قەیس وەیس:

كێمتر مەهەك ماییە بۆ دەست ب وەرزێ‌ نوو یێ‌ خولا ستێرێن ئیراقێ‌ یا فوتبۆلێ‌ بهێتە كرن، تا ڕادەیەكێ‌ مەزن هەموو یانەیان گرێبەستێن خوە دگەل كادرێ‌ راهێنانێ‌ و یاریزانان ب دووماهی ئیناینە و چەند پێنگاڤەكێن كێم ماینە بۆ تمامكرنا ڕێزێن تیمێن خوە، ئەوا دهێتە پێشبینیكرن وەرزێ‌ ئەڤ سالە هەڤڕكی ب هێزتر بیت ژبەر هاتنا كۆمەكا ئێكچار باش یا پیشەكارێن دەرڤەیی ئیراقێ‌ و هەرێمێ‌ بۆ ناڤ یانەیان.
پیتەر گۆرگیس دێ‌ ڤەگەڕیت!
ژبەر نە پێگیرییا وی ب ڕاهێنانان كارگێرییا یانەیا دهۆكێ‌ ئاكۆ عزێر یاریزانێ‌ تیما خوە سزادا ژبەركو دگرتە ڤیدیۆیەكێ‌ هاتبوو دیتن ددەمێ‌ تیما وان ل هەولێرێ‌ دناڤا كەمپێ‌ ڕاهێنانێ‌ دا، ژنشكەكێ‌ دگەل چەند كەسان ل یاریگەهەكا بچووكری یاری دكر بێ‌ ئاگەهدارییا كادرێ‌ ڕاهێنانێ‌، یلنەیێ‌ بڕیار دا ب سزادانا كێمكرنا مووچەیێ‌ وی 50% ژبەر ئەڤێ‌ ڕەفتارێ‌، هەر د چارچووڤەیێ‌ كەمپێ‌ خوە یێ‌ نافخوەیی دا ل هەولێرا پایتەخت دهۆكێ‌ یارییا خوە یا دویێ‌ یا هەڤالینی دگەل هەلبژارتیێ لاوێن ئیراقێ‌ كر، د یارییا ئێكێ‌ دا هەردو تیم وەكهەڤبوون ب گۆلەكێ‌.
ئەلهۆیێن چیا ب سەرپەرشتییا ڕاهێنەرێ‌ خوە یێ‌ بەرازیلی سێرجیۆ ڤاریاس نێزیكی 60% تیما خوە گوهۆڕیە، دەنگۆباس هاتینە بەلاڤكرن كو یانەیا دهۆك هوشدارییا چارێ‌ داییە ستێرێ‌ خوە پیتەر گۆرگیسی كو ڤەگەڕێتە دناڤ ڕێزێن تیمێ‌ دا ئەوێ‌ بێ‌ ڕازیبوونا یانەیێ‌ تیم بجهـ هێلایی و گرێبەستا وی بۆ وەرزێ‌ ئەڤ سالە ژی مایە، دەنگۆ هەیە كو ڤەگەڕیتە ڤە.
ئینانا سێ‌ یاریزانان دێ‌ ڕێزێن زاخۆ تمامكەت
ژلایەكێ‌ دووڤە تیما یانەیا زاخۆ تا ڕادەیەكێ‌ مەزن پێكهاتیێ‌ تیما خوە دروستكرییە و گەهشتییە 80% بەری دەست ب دو هەڤڕكیێن مەزن یێن داهاتی بكەت، كوڕێن خابووری ب ئەركەكێ‌ مەزن دێ‌ پشكداریێ‌ د كۆپا كەنداڤی داكەت وەكو تاكە نوونەرا كوردستانێ‌ و ئیراقێ‌، لەوما ژی هەرزوو ڕاهێنەرەكێ‌ وەلاتێ‌ قەتەر یێ‌ كەنداڤی ویسام رزق دەستنیشانكرن و چەندین یاریزانێن خودان شیان ئینانە دناڤ ڕێزێن تیما خوە دا، د هژمارەیا پێشتر یا رۆژانەیا ئەڤرۆ، عەمار فەرهاد سەرۆكێ‌ یانەیا زاخۆ خویاكربوو، بۆ تمامكرنا كێماسیێن تیما خوە ئەو پێدڤی ب سێ‌ یاریزانێن دیتر هەنە تایبەت ل هێلا بەرەڤانیێ‌ و ناڤین و دیاركر وەرزێ‌ ئەڤ سالە بۆ تیما وان بزەحمەتە لێ‌ هەموو بزاڤێن وان ئەون بشێن بگەهنە ئارمانجێن خوە.
لدۆر بەرهەڤیێن تیمێن پشكدار سلێمان زەكی شرۆڤەكارێ‌ وەرزشی ل پارێزگەها دهۆكێ‌ بۆ رۆژنامەیا ئەڤرۆ گۆت: ئەوا دهێتە دیتن كو هەموو یانەیێن ئیراقێ‌ تایبەتی یێن كوردستانێ‌ ئەڤە نێزیكی دو حەفتییە دەست ب بەرهەڤییان كرینە، دهێتە پێشبینكرن وەرزێ‌ ئەڤ سالە یا خولا ستێرێن ئیراقێ‌ ب هێزتر و زەحمەتر بیت، وەكو دیار یانەیێن پشكدار یاریزانێن خودان شیان ئیناینە دناڤ رێزێن تیمێن خوەدا، یا نوو هاتنا كۆمەكا باش ژ یاریزانێن كێشوەریچ ئەفریقیا و وەلاتێ‌ ئوردن بۆ خولا ئیراقێ‌، ئەڤە ژی دێ‌ هێزەكا دی دەتە خولێ‌.
ژلایەكێ‌ دووڤە ناڤهاتی گۆت: ژبەركو وەرزێ‌ ئەڤ سالە كێمتر ژ مەهێ‌ یا مایی ب دیتنا من ژبەر كورتییا دەمی باشتر ئەوە چو یانە كەمپێن دەرڤە نە دانن، چوونا یانەیا دهۆك بۆ كەمپێ‌ هەولێرێ‌ گەلەك باشە و دێ‌ یاریێ‌ دگەل یانەیێن دی یێن ئیراقێ‌ كەت، هەكە چووبا دەرڤە دبیت ئاستەنگ و زەحمەتی هەبان زێدەباری بارگرانییە ل سەر مللێن كارگێریێ‌ وەكو دارایی و یاریزان ژی دێ‌ وەستیابن، بدیتنا من هەكە نە چنە چو كەمپێن دەرڤە باشترە.
بۆ زانین وەرزێ‌ نوو یا خولا ستێرێن ئیراقێ‌ دێ‌ ل 13ێ‌ مەها بهێت ئەیلوونێ‌ هێتە كرن و بڕیارە ل ئیكی خزیرانا سالا 2026ێ‌ ب دووماهی بهێت، ئەوا 20 یانە دێ‌ پشكداربن، هەرسێ‌ یانەیێن نوو ئەلغراف، مووسل و ئەمانە بەغدا هاتینە دناڤ وەرزێ‌ ئەڤ سالە دا.

