌پا پیێ‌ یا ناڤهاتی دیاركریه‌ پشتی داخویانیێن سه‌رۆكێ‌ ئێكه‌تیا فیفا جیانی ئینڤانتینۆ ل سه‌ر ره‌وشا ئیراقێ‌ و مێڤانداریكرنا قاره‌مانیا كه‌نداڤی25 ل باژێرێ‌ به‌سرا و به‌رهه‌ڤبوونا وی د ناڤ یاریگه‌هێ‌ دا پشتگه‌رمی بۆ ئێكه‌تیا ئیراقێ‌ و جه‌ماوه‌رێ‌ وه‌رزشی په‌یدابوویه‌ كو د نێزك دا دبیت دوورپێچا وه‌رزشی یا فیفایێ‌ ل سه‌ر یاریگه‌هێن ئیراقێ‌ رابیت و دووباره‌ بشێت مێڤاندارییا هه‌ر هه‌لبژارتی یان یانه‌كا ده‌رڤه‌ بكه‌ت و ئه‌ڤچه‌نده‌ وه‌كریه‌ ئێكه‌تیا ته‌پا پێی یا ئیراقێ‌ ب رژدی هزر كریه‌ پشتی ب دووماهی هاتنا كۆپا كه‌نداڤی یا نوكه‌ ل به‌سرا نڤێساره‌كا فه‌رمی ئاراسته‌یی ئێكه‌تیا عه‌ره‌بی یا ته‌پا پێی بكه‌ت ژبۆ مێڤانداریا كۆپا عه‌ره‌بی 2025 ل سه‌ر ئاستێ‌ هه‌لبژارتیان.

هه‌مان ژێده‌ری دیاركر كو هه‌ر ئێك ژ پارێزگه‌هێن دهۆك، هه‌ولێر، به‌غدا، به‌سرا و كه‌ربلا ده‌ستنیشان كرینه‌ وه‌كو باده‌كا به‌رهه‌ڤكری بۆ مێڤانداریا قاره‌مانیێ‌ و دوور نینه‌ هه‌كه‌ ئه‌ڤ داخوازیه‌ ب جه نه‌هات به‌ر ب ئێكه‌تیا ئاسیا بچیت و داخوازا مێڤانداریا كۆپا ئاسیا 2027 یا 2031ێ‌ بكه‌ت و دێ‌ رژدی كاركه‌ن هه‌تا بشێن بجهبینن.