سندس سالح سلێڤانەیی:

شێوەكارێ‌ گەنج (شێرزاد شاهین حەسەن) كو ب (شێرزاد مارۆنسی) یێ‌ بەرنیاسە، د دیدارەكێ‌ دا بۆ بەرپەرێ‌ هونەری یێ‌ رۆژنامەیا ئەڤرۆ گۆت: دەمێ‌ ئەز قوتابی ل قوناغا بنەرەت حەزا چێكرنا وێنەیان ل دەف من هەبوو، خێزان و ماموستایێن من ژی د هاریكاربوون، لەورا من ژی بەردەوامی پێ‌ دا هەتا گەهشتیمە قوناغا ئامادەیی ئەو حەز ژی ل گەل من مەزن بوو، پشتی زانكۆیا دهۆك (پشكا شێوەكاری) ڤەكری، كو سەر ب كولیژا زانستێن مرۆڤایەتی ڤەیە، ئەز چوومە وێ‌ پشكێ‌ و من ب هونەر ب شێوەیەكێ‌ ئەكادیمی خواندن و ب راستی ل كولیژێ‌ گەلەك دەرگەه بۆ من ڤەبوون كو ئەز شیانێن خوە پێشبێخم و كەڤالێن باشتر چێكەم، چنكو ماموستایێن مە گەلەك د زیرەك و باش بوون و ئەوا رێكا راست نیشا مەدا و نوكە بەردەوام و ب شێوەیەكێ‌ ئەكادیمی كارێ‌ خوە دكەت و هیڤیا من ئەوە ل پاشەرۆژێ‌ ئەم بشیێن ل دووف شیانێن خوە خزمەتا هونەرێ‌ شێوەكاری بكەین، هەروەسا شوون تبلێن مە وەكو شێوەكارەك و كوڕێ‌ ڤی باژێری بۆ خزمەتكرنا پارێزگەها دهۆكێ‌ د دیاربن.
هەروەسا گۆت: د دەمێ‌ بۆری دا من پشكداری د گەلەك پێشانگەهان دا كریە و دووماهی پێشانگەه ژی بەری چەند هەیڤان بوو من و هەڤژینا خوە (دنیا دەهام) كو ئەو ژی شێوەكارە پشكداری تێدا كر، ئەو پێشانگەه ل پاركا نەورۆز بوو ل سەنتەرێ‌ پارێزگەها دهۆكێ‌ و هژمارەكا كەڤالێن من و وێ‌ دوێ‌ پێشانگەهێ‌ دا هاتنە فرۆتن، وەكی دی ژی بەردەوام ب رێكا ئۆنلاین خەلكەك داخوزا چێكرنا كەڤالان ژمە دكەن و ئەم بۆ چێدكەین و بەرامبەر پارەیەكی دفرۆشینێ‌، راستە ئەو پارە نە بهایێ‌ وی كەڤالی یە و شێوەكار نەشێن ژیانا خوە وەكو پێدڤی ژیانا خوە ب فرۆتنا كەڤالان خۆش بكەن، بەس داهاتەكێ‌ بچووكە هەر چو نەبیت دێ‌ شێت هندەك كەرەستەیێن وێنەچێكرنێ‌ بۆ خوە پێ‌ كڕیت.
ل دووماهیێ‌ شێوەكار(شێرزاد مارۆنسی) گۆت: ل دەمێ‌ چێكرنا هەر كەڤالەكی ئەز و هەڤژینا خوە پێكڤە مفای ژ تێبینیێن هەڤدو دبینین و هاریكارێن ئێكێن و داخوزا من ژ خەلكێ‌ مە خوە ژ كڕینا كەڤالێن بیانی، ب تایبەت یێن (چینی) دووربێخن و وەك پشتەڤانی كەڤالێن هونەرمەندێن كورد بكڕن و ل مالێن خوە ب هەلاویسن، هەروەسا فەرە ل رێڤەبەریێن حكومی و هەموو دامۆدەزگەهێن حزبی و لەشكەری ژی كەڤالێن شێوەكارێن كورد ل جهێ‌ وان دهەلاویستی بن، چنكو هەكە ئەم ب خوە پشتەڤانیا هونەرمەندێن كورد نەكەین و كەڤالێن وان نەكڕین پشت راستبن كەسێن بیانی ناهێن پشتەڤانیا مە بكەن و كەڤالێن كوردی بكڕن، بۆ زانین ئەز ژی و هەر شێوەكارەك حەزدكەت پێشانگەهێن تایبەت ڤەكەت لێ‌ پشتەڤانی نەبیت یا ب زەحمەتە، ب تایبەت ژی لڤی سەردەمی كو رەوشا دراییا پتریا مە نەیا باشە و نەشێن پێشانگەهان ڤەكەین، لێ‌ هەكە جهێن شۆلەژێ‌ ب تایبەت ژی رێڤەبەریا رەوشەنبیری و سەندیكا هونەمەندان پشتەڤانیا مە كرن ل وی ددەمی دێ‌ شێین پێشانگەهێن تایبەت ڤەكەین و داهێنانێ‌ دكارێ‌ خوە دا كەین.