شاهۆ فەرید:

د داخویانیەكا تایبەت دا د. بەهزاد سالح سەرۆكێ یانەیا پیرس بۆ رۆژنامەیا ئەڤرۆ دیار كر ئەو چاڤەڕیێ ڕێنمایێن فێدراسیونا فوتبۆلا ئیراقێ و كوردستانێ‌ نە ژبۆ ئێكلاكرنا پشكداریی، مە كادر و ڕاهێنەرێن خودان شیان هەنە ژبۆ پشكدارییەكا سەركەڤتی.
زێدەتر ناڤهاتی گۆت: ژبۆ زانین و وەرگرتنا ڕێنمایان بۆ پشكداریێ‌ د خولا پلا دو یا ئیراقێ دا دێ‌ چاڤەڕێ‌ بین چو مەرج و یاسا هەبن پێخەمەت ئەم ژی بڕیارا خوە ئێكلا بكەین ژبۆ پشكداریێ‌، پێنەڤێت هەكەر مە دیت دێ‌ پێ باش بیت پشكداربین، ئەم دێ پێنگاڤێن خوە یێن باش بۆ بەرهەڤكرنێ هاڤێژین، تیمێن یانەیا مە بۆ هەر قارەمانیەكێ هەردەم باشترین شێوە بەرهەڤن لسەر دەستێ كادریێن مە یێن ڕاهێنەران و هەروەسا پشت بەستن ل سەر ئەكادیمیا یانەیێ.
ژلایەكێ‌ دووڤە د. بەهزاد گۆت: هەر قارەمانییەك و خولەك هەبیت بشێن پشكداربین دێ كەین، مەرەم پێ ئەوە ئەڤ لاوە و تازە پێگەهشتییە هەست پێ نەكەن كۆ تنێ مژوولكرنە هەر جهێ مفایێ یاریزانێن مە تێدا هەبیت دێ پشكداریێ كەین، ئەم چاڤەرێ دو خولانە یا كوردستانێ و ئیراقێ هێشتا دیار نەبوویە دێ ب تیما لاوان یان هێلا ئێكێ پشكداریێ كەین، ئارمانجا مە گرنگی بدەینە یاریزانێ خومالی.

