ئه‌ڤرۆ، قه‌یس وه‌یس

چاڤه‌ڕێ‌ دهێته‌ كرن ئه‌ڤرۆ و سوبه‌هی یاریێن گه‌ڕا 37ێ‌ و پێش دووماهیا خولا ئیراقێ‌ بۆ یانێن پلا نایاب یا ته‌پا پێی ب ئه‌نجامدانا نه‌ه یاریان ده‌ستپێبكه‌ن ئه‌وا یانا شورته‌ به‌ری چار گه‌ڕان ناسناڤێ‌ وه‌رزێ‌ ئه‌ڤ ساله‌ مسۆگه‌ر كری.

ئه‌ڤرۆ ل ده‌مژمێر نه‌هی شه‌ڤ تیما یانا زاخۆ دێ‌ مێڤانداریا یانا سامرا ل یاریگه‌ها خوه‌ یا نێڤده‌وله‌تی كه‌ت، كوڕێن خابووری ب 45 خالان رێزا ده‌هێ‌ دهێن و مێڤانا وێ‌ ب كۆمكرنا 12 خالان رێزا 20ێ‌ و دووماهیێ‌ دهێت و پاشڤه‌چوونا خوه‌ بۆ پلا ئێك مسۆگه‌ركریه‌، زاخۆ دێ‌ بێ‌ پشكداریا هه‌ر ئێك ژ محه‌مه‌د عه‌بدولكه‌ریم، ئه‌ركان ئه‌میر و پیشه‌كارێ‌ به‌رازیلی برۆنۆ ئۆلیڤێرایی یاریێ‌ كه‌ت ژبه‌ر كارتێن زه‌ر و سۆر، لێ‌ گه‌شبینه‌ سێ‌ خالێن ب سانه‌هی ژ تیما سامرا وه‌ربگریت ئه‌وا دێ‌ هێته‌ دناڤ یاریێ‌ دا بێ‌ چو ئۆمێد هه‌بن بۆ مانا خوه‌ د خولێ‌ دا،خودانێن ئه‌ردی ژلایێ‌ جه‌ماوه‌رێ‌ خوه‌ڤه‌ داخوازكرینه‌ بۆ ڤه‌گه‌ڕاندنا سه‌ركه‌فتنان به‌ری دیدارا جاما ئیراقێ‌ ژ قۆناغا پێش دووماهیێ‌ ئه‌وا بڕیاره‌ ل 28ێ‌ ڤێ‌ هه‌یڤێ‌ ل باژێرێ‌ نه‌جه‌ف هه‌مبه‌ری یانا كاره‌با بیت.

ژلایه‌كێ‌ دووڤه‌ یانا نه‌وروز ل باژێرێ‌ سلێمانیێ‌ دێ‌ مێڤانداریا یانا هه‌ولێرێ‌ كه‌ت ئێك ژ یاریێن دێربیێ‌ كوردستانێ‌ د خولێ‌ دا، خودانین ئه‌ردی ب 48 خالان رێزا نه‌هێ‌ و یانا پایته‌ختی ب 44 خالان رێزا 11ێ‌ دهێت، ژ یاریێن دی یێن ئه‌ڤرۆ چارشه‌مبی دهێنه‌ كرن، نه‌فت- ئه‌لقاسم، ئه‌مانه‌ت به‌غدا- دیوانیه‌، مینا- ته‌له‌به‌، نه‌فت ئه‌لوه‌سه‌ت- سیناعه‌، یاریێن سوبه‌هی نه‌جه‌ف- شورته‌، نه‌فت ئه‌لبه‌سرا- نه‌فت ئه‌لمیسان، زه‌ورا- جه‌ویه‌.

ئه‌ڤرۆ،ره‌مه‌زان زه‌كه‌ریا:

د داخویانیه‌كێدا سه‌میر عه‌بدولقادر سه‌رۆكێ‌ یانا به‌رده‌ڕه‌ش یا وه‌رزشی بۆ رۆژناما ئه‌ڤرۆ دیاركر ئه‌و پرۆژێن وه‌به‌رهێنانی كو د ده‌ستێ یانێ‌ دایه‌ نه‌شیایه‌ ره‌وشا خوه‌ یا ئابوور باش بكه‌ت و ئه‌و پرۆژێن به‌رده‌ست بۆ ده‌مێ سیهـ ساڵا گرێبه‌ست ل سه‌ر هاتیه‌ كرن دگه‌ل وه‌به‌رهێنه‌ری لێ ئه‌و پرۆژه‌ كێمن و مه‌ داخوازكریه‌ كو پرۆژه‌كێ نوو بۆ دروستكرنا بیست دوكانا بجهبینن لێ رێگری هه‌یه‌ بۆ دروستكرنێ‌، بڤی ره‌نگی ره‌وشا ئابووریا یانێ به‌ر ب خرابیێ‌ چوویه‌ سه‌رباری ده‌لیڤه‌یا مایی كو بجهبینن لێ مخابن رێگری هه‌یه‌ .

