د داخویانیەكێ‌ دا سەیف ئەلعگێلی سەرۆكێ‌ فدراسیۆنا تێنسا ئەردی یا ئیراقێ‌ ڕاگەهاند سێ‌ یاریزانێن ڕێزێن ئێكێ‌ یا قارەمانییا ئیراقێ‌ ب دەستڤە ئینایین دێ‌ پشكدارێ‌ د ڤاڤارتنێن كۆپا جیهانی دا كەن، ئەوا بڕیارە د ڤێ‌ مەهێ‌ ژڤان و دەمێ‌ دیاركری بۆ دەستپێكرنا وێ‌ بهێتە دانان.
زێدەتر ناڤهاتی گۆت: ژبۆ ژێگرتنا باشترین یاریزانێن مە بۆ هەلبژارتیێ‌ ئیراقێ‌ پێخەمەت پشكداریكرن د ڤاڤارتنێن كۆپا جیهانی دا، ل حەفتیا بۆری قارەمانیەك ل سەر ئاستێ‌ كچان ل پارێزگەها دهۆكێ‌ هاتبوو كرن و هەڤڕكی ل سەر سێ‌ ڕێزێن ئێكێ‌ هاتبووكرن، پشتی بۆ ماوەیێ‌ سێ‌ رۆژان هەرسێ‌ یاریزانێن پارێزگەها دهۆكێ‌ لارا ئاڤدەل حەسەن، زەلال سەعید خەلیل و هانا ئاڤدەل حەسەن یێن ئێكێ‌ هاتا سێیێ‌ هاتبوو و ب فەرمی بۆ ناڤ ڕێزێن هەلبژارتیێ‌ ئیراقێ‌ هاتنە ژێگرتن ژبۆ پشكداریێ د ڤاڤارتنێن كێشوەرێ‌ ئاسیا دەربازبوون بۆ كۆپا جیهانی.
ژلایەكێ‌ دووڤە سەیف ئەلعگێلی پەسنا پێشكەڤتنا ڤێ‌ وەرزێ‌ ل دهۆكێ‌ كر و گۆت: ب گشتی وەرزش یا بەر ب پێشڤە دچیت لێ‌ ئەوا بۆ مە جهێ‌ دلخوەشیێ‌ یە هەردەم پارێزگەها دهۆكێ‌ بوویە ڕێكخۆشكەر ژبۆ پێشكەڤتنا یارییا تێنسا ئەردی ل ئیراقێ‌، هەروەسان ژبەر هەبوونا پووتەدانێ‌ ژلایێ‌ بەرپرسێن وەرزشی یێن ڤێ‌ دەڤەرێ‌ و ڕاهێنەرێن خودان شیان كۆمەكا باش یا یاریزانێن كچ هاتینە پێش، ئەڤە ژی ڕامانا وێ‌ ددەت كو پارێزگەها دهۆكێ‌ لایەنێ‌ هێزێ‌ یە بۆ پێشكەڤتنا ڤێ‌ یاریێ‌ و ئەم هەردەم پشت بەستنێ‌ ل سەر دكەین، سۆپاسییا هەر لایەكی دكەین بوویە ئەگەر ئەڤ یارییە یا ب هێز بمینیت و بەردەوام بەر ب پێشڤەچوونێ‌ بچیت.

یێ‌ ئوسترالی گێرهام ئارنۆلد ڕاهێنەرێ‌ هەلبژارتیێ ئیراقێ‌ داخازا فەرمی پێشكێشی یاریزانێ‌ ڕەڤەندا كوردستانی ل ئۆرۆپا داریۆ ڕزگار نامۆ كر ژبۆ پشكداریێ‌ د پێكهاتیێ‌ تیما وی دا خوە بەرهەڤكرن بۆ مۆندیالا جیهانی 2026ێ‌ ئەوا بڕیارە هەڤڕكیێن وێ‌ ل 11ێ‌ مەها بهێت ل هەرسێ‌ وەلاتێن ئەمریكا، مەكسیك و كەندا بهێنە كرن و هەلبژارتیێ‌ ئیراقێ‌ پشتی 40 سالان دوبارە ڤەگەڕیایە مۆندیالێ‌.
ژێدەرێن رۆژنامەڤانی دیاركرینە كو د یارییا ئەینیا بۆری یا تیما دهۆكێ‌ بەرانبەر زەورا بابێ‌ وی ڕزگار مانۆ ل یاریگەهێ‌ بەرهەڤبوو، دیسان دگەل بەرپرسێن فدراسیۆنا فوتبۆلا ئیراقێ‌ كۆمبوو ژبۆ دۆڤچوونا ڕێكارێن یاسایی و كارگێری بۆ پشكدارییا داریۆیی دگەل هەلبژارتیێ‌ ئیراقێ‌، دیسان بەرپرسێن یانەیەكێ‌ د خولا ستێرێن ئیراقێ‌ دا داخوازا ئیمزاكرنێ‌ ژێ‌ هاتیە كرن.
هەژی گۆتنێ‌ یە داریۆ ڕزگار مانۆ د ژیێ‌ 20 سالی دایە یاریزانێ‌ یانەیا دندی یۆنایتد یا ئسكۆتلەندیە ژ خەلكێ‌ هەولێرا پایتەختە بابێ‌ وی ل سالێن هەشتیان مەشختبوویە وەلاتێ‌ فنلەندا، دایكا وی فنلەندیە.

