كارگێرییا یانەیا دهۆك یا وەرزشی ب فەرمی گرێبەست دگەل هێرشبەرێ‌ سینیگالی بۆلی جۆنیۆر سامبۆ بۆ ئێك وەرز ئیمزاكر ژبۆ ب دووماهی ئینانا پێكهاتیێ‌ تیما خۆ د هێلا هێرشبرنێ‌ دا و هێزكرنا ڕێزێن تیمێ‌، یاریزانێ‌ ناڤهاتی ل چامپیۆنزا ئەفریقیا و یانەیێن مەغربی یاری كرییە.
ل دووڤ دووماهی لیستا یاریزانێن یانەیا دهۆكی ڕاهێنەرێ‌ تیمێ‌ یێ‌ بەرازیلی سێرچیۆ ڕیكاردۆ دی پاڤیا ڤاریاس شەش یاریزانێن پیشەكار دناڤ ڕێزێن تیمێ‌ دانە، ئەوژی هەر ئێك یێ‌ كرواتی ئێڤان نێڤۆسیلیچ ل هێلا بەرەڤانیێ‌ یاریێ‌ دكەت، یێ‌ لوینانی كەریم دەرویش ل هێلا هێرشبەریێ‌، یێ‌ كۆتیڤۆاری یانیك زاكێری ل هێلا ناڤین، یێ‌ بەرازیلی لیۆ كۆستا ل هێلا ناڤین یێ‌ سینیگالی خادم رەسوول ل هێلا بەرەڤانیێ‌ و یێ‌ شەشێ‌ ئەڤ هێرشبەرێ‌ سینگالی بوویە، ژلایەكێ‌ دووڤە ژبەر نە سەركەڤتنا وی د تێستا تیمێ‌ دا ڕاهێنەرێ‌ تیمێ‌ و كارگێرییا یانەیێ‌ بڕیار دا بوو ب دوورئێخستنا هێرشبەرێ‌ بەرازیلی جواو كابال.
لدۆر هاتنا هێرشبەرێ‌ نوو سلێمان زەكی شرۆڤەكارێ‌ وەرزشی بۆ رۆژنامەیا ئەڤرۆ گۆت: هەرچەندە ئینانا هێرشبەرەكی د دەمەكێ‌ نەخۆش دا هاتییە، ژبەركو ڕاهێنەری ئەو دەم نابیت تێستا دگەل بكەت یان ژی یاریزان هەتا دگەل پێكهاتیێ‌ تیمێ‌ و یاریزانان ب گۆنجیت ئەوچەندە ژی دەم بۆ دڤێت سەرباری خول یا درێژە بتنێ‌ یارییەك چوویە، هەرچەوابیت هێرشبەرەكێ‌ پیشەكارە د خولا مەغربێ دا كرییە، ل دووڤ ساخلەتێن وی شیانێن باش هەنە دبیت ئاریشەیا هێلا هێرشبەرییا دهۆكێ‌ چارەسەربكەت، ب هیڤی نە مفایی بگەهینە تیمێ‌ و ببیتە گۆلكەر.
حەفتییا بهێت كۆمبوون دێ‌ هێتە كرن
ل دووڤ ژێدەرێن ڕۆژنامەڤانی دهێتە گۆتن ل حەفتییا بهێت فدراسیۆنا فوتبۆلا ئیراقێ‌ و لژنەیا سزایان و دەستپلینێ‌ ئیراقێ‌ كۆمبوونەكا تایبەت ل سەر پێداچوونا ئەوان سزایێن ل سەر هەردو یانەیێن دهۆك و زاخۆ هاتینە سەپاندن دەرئەنجامێ‌ روودانێن پشتی یاریێ‌ ل یاریگەها شەعب هاتییە پێش، ئەڤچەندە هات پشتی لژنەیا ناڤهاتی سەرەدانا پارێزگەها دهۆكێ‌ كرین و دگەل سەرۆكێ‌ هەردو یانەیێن دهۆك و زاخۆ كۆمبوون ژبۆ وەرگرتنا سۆزنامەیێن جودا كو كۆنترۆلا یاریگەهێ‌ و جەماوەری بهێتە كرن.