زێده‌تر ناڤهاتی گۆت: ژبلی یاریا ته‌پا پێی یانا به‌رده‌ڕه‌ش یا ڤۆلی بۆلێ‌ ژی یا هه‌یی و ئاسته‌كێ باش پێشكه‌ش كریه‌ هه‌تا نوكه‌ پشكداری خولا دكه‌ت و پار سال ل سه‌ر ئاستێ پارێزگه‌ها دهۆك یانا به‌رده‌ڕه‌ش رێزا ئێكێ ب ده‌ستڤه‌ئینا و ل سه‌ر ئاستێ كوردستانێ رێزا چارێ .

سه‌رۆكێ‌ یانا به‌رده‌ڕه‌ش ئاشكراكر هه‌تا نوكه‌ ئێكلانه‌بووه‌ تیما مه‌ یا ته‌پا پێی دێ ل پله‌ ئێك یاریێ یان پله‌ دو كه‌ت ئه‌ڤ چاڤه‌ڕێ‌ بڕیاره‌كێ‌ نه‌ ،داخوازیا مه‌یا سه‌ره‌كی ئه‌وه‌ رێگریا ل سه‌ر پرۆژێن وه‌به‌رهێنانێ ڕاكه‌ن و یانه‌ بشێت پرۆژێن خوه‌ ته‌مام بكه‌ت بۆ باشتركرنا ره‌وشا ئابووریا یانێ و به‌رده‌وامی  ب چالاكیێن وه‌رزشی ل ده‌ڤه‌رێ ژبه‌ركو ئێكانه‌ رێك بۆ باشتركرنا ره‌وشا یانێ ئاڤاكرنا بیست دوكانێن نویه‌ ل ده‌ڤه‌رێ .

ئه‌ڤرۆ،شاهۆ فه‌رید:

د دیداره‌كێ‌ دا عه‌بدولره‌حمان زه‌ید كاپتنێ تیما نموونه‌یا ئه‌كادمیا پیرس نوونه‌راتیا یانا گاره‌ د خولا كوردستانێ‌ بۆ لاوان دا دیاركر ئه‌وی سالا 2017 ده‌ست هاڤێتیه‌ یاریا ته‌پاپێی ب هاریكاریا خالێ خوه‌ راهێنه‌ر عه‌لی وه‌حید و ل گه‌ل كاپتن وه‌لاتی هه‌موو زانیاریێن ته‌پاپێی وه‌رگرتینه‌ و شاشیێت خوه‌ راستڤه‌كرینه‌، هه‌روه‌سان هه‌رژه‌نگ بابه‌كری هاریكاریا وی و خوه‌ ماندی كریه‌ ئه‌گه‌ر ئه‌و نه‌با 40% ژی نه‌ دگه‌هشتمه‌ ئاستێ پێدڤی و گۆت: ژ به‌ر ته‌پاپێی پێنچ ساله‌ ژ مالاخوه‌ دووركه‌تیمه‌ كو ئاكنچیێ‌ قه‌زا شیخانم.

زێده‌تر ناڤهاتی بۆ رۆژناما ئه‌ڤرۆ گۆت: من پشكداری د سێ‌ قاره‌مانیان دا كریه‌ و راهێنه‌ر ژ ئاستێ من رازی بوون، یا نه‌خۆشی ئه‌بوو د خولا لاوان دا ب ناڤێ پیرس پشكدار نه‌بووین لێ‌ مه‌ ئاسته‌كێ‌ باش نیشان دایه‌ سه‌رباری پرانیا یاریزانان جارا ئێكێ‌ یه‌ پشكداریێ‌ دكه‌ن و ژیێن وان د چووكن و پێخووشحالم كاپتنێ تیمێ‌ مه‌ و ئه‌ركێ من قورسترلێ هاتیه‌.