رەمەزان زەكەریا

د داخویانیەكێ دا پەیڤدارێ یانەیا ئاكرێ یا وەرزشی ئاشكراكر بۆ وەرزێ نوو یێ 2025-2026 خولا نایابا كوردستانێ تیما فوتبۆلا یانەیا ئاكرێ دێ ب سەرپەرشتییا راهێنەر هێور مستەفا بیت پێخەمەت پشكداری خولا نایابا كوردستانێ بیت و بڕیارە ئەڤرۆ د كۆنگرەیەكێ‌ رۆژنامەڤانی دا گرێبەستا وی بهێتە ڕاگەهاند.
زێدەتر سوهەیب عەلی بۆ رۆژنامەیا ئەڤرۆ گۆت: دەستەیا كارگێریا یانەیا ئاكرێ ب ئێك دەنگ گەهشتینە رێكەفتنێ دگەل راهێنەری گەنج هێور مستەفا بۆ وەرزێ نوو یێ خولا نایابا كوردستانێ دیسان ب فەرمی ژی گرێبەستا یاریزانێ‌ خوە عەلی فائیق بۆ وەرزەكێ‌ دی نووكرییە.
ناڤبری گۆت : ڕاهێنەر هێور مستەفا پێشتر سەرپەرشتییا تیما یانەیا برایەتی كربوو ل خولا نایابا كوردستانێ، دەستنیشانكرنا وی ژی بۆ وەرزێ نوو ژبەركو یانەیا ئاكرێ دڤێت ب هێز ڤە دێ پشكداری خولا نایاب بیت بۆ وێ چەندێ دوبارە بگەهیتە ناسناڤێ خولێ، هەر ژبۆ دانەنیاسینا وی وئارمانجا كارگێریێ‌ بۆ وەرزێ‌ نوو بریارە ئەڤرۆ رۆژا پێنجشەمبی راهێنەرێ نوو یێ یانەیێ د كۆنگرەكێ رۆژنامەڤانی دا بۆ راگەهاندنێ و جەماوەری بهێتە بەرنیاسكرن
سوهەیب عەلی گۆت ژی : یانەیا ئاكرێ‌ شیابوو ل وەرزێ 2023-2024 ناسناڤێ خولا نایابا كوردستانێ ب دەستڤەئینا و وەرزێ 2024-2025 نەگەهشتە ناسناڤێ جهێ خوە ل رێزا حەفتێ یا خولا نایاب پاراست و بۆ وەرزێ نوو 2025-2026 دێ ب هێزڤە پشكداری خولا نایاب بیت شەرێ ب دەستڤەئینانا دوبارە ناسناڤی كەت.

