ب ئامادەبوونا د. عەلی تەتەر، پارێزگارێ دهۆكێ و خانم د. ڤیان سلێمان، هاریكارا بەرپرسێ مەكتەبا ڕێكخستنا پارتی ل پارێزگەهێ و هەژمارەكا بەرپرسێن دام و دەزگەهێن جودا، وەكو وەفاداریەك بۆ خووشك و برایێن كورد ل ڕۆژئاڤایێ كۆردستانێ و بەرسڤدانەك بو كارێن دڕندانە یێن چەكدارێن سووریێ بەرامبەر ئافرەتا كورد، دوهی 27/1/2026 پەیمانگەها هۆنەرێن جوان ئالایەكێ كوردستانێ ب درێژاهیا 120 مەتران بلند كر و كەزیەكا ڤەهاندی یا 35 مەتری، كو ژ لایێ مامۆستا و شێوەكارێن پەیمانگەهێ ڤە، وەكو پەیاما ئافرەت و گەنج و لاوێن باژارێ دهۆكێ بەرچاڤكر.
دیسا هەر دوهی 27/1/2026 د. عەلی تەتەر، پارێزگارێ دهۆكێ د كۆنگرەكێ‌ رۆژنامەڤانی دا ل دۆر وەرگرتنا هاریكاریان بۆ خووشك و برایێن رۆژائاڤایێ كۆردستانێ دیاركر، دەمێ وان كەمپینێن هاتینە ڕاگەهاندن ب دووماهی هاتیە، لێ‌ ڕێڤەبەریا كۆچ و كۆچبەران دێ بەردەوام هاریكاریان وەرگریت، ئەو كەلوپەلێن هاتینە كۆمكرن، هەر ب ڕێكا ڕێڤەبەریا ناڤبری بۆ رۆژئاڤایێ‌ كوردستانێ‌ دێ هێنە هنارتن و ل سەر كەسێن پێدڤی دێ‌ هێنە بەلاڤكرن، دیسا ئەو ژمارێن بانكی یێن هاتینە ڕاگەهاندن، دێ دڤەكری بن بۆ هەر كەسەكێ بڤێت هاریكاریێن ماددی بگەهینیت.

دهۆك، لەزگین جۆقی:

رێڤەبەرێ بەنداڤا دهۆكێ راگەهاند، رەوشا ئیراقێ بۆ ژێدەرێن ئاڤێ یا باش نینە، ژبەركو پشتبەستنێ ل سەر ژێدەرێن ئاڤا وەلاتێن دەوروبەر دكەت و پشتبەستنێ لسەر ئاڤا بارانان ناكەت.
فەرهاد محەمەد، رێڤەبەرێ بەنداڤا دهۆكێ بۆ رۆژناما ئەڤرۆ گۆت: «حكومەتا هەرێما كوردستانێ چەندین بەنداڤ بۆ كۆمكرنا ئاڤێ چێكرینە و ئاڤەكا باش كۆمكریە، لێ حكومەتا ئیراقێ یا هاریكار نینە و هەتا نوكە بودجەیا پێدڤی تەرخان نەكریە بۆ چێكرنا بەنداڤان و كۆمكرنا ئاڤێ، حكومەتا هەرێما كوردستانێ هەمی دەرگەهـ بۆ حكومەتا ئیراقێ ڤەكرینە، داكو بشێن ئێدارەكا باشتر یا ژێدەرێن ئاڤێ بكەین، لێ ئیراق بودجەیا پێدڤێ بۆ چێكرنا بەنداڤان دابین ناكەت».

