شاهۆ فەرید:
د داخویانیەكا تایبەت دا محەمەد جبرائیل راهێنەرێ تیما تایكواندۆیا یانەیا پیرس بۆ رۆژنامەیا ئەڤرۆ دیار كر ب فەرمی ئەو یێ بەرهەڤییان دا بۆ قارەمانییەكا نێڤدەولەتی ئەوا بڕیارە ل دەستپێكا مەها بهێت وەلاتێ قەتەر هێتە كرن.
زێدەتر ناڤهاتی گۆت: نوكە تیم ب باشی بەرهەڤبێن خوە بۆ قارەمانیبا جی وان دكەت ئەوا دێ ل پایتەختێ قەتەر ل دەوحە هێتە كرن، ئێك ژ مەزنترین قارەمانیێن یارییا تایكواندۆیێ یە كۆ سالانە دهێتە ئەنجامدان، یانەیێن هێز د ئەڤێ یاریێ دا تیمێن وانا پشكدارن سەرانسەری وەلاتێن جیهانێ، ئەم ژی وەكۆ یانەیەكا دهۆكێ و كوردستانی پشكداریێ دكەین، پالپشتیا مە ژلایێ وەبەرهێنەریێ وەرزشی كاپتن هەرژەنگ بابەكر زێباری هاتیەكرن، داخازێ ژ جهێن پەیوەندیدار دكەین هاریكاربن دگەل مە ژبۆ پشكدارییەكا سەرفەراز و هەڤڕكی بۆ ڕێزێن پێشیێ د ڤێ قارەمانیێ دا.
زێدەتر محەمەدی گۆت ژی: ئەم دێ ب سێ یاریزانان پشكداربن ئەو ژی ب دو كۆڕ و كچەكێ ئەوێن خودان ئاستێن باش ل سەر ئاستێ كوردستانێ و ئیراقێ، ئەڤچەندە هات پشتی چەندین قارەمانیێن ناڤخوەیی و دەرڤە مە پشكداریی كری مە بڕیار دا ئەڤ جارە قارەمانیەكا هەرە ب هێز بكەین، مە ئەنجام و ڕێزبەندیێن باش دەستڤە ئیناینە ئەڤ قارەمانیە ئاست و شیانێن وێ مە هەنە و گەشبینن دێ گەهینە پلێن باش، هەر ئێك ژ یاریزان سیداد كوڤان بۆ كێشەیا 49 كیلوگرامی و عمر كۆڤان 45كیلوگرام و یاریزانا كچ وارڤین عەبدولكەریم بۆ كێشەیا 37 كیلوگرام پشكداربن، ئەم دێ لسەر ئەڤان ئاستان پشكداربین، هەمی بەرهەڤی و رێكخستنێن خوە ئەنجامداینە بۆ ئەڤێ قارەمانیێ.
نيشاندان