سالار محەمەد دۆسكی:
1- 5
بەرپرسێ ئێكەتیا قوتابیێن كوردستانێ ل سالێن حەفتێیان ل قەزا تلكێفێ، سادە ئادەم رێكانی ل سالا 1953 ل گوندێ(ئستپ) ل دەڤەرا رێكان ژ دایك بوویە، هەتا پولا سیێ ل دەڤەرا رێكان و دوڤدا قوناغا سەرەتایی و ناڤنجی و ئامادەیی ل قەزا تلكێفێ ب دووماهی ئینایە، ل سالا 1976 پەیمانگەها چاندنێ ل ئەبو غورێب ل باژێرێ بەغدا ب دووماهی ئینایە، ل شۆڕەشا گولانێ ل دەڤەرا رێكانیان رۆلەكێ بەرچاڤ هەبوو، ل قوتابخانێن شۆڕەشێ و تایبەت ل گوندێ(هورە) پاش ل گوندێ خوە (ئستپ) قوتابخانەك ڤەكر، و چەندین قوتابی ل بەر دەستێ وی پەروەردە بووینە.
سادە ئادەم ئستپ رێكانی، ئێك ژ رێكخستیێن نهێنیێن پارتی و بەرپرسێ ئێكەتیا قوتابیێن كوردستانێ ل تلكێفێ بوویە، د دیدارەكا تایبەت دا بۆ رۆژنامەیا ئەڤرۆ دیاركر، كو هێشتا ل زارۆكینی هەستا كوردینیێ ل دەف پەیدا بوو پشتی هەست پێكری كو مللەتێ كورد ب هەمی ئاین و نەتوا ڤە زولم و زورداری یا لێ دهێتەكرن، و ئەڤە بۆ دەرگەه حەزا وی بۆ سیاسەتێ بەرەف پێشڤەبچیت، دیسا گەلەك جارا ل دیوانا كەسایەتیێن گوندی رونشتی یە و گوهداری یا دەنگۆباس و رەوشا وەلاتی و شۆڕەشێ كریە.
بەرپرسێ ئێكەتیا قوتابیێن كوردستانێ ل تلكێفێ، سادە رێكانی گۆت: ب فەرمی هاتیمە د ناڤا سیاسەتێ دا ل قوناغا چارێ ئامادەیی بوو وی دەمی ئەم دگەنج و خوین گەرم بووین، ل ڤێ قوناغێ كەسەك هاتە تلكێفێ یێ سواری بوو بناڤێ (محەمەد سەلیم سواری) خودێ ژێ رازیبت بەری ماوەكی ل وەلاتێ ئەمریكا چوو بەر دلوڤانیا خودێ، و ئەڤ كەسە بۆ هەڤالێ من و هەمان دەم ئەم ئاشوریێن دەڤەرا رێكان ئەم هەمی هاتینە تلكێفێ نێشتەجێبووین و نەبتنێ رێكانی بەلكو تیاری، بازی، بەرواری ئەم گەلەك ل وێ دەڤەرێ نێشتەجێبووین، هەست و هزرێن مە لڤین ب خوە ڤەدیتن دەمێ ئەز و (محەمەد سەلیم سواری) چووینە پیاسان و مە دیت فرۆكە یا سەرسەرێ مە رادەرباز دبیت و بەرەف كوردستانێ ڤە دچیت و ئەف فرۆكە یا دچیت خەلكێ مە و گوندێن مە توپباران دكەت، رۆژەكێ (محەمەد سەلیم سواری) گۆتە من كورێ مامێ من (حسێن عەبدولرەحمان سواری) گۆتیە من بابێ من پارتی یە و من گۆتێ چەوا و مە بریار دا بینە دەف چوونا مە بۆ دەف گەلەك كەیفا وی هات و ئەم چووینە دەف بوومە دئاخفت و ئەڤە بوو كارەكێ نهێنی دناڤبەرا مە هەرسێ یان دا و پشتی بورینا ماوەكی گۆت دڤێت خوە تۆمار بكەن وەك رێكخستنێن پارتی دیموكراتی كوردستان و من گۆتێ ما پارتی رێكخستن ل دەڤەرێ هەنە ؟ گۆت بەلێ و ئەڤە ئەو دەم بوویە وەختێ (عەبدولكەریم جحێشی) چووی خەلكێ گوندێ (صوریا) هەی كوشتین هەر وێ رۆژێ من بریارا خوە دا كو ببمە ئەندامێ رێكخستنا پارتی دیموكراتی كوردستان و چووینە دەف حسێن و ب رێكا پەیوەندیێن ویێن نهێنی ئەم دناڤا پارتی دا هاتینە رێكخستن و ئەڤە ل سالا 1969ێ بوویە و كاك (حسێن) پەیوەندی ب رێكێن نهێنی ب لژنا ناوچا ئێسفنێ كر و كەسەك هات و بیرا من ناهێت (عەلی جوقی) بوو یان كەسەكێ دی بوو و هاتە تلكێفێ مالەكێ ناڤێ خودانێ مالێ( ئەكرەم چەكو) بوو ئەو مال ژی