ل دووماهیێ‌ عه‌بدولره‌حمانی گۆت: یاریكرن ل یاریكه‌هێن فریزێ ده‌ستكرد یاب زه‌حمه‌ته‌ ئاستی یاریزانی دئینه‌ خارێ هنگاڤتن زێده‌تر لێدهێن و ئیك یاریا د قاره‌مانیه‌كێ‌ دا هه‌مبه‌ری ده‌هێن هه‌ڤالینی نه‌، ته‌پاپێی كارتێكرن ل ئاستێ خاندنامن نه‌كریه‌ و به‌رده‌وامم، داهاتیدا هه‌ر یانه‌كا گرێبه‌سته‌كا باش پێشكێشی من كر دێ په‌یوه‌ندیێ پێكه‌م ئه‌كه‌ر تیمامه‌ نه‌بوو یانه‌، گه‌له‌ك كه‌سان ده‌سپێكی و تا نوكه‌ خه‌له‌ت قه‌له‌م دده‌ن كۆ یاریزانم لێ من ده‌مێت بهێت به‌رسڤ بۆ هه‌یه‌.

ئه‌ڤرۆ،

چاڤه‌ڕێ‌ دهێته‌ كرن ل شه‌مبیا بهێت هژماره‌كا مه‌زن یا چالاكیێن وه‌رزشی ل پرانیا باژێر و قه‌زایێن هه‌رێما كوردستانێ‌ بهێنه‌ ئه‌نجامدان وه‌كو نه‌ریته‌كا سالانه‌ كو ل 25ێ‌ خزیرانێ‌ ب رۆژا وه‌رزشا كوردستانێ‌ هاتیه‌ دانان ئه‌وا ئه‌ڤه‌ بوو ماوێ‌ سێ‌ ساله‌ ژلایێ‌ چه‌نده‌ك ژ راگه‌هاندكار و وه‌رزشڤانێن كوردستانێ‌ هاتیه‌ رێكخستین بۆ زێده‌تر لێك نێزكبوونا وه‌رزشڤانێن ده‌ڤه‌رێ‌ و دانانا رۆژه‌كا مێژوویی یا هه‌ر سال ب ناڤێ‌ رۆژا وه‌رزشا كوردستانێ‌.

لدووڤ لیستا ئه‌ڤ ساله‌ یا لژنا رێكخستنێ‌ هاتیه‌ راگه‌هاندن بڕیاره‌ هه‌شت باژێر و قه‌زا و ئیدارێن سه‌ربه‌خۆ چالاكیێن جودا یێن وه‌رزشی و دیدار و كۆنفراسان ئه‌نجامبده‌ت ئه‌وژی ل دهۆك، زاخۆ، ئاكرێ‌، هه‌ولێر، شه‌قلاوه‌، سۆران، گه‌رمیان و سلێمانی، ئه‌و چالاكیێن ل سنورێ‌ پارێزگه‌ها دهۆكێ‌ دهێنه‌ ئه‌نجامدان بڤی ره‌نگی نه‌.

ل باژێرێ‌ دهۆكێ‌ و ده‌مژمێر هه‌شتی سپێدێ‌ دێ‌ به‌ریكانا پایسكلان ل به‌نداڤا دهۆكێ‌ بۆ پاركا نه‌وروز ب ڕێڤه‌ چیت، دیسان ده‌مژمێر شه‌شی ئێڤاری كه‌رنه‌ڤاله‌كێ‌ وه‌رزشی و چالنچا خوه‌ هه‌لاویستن ل پاركا نه‌وروز هێته‌ كرن، ل ئیدارا سه‌ربه‌خۆیا زاخۆ قاره‌مانیا باسكێت بۆلێ‌ 3×3 ده‌مژمێر شه‌ش ئێڤاری، دیسان ل گۆرپانا پرا ده‌لال دێ‌ چالێنچا ده‌ستشكاندنێ‌ ل ده‌مژمێر شه‌شێ‌ ئێڤار هێته‌ كرن، ل باژێرێ‌ ئاكرێ‌ یاریه‌كا هه‌ڤالینی یا ڤۆلی بۆلێ‌ دناڤبه‌را یانا ئاكرێ‌ و دینارته‌ ل ده‌مژمێر هه‌شتی ئێڤاری هێته‌ ئه‌نجامدان.

ئه‌ڤرۆ،

هه‌لبژارتیێ‌ ئیراقێ‌ یێ‌ فۆتسالێ‌ ده‌ربازبوو پێش دووماهیا قاره‌مانیا رۆژئاڤا ئاسیا پشتی شیایی سه‌ركه‌فتنه‌كا مه‌زن ل سه‌ر هه‌لبژارتیێ‌ فله‌ستینێ‌ بینت ب حه‌فت گۆلان بێ‌ به‌رامبه‌ر، د هه‌ڤڕكیێن وان دا ئه‌و نوكه‌ باژێرێ‌ جدده‌ یێ‌ وه‌لاتێ‌ سعودیێ‌ مێڤانداریا وێ‌ دكه‌ت.

