چێرۆكێن ئافره‌تێن د زیندانێن رژێما به‌عس دا
دهۆك، نه‌وزاد هلۆری:
ئه‌نجومه‌نێ ئافره‌تێن ده‌ورۆبه‌رێن دهۆك ب هه‌ڤكاری ل گه‌ل سكرتاریه‌تا ئێكه‌تیا ئافره‌تێن كوردستانێ 20 ئافره‌ت خه‌لات كرن كو ل
سه‌ر ده‌مێ رژێما به‌عس هاتینه زیندان كرن و شه‌ڤ و رۆژێن تاری بوراندینه.
غه‌ریبا سه‌بری، ئێك ژ وان ئافره‌تایه كو هاتیه خه‌لات كرن، بۆ ئه‌ڤرۆ گۆت: (ئه‌ز ل سالێن هه‌شتێیا ل گه‌ل هه‌شت ژ ئه‌ندامێن خێزانا خوه هاتمه گرتن و بۆ ده‌ما دوو سالان ژی د زیندانێ دا مه شه‌ڤ و رۆژێن نه‌خوش و ب ئازار و تاری بوراندن، ده‌مێ ئه‌ز هاتیمه گرتن یا ب دوو گیان بووم و ل زیندانێ من زارویه‌ك هه‌بوو).
غه‌ریبایێ زێده‌تر گۆت: (ئه‌ڤه چه‌ند سال بورین و هێشتا دل و ده‌روونێ مه ئارام نه‌بوینه، هنده‌ك ژ كه‌سوكارێن مه شه‌هید بوون و هنده‌ك ژی ل به‌ر لێبورینێ كه‌فتین، جهێ داخێ یه هه‌تا نوكه چو كه‌س و لایه‌نان چو تشت بو مه نه‌كریه).
نه‌زیفا عه‌بدولخالق، ئه‌و ژی ئافره‌ته‌كا دیه كو هاتیه خه‌لات كرن دیار كر كو ژیێ وێ 10 سال بوون ده‌ما هاتیه گرتن و گۆت: (ئه‌ز ل پولا چارێ سه‌ره‌تایی بووم، ل وی ده‌می ئه‌ز ل گه‌ل دایك و برایه‌كێ خوه هاتینه گرتن و دوو سال و چه‌ند هه‌یڤان ماینه ل زیندانا ئالوكا، ل وێرێ هه‌موو نه‌خوشی ب سه‌رێ مه هاتینه، هه‌تا ژبه‌ر نه‌بونا ئاڤێ نه‌چار بوین ب ته‌نه‌كه‌یان ئاڤا بارانان كوم بكه‌ین و ڤه‌خوین، ئه‌ز خوشكا سێ شه‌هیدان مه).
فه‌یروز عه‌باس، ئه‌و ژی ئافره‌ته‌كا دیه سه‌باره‌ت بابه‌تی گۆت: (بیرا من ناهێت ئه‌ز ل گه‌ل كێ و سالا چه‌ندێ گرت بووم، به‌لێ بیرا من دهێت كو مه زۆر نه‌خوشی و ئاسته‌نگ برینه و چو جاران نه‌شێین ژبیر بكه‌ین، به‌لێ سوپاس بۆ خودێ نوكه ئه‌م د ئازادیێ دا دژین و دخوازیت خزمه‌ت و ماندیبونا ئافره‌تێن دناڤ زیندانێن سیاسی نه‌هێته ژبیر كرن).
لاهیجان ره‌شید، به‌رپرسا ئه‌نجومه‌نێ ده‌ورۆبه‌رێن دهۆك ب وه‌كاله‌ت بۆ رۆژناما ئه‌ڤرۆ گۆت: (ب خوشحالیڤه ئه‌نجومه‌نێ ئافره‌تێن ده‌ورۆبه‌رێن دهۆك ب هه‌ڤكاری ل گه‌ل سكرتاریه‌تا ئافره‌تێن كوردستانێ، 20 ئافره‌ت خه‌لاتكرن كو هه‌موو ژی ب سیاسی ل سالێن حه‌فتێیا و هه‌شتێیا هاتینه گرتن و زیندانكرن ژلایێ رژێما به‌عس ڤه و سالێن ره‌ش دناڤ زیندانێن رژێما به‌عس دا بوراندینه، گونه‌ها وان ئافره‌تان تنێ ئه‌و بویه كو دده‌ما خوه دا هاریكاریا پێشمه‌رگه‌یان كریه و كورد په‌روه‌ر بوون و كار بۆ ئازادیا نوكه دكر).
لاهیجانێ زێده‌تر گۆت: (رولێ ئافره‌تان زۆر یێ گرنگه و وان خزمه‌ته‌كا باش بۆ كوردستانێ و ئه‌ڤ ئازادیا نوكه ئه‌م تێدا دژین كریه، له‌وا نابیت ئه‌و بهێنه ژبیر كرن و دڤێت خزمه‌تا وان بهێته كرن).
