زاخۆ، دلۆڤان هالۆ:

مۆزەخانا زاخۆ نە ب تنێ جهێ پاراستنا كەرەستەیێن فۆلكلوری و پارچەیێن شوونواری یە، بەلكو بوویە ژێدەرەكێ سەرەكی یێ داهاتی بۆ كەرتێ گەشتوگوزارێ ل ئیدارەیا سەربخوە یا زاخۆ، چونكی ڕۆژانە ب سەدان گەشتیارێن نافخوە و بیانی سەرەدانا وێ دكەن.

چیا ئەمین، ڕێڤەبەرێ گەشتوگۆزارا زاخۆ بۆ ڕۆژناما ئەڤرۆ دیار كر، مۆزەخانا زاخۆ بوویە ژێدەرەكێ سەرەكی یێ داهاتی بۆ كەرتێ گەشتوگوزارێ ل ئیدارەیا سەربخوە یا زاخۆ، چونكی بوویە جهەكێ گرنگ یێ ڕاكێشانا گەشتیارێن نافخوە و بیانی بۆ دەڤەرێ، ب تایبەت ل وەرزێ هاڤینێ ڕێژەیەكا زۆر یا گەشتیاران سەرەدانا مۆزەخانا زاخۆ دكەن.
لانە عەبدولسەلام، ڕێڤەبەرا مۆزەخانا زاخۆ گۆت:»ل سالا 2024 ێ مۆزەخانا زاخۆ هاتیە ڤەكرن و ژ هەردو بەشێن شوونواری و فۆلكلوری پێك دهێت، ل هەموو ڕۆژێن حەفتیێ ژ دەمژمێر 9ی سپێدێ هەتا 12ی شەڤ ڤەكریە، ڤێ چەندێ ژی ئاسانكاریەكا مەزن بۆ نیاسینا مێژوویا دەڤەرێ كریە، هەموو پارچەیێن ڤێ مۆزەخانێ ل دەڤ كەسەكێ هاتبوونە پاراستن بناڤێ محەمەد كۆچەر كو وی پێشكێشی مۆزەخانێ كرن و نوكە هەموو پارچە ل ڤێرێ دهێنە پاراستن.
محەمەد ئەحمەد، ڕێڤەبەرێ شوونوارێن زاخۆ گۆت:»پتری 300 پارچەیێن شوونواری ل مۆزەخانا زاخۆ هەنە كو كەڤنترین پارچە ژی بەرێ ئۆپسیدنە كو مێژوویا وێ بۆ نێزیكی 10 هزار سالان ژبەری زایینێ ڤەدگەڕیت، هەروەسا تابلۆیەكێ مێژوویی ل ڤی بەشی دهێتە دیتن كو ژ چەندین پارچەیێن گرنگ یێن چاخێ بەردین و سەردەمێ ئێلنستی و ئاشووری و میتانی پێك دهێن».
ناڤهاتی گۆت ژی:»ل مۆزەخانا زاخۆ سێ پارچەیێن دەگمەن و جیاواز یێن شوونواری سەرنجا گەشتیاران ڕاكێشایە و مێژوویا وان بۆ 3 هزار سالان ژبەری زایینێ ڤەدگەڕیت، كو ئێك ژ وان پەیكەرێ هێراكلیس بۆ سەردەمێ هێرشا ڕۆمانیان بۆ ناڤچەیا میزۆپۆتامیا ڤەدگەڕیت.

هەولێر، قائید میرۆ:

پارێزه‌ره‌كا شیره‌تكار دیار کر، رۆژ بۆ رۆژێ تۆماركرنا سكالایان ل دادگه‌هێن توندوتیژیێ به‌ر ب زێده‌بۆنێ نه‌ و گۆت؛ پێدڤیه‌ ل ده‌مێ ئه‌نجامدانا توندوتیژیێ پێنگاڤا ده‌ستپێكێ بزاڤێن ئاشت بوون و چاره‌سه‌ركرنێ هه‌بن، به‌لێ ئه‌گه‌ر توندوتیژی هه‌ر یا به‌رده‌وام بیت پێدڤیه‌ سكالا بهێته‌ تۆماركرن.