رەمەزان زەكەریا:

موسا ئەحمەد، سەرۆكێ دەزگەهێ خێرخوازیێ بارزانی دوهی 27/1/2026 د كۆنفرانسەكێ ڕۆژنامەڤانی دا، دووماهی ئامارێن چالاكی و هاریكاریێن دەزگەهی بۆ خووشك و برایان ل ڕۆژئاڤایێ كوردستانێ ئاشكراكرن.
ناڤهاتی ئاشكرا كر، وان هەتا نوكە 165 بارهەلگرێن هاریكاریێن مرۆڤی گەهاندینە باژار و باژارۆكێن قامشلۆ، عامودێ، گركێلەكێ، دێریكێ‌، تربەسپی و دەرباسیێ و گۆت: «115 كارمەندێن دەزگەهی د ناڤ 12 تیمێن مەیدانی دا، ل دەڤەرێن جودا مژوولی بەلاڤكرنا هاریكاریانە».
گۆت ژی: «هەتا نوكە 9 هزار و 180 خێزان، كو دبنە 57 هزار و 955 كەس، ژ هاریكاریێن جۆراوجۆر مفادار بووینە، دیسا 145 هزار و 177 لیترێن گازوایل و گازا سپی بۆ 108 قوتابخانە و هەشت مزگەفتان هاتینە دابینكرن».
سەرۆكێ دەزگەهێ خێرخوازیێ بارزانی زێدەتر گۆت: «ژ روویێ دابینكرنا خوارنا گەرم ڤە، 9 هزار و 330 ژەمێن خوارنێ ل 15 قوتابخانە و سێ‌ مزگەفتان هاتینە بەلاڤكرن و بڕیارە ڕۆژانە سێ‌ 3 هزار ژەمێن دی ژی بهێنە بەلاڤكرن».
ئاشكرا ژی كر كو تیمێن ساخلەمیێ یێن دەزگەهێ خێرخوازیێ بارزانی و تیمێن خۆبەخش شیاینە چارەسەریێن نۆشداری بۆ دو هزار و 749 كەسان بكەن، ژبلی لایەنێ مرۆڤی، دەزگەهی گرنگی ب پەیداكرنا دەلیڤەیێن كاری ژی دایە و د ڤی چارچوڤی دا 289 كەس د پرۆسەیا گەهاندن و بەلاڤكرنا هاریكاریان دا هاتینە دامەزراندن و گۆت: «ئەڤ هەوا مرۆڤی یا دەزگەهێ خێرخوازیێ بارزانی وەكو پشكەك ژ ئەركێن نیشتیمانی و مرۆڤی یێن دەزگەهی بۆ هاریكاریكردنا لێقەومییان ل ڕۆژئاڤایێ كوردستانێ دێ بەردەوام بیت».

رەمەزان زەكەریا

ئاكرێ ئەو باژێرێ ب دیرۆك و رەسەناتیا خۆ دهێتە نیاسین، رووبرووی مەترسیەكا مەزن بوویە و زێدەگاڤی و دەستدرێژیا بەردەوام بۆ سەر جهێن شوونوار كو بوویە دیاردەیەكا رۆژانە، ل سنوورێ دەڤەرداریا ئاكرێ ٧٦٠ جهێن شوونواری هەنە كو دیرۆكا پشكەكا وان وەك كەلها ئاكرێ و شكەفتا گوندك و جهێن دیتر بۆ بەریا زێدەتر ژ هزار سالان ڤەدگەرێت. ب تنێ ل سالا بووری ٢٥ جهێن دیرۆكی ل دەڤەرێ هاتینە تێكدان.

