سەرۆك بارزانی ل گەل شاندەكێ هەڤپەیمانییا (حەسم) و هەڤپەیمانییا (نەینەوا بۆ خەلكێ وێ) كۆمبوو.
بارەگەهێ بارزانی بەلاڤكر» ل سەلاحەدین سەرۆك مەسعود بارزانی ل گەل شاندەكێ هەڤپەیمانییا حەسم و هەڤپەیمانییا نەینەوا بۆ خەلكێ وێ ب سەرۆكاتییا سابت عەباسی، وەزیرێ بەرگرییا ئیراقێ كۆمبوو».
بارەگەهێ بارزانی ئاماژە ب وێ چەندێ كر» د دیدارەكێدا رەوشا سیاسییا ئیراقێ هاتە گەنگەشەكرن و بیر و بۆچوون ل دۆر هەلبژارتێن داهاتی یێن جڤاتا نوونەرێن ئیراقێ هاتنە لێكگۆهارتن و دوپاتی ل سەر هەماهەنگییا ئالییان بۆ دەربازكرنا كێشە و گرفتێن سیاسی هاتە كرن».

دوهی دوشەمبی 20/9/2025، مەسرور بارزانی، سەرۆكێ حوكمەتا هەرێما كوردستانێ، د رێوڕەسمێ ڤەكرنا عەمبار و سەنتەرێ پشكنینا پێشوەخت یا كۆمپانییا تۆیۆتا ل دهۆكێ، د وێ رێوڕەسمێدا سەرۆكێ حوكمەتا هەرێمێ پەیڤەك پێشكێشكر و ئەڤە دەقێ وێ یە:
ب خێرهاتنەكا تایبەت ل بالیۆزێ چاپۆنێ دكەم بۆ هەرێما كوردستانێ، هەروەسا سوپاسییا بەرهەڤبوونا قونسل و نوونەرێن كۆمپانییا تۆیۆتا ل ئیراقێ دكەم و دەستخوەشییەكا گەرم ل كاك سەرداری و سەردار گرۆپ دكەم بۆ ڤی كارێ پیرۆز یێ كری.
ب راستی جهێ دلخوەشیێیە كو دبینین وەلاتەكێ وەكو چاپۆنێ، باوەرییەكا وەسا ب هەرێما كوردستانێ هەیە، كو باژێرەكێ كوردستانێ دەستنیشان دكەت بۆ وێ چەندێ ل ڤێرێ هەموو ترۆمبێلێن چاپۆنی كو دهێنە د ئیراقێدا، ل ڤێرێ بۆ باژێرێن دی بهێنە هنارتن. حوكمەتا هەرێما كوردستانێ هەردەم پشتەڤان بوویە و دێ بەردەوام بین ژی د پشتەڤانیكرنا ڤان پڕۆژەیێن مەزندا، پڕۆژەیێن بازرگانی و وەبەرهێنانێ كو بێگومان، دێ هاریكار بن د پێشئێخستنا ئابوورێ هەرێما كوردستانێدا و هاریكارییا خەلكێ هەرێما كوردستانێ كو ئەوژی بشێن زێدەتر فێری كارێن ژ ڤی جۆری ببن.
دلخوەش بووم من دیتی پشكەك ژ كارمەندێن ل ڤی جهی كاردكەن خەلكێ ڤێرێ نە و فێری كارێ پیشەیی دبن. نەك تنێ ترۆمبیل دهێنە ڤێرێ و پاشی دهێنە هنارتن، بەلكو ل ڤێرێ ب شێوەیەكێ گەلەك باش ژ كۆنترۆلا جۆری كو ل ڤێرێ دهێتە كرن، ژ ئالیێ ستانداردەكێ چاپۆنی و پشكەك ژ پارچەیێن وان ترۆمبێلان ژی ل ڤێرێ دهێنە گرێدان. ئەڤە هەموو دروستكرنا دەلیڤەیێن كارییە، زێدەتر شارازەییێ دئینیتە د ناڤ وەلاتیدا، خەلكێ مە دێ فێری كارێ باشتر بن و هیڤیدارم زێدەتر ژ ڤێ چەندێ كارێ پیشەیی بهێتە دروستكرن، كارێن ژ ڤی جۆری، و ئەڤ كۆمپانییا ژی بشێت كارێن گەلەك ژ ڤی مەزنتر ژی ئەنجام بدەت.
