بێوار حەمدی:
سترانبێژ (ئەیمەن ئەنوەر) نێزیکی 12 سالایە سترانان دبێژیت ددیدارەکێ دا بۆ بەرپەرێ هونەری یێ ڕۆژناما ئەڤرۆگۆت: پشتی کو ئەز ژ دەرڤەی وەلاتی زڤریمە کوردستانێ پتر حەزا من ل سەر سترانگۆتنێ زێدەبوو، لەوما من خوە نێزیکی سترانبێژێن خودان شیان دکر و هەتا کو ئەز شیایم بۆ خوە ستودیۆیەکا تایبەت ڤەکەم.
ئەیمەنی دبەردەوامیا ئاخفتنا خوە دا گۆت: من ل دەسپێکا کارێ خوە دوو بەرهەم چێکربوون، بەلێ پا ئەز یێ ژێ ڕازی نەبووم، چونکۆ دگەل بوورینا دەمی شیانێن مرۆڤی باشتر لێ دهێن، ئەڤە ددەمەکی دا یە کو ئەز گەلەک حەز ژ ستایلێ «سلو» دکەم بۆ سترانگۆتنێ، ژبەرکو ئەز پترحەز ژ سترانێن ب هەست دکەم لێ دگەل هندێ ژی ئەز شانازیێ ب فولکلورێ مە یێ کوردی دبەم و بتنێ ئەڤە ئەو ستایلە یێ ئەز حەزژێ دکەم.
ناڤهاتی هێشتا گۆت: ئەز حەزدکەم بەهراپتر ل لایڤ مۆزیکان سترانان بێژم، چونکۆ مرۆڤ دشێت پتر هەستێن خوە دەرببریت و ئارامیا وێ پترە ئەگەر مرۆڤی ستودیۆیەکا هونەری هەبیت یا پێدڤی یە ئامیرێ پیانویێ ژی بزانیت، لەوما من ژەنینا پیانۆیێ هەلبژارت و دگەل هندێ تا راددەیەکی ئەز ژەنینا عودێ و سازێ ژی دزانم.
سترانبێژ ئەیمەن ئەو چەندە ژی دا زانین کو هەتا راددەیەکی ئەز بەرنیاس بوویمە لێ پشتی کو من ڤیای ئەز ب ئەکادیمی بخوینم داکو زانستێ مۆزیکێ پتر ل دەف خوە زێدەبکەم ئێدی بەرنیاسبوون بۆ من هند یا گرنگ نەبوو لێ ب گشتی ئەگەر مرۆڤی کەسایەتیەکا باش هەبیت بەرنیاس بوون تشتەکێ خوەش و نورمالە.
ل دووماهیا ئاخفتنا خوە ژی ناڤهاتی گۆت: خالا لاوازیا من وەکو سترانبێژ بتنێ شەرمینی یە، لێ ئەز نوکە گەلەک باشتر لێ هاتیمە پشتی من کار ل سەر شیانێن خوە کری، لێ ئەز دبینم کو خالا لاوازیا پتریا سترانبێژان باوەری بخوە نەبوونە، داخوازیا من ژجهێن پەیوەندیدار ئەوە کو پتر خزمەتا سترانبێژان بکەن و بتایبەت ژ لایێ ماددی ڤە خوە لێ بکەنە خودان.
نيشاندان