چار گۆلێن هه‌لبژارتیێ‌ ئیراقێ‌ ژلایێ‌ كچێن هه‌رێما كوردستانێ‌ ڤه‌ هاتنه‌ تۆماركرن و بڤی ره‌نگی، شۆخان نوره‌دین گۆله‌ك، دێرین مه‌حمود دۆ گۆل و له‌نیا سه‌دیق گۆله‌ك، هه‌رسێ‌ گۆلێن دی ژلایێ‌ یاریزانا یانا ئافره‌تێن هه‌ولێرێ‌ پیشه‌كار ته‌بارك ره‌حمان تۆماركرن، بڤی ئه‌نجامی ئه‌ڤرۆ هه‌لبژارتیێ‌ ئیراقێ‌ دێ‌ یاریا پێش دووماهیا قاره‌مانیێ‌ هه‌مبه‌ری هه‌لبژارتیێ‌ كوێتێ‌ بن.

بۆ زانین سه‌رجه‌مێ‌ 14 یاریزانێن هه‌لبژارتیێ‌ ئیراقێ‌ نه‌ه یاریزان كورد ئه‌وژی، دێرین مه‌حموود، بێریڤان جه‌لال، سه‌میرا ره‌ئۆف، شیلان عه‌بدوللا، شۆخان نوره‌دین، له‌نیا سه‌دیق، به‌هره‌ دارا، شاجوان جه‌بار و خه‌لات ئه‌سعه‌د.

ئه‌ڤرۆ،

یاریا ته‌پا پێی د نوكه‌ دا بوویه‌ حه‌ز ژێكه‌را پرانیا كه‌سێن سه‌ر رویێ‌ ئه‌ردی و جه‌ماوه‌ره‌كێ‌ ئێكجار زوور بخوه‌ڤه‌ گرتیه‌ و سال بۆ سالێ‌ بازنه‌یا وێ‌ مه‌زنتر دبیت و گه‌هشتیه‌ وێ‌ ڕاده‌یی سه‌ده‌هان كۆمپان و سه‌رمایه‌دارێن جیهانێ‌ پێڤه‌ هاتینه‌ گرێدان و ملیۆنا دۆلاران مه‌زاختنێ‌ دكه‌ن تایبه‌ت د ئینانا یاریزان، ریكلام و بازاركرن و رێكخستنا قاره‌مانیان و خولێن مه‌زن دا كو هه‌مبه‌ری وێ‌ ژی قازانجه‌كێ‌ په‌یدا دكه‌ن، ئه‌و كینه‌ هاكه‌رێن ڤێ‌ یاریێ‌ كو ئه‌وان رۆله‌كێ‌ مه‌زن هه‌ین و د ڤه‌شارتی!.

پێنه‌ڤێت ئه‌و كه‌سێن ئه‌م ژێ‌ به‌حس دكه‌ین ئه‌وژی بریكارێن یاریزانانه‌ كو دهێنه‌ هژمارتن هاكه‌ر ئه‌وێن هێدی هێدی كۆنترۆلا خوه‌ ل سه‌ر یاریا ته‌پا پێی دكه‌ن ده‌ستپێكا وان ل سالێن شێستان بوو لدووڤ روتینێ‌ وی ده‌می كه‌سه‌كێ‌ پارێزه‌ر ب كارێ‌ یاسایی یێ‌ تمامكرنا گرێبه‌ستا یاریزانی ژ یانه‌كێ‌ بۆ یانه‌كا دی هه‌مبه‌ری كرێه‌كا كێم، ئێك ژ ئاریشێن یاریزانا هه‌تا دووماهیا سالێن هه‌شتیان كو نه‌ دشیان گرێبه‌ستا لدووڤ ئاست و شیانێن خوه‌ وه‌ربگرن و ماف نه‌بوو ب چیته‌ چو یانا بێ‌ یانا خوه‌ سه‌رباری گرێبه‌ستا وی ب دووماهی دهات.