پشتڕاست بن ژ وێ چەندێ كو حوكمەتا هەرێما كوردستانێ دێ پشتەڤانا هەوە بیت بۆ پاراستنا هەموو مافێن بازرگان و وەبەرهێنەران و د هەمان دەمدا حوكمەتا هەرێمێ وەكو هەردەم دێ پارێزەرا مافێن وەلاتییان ژی بیت و ئەو هەڤبەندییا ساخلەم كو پێدڤییە د ناڤبەرا بارزگان و وەلاتییاندا بهێتە دروستكرن، دێ حوكمەت هاریكار و پشتەڤان بیت و ئاسانكاریێن پێدڤی ژی دێ بۆ كەت.

مەسرور بارزانی، سەرۆكێ حوكمەتا هەرێما كوردستانێ، د رێوڕەسمەكیدا جووتسایدێ نوو یێ شێخان – لالش ڤەكر.
د وی رێوڕەسمیدا سەرۆكێ حوكمەتا هەرێما، پەیڤەكا گرنگ پێشكێشكر و راگەهاند: سەرەرای قەیرانان، بەلێ كاروانێ ئاڤەدانیێ نەراوەستیا.
مەسرور بارزانی ئەوژی بەرچاڤكر، بجهئینانا پڕۆەژەیان بۆ خزمەتكرنا وەلاتییان دێ بەردەوام بیت.
دەقێ پەیڤا سەرۆكێ حوكمەتا هەرێما كوردستانێ:
خووشك و برایێن هێژا.. بەرهەڤبوویێن قەدرگران… ب خێرهاتنەكا گەرم ل هەوە هەموویان دكەم.
ب تایبەت سوپاسییا بەرهەڤبوونا میر حازم و بابەشێخ و جڤاتا رۆحانی و كەسایەتیێن ئۆلی و ئایینی یێن ڤێ دەڤەرێ دكەم كو د ڤێ رێوڕەسمێدا و ب ڤێ هەلكەفتێ پشكدارن.
بەری سالەكێ ئەم ل ڤێرێ بووین و مە سۆز دابوو كو جادەیا شێخان بۆ لالشا پیرۆز دێ كەینە جووتساید، سوپاس بۆ خودێ پشتی سالەكێ زڤرین و ئەڤرۆ ئەم یێ ل ڤێرێ بۆ ڤەكرنا ڤێ جادەیێ.
بێگومان هەر كارەكێ ئەم بكەین، بۆ خزمەتكرنا وەلاتیێن مەیە، ئەركێ مەیە، ب تایبەت ئەڤ دەڤەرە گەلەك یا گرنگە ژ ئالیێ دیرۆكی و ئایینی و پێكڤەژیانێ و شۆرشگێرییا د دیرۆكا گەلێ مەدا گەلەك شۆرشگێر ل ڤێ دەڤەرێ رابوون، ئەركێ مەیە ئەم خزمەتا ڤێ دەڤەرێ بكەین، لەوما هەر كارەكێ بكەین ئەم ب ئەرك دزانین و خوەشحالین كو ئەڤە ئێك ژ وان پڕۆژەیێن ل ڤێ دەڤەرێ هاتینە ئەنجامدان و بێگومان ئەڤ پڕۆژە دێ د بەردەوام بن ل سەر ئاستێ پارێزگەهێ و ل جهێن دی ژی.
خووشك و برایێن مە یێن ئێزدی پشكەكا رەسەنێن كوردستانێنە و هەروەك سەرۆك بارزانی گوتی، كوردێن رەسەن ئێزدینە. ژ بەر وێ چەندێ ب هیچ جۆرەكی ئەم ژێك ناهێنە جوداكرن و ئەز دزانم ئەڤ دەڤەرە چەند یا گرنگە بۆ خووشك و برایێن ئێزدی و گەلەك خەلك ژ سەرانسەری جیهانێ دهێنە ڤێرێ و سەرەدانا لالشا پیرۆز دكەن و پشتی چەند رۆژێن دی ژی وەك مە گوهلێبووی دیسان سەرەدانكەر دێ هێنە ڤێرێ. هیڤیدارم ئەڤ خزمەتگوزارییە ئاسانكاریێ بكەت بۆ هاتنوچوونا خووشك و برایێن مە و هەروەسا ئەڤ جادەیە دێ خزمەتا خەلكێ دی ژی كەت كو ڤێ دەڤەرێ پێكڤە گرێددەت.