كوڕێ‌ باژێرێ‌ زاخۆ و یاریزانێ‌ هەلبژارتیێ‌ ئیراقێ‌ هارۆن عەبدوللا شیا سەركەڤتنێ‌ ل سەر یاریزانێن هندستانێ‌ و ئیندۆنیزیایێ‌ ئیناین، د هەڤڕكیێن قارەمانییا ئاسیا یا تایكواندۆیێ‌ ئەوا ل وەلاتێ‌ مالیزییا هاتینە كرن.
ل دۆر ڤێ‌ یەكێ‌ سەلام عەلی ڕاهێنەرێ‌ یانەیا زاخۆ و هارۆن عەبدوللای بۆ رۆژنامەیا ئەڤرۆ گۆت: وەكو ئێكانە یاریزانێ‌ كوردستانی و دەڤەرا بەهدینان هارۆن عەبدوللا بناڤێ‌ هەلبژارتیێ‌ ئیراقێ‌ پشكدار د قارەمانییا ئاسیا ل سەر ئاستێ‌ لاوان دا دكر، ئەوا ل دەستپێكا ڤێ‌ مەهێ‌ ل وەلاتێ‌ مالیزییا ب پشكدارییا باشترین یاریزانێن ئاسیا هاتییە كرن.
هەروەسان ناڤهاتی گۆت، سەرباری هارۆن عەبدوللایی نە شیا چو میدالییا بینت لێ‌ شیا دو سەركەڤتنا ل دووڤ ئێك ل سەر هەر ئێك ژ یاریزانێ‌ وەلاتێ‌ هندستان و ئەندۆنیزیا، ب تنێ‌ ب خالەكێن كێم نەشیا سەركەڤتنی ل سەر قارەمانێ‌ وەرزێ‌ بۆری یێ‌ وەلاتێ‌ كوریا باشۆر بینت د هەڤڕكییەكا دژوار دا لێ‌ شیا باشترین ئاست كو بوو جهێ‌ حێبەتییا هەموو ئامادەبوویان و دیسان شیا وەكو یاریزانەكێ‌ پلەكری دناڤ لیستا یاریزانێن كێشوەرێ‌ ئاسیا پلەیا یاریزانێ‌ پیشەكار دوپات بكەت.
هەروەسان سەلام عەلی گۆت: ئەو ئەنجامێ‌ یاریزانێ‌ باژێرێ‌ مە ئینایی گەشتن ب قووناغا پێش دووماهییا قارەمانیێ‌ ڕێكخوەشكەر بۆ هارۆنی پەیداكرییە بەر ب قارەمانیێن مەزنتر یێن نێڤدەولەتی بچیت، هەروەسان ببیتە پالدەر ئەو یاریزانێن مە هەیین ل زاخۆ پشت بەستنێ‌ ل سەر هێز و شیانێن خوە بكەن، پێنەڤێت مە بەرنامە و پلانێن پێشتر دانابوون و هەتا نوكە كۆمەكا باش یا یاریزانان دهێنە دیتن وەكو هارۆنی دێ‌ هەڤڕكیێ‌ كەن، هیڤییا مە ئەوە بەرپرسێن وەرزشی و ئیدارا سەربەخوەیا زاخۆ پشتەڤانیێ‌ ل كوڕێن باژێرێ‌ خوە بكەت.

رەمەزان زەكەریا

یانەیا بەردەڕەش یا وەرزشی قارەمانا وەرزێ 2024-2025 یا خولا پلە دو یا كوردستانێ بۆ ماوەیەكە خۆ بەرهەڤ دكەت ژلایێ‌ هونەری و بەردەستكرنا هەر پێدڤییەكێ‌ بۆ وێ چەندێ ل دەمێ داهاتی دەست ب مەشق و راهێنانا بكەن ژبۆ باشترین ئامادەكاری بۆ وەرزێ نوویێ خولا پلە ئێكا كوردستانێ .
ل دۆر ڤێ‌ یەكێ‌ و د داخویانیەكێ‌ دا زەهدی عەبدولقادر سەرپەرشتێ تیما فوتبۆلا یانەیا بەردەڕەش بۆ رۆژناما ئەڤرۆ گۆت: پشتی ب سەرفەرازی مە وەرزێ 2024-2025 دەربازكری و بووینە قارەمانا خولا پلە دو یا كوردستانێ‌ و ناسناڤ ب دەستڤەئینایی، دەستكەفتەكێ مەزن و هێز بەخش بوو بۆ تێمی و دەستەیا كارگێری بۆ وەرزێ ئەڤسالە ژی دێ ب باشترین شێوە خۆ بەرهەكەین چاڤەرێ دەستپێكرنا یاریێن خولێ كەین.
