هه‌ولێر، قائید میرۆ

به‌رپرسه‌كێ ده‌زگه‌هێ هه‌لبژارتنێن پارتی ئاشكراكر، دناڤا هه‌موو ئالیێن سیاسی تنێ پارتی دیموكراتی كوردستان دگه‌ل بڕێڤه‌چوونا پرۆسا هه‌لبژارتنان بوویه‌ د ده‌مێ وان یێ دیاریكری دا ، چونكه‌ پارتی هیچ ده‌مه‌كی ترس ژ ئه‌نجامدانا هه‌لبژارتنان نه‌بوویه‌ و دبێژیت، ئالیێن سیاسی به‌هانه‌ هه‌بوون و هه‌ر ئه‌وبوونه‌ ئه‌گه‌رێ پاشخستنا هه‌لبژارتنان ل هه‌رێما كوردستانێ و هیڤدارین ده‌مێ هه‌لبژارتنان بهێته‌ دیاركرن.

هاوار محه‌مه‌د، به‌رپرسێ قانوونی ل ده‌زگه‌هێ هه‌لبژارتنێن پارتی بۆ رۆژناما (ئه‌ڤرۆ) گوت” پارتی دگه‌ل پاشخستنا پرۆسا هه‌لبژارتنان ل هه‌رێما كوردستانێ نه‌بوویه‌، به‌لێ ژبلی پارتی ئالیێن دی به‌رهه‌ڤ نه‌بوون هه‌لبژارتن دده‌مێ خوه‌ یێ دیاركریدا بهێنه‌ ئه‌نجامدان، چونكه‌ ژڤانێ هه‌لبژارتنان ژئالیێ سه‌رۆكێ هه‌رێما كوردستانێ هاتبوو دیاركرن و حوكمه‌تا هه‌رێما كوردستانێ ژی هه‌موو به‌رهه‌ڤیه‌ك نیشادا بۆ رێڤه‌برنا هه‌لبژارتنان، مه‌ ژی وه‌كو ده‌زگه‌هێ هه‌لبژارتن یێ پارتی كار دكر بۆ به‌رهه‌ڤیێن هه‌لبژارتنان ل ١ی ئۆكتۆبه‌رێ، چونكه‌ پارتی به‌رده‌وام دگه‌ل ئه‌نجامدانا هه‌لبژارتنانه‌ و ترس ئه‌نجامدانا وان نینه‌، هه‌تا پارتی گه‌له‌ك بزاف دكرن هه‌لبژارتن نه‌هێته‌ پاشخستن، پارتی چه‌ندین داگیران ژی بۆ ئالیێن سیاسی كرن ب مه‌ره‌ما ئه‌نجامدانا پرۆسا هه‌لبژارتنێن هه‌رێما كوردستانێ”.

خویاكر ژی” لدۆر كاراكرنا كۆمسیۆنا سه‌ربخوه‌یا هه‌لبژارتنان ل هه‌رێمێ، پارتی به‌رهه‌ڤی نیشادا تنێ ئێك ئه‌ندام هه‌بیت، ئه‌ڤه‌ د ده‌مه‌كی دایه‌ ب گۆره‌ی رێژه‌یا كورسیێن پارتی پێدڤی بوو پارتی پشكا زێده‌تر وه‌ربگریت ل جڤاتا كۆمسیۆنێ، مخابن پتریا ئالیێن سیاسی به‌رهه‌ڤ نه‌بوون هه‌لبژارتن بهێنه‌ ئه‌نجامدان، هه‌ر جاره‌كێ به‌هانه‌یه‌ك زێده‌ دبوو، هه‌ر ئه‌و ئالی ژی ل په‌رله‌مانێ كوردستانێ دژی درێژكرنا ده‌مێ په‌رله‌مانی بوون، ئه‌ڤه‌ژی دچیته‌ د چارچۆڤه‌یێ موزایه‌دێن سیاسی، چونكه‌ ماده‌م ئه‌و رازینابن ب ئه‌نجامدانا هه‌لبژارتنان، بۆچی دژی درێژكرنا ده‌مێ خولا پێنجێ یا په‌رله‌مانی نه‌، هه‌ر ئه‌و ئالی بوونه‌ ئه‌گه‌ر هه‌لبژارتن نه‌هێنه‌ ئه‌نجامدان”.