یاسا بۆسمان

پشتی ئێكه‌تیا ته‌پا پێی یا ئۆرۆپا یاسایه‌كا نوو ده‌رخستن ل سه‌ر روودانا یاریزانێ‌ یانا لیچ یا به‌لجیكی جان مارك بۆسمان ئه‌وێ‌ گرێبه‌ستا وی ب دووماهی هاتی و یانه‌ بوویه‌ ڕێگر ل سه‌ر چوونا وی كو داخازا كۆژمه‌كێ‌ پاره‌یی ژێ‌ كری، ناڤهاتی نه‌چاربوو د ماوێ‌ پێنچ سالان دا سكالا خوه‌ گه‌هاندیه‌ دادگه‌هێ‌ بڕێكا پارێزه‌رێ‌ خوه‌ ل سالا 1995ێ‌ ئێكه‌تیا ته‌پا پێی یا ئۆرۆپا یاسایه‌كا نوو ده‌رخستن كو بناڤێ‌ یاسا بۆسمان ده‌نگڤه‌دایه‌ ئه‌وژی پشتی بدووماهی هاتنا گرێبه‌ستا هه‌ر یاریزانه‌كی نابیت یانه‌ ڕێگریێ‌ لێ‌ بكه‌ت و مافێ‌ هه‌یی ب ئازادی گرێبه‌ستا خوه‌ بۆ یانه‌كا دی ئیمزابكه‌ت، ئه‌ڤچه‌نده‌ بوو ئه‌گه‌ر كار ب بریكارێ‌ یاریزانی بهێته‌ كرن و پرانیا یاریزانێن ئۆرۆپا و جیهانێ‌ پشتبه‌ستن ل سه‌ر وان كرن ژبۆ دووركه‌فتن ژ هه‌ر ئاریشه‌كێ‌ و بوو ئه‌گه‌ر ژی بهایێ‌ بریكاران به‌ر ب زێده‌بوونێ‌ بچیت و هنده‌ك ژ داهاتێ‌ ریكلام و فرۆتنا درێسێ‌ یاریزانی بوو بریكاری بچیت و گرێبه‌ستێن یاریزانان ژی گران بن و دگه‌هشته‌ پارێن سه‌رسۆرمان.

پێشكه‌ڤتنا كارێ‌ بریكاری

د نوكه‌ دا كارێ‌ بریكارێ‌ یاریزانی نه‌ بتنێ‌ گه‌نگه‌شه‌ ل سه‌ر گرێبه‌ستێ‌ و ریكلامكرن و درێسی دهێته‌ كرن به‌لكو گه‌هشتیه‌ وێ‌ راده‌یی كو به‌رپرسیاره‌تیا كارگێری یا یاریزانی بكه‌ت و كه‌نگی بهێته‌ پێشچاڤێن راگه‌هاندنێ‌ و نڤێسینێن د تۆرێن كۆمه‌لایه‌تی دا، ئه‌ڤچه‌نده‌ رێكخستنه‌ك ئێخسته‌ د كارێ‌ یاریزانی دا تایبه‌ت ئه‌وێ‌ ستێربیت كو بوو ئه‌گه‌ر گرێبه‌ستێن وان ژی به‌ر ب زێده‌بوونێ‌ دچیت.

گرنترین بریكار

هه‌رچه‌نده‌ مینۆ رایۆلا ئه‌وێ‌ به‌ری چه‌نده‌كی چوویه‌ به‌ردلۆڤانیا خودێ‌ ئێك ژ بریكارێن مه‌زن بوو ل جیهانێ‌ لێ‌ د نوكه‌ دا یێ‌ پۆرتۆگالی خورخێ‌ میندێز دهێته‌ هژمارتن سه‌ركێشێ‌ هه‌موو بریكارێن یاریزانا ل جیهانێ‌ ئه‌وێ‌ هه‌تا نوكه‌ شیایی ب كارێ‌ خوه‌ یێ‌ بریكاریێ‌ زێده‌تر ئێك ملیار دۆلاران قازانج بكه‌ت بڕێیا كۆمپانیا خوه‌ (GestiFute) و پێنگاڤا وی یا ئێكێ‌ ل سالا 1997 بوو، شیا چه‌ندین خالێن تایبه‌ت ل سه‌ر به‌ندێن گرێبه‌ستا زێده‌بكه‌ت ژبه‌ر زیره‌ك و شاره‌زاهیا وی ببیته‌ بریكارێ‌ زێده‌تری 200 یاریزانێن جیهانێ‌ ژوانا كرستیانۆ رۆنالدۆ، ئه‌نخێل دی ماریا، پیپێ‌، كۆنتێراو، ئه‌ندرسۆن ئۆلیڤێرا،فالكاۆ،نانی، ریكاردۆ كارفالیۆ،دیێگۆ، هه‌روه‌سان راهێنه‌ر مۆرینیۆ و دیێگۆ سیمیۆنی.