هه‌ولێر، قائید میرۆ:

به‌رپرسه‌كێ وه‌زاره‌تا خواندنا بلند و ڤه‌كۆلینێن زانستی ئاشكرا كر، ژ به‌ر نه‌بوونا خواستا قوتابیان ل سه‌ر هه‌ژماره‌كا پشكێن زانكۆیان گوهۆڕین دێ هێنه‌ كرن و ئه‌و پشكێن خواست ل سه‌ر نه‌بیت دێ هێنه‌ گرتن.

عه‌بدولفه‌تاح عه‌بدولڕه‌زاق، بریكارێ وه‌زاره‌تا خواندنا بلند و ڤه‌كۆلینێن زانستی بۆ رۆژناما ئه‌ڤرۆ دیار كر، سالانه‌ هه‌ژماره‌كا زۆرا قوتابیێن ده‌رچوویێن پۆلا 12ێ ئاماده‌یی دخوازن ل زانكۆ و په‌یمانگه‌هان بهێنه‌ وه‌رگرتن و گۆت: “هه‌ژماره‌كا پشكان هه‌نه‌ ل زانكۆیێن هه‌رێما كوردستانێ خواست ل سه‌ر نینه‌ و قوتابی ناخوازن تێدا درێژیێ ب خواندنێ بده‌ن و بهێنه‌ وه‌رگرتن، له‌وڕا ژی نوكه‌ ئه‌م یێ ل قووناغا گوهۆڕینان و ئه‌و پشكێن خواست ل سه‌ر نه‌بیت دێ‌ هێنه‌ گرتن”.

عه‌بدولفه‌تاح عه‌بدولڕه‌زاق گۆتژی: “بڕیار هاتیه‌دان هه‌ژماره‌كا پشكێن نوو ل زانكۆیێن هه‌رێما كوردستانێ بهێنه‌ ڤه‌كرن، ئه‌و ژی زێده‌تر ئه‌و پشكن یێن ژ لایێ قوتابیان ڤه‌ خواست ل سه‌ر هه‌ی و پشتی ده‌رچوونێ ژی بۆ خوه‌ مفای ژێ‌ وه‌ردگرن، چونكو ئه‌گه‌ر قوتابی زانكۆیێ ب دوماهی بینیت و مفای ژ باوه‌رناما خوه‌ وه‌رنه‌گریت به‌رهه‌ڤ ژی نینه‌ بچیته‌ وان پشكێن زانكۆیێ

به‌رده‌ڕه‌ش، ره‌مه‌زان زه‌كه‌ریا:

حوكمه‌تا هه‌رێما كوردستانێ دێ هه‌ژماره‌كا پڕۆژه‌یێن خزمه‌تگوزاری ل سنوورێ ده‌ڤه‌رداریا به‌رده‌ڕه‌ش ئه‌نجام ده‌ت.

ئیسماعیل مسته‌فا، ده‌ڤه‌ردارێ به‌رده‌ڕه‌ش بۆ ئه‌ڤرۆ راگه‌هاند: ب بریارا مه‌سرور بارزانی، سه‌رۆكێ حوكمه‌تا هه‌رێما كوردستانێ، ب گوژمێ‌ 32 ملیار دیناران هه‌ژماره‌كا پڕۆژه‌یێن گرنگ و پێدڤی ل سنوورێ ده‌ڤه‌ردایا به‌رده‌ڕه‌ش و ناوچه‌داریێن رۆڤیا و كه‌له‌ك و داره‌توو دێ‌ هێنه‌ ئه‌نجامدان.

ناڤهاتی گۆت: “ده‌ڤه‌رداریا به‌رده‌ڕه‌ش دێ مفایه‌كێ مه‌زن ژ ڤان پڕۆژه‌یێن حوكمه‌تا هه‌رێما كوردستانێ بینیت، پڕۆژه‌ ژی ب دو قووناغان كه‌ڤتینه‌ د بیاڤێ‌ بجهئینانێ دا”.

خویا ژی كر، گوژمێ بۆ پڕۆژه‌یێن ده‌ڤه‌رداریا به‌رده‌ڕه‌ش هاتیه‌ مه‌زاختن، 32 ملیار دینارن و پڕۆژه‌یێن به‌رده‌ڕه‌ش ل سه‌ر سنوورێن ده‌ڤه‌رداریێ هاتینه‌ به‌لاڤكرن و د بیاڤێن ساخله‌می، په‌روه‌رده‌، رێك و خزمه‌تگوزاریێن گشتی دانه‌‌، دیسا چه‌ندین رێكێن ستراتیژی ل به‌رده‌ڕه‌ش دێ هێنه‌ درووستكرن دگه‌ل نه‌خۆشخانا ته‌نگاڤیان و چه‌ندین پڕۆژه‌یێن دی.