پارێزه‌را شیره‌تكار گۆنا مه‌جید بۆ رۆژنامەیا ئه‌ڤرۆ دیار کر، تۆماركرنا سكالایان ل دادگه‌هان لدۆر توندوتیژیێ رۆژ بۆ رۆژێ زێده‌بوونێ دایه‌، زۆر پێنگاف هه‌نه‌ ژبۆ كێمكرنا رێژا توندوتیژیێ ژ وانژی هشیاركرنا خه‌لكی ژلایێ قانوونی و جڤاكی و ئایینی بۆ هه‌ردو ره‌گه‌زا نه‌ك تنێ ره‌گه‌زێ مێ و گۆت؛ هه‌روه‌سا ژلایێ كه‌نالێن راگه‌هاندنێ و سۆشیال میدیایێ هشیاری بهێته‌ به‌لاڤكرن و باده‌كێن توندوتیژیێ بشێوه‌یه‌كی نه‌هێنه‌ به‌لاڤكرن ببیته‌ ئه‌گه‌رێ زێده‌بوونا توندوتیژیێ و ئازراندنێ.
پارێزەرێ دیار کر، مخابن هنده‌ك جارا قوربانیێن توندوتیژی ل هه‌مبه‌ر دهێته‌ ئه‌نجامدان سكالایێ تۆمار ناكه‌ن یانژی سه‌ره‌دانا رێڤه‌به‌ریێن به‌رهنگاربوونا توندوتیژیێ ناكه‌ن و گۆت؛ ئه‌ڤه‌ژی بۆ هندێ ڤه‌دگه‌ڕیت هنده‌ك جاران ئەو كه‌سێ بوویه‌ قوربانی ترس هه‌یه‌ و ره‌نگه‌ وه‌سا هزر بكه‌ت سكالایێ ژی بكه‌ت چ بۆ نه‌هێته‌كرن.
پارێزەرا شیرەتکار گۆتژی؛ ئه‌م هه‌موو جاران دبێژینێ پێكوه‌رن و ئاشت ببن، به‌لێ ئه‌گه‌ر پێکنەهاتن و توندوتیژی هه‌ر یا به‌رده‌وام بیت هینگێ باشترین رێك تۆماركرنا سكالایێ یه‌ ژلایێ دادگه‌هێ ڤه‌، هه‌تا ب رێیا قانوونێ مافێ وان بهێته‌ گه‌ره‌نتی كرن.
گۆنا مه‌جید ئاماژه‌ پێ کر کو پێدڤیه‌ ده‌مێ تۆماركرنا سكالایێ سه‌بر هه‌بیت بۆ ئێكلاكرنا سكالایێ، چونكه‌ قانوونێ رێكارێن خۆ هه‌نه‌ بۆ به‌رهنگاربوونا توندوتیژیێ و چاوانیا ئێكلاكرنا هه‌ر سكالایه‌كا دهێته‌ تۆماركرن، نابیت له‌ز بهێته‌ كرن و بابه‌ت زێده‌تر بهێته‌ ئازراندن و گۆت؛ چونكه‌ به‌رده‌وام وه‌لاتیێن مه‌ دخوازن هه‌رده‌مێ سكالا تۆمار كر بلەز بڕیار لسه‌ر بهێته‌دان و بهێته‌ ئێكلایی كرن و به‌رۆڤاژی رێكارێن قانوونی و ڤه‌كۆلینێ هویركاریێن خۆ هه‌نه‌.
پارێزەرا شیرەتکار د بەردەوامیا ئاخفتنێن خۆدا گۆت؛ ئه‌م چو جاره‌كێ دگه‌ل تێكچوونا په‌یوه‌ندیێن دناڤبه‌را هه‌ڤژینان نینین، به‌لێ ئه‌گه‌ر توندوتیژی به‌رده‌وام بهێته‌ كرن باشترە ئەو كه‌سێ توندوتیژی ل هه‌مبه‌ر دهێته‌ كرن رێكارێن قانوونی هه‌لبژێریت، چونكه‌ ئه‌گه‌ر چاره‌سه‌ری بۆ ئاریشه‌یێن دناڤبه‌را واندا نه‌بوون باشترین رێك ئه‌وە سكالا بهێته‌ تۆماركرن و هه‌ر كه‌سه‌ک بگه‌هیته‌ مافێ خۆ.