پڕۆژەیێن دی ژی یێن هەین ئەوژی دێ هێنە ئەنجامدان، ئەڤە ژی هەموو پێگڤە دێ هێنە گرێدان و بابەتێ هاتنوچوونێ بۆ وەلاتییان ساناهیتر دكەت و روودانێن هاتنوچوونێ ژی دێ كێمتر كەن و بۆ سەلامەتییا وەلاتییان دێ گەلەك باشتر بیت و هیڤییا من ئەوە كو وەلاتی ژی كارەكێ وەسا بكەن كو رێنمایێن وەزارەتێ و پۆلیسێن هاتنوچوونێ ل بەرچاڤ بگرن بۆ سەلامەتییا خوە و كەسوكار و وەلاتیێن دی ژی.
باوەرییا مە ئەوە كو چەند ئەم بشێین خزمەتا مللەتێ خوە بكەین، پێكڤە دێ شێین بەختەوەرتر بین. مە دخواست پشتەڤانییەكا زێدەتر ل سەر ئاستێ حوكمەتا فیدرالی بۆ هەرێما كوردستانێ هاتبا كرن، بەلێ سەرەرای هەموو وان قەیرانێن مە دیتین، دیسان پڕۆژەیێن ئاڤەدانكرنێ ل ڤێرێ نەهاتنە راگرتن، پشكەكا مەزن یا ڤێ چەندێ دزڤریت بۆ باوەرییا كۆمپانیێن كەرتێ تایبەت كو باوەرییەكا مەزن ب حوكمەتا هەرێمێ هەبوو و ئەڤ پڕۆژە ل سەر ئەركێ خوە بجهئینا، جهێ دەستخوەشیێیە. ژ بەر وێ چەندێ من پێخوەشە سوپاسییەكا تایبەت یا كۆمپانییا جێبەجێكار بكەم بۆ ئەنجامدانا ڤی پڕۆژەی كو ب راستی د دەمەكێ گەلەك كێم دا و ب ستانداردەكێ جیهانی و نێڤدەولەتی ئەڤ جادەیە بجهئینا. دەستخوەشیێ لێ دكەم و هیڤیدارم بەردەوام بن د خزمەتكرن و بجهئینانا پڕۆژەیێن دی ژی ل هەر جهەكی كو ئەڤ ئەركێ پێ بهێتە سپاردن.
من پێخوەشە ل ڤێرێ باسێ بابەتێ خووشك و برایێن مە یێن ئێزدی بكەم كو چەندین سالە روو ب روویێ نەخوەشی و نەهامەتیێ بوون، بەلێ هەموو دەمان ب هێزتر مان و ل سەر پییێن خوە راوەستان و روو ب روویێ پیلانێن دوژمن و نەحەزان بوون. ئەز ئێك ژ وان كەسانم كو وەك دیدەڤان دەمێ ل خزمەتا سەرۆك بارزانی بووین دەمێ داعشا دڕندەیا تیرۆرست هێرش ئینایە سەر شنگالێ، سەرۆك بارزانی وی دەمی گوت: یان شنگالێ دێ رزگار كەین، یان ژی دڤێت ئەم هەموو خوە ل سەر دابنین. ب پشتەڤانییا خودێ، سەرۆك بارزانی، سەركردایەتییا لەشكرێ كوردستانێ كر بۆ ئازادكرنا شنگالێ و پشتی 100 رۆژان، سۆزا سەرۆك بارزانی هاتە بجهئینان, راستە مە ب سەدان شەهید دان، بەلێ مە وەنەكر ئیرادەیا مە بهێتە شكاندن، ل دەف سەرۆك بارزانی سەربلندییا خووشك و برایێن مە یێن ئێزدی ژ هەموو تشتەكی گرنگتر بوو كو جارەكێ ل سەر چیایێ شنگالێ گوت: نوكە ئەم ل ڤێرێ نە و سەرێن دوژمنێن خووشك و برایێن مە یێن ئێزدی د بن پییێن مەدانە.