ئامێدیێ، مه‌حمود نهێلی:

هه‌ژماره‌كا نانپێژیێن دێره‌لۆكێ‌ ژ به‌ر گرانكرنا بهایێ گازێ گه‌فا دائێخستنا نانپێژیێن خوه‌ دكه‌ن و ل سه‌ر ڤێ یه‌كێ یاداشته‌ك دایه‌ رێڤه‌به‌ریا ناوچه‌داریێ.

نه‌دیار محه‌مه‌د تاهر، نوونه‌رێ نانپێژیێن دێره‌لۆكێ‌ بۆ رۆژناما ئه‌ڤرۆ دیار كر كو بڕیاره‌ك ژ لایێ ده‌ڤه‌رداریا ئامێدیێ ڤه‌ ده‌ركه‌فتیه‌، كو نابیت گازا سروشی یا دده‌نه‌ مالان بۆ نانپێژیان بهێته‌دان، ئه‌ڤ چه‌نده‌ ژی بۆ وان دبیته‌ بارگرانی وه‌كو نانپێژی و نه‌شێن لیترا گازا سروشتی ب 500 دیناران بكڕین و گۆت: “ئه‌و گازا ب سیسته‌می دهێت ل سه‌ر مه‌ گران رادوه‌ستیت و بهایێ كه‌لوپه‌لێن دی ژی، مینا: ئار و زه‌یت و هه‌ڤیرترش و هه‌موو كه‌ره‌ستێن دی یێن دبنه‌ نان یێ‌ گرانبووی و بوویه‌ سێ‌ قات، له‌و ئه‌م نه‌شێین ب ڤی شێوه‌ی كار بكه‌ین، بتنێ غاز مابوو، ئه‌و ژی گرانكرن و یا مالان ژی بۆ مه‌ ناهێته‌ دان ئه‌م نه‌شێن ب ڤی ره‌نگی كار بكه‌ین .

گۆتژی: “هه‌كه‌ ئاریشا مه‌ نه‌هێته‌ چاره‌سه‌ركرن، ئه‌م دێ نه‌چاڕ بین نانپێژیێن خوه‌ بگرین، له‌و ئه‌م هیڤیدارین چاره‌سه‌ریه‌ك بۆ ئاریشا مه‌ بهێته‌ دیتن، چونكو ئه‌ڤه‌ نه‌ دێ بیته‌ ئاریشا مه‌ بتنێ، ئه‌ڤه‌ ئاریشا هه‌موو خه‌لكێ ده‌ڤه‌رێ یه‌”.

زاخۆ، دلۆڤان هالۆ:

عه‌لی عوسمان، ئه‌فسه‌ر ل ڕێڤه‌به‌ریا ئاسایشا زاخۆ بۆ ڕۆژناما ئه‌ڤرۆ دیار كر كو ل سنوورێ ئیدارا سه‌ربخوه‌ یا زاخۆ سێ‌ بازرگانێن مادێن هۆشبه‌ر هاتنه‌ ده‌سته‌سه‌ر كرن، كو 100 كیلۆ گرامێن مادێن هۆشبه‌ر د گه‌ل دا بوون.

ناڤهاتی ئاماژه‌ ب وێ چه‌ندێ ژی كر، ڕێڤه‌به‌ریا ئاسایشا زاخۆ ب هه‌ڤكاری ل گه‌ل ئه‌نجوومه‌نێ ئاسایشا هه‌رێما كوردستانێ شیان ل سنوورێ ئیدارا سه‌ربخوه‌ یا زاخۆ وان هه‌رسێ‌ بازرگانێن مادێن هۆشبه‌ر ده‌سته‌سه‌ر بكه‌ن، ئه‌و ماددێن ل گه‌ل ژی ژ جۆرێن كریستال و هێروین بوون و گۆت: “دو ژ وان بازرگانێن مادێن هۆشبه‌ر یێن ناڤخوه‌یا هه‌رێمێ نه‌ و ئێك ژی یێ ژ ده‌رڤه‌ی هه‌رێما كوردستانێ یه‌”.