شاهۆ فەرید:

د دیدارەکێ دا کورێ باژێرێ سێمێل موسا شوکر گۆلپارێزێ یانەیا ناسریە دیارکر کاروانێ وی دگەل یانەیا خوە یا سەرکەڤتییە و هەست ب ئارامیێ و خۆشیێ دکەت و ئەگەرێن سەرەکی ب هەبوونا ڕێزگرتنا خەلکی وی باژیری ل وی دهێتە گرتن.
زێدەتر ناڤهاتی بۆ رۆژنامەیا ئەڤرۆ گۆت : چوونا من بۆ یانەیا ناسریە وەکو تاقیکرنەکا نوو و پێشئێخستنا ئاستێ خوە بوویە، دماوەیێ ٢٣ یاریێن بۆری یێن خولا پلا نایابا ئیراقێ دا هەشت کلین شێتن من تومارکرینە و پێ دلخوەشم، یاریێن بوری ژی چەندین پەنەلتی من گرتینە و هێرشین مەترسی ڕاوەستاندینە، بزاڤ و ماندیبوونەکا بەردەوام دێ گەهیە ئەڤی ئاستی، ڕاهێنەرێ گۆلپارێزان کاپتن ئیبراهیم سالم خودان سەربۆر و شارەزایەکا باشە دناڤا فوتبۆلا ئێراقێ دا هەیە، کارگێریا یانەیێ هەر ژ دەستپێکا پەیوەندی بمن کری هەمی ئاخڤن جوانی و ڕاستی گوتنە من دێ گولپارێزێ سەرەکی بی کەیف خوەشی یا دەف وان پەیدابی باوەریا وان من هەی وەکی ویێ دەرکەتم.
هەروەسان موسا شوکر گۆت: گرێبەستا من بۆ ئێک وەرزە هێشتا من چ ئاخڤتن نەکرینە کا دێ مینم یان دێ چم، دو گرێبەست بۆ من ژ یانەیێن پلا نایاب ل بەغدا هاتینە، یانەیێ دڤێت گرێبەستا من دووبارە نوو بکەن، لێ هەموو تشت من هەلاویستینە هەتا ئەڤ یارێن مایی کۆ خول دووماهیک بهێت دێ ژنوو دەست گفتوگۆیا کەم.
موسایی گۆت ژی: ئەوان یانەیێن بەغدایی پەیوەندی من کرینە و ئەز کریمە دناڤا پلانێن خوە دا بۆ وەرزێ بهێت، یانەیا ناسریە ژی یا من ڤە گرێدایە و حەزەکا مەزن هەیە کۆ گرێبەستێ نوو بکەن، چونکۆ ئاستێ من گەلەکێ دلێ وانایە بوویمە جهێ ڕازەمەندیا جەماورێ یانەیێ کو ئەوژی ژ من دخوازن و خەلکێ ناسریە بمینمە یانەیا وانا بۆ وەرزەکێ دی لێ هەمی تشت گەل بورینا دەمی دێ دیاربن.