ناڤبری گۆت ژی: ل دووڤ پلانا هاتییە دانان بڕیارە ل دەستپێكا مەها بهێت تیما مە یا فوتبۆلێ‌ راهێنانان بكەن وەكو بەرهەڤی بۆ خولا پلە ئێكا كوردستانێ، دێ بزاڤێ كەین هژمارا مەزن یا یاریزان ژ ناڤخۆ بن سەرەرای دێ هژمارەكا یاریزانێن نوو ئینین دناڤ رێزێن یانەیێ دا ب مەرجەكێ راهێنەرێ یانەیێ پەسەند بكەت.
ناڤهاتی خویاكر : تیما مە دێ هەموو بزاڤێن خوە كەت ل گۆر شیانێن ل بەر دەست بۆ وێ چەندێ سەركەڤیت بۆ خولا پلە نایابا كوردستانێ، ل وەرزێ بۆری ئاستەكێ باش پێشكێشكر ب هیڤینە ئەڤسالە ئاستەكێ باشتر هەبیت ژبەركو هەڤكریا پلا ئێك ب زەحمەت ترە ژ پلە دو بۆ وێ چەندێ بگەهین خولا نایاب دێ هەموو هێزا خوە پێشكەش كەین و پشتەڤان بین دگەل یاریزانان ئەوا دشیاندابیت دێ بۆ دابینكەین ژبەركو ئارمانجامە سەركەفتنە بۆ خولا نایابا كوردستانێ .

بڕیارە ئەڤرۆ ژی ل دانێ‌ شەڤێ‌ شەش یاریێن دی ژ هەڤڕكیێن گەڕا ئێكێ‌ و دەستپێكا وەرزێ‌ نوو یا قارەمانییا یانەیێن ئۆرۆپا قارەمانێن خولا چامپیۆنز لیگ ب ئەنجامدانا چەند یاریێن ئاگرین بهێنە كرن.
یاریێن دەمژمێر 7:45 شەڤ بڤی شێوەیی نە
یانەیا ئۆلمپیاكۆس یا یۆنانستانی دێ‌ ل یاریگەها خوە یانەیا باڤۆس یا قوبرسی كەت كو دبیتە ئێك ژ دێربیێن یانەیێن رۆژهەلاتا ئۆرۆپایێ‌، ژلایێ‌ خوەڤە یانەیا بۆدۆ گلێمت یا نەرویجی دێ‌ بیتە مێڤانا یانەیا سلاڤا براگا یا چیكی د یارییەكا دی كۆ بیتە یا فایكینگ و شەركەرێن ناڤەڕاستا ئۆرۆپا دا.
چار یاریێن ئاگرین د شەڤەكا ئارام دا
بڕیارە هەر د ئەڤ شەڤە دا چار یاریێن دی یێن ئاگرین د ئێك دەمدا بهێتە كرن ئەوژی ل دەمژمێر 10سی شەڤ بڤی شێوەیی بن.
ئەیاكس ئەمستردام- ئینتەر میلان
ئێك ژ یاریێن ب هێز یێن ڤێ‌ گەرێ‌ یانەیا ئەمستردام ل یاریگەها خوە دێ‌ مێڤاندارییا ئینتەر میلان كەت، دیدارێن هەردو یانەیان د بەروژەوەندییا یانەیا ئیتالی دایە، ژ پێنچ یارییان دو سەركەڤتن ئیناینە و سێ‌ وەكهەڤی، یارییا ئەڤ شەڤە یا تۆلڤەكرنا دیرۆكێ‌ یە، بۆ زانین ئەیاكس خودانا چار ناسناڤێن چامپیۆنزێ‌ یە ل سالێن(1971- 1972- 1973- 1995ێ‌)، د بەرانبەر دا ئینتەر میلان سێ‌ ناسناڤ هەنە ئەوژی ل سالێن( 1964- 1965- 2010).
