ب، سهرجان مهحمود:
عهلی باباجان سهرۆكێ پارتیا DEVA و جێگرێ بهرێ یێ سهرۆك وهزیرێن توركیا ل باژێرێ دێرسیمێ یێ باكورێ كوردستانێ راگههاند كو دهم یێ هاتی پرسا كوردی ل توركیا بهێته چارهسهركرن و دڤێت ب ئاشكرا بهحسێ ئالیهتێن چارهسهركرنا پرسا كوردی ل توركیا بهێتهكرن.
عهلی باباجان سهرۆكێ پارتا DEVA و جێگرێ بهرێ یێ سهرۆك وهزیرێن توركیا ل باژێرێ دێرسیم یێ باكورێ كوردستانێ د كۆمبوونهكا جهماوهری دا راگههاند كو توركیا ئامادهیه پرسا كوردی چارهسهر بكهت و دڤێت ب وێرهكی پرسا كوردی و پرسا عهلهویان ل توركیا بهێنه گهنگهشه كرن و گۆت: (پرسا كوردی و پرسا عهلهویان دو پرسێن گرنگ یێن توركیا نه و ل دووڤ هزرا مه ههكه سیاسهتمهدار ب وێرهكی دهركهڤنه مهیدانێ و گهنگهشه بكهن بێگۆمان دێ پرسا كوردی ب ساناهی هێته چارهسهركرن و بلا كهس نهبێژیت توركیا نها بۆ هندێ بهرههڤ نینه، گهلهك ئاشكرایه كو ههكه ب دروستی كار بهێته كرن توركیا نها پتر ژ ههر دهمهكێ یا بهرههڤه كو پرسا كوردی چارهسهر بكهت و د بهرنامێ مه دا یهك ژ كارێ سهرهكی چارهسهركرنا پرسا كوردی یه، چونكی ههتا پرسا كوردی ل توركیا نههێته چارهسهركرن دێ گهلهك پرسێن دی ژی هێنه پێشبهری مه، ڤێجا نها باشترین دهمه كو ئهم پێكڤه پرسا كوردی ل توركیا چارهسهر بكهین).
سهرۆكێ پارتا DEVA ههروهسا راگههاند كو زۆرداریهكا مهزن ل كوردان و عهلهویان هاتیه كرن و سیاسهتمهدارێن توركیا د چهندین سالێن بۆری دا كوردبوون و عهلهویبوون وهك خالێن رهش نیشا توركیا داینه لێ د راستی دا وهسا نینه بهلكو كورد و عهلهوی ل توركیا وهكو ههر نهتهوه و باوهریێن جودا ب رومهتن و جهێ رێزێ نه و گۆت: (دڤێت ئهم وهسا بكهین كو ههر وهلاتیهكێ كورد بشێت ب ئازادانه ل توركیا بژیت و د ههمان دهمی دا ئهم دێ ناڤهندێن باوهریا عهلهویان ژی وهك مزگهفتان قهبوول كهین كا چاوا هاریكاریێن دارایی بۆ مزگهفتان دهێته كرن دڤێت وهسا هاریكاریا ناڤهندێن عهلهویان ژی بهێته كرن، ئهم دێ دهست ب بزاڤهكا نوو كهین دا ل توركیا ئێدی ژ بهر بیروباوهریێن جودا زۆرداری ل كهسێ نههێته كرن).
د دووماهیا ئاخڤتنا خوه دا ژی عهلی باباجانی راگههاند كو د قۆناغا نها دا ل گهل پرسا كوردی و پرسا عهلهویان پرسێن دی یێن سهرهكی ژی ل توركیا پرسا وهكههڤیێ و دیموكراسیێ، مافێن مرۆڤی و بنپێكرنا قانوونانه و گۆت: (دهمێ ئهم پرسا وهكههڤیێ چارهسهر بكهین و ههموو وهلاتی ل ههمبهر دادگههێ وهكههڤ بن دێ گهلهك پرسێن توركیا ب سروشتی هێنه چارهسهركرن و دهمێ ئهم ژ دل خوه نێزیكی پرسێن توركیا بكهین دێ ههموو پرسێن توركیا هێنه چارهسهر كرن).
نيشاندان