ڕێڤەبەرییا گشتی یا وەرزشی ل هەرێما كوردستانێ‌ ستاڤێ‌ نوو یێ‌ هەلبژارتیێ‌ كوردستانێ‌ دەستنیشانكرن، پشتی ئەنجامدانا پشككێشانا كۆپا جیهانی 2025ێ‌ یا فوتبۆلا بچووكری ل سەر ئاستێ‌ كچان هاتە ئەنجامدان، ئەوا بڕیار هەڤڕكیێن وێ‌ ب پشكدارییا 12 هەلبژارتییان ل هەولێرا پایتەخت ل 17ێ‌ مەها بهێت ب پشتەڤانییا مەسرۆر بارزانی سەرۆكێ‌ حوكمەتا هەرێما كوردستانێ‌ و سەرپەرشتییا ڕێڤەبەرییا گشتی یا وەرزشی ل هەرێمێ‌ هێتە بڕێڤەبرن.
ئەنجامێ‌ پشككێشانێ‌ بڤی شێوەیی بوو، كۆما ئێكێ‌: كوردستان، لوبنان، سویسرا، كازاخستان، ئوردن، پاكستان، كۆما دویێ‌ تونس، مسر، ئوگەندا، هایتی، تایوان.
دوهی ل یاریگەها بچووكری یا یانەیا پیرس تاقیكرن بۆ یاریزانێن كچ یێن ڤێ‌ یاریێ‌ ل سەر ئاستێ‌ پارێزگەها دهۆكێ‌ دەستپێكرن ئەوا هەتا ئەڤرۆ دێ‌ بەردەوامبیت، كادرێ‌ ڕاهێنانێ‌ پێكهاتینە ژ مەزن محەمەد ڕاهێنەر، زێنە جەمیل هاریكارا ڕاهێنەری و لەنیا سەدیق هاریكارا ڕاهێنەری، پشتی دەستنیشانكرنا ستاڤێ‌ هەلبژارتیێ‌ كوردستانێ‌ نەڕازیبوون پشتخوە هێلایە و یانەیا ئافرەتێن دهۆكێ‌ ب مافێ‌ خوە دزانن كو دڤیابیت ژ تیما وان ژی دگەل دابن.
ل دۆر ڤێ‌ یەكێ‌ سەردار سالح سەرۆكێ‌ یانەیا ئافرەتێن دهۆكێ‌ بۆ رۆژنامەیا ئەڤرۆ گۆت: ل دەستپێكێ‌ پێخوەشحالبووین ب مێڤانداریكرنا هەرێا كوردستانێ‌ بۆ قارەمانییا كۆپا جیهانی یا تەپاپێی یا بچووكرین ئەڤە ژی پێنگاڤەكا گرنگە ژبۆ پێشئێخستنا ئاستێ‌ وەرزشا كچان ل كوردستانێ‌، لێ‌ یا پێ نەخووش بووین ئەوە كو چو كەس یان ڕاهێنەر ژ تیما مە یا فوتسالێ‌ دگەل ستاڤێ‌ هەلبژارتیێ‌ كوردستانێ‌ نەبوون، سەیرە تیما مە بۆ دو وەرزان ل دووڤ ئێك قارەمانا كوردستانێ‌ بیت و هیچ كەسەك دگەل هەلبژارتیێ‌ كوردستانێ‌ بۆ ڤێ‌ قارەمانیێ‌ نە هاتینە گازیكرن.
هەروەسان ناڤهاتی گۆت: وەكو كارگێرییا یانەیا ئافرەتێن دهۆكێ‌ نە د ڕازینە و مە نڤێسارەكا نەرازیبوونێ‌ پێشكێشی هەر ئێك ژ لژنەیا ئۆلمپی- تایێ‌ دهۆكێ‌، ڕێڤەبەرییا وەرزش- دهۆك و فدراسیۆنا فوتبۆلا دهۆكێ‌ كرینە كو ئەو نەڕازیبوونا مە ب پشتگێری بلندكەن بۆ جهێن پەیوەندیدار و ڕێڤبەرییا گشتی یا وەرزشی، نە یا ڕەواییە تیمەك دو وەرزان ل دووڤ ئێك قارەمان بیت و هیچ كەسەكێ‌ كادرێ‌ ڕاهێنانێ‌ یان ئیداری دناڤ تیمێ‌ دا نەبیت.
ل دووماهیێ‌ سەردار سالحی خویاكر، هەكەر نەڕازیبوونا مە ژلایێ‌ جهێن پەیوەندیدار نە هاتە وەرگرتن و چو دووڤچوون بۆ نە هاتە كرن، مە مافێ‌ هەیی وەكو كارگێری و ژبۆ بەرژەوەندییا كادرێ‌ راهێنانێ‌ و یاریزانان هەلوەستەكێ‌ ڕژد بەرانبەر ڤێ‌ نە حەقیێ‌ بدەین.

ستێرێ‌ یانەیا ڕیال مەدرید یا ئسپانی دانی كارڤاخال كەیفخوەشییا خوە دیاركر ب سەركەڤتنەكا گرنگ د ئێكەم یارییا خوە ژ دەستپێكا وەرزێ‌ نوو یا خولا پلا ئێكا ئسپانیا پشتی ب گۆلەكێ‌ ل سەر ئۆساسۆنا ب سەركەڤتی.
كارڤاخال بۆ كەنالێ‌ فەرمی یێ‌ یانەیێ‌ گۆت: هەرچەندە سێ‌ خالێن یاریێ‌ گرنگ بوون پێخەمەت بلندكرنا مۆرالا یاریزانان و دەستپێكەكا باش بیت، تیما مە بەرهەڤیێن باش نە كربوو، لێ‌ مە پێكهاتییەكێ‌ گەلەك باش هەیە و دەم بۆ دڤێت هەتا تێگەهشتن هەبیت ژبەركو كۆمەكا یاریزانان د نوو نە، سەركەڤتن د یارییا ئێكێ‌ دا نە پیڤەرە بۆ ئاست و شیانێن تیما مە، لێ‌ ڕیال مەدرید دێ‌ هەڤڕكەكا ب هێز بیت بۆ چامپیۆنز، خول و قارەمانیێن ئسپانیا.