ئامێدیێ، مه‌حمود نهێلی:

ب هه‌لكه‌فتا رۆژا جیهانی یا خودان پێدڤیێن تایبه‌ت و ب به‌رهه‌ڤبوونا هه‌ژماره‌كا به‌رپرسێن  دام و ده‌زگه‌هێن میری و حزبی و مامۆستا و هه‌ژماره‌كا مێهڤان و سه‌میانێن قوتابیان، د رێوره‌سمه‌كی دا چه‌ندین چالاكیێن جودا جودا هاتنه‌ ئه‌نجام دان.

د رێوره‌سمان دا كو ژ لایێ رێڤه‌به‌ریا په‌روه‌دا ئامێدیێ ڤه‌ هاتبوو رێكخستن وه‌جیهـ سه‌عید، رێڤه‌به‌رێ په‌روه‌ردا ئامێدیێ  په‌یڤه‌ك پێشكێش كر و گۆت: “رۆژا جیهانی یا خودان پێدڤیێن تایبه‌ت رۆژه‌كا گرنگه‌، ئه‌م ڤێ‌ رۆژێ‌ ل هه‌موو  قوتابیێن خودان پێدڤیێن تایبه‌ت پیرۆز دكه‌ین، دیسا  ده‌ست خوه‌شیێ ل هه‌موو مامۆستایێن په‌روه‌ردا تایبه‌ت دكه‌ین بۆ وێ خزمه‌تا پیرۆز و ژ هه‌ژی یا وان پێشكێش كری”.

د دووماهیا وێ‌ رێوره‌سمێ دا هه‌ژماره‌كا قوتابیێن خودان پێدڤیێن تایبه‌ت ژ لایێ رێڤه‌به‌ریا په‌روه‌ردا ئامێدیێ ڤه‌ هاتنه‌ خه‌لاتكرن.

ئه‌ڤرۆ:

به‌رپرسێ راگه‌هاندنا رێڤه‌به‌ریا گشتی یا كاروبارێن مینان ل دهۆكێ بۆ ئاژانسا خانی دیار كر، وان هه‌ژماره‌كا مین و ته‌قه‌مه‌نیان ل گوندێ ره‌شه‌ورێ یێ سه‌ر ب ناوچه‌داریا زاویته‌ ڤه‌ ژناڤبرن.

رێگر بێسفكی، به‌رپرسێ راگه‌هاندنا رێڤه‌به‌ریا گشتی یا كاروبارێن مینان ل پارێزگه‌ها دهۆكێ دیار ژی كر، دوهی تیما ژناڤبرنا میـن و تـه‌قـه‌مـه‌نـیان 238 پارچه‌یێن مین و ته‌قه‌مه‌نیان ل گوندێ ره‌شه‌ورێ یێ سه‌ر ب ناوچه‌داریا زاویته‌ ڤه‌ ژناڤبرن و گۆت: “ئه‌و مین و ته‌قه‌مه‌نی ل ده‌ڤه‌رێن جۆدا یێن پارێزگه‌ها دهۆكێ هاتبوونه‌ كۆم كرن”.

زاخۆ، دلۆڤان هالۆ:

گۆهدار شێخۆ، سه‌رپه‌رشتێ ئیدارا سه‌ربخوه‌ یا زاخۆ، ب مه‌ره‌ما خوه‌ به‌رهه‌ڤكرن ژ بۆ وه‌رزێ‌ زڤستانێ‌ و هه‌ر روودانه‌كا نه‌چاڤه‌رێكری، كۆمبوونه‌ك ل گه‌ل لژنا ئێمناهیا ئیدارا سه‌ربخوه‌ یا زاخۆ كر.

شڤان عه‌بدی، به‌رپڕسێ ڕاگه‌هاندنا ئیدارا سه‌ربخوه‌ یا زاخۆ بۆ ڕۆژناما ئه‌ڤرۆ دیار كر، د كۆمبوونێ دا به‌حس ل ئاماده‌كاریێن هاتنا وه‌رزێ زڤستانێ ل سنوورێ ئیدارا سه‌ربخوه‌ یا زاخۆ هاته‌ كرن، كو ئاماده‌كاریێن باش ژ بۆ هه‌ر ڕوودانه‌كا نه‌چاڤه‌ڕێكری و پاراستنا ئێمناهیا باژێڕی بهێنه‌ كرن.

به‌رپڕسێ ڕاگه‌هاندنا ئیدارا سه‌ربخوه‌ یا زاخۆ، ئاماژه‌ ب وێ چه‌ندێ ژی كر كو د كۆمبوونێ دا گۆهدار شێخۆی ته‌كه‌ز ل سه‌ر وێ چه‌ندێ كریه‌ كو هه‌ماهه‌نگیه‌كا باشتر د ناڤبه‌را ده‌زگه‌هێن حكومی ل ئیداره‌یا سه‌ربخوه‌ یا زاخۆ دا هه‌بیت دا بشێن هه‌ر زوو ئاریشه‌یان چاره‌سه‌ر بكه‌ین، دیسا بشێن باژێڕێ زاخۆ ژ هه‌موو ڕوویه‌كیڤه‌ پێش بێخن و ل دووماهیا كۆمبوونێ ژی، بۆچوون و پێشنیارێن هه‌موویان هاتنه‌ وه‌رگرتن.