ئەڤ پێكڤەژیانا ل كوردستانێ هەی و ئەڤ پەیوەندییا رەسەن ئەوا د ناڤبەرا ئێزدی و مە دا هەی، ب هیچ تشتەكێ ناهێتە ژێكجوداكرن، هەرچەندە بزاڤێن مەزن دهێنە كرن بۆ وێ چەندێ خووشك و برایێن مە یێن ئێزدی ژ شنگالێ دووربێخن. مە بزاڤەكا جدی كر بۆ وێ چەندێ رێككەفتنا شنگالێ ل گەل حوكمەتا فیدرالی بهێتە بجهئینان، بەلێ دیسان هەتا ڤی دەمی ژی ئەڤ رێككەفتنە نەهاتیە بجهئینان، چونكە هندەك هێزێن ژدەرڤەی قانوونێ خوە ل وێرێ سەپاندیە و داخوازییا مە ژ حوكمەتا فیدرالی ئەوە پێنگاڤێن جدی بهێنە هاڤێتن و ئاسانكاری بهێتە كرن تاكو خووشك و برایێن مە یێن ئێزدی ب سەربلندی بزڤرنە شنگالێ، دێ بەردەوام بین ژی بۆ وێ چەندێ هەموو وەلاتیێن مە، چ ئێزدی بن، موسلمان بن، عەرەب بن، توركمان بن، كریستیان بن، ب سەربلندی بزڤرنە سەر مال و حالێن خوە ل وێ دەڤەرێ كو مخابن ژ بەر هێرشا دڕندانەیا تیرۆرستان هاتبوو بجه هێلان، پێدڤییە هەر بزڤرن و گرێدانا ئاخ و ئاڤا مە ب هیچ پیلانەكا سیاسی ناهێتە ژێكجوداكرن.
حەز دكەم ب دەلیڤە ببینم و بۆ خووشك و برایێن هێژا باسێ وێ چەندێ بكەم كو دانوستاندنێن مە ل گەل حوكمەتا فیدرالی ژی ل سەر بابەتێ دابینكرنا بودجەی و مووچەی د بەردەوامن، مە گەلەك جاران یا گوتی كو هیچ ئاستەنگەیك نەمایە، ب راستی ژی ژ ئالیێ حوكمەتا هەرێما كوردستانێڤە هیچ جارەكێ ئاستەنگ نەهاتینە دروستكرن، هەموو جاران هەر بەهانەیەكا هەبا، مە بزاڤكریە لادەین بۆ وێ چەندێ بابەتێ شایستەیێن دارایی یێن خەلكێ هەرێما كوردستانێ بهێنە دابینكرن. ل دوماهی دانوستاندنێن مە ل گەل بەغدا، نوكە وەكو هاتیمە ئاگەهداركرن كو دیارە تێكگەهشتن و رێككەفتنەك د ناڤبەرا كۆمپانیێن وارێ بەرهەمئینانا پەترۆلێ ل هەرێما كوردستانێ و حوكمەتا فیدرالی هەیە، ئەڤە دێ بیتە دەستپێكەكا گەلەك باش بۆ نەهێلانا وان ئاستەنگێن هەتا نوكە ماین. هیڤییا من ئەوە ل رۆژێن داهاتی ئەڤ رێككەفتنە ببیتە واقع و ببیتە جهێ رازیبوونا هەموو ئالییەكی و حوكمەتا ئیراقێ ژی پێگیرییا خوە بەرامبەر ماف و حەقێ خەلكێ كوردستانێ بجهبینیت و ئێدی بابەتێ مووچەی نەبیتە سەردێرا دەنگوباسێن رۆژانە. هیڤییا من ئەوە بگەهینە ئەنجامەكێ ئەرێنی د دەمەكێ نێزیكدا.

دوهی شەمبیێ 20/9/2025، مەسرور بارزانی، سەرۆكێ حوكمەتا هەرێما كوردستانێ پاركا سەرهلدان ل دهۆكێ ڤەكر و د پەیڤەكێدا راگەهاند: رۆژێن خوەشتر ل پێشبەری مەنە و دێ كارێن باشتر كەین.