بایرن میونخ- چێلسی
یارییەكا دی یا پری هەڤڕكی و جەماوەرێ‌ هەردو یانەیان چاڤەڕێ‌ یە، یانەیا بایرن میۆنخ یا ئەلمانی دێ‌ ل یاریگەها خوە یانەیا چێلسی یا ئنگلتەرایێ‌ مێڤانكەت، ئەڤ یارییە دێ‌ هەستیاری بیت دناڤبەرا هێزین دو خولان، هەرچەندە د پێنچ یاریێن دووماهیێ یێن هەردو یانەیان د بەرژەوەندییا بایرن میۆنخێ‌ دایە ئەوا سێ‌ سەركەڤتن بەرانبەر وەكهەڤییەكێ‌ و خوسارەتییەكێ‌ بوویە، ژلایێ‌ ناسناڤان ژی بایرنێ‌ شەش ناسناڤ هەبووینە ل سالێن( 1974- 1975- 1976- 2001- 2013- 2020)، لێ‌ چێلسی ژی دو جاران بدەستڤە ئینایە ل سالێن( 2012- 2021)، یارییا ئەڤ شەڤە جوداییە بۆ كۆمكرنا سێ‌ خالانە.
لیڤەرپۆل- ئەتلەتیكۆ مەدرید
تاقیكرنەكا دی یا ب هێز د یاریێن ئەڤ شەڤە یێن ئاگرین دا، یانەیا لیڤەرپۆل یا ئنگلتەرایێ‌ دێ‌ ل یاریگەها خوە ئانفێلد مێڤاندارییا یانەیا ئەتلەتیكۆ مەدرید یا ئسپانی كەت، ئەڤ یارییە ژی روویەكێ‌ دی یێ هێزێ یە، ئەتلەتیكو مەدرید ئەوا چو جاران ناسناڤ دەستڤە نە ئینایە دێ‌ بەرانبەر یانەیەكێ‌ بیت خودانا شەش ناسناڤانە و شەرێ‌ حەفتێ‌ دكەت ئەوێن هەر ژ سالێن (1977- 1978- 1981-1984-2005- 2019)، لێ‌ دیدارێن وان خۆیادكەن كو د شەش یاریێن دووماهیێ‌ یێن هەردو تیمان ئاگرین بووینە، هەر تیمەكێ‌ سێ‌ سەركەڤتن ل سەر تیما دی ئیناینە.
پاریس سانجێرمان- ئاتلانتا
یانەیا پارێس سانجێرمان یا فرەنسی قارەمانا وەرزێ‌ بۆری ب هیڤیێن مەزن دێ‌ هێتە دناڤ چامپیۆنزێ‌ دا ژبۆ پاراستنا ناسناڤێ‌ خوە و دێ‌ یارییەكا دی یا ب هێز یێن چارچووڤەیێ‌ چامپیۆنزا ئەڤ شەڤە دا مێڤاندارییا یانەیا ئەتلانتا یا ئیتالی كەت، ئەوا هیچ جارەكێ‌ ژی نە گەهشتییە یارییا دووماهیێ‌، هەرچەند دو دیدار دناڤبەرا وان هەبووینە ب سەركەڤتنا پاریسێ‌ و وەكهەڤیەك هەبوویە، لێ‌ یارییا ئەڤ شەڤە ب حسابەتێن نوو و هیڤیێن مەزن یێن هەردو یانەیان هەنە.
بۆ زانین لدووڤ سیستەمێ‌ نوو ییچ چامپیۆنزێ‌ 36 یانە پشكدارن، هەر یانەیەك دێ‌ هەشت یارییان كەن ب شێوەیێ‌ خول ئێك قۆناغ، چار یاری دناڤ ئەردێ‌ خوە دا و چار ژ دەرڤەیی یاریگەها خوە دا كەت.
د قۆناغا ئێكێ‌ دا هیچ یانەیەك ئێك وەلات بەرانبەران ئێك ناكەن، هەموو یانە ل سەر چار ئاستان هاتینە بەلاڤكرن، هەر تیمەك دێ‌ دو یارییان بەرانبەر دو یانەیێن هەر ئاستەكی كەت، خودانێن ڕێزێن ئێكێ‌ هەتا هەشتێ‌ ئێكسەر دێ‌ دەربازبنە قۆناغا دویێ‌- یاهەشتێ‌-، ئەو یانەیێن ل رێزێن نەهێ‌ هەتا 24ێ‌ هاتین دێ‌ دو یاریێن ڤەبر بەرانبەری ئێك كەن ژبۆ دەربازبوونا هەشت یانەیان بۆ قۆناغا هەشتێ‌، ئەو یانەیێن ل ڕێزا 25 هەتا 36 دهێن دێ‌ هێنە دووركرن.