چاڤەڕێ‌ دهێتە كرن وەرزێ‌ ئەڤ سالە یێ‌ خولا ستێرێن ئیراقێ‌ یا فوتبۆلێ‌ دگەل خولێن هەر پێنچ مەزنێن ئۆرۆپایێ ب دووماهی بینیت ئەوژی یێن ئنگلتەرا، ئیتالیا، ئسپانیا، ئەلمانیا و فرەنسا كو دهێتە هژمارتن روودانەكا دیرۆكی بۆ جارا ئێكێ‌ یە د هێتە پێش.
ل دووڤ بەرنامەیێ‌ فدراسیۆنا فوتبۆلا ئیراقێ‌ بڕیارە خولا ستێران بەری دەستپێكرنا مۆندیالا جیهانی 2026ێ‌ ب دووماهی بهێت كو ئێكێ‌ خزیرانێ‌ دانایە دووماهی یارییە ژ خولێ‌ ئەوا بڕیارە مۆندیال ل 11ێ‌ خزیرانا بهێت ل هەرسێ‌ وەلاتێن ئەمریكا، مەكسیك و نەرویج بهێنە كرن، ئەڤ پلانە وەكو ئێكەم پێشهاتەیا دیرۆكی یە د خولا ئیراقێ‌ دا دهێتە كرن ئەوا دەستپێكا وێ‌ ل 13ێ‌ ئەیلوونا سالا بۆری هاتیە كرن.

د دیدارەكێ‌ دا ڕاهێنەرێ‌ تیما فوتبۆلا یانەیا هەولێرێ‌ كەیفخوەشیا خوە دیار كر ژبەر كو تیما وی بەردەوامە ل سەر ئەنجامێن باش و ئەڤچەندە ژی ب كارەكێ‌ كو یێ‌ پشتەڤانیا پارێزگارێ‌ هەولێرێ‌ و كارگێری دا زانین و ئارمانجا تیمێ‌ ژی دا دیار كرن، ئەڤچەندە هات پشتی تیما وی شیایی سەركەڤتنا 19ێ‌ د خولێ‌ دا بنیت و جهێ‌ خوە ل ڕێزا سێیێ‌ ب پارێزیت و 66 خالان كۆمبكەت.
زێدەتر باسم قاسم د پرێس كۆنفرانسێ‌ رۆژنامەڤانی دا گۆت: بۆ وەرزێ‌ ئەڤ سالە ب پشتەڤانیا پارێزگارێ‌ هەولێر ئۆمێد خۆشناو و كارگێرییا شارەزا ئەم شیاین تیمەكێ‌ بەرهەڤبكەین ژبۆ هەڤڕكیێ ل سەر ڕێزێن پێشیێ‌ و هەتا نوكە ئەم یێ‌ بەردەوامین ل سەر وێ‌ هەڤڕكیێ، ئارمانجا مە یا سەرەكی ئەوە هەولێرێ‌ ڤەگەڕینە ل سەر دەمێ‌ زێرین، ژبەركو هەلگرا چار ناسناڤێن ئیراقێ‌ یە و سەنگا خوە یا هەیی، بۆ ئەڤ سالە ئەم بزاڤێن دكەین هەكە بشێن تكێتەكا دەربازبوون بۆ پشكداریێ‌ د قارەمانییەكا دەرڤە دا بكەین.
هەروەسان ناڤهاتی گۆت: یاریێن مایی هەموو بۆ مە فینالن و هەستیارن ژبۆ پاراستنا جهێ‌ خوە، لەوما ژی دڤێت هەموو بزاڤان بكەین هیچ خالەكێ‌ ژ دەست نەدەین، سەرباری یاری ب سانەهی نابن، لێ‌ من باوەری ب شیانێن یاریزانان هەنە بۆ گەهشت بەر ب ئارمانجا یانەیێ‌.

فدراسیۆنا فوتبۆلا ئیراقێ ئیدانەیا ئەوان ڕافتار و هێرشێ دوور ژ گیانێ وەرزشی بەرانبەر دادڤانێ یارییا نەجەف و کارەبا ئەحمەد عەسکەر کر، ئەوا د یارییا بۆری یا گەڕا ٣٢ێ ژ خولا ستێرێن ئیراقێ هاتیە کرن.
د ڕاگەهاندنەکا فەرمی دا فدراسیۆنێ بەلاڤکرییە: ئەوا ل یارییا نەجەف و کارەبا دژى دادڤانێ یاریێ هاتیە کرن سەرپێچی و ڕەفتارەکا نە بەرپرسیارانەیە و پێشهاتیەکێ مەترسیدارە و نا هێتە قەبوولکرن، ئێکسەر مە لژنەیەک پێکئینایە بۆ دۆڤچوونا بابەتى و هەر کەسەکێ خەمسار و ئەگەرێ تێکدانێ دێ ب توندی هێتە سزادان و بڕیار دێ هێتە دان و تانەدان بوو نابیت، هەر هێرشەکا ل سەر دادڤانی هێرشە ل سەر یاسا و سەروەرییا وەرزشا ئیراقێ.