یوسف سالح، وەلاتیەكێ دەڤەرێیە بۆ ئەڤرۆ گۆت: ل سەردەمێ بەرێ ئەم دچووینە كۆیستانا بەری، مە كەرەستەیێن خۆ د ئینانە ناز گۆرستانێ، هەتا ئەم زڤری باین د پاراستی بوون، بەلێ مخابن نوكە خەلك یێ گۆرا هەلدكولن و بۆ تشتەكێ كێم، دڤێت دووڤچۆنێ بۆ بهێتە كرن.
دیار تاهر، وەلاتیەكێ دەڤەرێیە بۆ ئەڤرۆ گۆت: جهێن شوونواری دڤێت بهێنە پاراستن، نابیت هەر كەسێ بیت جهەكێ شوونواری تێك بدەت و خراب بكەت، پێدڤیە حكومەت كەسێن تێكدەرێن جهێن شوونواران دەستەسەر بكەت و سزا بدەت.
هیوا شەمال، رێڤەبەرێ شوونوارو كەلەپۆرێن ئاكرێ بۆ ئەڤرۆ گۆت: جهێن شوونواری ل دەڤەرا ئاكرێ د زۆرن، وەك گوندێ شوش و گوندك و دەوروبەرێن ئاكرێ گرێن شوونواری هەنە و دەوروبەرێ دەڤەرا بەردەڕەش مە گەلەك جهێن شوونواری و گورستانێن كەڤنار هەنە و جۆرا جۆر زێدەگاڤی ل سەر ڤان جهێن شوونواری دهێتەكرن و ئەم داخواز دكەین وەك رێڤەبەریا شوونواران رێك ل ڤێ دیاردێ بهێتەگرتن.
ناڤبری گۆت ژی: پاراستنا جهێن شوونواری ب تنێ ئەركێ حكومەتێ نینە، بەرپرسیارەتیەكا نیشتمانی و جڤاكی یە، پێدڤیە ل دووڤ یاسایا شوونواران تاوانبار بهێنە دەستەسەركرن و سزادان.
ناڤهاتی گۆت: ل سالا بووری ١٥ كەس هاتینە دەستەسەركرن سەرا تێكدانا جهێن شوونواری، بەلێ دیارە سزایێن یاسایی نەبووینە رێگر ل بەرامبەر وان كەسێن كو بۆ دەستكەفتەكێ ماددی یێ كێم ناسنامەكا هزار سالی ژ ناڤ دبەن.

ئامێدیێ‌، مەحمود نهێلی

زێدەباری وێ‌ سر و سەرمایا نوكە ل دەڤەرێ‌ ب گشتی هەی و ب تایبەت ژی ل دەڤەرا ئامێدیێ‌، لێ‌ هەتا نوكە ب تنێ‌ ئێك بەرمیلا گازێ‌ ب سەر وەلاتیێن دەڤەرا ئامێدیێ‌ هاتیە بەلاڤكرن و ئەو ژی ژ مێژە خلاس بووی.

چورین محەمەد ئاكنجی ل ناوچەدارییا دێرەلۆك بۆ رۆژناما ئەڤرۆ دیار كر، هەموو سالان ب تنێ‌ ئێك بەرمیلا گازێ‌ ل دەڤەرێ‌ دهێتە بەلاڤكرن، بەرمیلەكا بازرگانی ژی بۆ خوە دكرن و تێرا مە دكەت و گۆت: ژ بەر كو ئەڤ سالە سەقایێ‌ دنیایێ‌ گەلەك یێ‌ سارە، ئێك بەرمیل و دو بەرمیل تێرا خەلكی ناكەن.
ناڤهاتیێ‌ دیار ژی كر، ژ بەر رەوشا هەرێمێ‌ ب گشتی و یا فەرمانبەران تایبەت یا خرابە ژ بەر نەهاتنا موچەی، ئەو داخواز دكەن حۆكمەت پتر چاڤێ‌ خوە بدەتە خەلكێ‌ دەڤەرا ئامێدیێ‌ و بشێن ئەڤ سالە ب قەتینن و ئەو پێدڤی ب بەرمیلەكا دی یا گازێ‌ نە.
وەلاتی نشوان تاها كو خەلكێ‌ دەڤەرا ئامێدیێ‌ یە دیار كر، هەموو سالان ل گەل بەرمیلەك یان دوویێن گازێ‌ ئەو سوپا دارا ژی ددانن و دشێن سالا خوە پێ‌ دەرباز بكەن، لێ‌ ب مخابنی ڤە ئەڤ سالە رەوشا خەلكی گەلەك یا خرابە و حكۆمەت ناهێلیت كەس كاتەكی دارا ژ بینیت و گازێ‌ ژی نادەنە خەلكی پا خەلك چاوا بژیت و گۆت: ئەم داخواز دكەین یان گازێ‌ بدەنە خەلكی یان ژی بهێلن خەلك بۆ خوە دارا ل ڤان گوندان بینیت.
هەروەسا وەلاتیەكی یێ‌ ئامێدیێ‌ دیار كر، ئەڤ سالە گەلەك بەفر ل دەڤەرێ‌ باریە و سەرمایەكا زۆر كەفتیە دەڤەرا ئامێدیێ‌ و بارا پترێ‌ پلێن گەرمێ‌ دبن سفرێ‌ دانە و سرەكا زۆرە و خەلك ب ڤی رەنگی ناقەتینیت ب هیڤیا ئێك بەرمیل ڤە و گۆت: ئەم هیڤی دكەین چارەكی ل ڤی خەلكی بكەن و بهێلن ئێدی یان دارا بینن یان ژی گازێ‌ ب سەر ڤی خەلكی دا دابەش بكەن.
رێبەر سادق رێڤەبەرێ‌ ناوچەدارییا دێرەلۆك دیار كر، بەرنامەیێ‌ دابەشكرنا گازا سپی ل سەرانسەرێ‌ هەرێما كوردستانێ‌ وەك و ئێكە و گۆت: مە پەیوەندی ب جهێن پەیوەندیدار كرینە لێ‌ دیارە نوكە د شیان دانینە بەرنامە بهێتە گوهورین، ژ بەر كو نەك ب تنێ‌ ئەڤ دەڤەرە یا سارە، بەلكوو ل دەڤەرێن چیایی هەموویێ‌ ئەڤ سالە گەلەك بەفر باریە و سەرمایە و گۆت : هەكە بەرنامێ‌ دابەشكرنا بەرمیلا دوویێ‌ یا گازێ‌ هەبیت دێ‌ بۆ هەموو دەڤەرێن چیایی وەكو ئێك بیت و ل وی دەمێ‌ دێ‌ بۆ ڤێ‌ دەڤەرامە ژی هەمان بەرمیلان گازێ‌ هەبیت و دێ‌ ب سەر خەلكێ‌ دەڤەرێ‌ ژی دا هێتە بەلاڤكرن.