دەقێ پەیڤا سەرۆكێ حوكمەتا هەرێما كوردستانێ:
هێزا مە د باوەرییا مەدایە ب خودایێ مەزن بۆ پشتەڤانیكرنا پێشمەرگێ قەهرەمان و خەلكێ خۆڕاگرێ كوردستانێ.. ب خێرهاتنەكا گەرم ل هەموو بەرهەڤبوویێن هێژا دكەم و گەلەك خوەشحالم كو ئەڤرۆ ل گەل هەوە ل ڤێرێ و ب ڤێ هەلكەفتێ پشكدارم د ڤەكرنا پاركا سەرهلدان دا كو بەری سالەكێ بەرێ بنیاتی هاتبوو دانان ل تاخێ بەرۆشكی كو بەری چەند سالان هاتبووم ومن سەرەدانا ڤێرێ كربوو، ب راستی من هەست ب وێ چەندێ كر كو وەك پێدڤی كارێ خزمەتگوزاری بۆ ڤێ پشكا باژێرێ دهۆكێ نەهاتیە ئەنجامدان، دبیت خەلكێ ڤی تاخی ژ روویێ شیانێن داراییڤە وەك پێدڤی د زەنگین نەبن، بەلێ ئەوا من دیتی و ل گەل ئاخڤتیم، ب راستی من دیت كو خەلكەكێ گەلەك زەنگین ئاكنجیێن ڤێرێ نە، زەنگین ب بیروباوەرێن خوە، زەنگین ب نیشتمانپەروەریێ و خزمەتا خوە. گەلەك مالێن شەهیدان و پێشمەرگێن قەهرەمان ل ڤێرێ نە كو هەژی وێ چەندێ نە هەموو خزمەتگوزاری بۆ بهێنە ئەنجامدان، لەوما دەمێ داخوازا ڤەكرنا ڤێ پاركێ هاتیە كرن، مە ب دل و گیان خواست ئەڤ پاركە بۆ بهێتە دروستكرن.
جهێ دەستخوەشیێیە كو كۆمپانییا جێبەجێكار د دەمێ سالەكێدا ئەڤ پاركە دروستكر و ب شێوەیەكێ گەلەك جوان ئەڤرۆ ئەم یێن دبینین یا بەرهەڤە بۆ پێشوازیكرنێ ل خەلكێ دهۆكێ.
بەری نوكە ڤێرێ جهێ خودان پیشەییان بوو كو پیشەسازییا ترومبێلان بوو و گەلەك خەلكی ل ڤێرێ كاردكر، بەلێ جهێ كارێ وان یێ گونجای نەبوو بۆ وان كارێن تێدا دكەن، لەوما بڕیار هاتە دان جهەكێ دی بۆ وێ پیشەسازیێ بهێتە ئامادەكرن و ب خوەشحالیڤە نوكە ئەو خودان پیشە ل جهێ نوو یێ خوە د كارێن خوە دا د بەردەوامن و ئەڤگ پاركە ژی ل ڤێرێ هاتیە دروستكرن بۆ خەلكی، ب تایبەتی ژی ل ڤێ پشكا باژێرێ دهۆكێ كو گەلەك خزمەتگوزاری تێدا هاتینە بەرهەڤكرن، ژ روویێ ساخلەمیڤە باوەرییا من ئەوە كو خەلكەك دێ مفای ژێ بینن، ژ روویێ وەرشی ڤە جه هاتینە دەستنیشانكرن كو هەتا بۆ زارۆیان ژی هندەك جه یێن هاتینە بەرهەڤكرن و دشێن دەمێ خوە لێ ببۆرینن.
هیڤییا من ئەوە كو هەوە دەمەكێ خوەش ل ڤێ پاركێ و جهێن دی هەبیت، ئەڤە ئێك ژ وان پڕۆژایە كو د بەردەوامین ل سەر ئەنجامدانا وان، هەروەك پێشتر ژی من باسكری ل ئالۆكا پاركەكا دی ژی كار یێ تێدا دهێتە كرن، دیسان ئەو پاركە ژی دێ هێتە تمامكرن و دێ كەڤیتە د خزمەتا خەلكێ دهۆكا رەنگیندا.