بێوار حەمدی:

بازرگانەکێ دیار کر کو دەسپێکا کارێ ئونلاین یا ب ساناهییە، ژبەرکو مرۆڤ پێدڤی ب رێژەیەکا مەزن یا پارەی نابیت و باشیێن ڤی کاری پترن، چالاکڤانەکی ژی گۆت: کارێ ئونلاین هەتا رادەیەکێ باش دبیتە بار سڤکی بو خەلکی لێ جاران فێل ژی دناڤدا هەنە.

ڕۆژڤین خەلیل، بازرگان و خودان کارە د دیدارەکێ دا بۆ ڕۆژنامەیا ئەڤرۆ دیار کر کو ئەڤە بۆ ماوێ هەشت سالانە ئەو ڤی کاری دکەت و ب گشتی دگەل وێ چەندێ یە کو بازاڕێ ئونلاین هەبیت، ژبەرکو باشیێن وێ پترن و گۆت؛ ژ باشیێن ڤی کاری ئەوە کو مەزاختی کێمترن و مرۆڤ پێدڤی ب وێ چەندێ نابیت کو جهەکی بکرێ بگریت و بهایێ ئاڤ و کارەبان بدەت، هەروەسا سنورێ کڕین و فروتنێ ژی بەرفرەهترە.
ڕوژڤینێ د بەردەوامیا ئاخفتنێن خۆدا دیار کر، دەما مرۆڤ بڕیارێ ددەت کارێ ئونلاین بکەت دەسپێکا وێ یا ب ساناهیە، ژبەرکو مرۆڤ پێدڤی ب ڕێژەیەکا مەزن یا پارەی نابیت، بتنێ دڤێت پەیجەکی درست کەت و هندەک ماددەی بینیت.
روژڤینێ گۆتژی؛ جاران ڤی کاری هندەک خالێن نەرێنی ژی هەنە وەکو، هەر کەسەکێ ڤیا دشێت ڤی کاری بکەت بێی بەرچاڤ وەرگرتنا هیچ ڕێنمایەکا دەستهەلاتێ، جاران ژی ئەو ماددێ دهێت رەنگە کوالێتی ل ئاستێ پێدڤی نەبیت و بکڕ بهێتە خاپاندن.
هەمزە تەمەر چالاکڤانە سەبارەت بابەتی دیار کر کو د نوکەدا بسەدان پەیچ و ئەکاونتێن پەیدا بوین بو کارێ ئونلاین، ژلایەکی ڤە دبیتە بارسڤکی بو خەلکی کو زوی تشتان ب دەستخۆڤە دئینن و گۆت؛ لێ ژلایەکێ دیڤە بویە ئەگەر کو کارتێکرنێ ل خودان کارێن کرێ ددەن بکەت، لەورا ئەو ژی نەچار بۆینە ڤان ئەکاوەنتان درست بکەن.
هەمزەی د بەردەوامیا ئاخفتنێن خودا دیار کر، ل دەسپێکا ڤی کاری گەلەک فێلبازی و سەردابرن هەبۆن، ژبەرکو ئەو کەلوپەل دبن کارتێکرنا رەنگان دا بۆن و بشێوەیەکێ جوان دەردکەڤتن و گۆت؛ لێ دەما دگەهشتە دەستێ مرۆڤی بەرۆڤاژی ب هەمان جوانی و قەبارەی نەبوینە، لێ هەتا رادەیەکێ باش نها ئەڤ سەردابرنە کێم بوینە.