زێده‌تر رۆهنكر” دناڤا هه‌موو ئالیێن سیاسی دا تنێ پارتیه‌ دگه‌ل ئه‌نجامدانا هه‌لبژارتنان و به‌رهه‌ڤی ژی هاتبوونه‌ كرن ژئالیێ پارتی ڤه‌ بۆ ئه‌نجامدانا هه‌لبژارتنان ل ده‌ستپێكا هه‌یڤا ئۆكتۆبه‌رێ، ژ به‌ر كو پارتی جه‌ماوه‌ر و ئه‌ندام و لایه‌نگرێن خوه‌ یێن هه‌ین و ل هه‌موو پرۆسه‌یێن هه‌لبژارتنان بۆ خه‌لكێ كوردستانێ و جیهانێ خویایه‌ پێگه‌هێ پارتی چه‌نده‌، لسه‌ر ڤی بنگه‌هێ جه‌ماوه‌ری، پارتی ناترسیت ژ هه‌لبژارتنان، هه‌م پرۆسه‌یه‌كا دیموكراسیا ئازاده‌ بۆ حوكمڕانیا هه‌رێما كوردستانێ وهه‌م ژی پێگه‌هێ پارتی یێ دیاره‌ وهه‌لبژارتنێن بۆری باشترین به‌لگه‌نه‌ لسه‌ر وێ چه‌ندێ كو هێشتا پارتی بهێزترین ئالیێن سیاسیه‌ ل هه‌رێما كوردستانێ و لسه‌ر ئاستێ ئیراقێ ژی ئێكه‌ ژ ئالیێن بهێز و كاریگه‌ر، له‌وڕا پارتی باوه‌ری ب پره‌نسیپێن دیموكراسیێ هه‌نه‌ و هیچ ده‌مه‌كی خوه‌ نه‌دایه‌ پاش ژ هه‌ر پرۆسه‌یه‌كا دیموكراتی، هه‌بوونا سه‌ركردایه‌تیا موكم و رێبه‌رایه‌تیا سه‌رۆك بارزانی ژی هێزه‌كادی دا دایه‌ پارتی، به‌لێ ده‌مێ هه‌موو ئالیێن سیاسی به‌رهه‌ڤنه‌بن بۆ ئه‌نجامدانا هه‌لبژارتنان پارتی ناخوازیت ب ئێكلایه‌نی بڕیارێ بده‌ت، ئالیێن سیاسی هه‌ر جار به‌هانه‌یه‌ك هه‌بوو و ئه‌ڤه‌ژی بۆ ئه‌گه‌ر هه‌لبژارتن گیرۆ ببن، ب نه‌چاری بڕیار هاته‌دان ده‌مێ په‌رله‌مانێ كوردستانێ بۆ دو وه‌رزێن دی بهێته‌ درێژكرن و نوكه‌ هیڤیدارین ئالیێن سیاسی بگه‌هنه‌ ئه‌نجامه‌كی و د ده‌مه‌كێ زوو دا بڕیار لسه‌ر ئه‌نجامدانا هه‌لبژارتنان بهێته‌دان”.

ئه‌ڤرۆ:

ئه‌نجوومه‌نێ نشتیمانی یێ كوردی ل سووریێ راگه‌هاند كو سێ سالن گرۆپێن چه‌كدارێن سه‌ر ب توركیا ل گرێسپی و سه‌رێكانیێ زۆرداریێ ل كوردان دكه‌ن و مافێن مرۆڤی دهێته‌ بنپێكرن، ژ به‌ر هندێ ژی دڤێت گرۆپێن سه‌ر ب توركیا ژ وان ده‌ڤه‌ران و ده‌ڤه‌رێن دی یێن رۆژئاڤایێ كوردستانێ ده‌ركه‌ڤن.