زنار تۆڤی:

سترانبێژ (عەلی تەكباش) د دیدارەكێ‌ دا بۆ بەرپەرێ‌ هونەری یێ‌ رۆژنامەیا ئەڤرۆ گۆت: ناڤێ‌ من (عەلی مەجید ئیسلام) ە، پاشناڤێ‌ من تەكباشە، دەمێ‌ ل هەوا ئەنفالان ل سالا 1988 ێ‌، ئەم چووینە جۆلەمێرگێ‌ ل باكورێ‌ كوردستانێ‌، پشتی چەند سالان دەولەتا تورك ئیقامە دامە و ل گەل هندێ‌ وان پاشناڤەك بۆ مە دانا، ئەز خەلكێ‌ گوندێ‌ سپیندارێ‌ مە ل دەڤەرا بەرواری بالا، نوكە ژی مالباتا من ل جۆلەمێرگێ‌ دژین و ئەز ژی ل وەلاتێ‌ بریتانیا دژیم.
ناڤهاتی گۆت ژی: دەمێ‌ ئەز زارۆك ل گوندی بووم، ل وی دەمی بابێ‌ من و برایەكێ‌ من پێشمەرگە بوون، هەروەسا هونەرمەند حەسەن شەریف ژی ل وی دەمی پێشمەرگە بوو، ئەز د چوومە قوتابخانێ‌، ل وی دەمی هندەك ئاهەنگ دهاتنە گێڕان و هونەرمەند حەسەن شەریف ستران دگۆتن و گرۆپەكێ‌ هونەری هاتە چێكرن و مە ل گەل وی گرۆپی ستران دگۆتن و كاریگەریا هونەرمەند حەسەن شەریف گەلەك ل سەر من هەبوو، كو ئەز سترانان بێژم، دایك و بابێ من ژی گەلەك حەز ژ هونەرێ‌ كوردی دكر و برایەكێ‌ من ژی تەمبۆر لێددا و ستران دگۆتن، هەروەسا بابێ‌ من ژی دەنگبێژ بوو، سترانێن محەمەد عارفێ‌ جزیری و عیسا بەرواری و حەسەنێ‌ جزیری دگۆتن، هەروەسا مالا مە وەكو قوتابخانەیەكێ‌ بوو بۆ من، د مال دا ئەز فێری گەلەك تشتان بوویمە، دەمێ‌ ئەز ل جۆلەمێرگێ‌ ژی هەردەم دناڤ كارێ‌ هونەری دابووم، ئەشقا وەلاتی و ئەو زەحمەتا مە دیتی وەكریە، كو ئەز ببمە سترانبێژ.
ل دووماهیێ‌ گۆت: ل جۆلەمێرگێ‌ مە گرۆپێ‌ هونەری یێ‌ (لاوژە) دامەزراند و سترانێن كەڤن یێن دەڤەرا جۆلەمێرگێ‌ كۆم دكرن و ئەرشیف دكرن، هەروەسا مە بەرهەمەك ژی بەلاڤكر كو ژ 13 سترانان پێك دهات، هەروەسا مە چەندین سترانێن سینگل ژی تۆماركرن، دەمێ‌ ئەز ل ئامەدێ‌ ژی، ل گەل شانۆیا باژێرێ‌ مەزن یا ئامەدێ‌ د شانۆگەریا مەم و زین دا وەكو شانۆكار من رۆلێ‌ مەموی گێڕا، هەروەسا د شانۆگەریا هاملێت ژی من رۆل گێرایە، هەكە دەلیڤە چێببیت، ئەز دێ‌ بەرهەمەكی چێكەم، هەر چەندە ژلایێ‌ ئابۆری دا گەلەك زەحمەتی هەنە و ئەڤ چەندە بۆ هەموو هونەرمەندێن كورد ئاستەنگەكە، هەتا بشێن بەرهەمەكی چێكەن، ئەز گوند ب گوند گەڕیایمە، داكو وان سترانان ژ مرنێ‌ رزگار بكەم، ئەز دخوازم وان سترانان ب دەنگێ‌ خۆ بێژم و هەكە ئەم نەچینە كۆنسێرت و ئاهەنگ و فەستیڤالان، ئەم نەشێین سترانەكێ‌ تۆمار بكەین و پەیداكرنا سپۆنسەران ژی كارەكێ‌ ب زەحمەتە، لەوما ئەم دخوازین كەسێن خۆدان شیان هاریكاریا هونەرمەندان بكەن، داكو هونەرمەندێن مە ژی بشێن خزمەتا هونەرێ‌ كوردی بكەن، نوكە من دەه ستران كۆمكرینە، دخوازم بكەمە بەرهەمەك و بەلاڤ بكەم، هەروەسا هندەك سترانێن سینگل ژی دێ‌ بەلاڤكەم و ب دیتنا من مۆزیكا كوردی كاتێكرن ل سەر مۆزیكا گەلەك مللەتێن دی كریە.