دهۆك، لەزگین جوقی

رێڤەبەرێ كۆچ و كۆچبەران و بەرسڤدانا قەیرانان ل پارێزگەها دهۆكێ راگەهاند، هەتا نوكە حۆكمەتا ئیراقێ گازا سپی بۆ ئاواران دابین نەكریە، ل هەیڤا 10 یا ئەڤ سالە ب فەرمی مە نڤیسارەك بۆ دابینكرنا گازا سپی ئاراستەی حكومەتا ئیراقێ كریە.

دەیان پیر جەعفەر، رێڤەبەرێ كۆچ و كۆچبەران و بەرسڤدانا قەیرانان ل پارێزگەها دهۆكێ گۆت: هەتا نوكە پتر ژ 20 هزار مالباتێن ئاواران دناڤ كەمپان ل سنورێ پارێزگەها دهۆكێ و ئیدارا سەربەخۆیا زاخۆ ئاكنجینە و نەشیاینە ڤەگەرنە سەر مالێن خۆ مە داخوازا گازا سپی بۆ ئاواران ژ حۆكمەتا ئیراقێ كریە و هێشتا وەزارەتا نەفتێ گازا سپی دابین نەكریە هەتا نوكە پتر ژ 280 هزار كەسێن ئاوارە گازا سپی نە وەرگرتیە.
قاسم عەونی، رێڤەبەرێ كۆچ وكۆچبەر وبەرسڤدانا قەیرانان ل زاخۆ راگەهاند، هەتا نوكە حۆكمەتا ئیراقێ گازا سپی بۆ ئاوارین دناڤ كەمپاندا زاخۆ دابین نەكریە ئەڤە هەیڤا ئێكە و سەرمایە هێشتا گاز بۆ ئاوارە نەهاتیە دان.
رێڤەبەرێ كۆچ وكۆچبەر و بەرسڤدانا قەیرانان ل ئیدارا سەربەخۆیا زاخۆ گۆت: حۆكمەتا ئیراقێ هەتا نوكە بەهرا ئاوارە ژ گازا سپی دابین نەكریە كۆ پێدڤیە بۆ هەر خێزانەكا ئاوارە 200 لیترێن گازا سپی بهێنە دان مخابن هێشتا حۆكمەتا ئیراقێ چ گاز بۆ ئاوارە نەهنارتیە كۆ پینچ كەمپێن ئاوارە ل زاخۆ هەنە گازا سپی ئیراقێ نەدایە ڤان كەمپێن ئاوارە.