ئه‌نجوومه‌نێ نشتیمانی یێ كوردی ل سووریێ راگه‌هاند كو سێ سالن گرۆپێن چه‌كدارێن سه‌ر ب توركیا گرێسپی و سه‌رێكانیێ داگیر كرینه‌ و د سێ سالێن بۆری دا گه‌له‌ك زۆرداری ل كوردان هاتیه‌ كرن، ژ به‌ر هندێ ژی دڤێت جڤاكێ نێڤده‌وله‌تی ل هه‌مبه‌ر زۆرداریا وان گرۆپێن چه‌كدار بێده‌نگ نه‌مینیت، ده‌م یێ هاتی كو گرۆپێن چه‌كدار ژ هه‌موو ده‌ڤه‌رێن رۆژئاڤایێ كوردستانێ بهێنه‌ ده‌رخستن، چونكی هه‌تا گرۆپێن چه‌كدار ل ده‌ڤه‌رێن وه‌كو عه‌فرین، گرێسپی و سه‌رێكانیێ بمینن وه‌لاتیێن كورد نه‌شێن ڤه‌گه‌رنه‌ ڤه‌ سه‌ر مالێن خوه‌ و ژ به‌ر هندێ ژی ئالۆزی و قه‌یرانا نها ل سووریێ هه‌ی چاره‌سه‌ر نابیت و دێ دژارتر لێ هێت.

د داخۆیانیێ دا ئه‌و یه‌ك ژی هاتیه‌ دیار كرن كو رۆژانه‌ ل وان ده‌ڤه‌ران گرۆپێن چه‌كدار زۆرداریێ ل وه‌لاتیێن كورد دكه‌ن، رۆژانه‌ وه‌لاتیان دڕه‌ڤینن و هه‌تا نها چاره‌نڤیسێ گه‌له‌ك وه‌لاتیێن كورد ژی دیار نینه‌، ژ به‌ر هندێ ژی ده‌م یێ هاتی كو نه‌ته‌وه‌یێن ئێكگرتی، ئه‌مریكا، وه‌لاتێن ئێكه‌تیا ئۆرۆپا، رۆسیا و توركیا دووماهیێ ب ره‌وشا نها یا خراب ل وان ده‌ڤه‌ران بینن و گرنگه‌ د پێنگاڤا ئێكێ دا هه‌موو گرۆپێن چه‌كدار ژ عه‌فرینێ، گرێسپی و سه‌رێكانیێ بهێنه‌ ده‌رخستن، هه‌كه‌ ئه‌و یه‌ك نه‌هێته‌ كرن دێ ره‌وشا نها یا ئالۆز به‌رده‌وام بیت و ژ به‌ر زۆرداریا گرۆپێن چه‌كدار ژی رۆژانه‌ وه‌لاتیێن كورد باژێرێ خوه‌ چۆل دكه‌ن و به‌رێ خوه‌ دده‌نه‌ جهه‌كێ دی.

ئه‌و یه‌ك د ده‌مه‌كێ دایه‌ كو هه‌تا نها چه‌ندین جاران رێكخستنا مافێن مرۆڤی یا سه‌ر ب نه‌ته‌وه‌یێن ئێكگرتی داخواز ژ توركیا كریه‌ كو رێ بده‌ن دا لیژنێن وان سه‌ره‌دانا عه‌فرینێ، گرێسپی و سه‌رێكانیێ بكه‌ن دا ڤه‌كۆلینان ل دۆر بنپێكرنێن مافێن مرۆڤان بكه‌ن، لێ هه‌تا نها توركیا رێ نه‌دایه‌ كو لیژنێن سه‌ربخوه‌ یێن مافێن مرۆڤی سه‌ره‌دانا وان ده‌ڤه‌ران بكه‌ن.

چاڤدێرێن سیاسی ژی دیار دكه‌ن كو دڤێت هه‌ر دو جڤاتێن كوردی یێن رۆژئاڤایێ كوردستانێ ئێدی به‌ره‌یه‌كێ كوردی ل سووریێ ئاڤا بكه‌ن و پێكڤه‌ ده‌ست ب خه‌باته‌كا هه‌ڤپشك بكه‌ن، چونكی هه‌تا كورد ل رۆژئاڤایێ كوردستانێ نه‌بنه‌ ئێك دێ ره‌وشا نها یا خراب ژی هه‌ر یا به‌رده‌وام بیت، چونكی توركیا دڤێت هه‌موو رۆژئاڤایێ كوردستانێ داگیر بكه‌ت و هه‌كه‌ كورد ژی د ناڤا خوه‌ دا ئێكگرتی نه‌بن دێ مه‌ترسیێن گه‌له‌ك مه‌زن ل سه‌ر ده‌ڤه‌رێن دی یێن رۆژئاڤایێ كوردستانێ ژی دروست بن، ژ به‌ر هندێ ژ بلی ئێكگرتنێ چو رێیێن دی ل پێشیا كوردان ل سووریێ و رۆژئاڤایێ كوردستانێ نینن.