جهێ دلخوەشیێیە كو ئەم دبینین ئەنجامێ پڕۆژەیان یێ دیار دبیت و خەلك مفای ژێ دبینن، هیچ منەتەك تێدا نینە، ئەڤە ئەركێ مەیە و پێدڤییە ئەم خزمەتا خەلكێ خوە بكەین. هیڤیدارم خەلكێ مە ژی، قەهرەمانێن ڤی مللەتی، خەلكەكێ خۆڕاگرە بەرامبەر وان هەموو ئاستەنگان و وان هەموو نەهامەتییان كو روو ب روویێ مللەتێ مە بووین، راوەستان و بەردەوام بوون د خۆڕاگریێدا، رۆژێن خوەشتر ل بەراهییا مەنە و ئینشائەللا گەلەك پڕۆژەیێن باشتر ژی ل دهۆكێ و هەموو باژێرێن كوردستانێ دێ هێنە ئەنجامدان و كەڤنە د خزمەتا وەلاتییاندا.
بابەتەك هەیە دخوازم ئاماژێ پێ بدەم، ل ڤان دۆ رۆژێن كو ل ڤێرێ بووم، من سەرەدانا هندەك جهێن دی ژی كر، چوومە رەخێ سواراتوكا و زاویتە و سەرسنكێ و ئامێدیێ و شێخان و شاریا و بەنداڤا دهۆكێ ژی، وەلاتێ مە وەلاتەكێ گەلەك خوەش، جهێن گەشتیاری یێن خوەش تێدا هەنە، بەلێ خالەكا جهێ پێدڤییێیە ل سەر راوەستین، ئەوژی ژینگەهپارێزییە، مخابن من دیت گەلەك پاشمایی و گلێش ل سەر رەخێن جادەیان هاتینە هاڤێتن كو ئەڤە ل گەل كەلتوورێ مە ناگونجیت، هیڤییا من ژ خەلكێ كوردستانێ ئەوە، ژینگەها خوە بپارێزن، وەلاتێ خوە بپارێزن، وەلاتێ مە مالا مەزن یا مەیە و پاراستنا وی وەلاتی ئەركێ مە هەموویانە. داخوازا من ئەوە ئەو گەشتیارێن كو سەرەدانا ڤێرێ دكەن، دیسان رێنمایی بۆ بهێنە دەركرن كو پێدڤییە سەقایێ كوردستانێ، ژینگەها كوردستانێ بپارێزن، ئەز داخواز دكەم و دبێژمە بەرپرسێن ڤی واری، پێدڤییە بۆ هەر كەسەكێ كو ژینگەها كوردستانێ پیس دكەت، هەوە پێرابوون هەبن و سزای بۆ دیار بكەن، چونكە ب راستی جهێ قەبوولكرنێ نینە ئەڤ وەلاتێ پیرۆز یێ بهوست ب بهوستا ڤێ ئاخێ خوونا شەهیدێن مە لێ هاتیە رژتن، بهێنە پیسكرن. هیڤییا من ژ خووشك و برایێن خوەشتڤی ل باژێرێ دهۆكێ و ل هەموو كوردستانێ ئەوە، ژینگەها خوە بپارێزن، تاكو ئەم ژی بشێن زێدەتر خزمەتا هەوە بكەین، نەك ب ڤێ پاركێ، چەندین پارك و جهێن دی ژی یێن گەشتیاری دێ ئاڤا كەین و ئەڤان پڕژەیان دێ بجهئینین.
جارەكادی هیڤییا سەركەفتنێ بۆ هەوە دخوازم، هیڤیدارم هەوە دەمەكێ خوەش هەبیت، پیرۆز بیت پاركا سەرهلدان ل تاخێ بەرۆشكێ و ل هەموو خەلكێ دهۆكێ و هەموو خەلكێ كوردستانێ پیرۆز بیت، هوون هەژی گەلەك زێدەترن و هەكە خودێ پشتەڤان بیت، ئەوا دشیانێن مە دا بیت د خزمەتكرنا هەوە دا دێ بەردەوام بین.