ئامێدیێ‌، مه‌حمود نهێلی

هاڤێتنا گلیشی بۆ ره‌خێن رووبارێ‌ زێ‌ و سپنه‌ ل سه‌نته‌رێ‌ ناحیا دێره‌لۆك زێده‌باری تێكدانا سرۆشتێ‌ جانێ‌ ده‌ڤه‌رێ‌ و نه‌شرینكرنا دیمه‌نێن رووباری نه‌ و وه‌لاتی ژی دخازن راده‌یه‌ك بۆ ڤێ‌ دیاردێ‌ بهێته‌ دانانان و ئه‌و گلێشێ ل ره‌خێن ئاڤێ‌ ژی بهێنه‌ راكرن بۆ وێ‌ یه‌كێ‌ دیمه‌نێن سرۆشتی یێن رووباری جوانیا خوه‌ ژ ده‌ست نه‌ده‌ن.

ئێك ژ وه‌لاتیان ب ناڤێ‌ له‌زگین به‌رگاره‌ی ئاكنجیێ‌ ناحیا دێره‌لۆكێ‌ دبێژیت: هه‌ر چه‌نده‌ ئه‌ڤ گلێشه‌ یێ‌ به‌رمایكێن خرابكرنا خانیانه‌، لێ‌ مخابن راستی ئه‌ڤه‌ دیارده‌یه‌كا كرێته‌ ل ڤێ‌ ده‌ڤه‌رێ‌ دهێته‌ دیتن و گۆت: جهێ‌ گلێشی یێ‌ تایبه‌ت و ده‌ستنیشانكریه‌ و دڤێت وه‌لاتی ل ده‌مێ‌ هاڤێتنا گلێشی یان به‌رمایكێن خانیان ماده‌م هه‌ر ترۆمبێل ڤێ‌ هه‌یه‌، بلا ببه‌ته‌ جهێ‌ تایبه‌تێ‌ گلێشی.

دیار ژی كر، مخابن ئه‌ڤ دیاردا كرێته‌ ل ڤێ‌ ده‌ڤه‌رێ‌ ب تایبه‌تی ژی ره‌خێن رووباری به‌رچاڤ دكه‌ڤیت و جوانیا ڤان دیمه‌نێن رووباری و یێن سرۆشتێ‌ ده‌ڤه‌رێ‌ تێكدایه‌ و گۆت: ژبلێ‌ ڤێ‌ یه‌كێ‌ هند كه‌س هه‌نه‌ ده‌مێ‌ دچنه‌ گه‌ریانا یان سه‌یرانا گلێشێ‌ خوه‌ ناراكه‌ن و ڤێ‌ یه‌كێ‌ ژی گه‌له‌ك كارتێكرن ل سه‌ر سرۆشتێ‌ ده‌ڤه‌رێ‌ كریه‌.

هه‌روه‌سا گۆت: ڤێ‌ یه‌كێ‌ گه‌له‌ك خرابیێن خوه‌ هه‌نه‌، چونكه‌ ژبلی تێكدانا ژینگه‌هێ‌ ئه‌ڤ پاشمایێن گلێشی دمیننه‌ دناڤ سرۆشتی دا، هه‌روه‌سا د ئاڤێ‌ دا و چێدبیت ئه‌ڤ ئاڤه‌ ژێده‌رێ‌ سه‌ره‌كی یێ‌ ئاڤا ڤه‌خوارنێ‌ یا چه‌ندین جهان بیت.

به‌هدین تاها وه‌لاتیه‌كی دی یێ‌ ده‌ڤه‌رێ‌ بۆ رۆژناما ئه‌ڤرۆ دیار كر، هاڤێتنا گلێشی ل سه‌ر ره‌خێ ئاڤێ‌ ب تایبه‌تی ژی رووبارێ‌ زێ‌ هه‌روه‌سا سپنه‌ ژی دیارده‌یه‌كا گه‌له‌گا كرێته‌ و ئه‌و جهێن گلیشی لێ‌ دهاڤێژن گه‌له‌ك یێن به‌رچاڤن و هڤییا مه‌ ئه‌ڤ دیارده‌یه‌ نه‌مینت و گۆت: ئه‌ڤ گلێشه‌ هه‌موو ئه‌وه‌ یێ‌ به‌رمایكێن خانیان خه‌لك دهاڤێژیته‌ ره‌خێن ئاڤێ‌ و هه‌موو ژی ئه‌ون یێن ب سه‌دان سالان دمیننه‌ ناڤ سرۆشتی و ژ ناڤ ناچن.

عه‌بدولمه‌ناف ره‌شید سه‌رۆكێ‌ باژێرڤانیا دێره‌لۆك دیار كر، ئه‌ڤه‌ دیارده‌یه‌كا كه‌ڤنه‌ و به‌ری نوكه‌ ژی مه‌ خه‌لكێ‌ ده‌ڤه‌رێ‌ هایداركرینه‌ كو نابیت گلێشی ب هاڤێژنه‌ ره‌خێن ئاڤێ‌ و گۆت: هه‌ر بۆ رێگرتنێ‌ ژ ڤێ‌ دیاردێ‌ ل گه‌ل جهان مه‌ ره‌خێن ئاڤێ‌ تایبه‌ت ژی رووبارێ‌ زێ‌ سیمه‌ كریه‌، لێ‌ ل سه‌ر ڤێ‌ چه‌ندێ‌ را هنده‌ك كه‌س هه‌نه‌ ب شه‌ڤێ‌ ڤان به‌رمایكان دبه‌نه‌ وی جهی و دهاڤێژن و ته‌كه‌ست كر، هه‌ر كه‌سه‌كێ‌ ئه‌و ببینن كو ب ئه‌نجامدانا ڤی كاری رادبن و گلێشی یان به‌رماییكێن خرابكرنا خانیا دهاڤێژنه‌ به‌ر ره‌خێن ئاڤێ‌، ئه‌و دێ‌ پێرابوونێن یاسایی ل گه‌ل وان وه‌رگرن.