رێكخستیێن پارتی بوو و دەمێ ئەو كەس شێخان هاتی گەلەك ب نهێنی هاتە دەڤەرا مە و ئەم چووینە دەف و بیرا من دهێت شەڤ بوو و ئەز و (محەمەد سەلیم سواری) چووینە دەف و ناڤێن مە تۆماركرن و مە پەنجەمورا خوە لێدا و ئەوی كاغەزێن خوە ل گەل خوە برن و چوو ئێسفنێ و ئەم بووینە رێكخستیێن پارتی دیموكراتی كوردستان سەر ب لژنا ناوچا ئێسفنێ ڤە و مە كومبوون دەسپێكرن و هەر هەمی ب شێوەكێ گەلەك نهێنی و بەرزە و هەتا خێزان و كەس و كار و دایك و باب و خویشك و برایێن من ژی نەدزانی ئەز چ دكەم و هەتا (محەمەد سەلیم سواری) ژی بڤی رەنگی بوو و ئەم ماین هەتا بەیانا 11ی ئادارێ سالا 1970ێ دناڤبەرا سەركردایەتی یا شۆڕەشا ئیلونێ و حوكمەتا بەعس دا هاتیە دروستكرن و ل گەل رێكەفتنا 11ی ئادارێ مە ژی خوە دیاركر و ئاشكراكر و دەمێ ئەم پولا پێنجێ ئامادەیی و گۆتن دێ ئێكەتیا قوتابیێن حزبا بەعس پەیڤەكێ خوینن و محەمەد سەلیم سواری گۆت رابە توژی پەیڤەكێ بخوینە من گۆتێ نە تو بخوینە و ئەم چووینە دەف رێڤەبەرێ قوتابخانێ مە گۆتێ مە ئێكەتیا قوتابیێن كوردستانێ ل تلكێفێ هەیە و مە ژی پەیڤەك ب ئەڤێ هەلكەفتێ هەیە وی دەمی تشتەكێ گەلەك سەرسورمان بوو دەمێ ئەوا ئەڤ تشتە گوهلێ بووی كو ئەندامێن پارتی ل تلكێفێ و دناڤا قوتابیان دا هەنە و یێ داخوازا پەیڤەكێ دكەن و هەتا قوتاب ژی سەرسورمان بوون و مە پەیڤەك خواند ب هەلكەفتا 11ی ئادارێ ئەڤە هەلكەفتەكا گەلەك مەزن بوو بۆ مللەتێ مە و خەونەكا مەزن بوو و ئەڤ پێنگاڤا ئێك بوو بۆ دامەزراندنا تایێ ئێكەتیا قوتابیێن كوردستانێ ل تلكێفێ و پارتی دیموكراتی كوردستان راسپاردام ببمە سەرۆكێ لقێ تلكێفێ یێ ئێكەتیا قوتابیێن كوردستانێ وی دەمی هەڤالێ من (محەمەد سەلیم سواری) دەرچوو وئەز كەفتم چونكە هەمی هزر و بیر و كەس و كارێ من ل سەر ئێكەتیا قوتابیان بوو و (محەمەد سەلیم سواری) چوو بەغدا زانكویا مستنصریە و ئەز هەر مامە ل تلكێفێ و دەمێ بوویمە سەرۆكێ ئێكەتیا قوتابیێن كوردستانێ ل تلكێفێ و ئەندامێ لقێ نەینەوا وی دەمی من پەیوەندی دروستكرن ل گەل د.(سەباح خەندان ئاغا ئاكرەیی) كاك (سادق) چەندین هەڤالێن دی و هەتا ئەندامێن لقێ مویسل یێ پارتی دیموكراتی كوردستان و هەژمارا قوتابیێن ل گەل من ل تلكێفێ گەهشتنە (160) قوتابیان و گەلەك ب هێز كەفت و هەمی رێكانی و تیاری و بازی و چەند هەڤالێن كوردێن موسلمان ژی هاتنە ل گەل مە و زێدەباری ئەندام بوونا (16) كچان بەلێ ئەڤ كچە ب شێوەكێ نهێنی ل گەل مە بوون و كارێ ئەڤان كچان كومكرن و ئینانا پێزانینا بوو بوومە و دیسا ئەگەر من كۆمبوونەك یان ڤیابا ل گەل كچەكێ باخڤم دەمژمێر 10 شەڤ دا سەرەدانا مالەكێ كەم و ئەز دا ل گەل ئاخڤم و رێنما و هەر تشتەكێ حزبێ دا گەهینمێ و بەرۆڤاژی ئەوا ژی پێزانین دگەهاندن و مەنەدڤیا ئەو كچ خوە ئاشكرا بكەن چونكە هەر دەم مە هزر دكر ئەڤ رێكەفتنە بەردەوام نابیت و ئەڤرۆ سبە ئەم دێ پەوەندیێ ب پێشمەرگەی كەین و مە نەدڤیا ئەو كچ دئاشكرابن چونكە مە زولم و زوریا حزبا بەعس دیت بوو.
نيشاندان