ئامێدیێ، مەحمود نهێلی:

بەهرام عریف یاسین، بەرپرسێ لقێ 18 یێ پارتی ل ئامێدیێ د دو سمینارێن جودا دا بۆ خەلكێ دەڤەرێن شێلادزێ و سەرسنكێ ئاماژە دا چەندین بابەتێن گرنگ، ژ وانا ژی: پرۆسەیا ئاشتیێ ل دەڤەرێ و دبێژیت: پارتی پشتەڤانێ ڤێ پرۆسەیێ یە و ئەڤ دەڤەرە پشكەكا گرنگە بۆ مفا وەرگرتنێ ژ پرۆسەیا ئاشتیێ.
ناڤهاتی د سمینارێن خۆ دا ئاماژە دا هەستیارییا ڤێ قووناغێ و هەلوەستێن نەگوهۆڕێن نەتەوەیی و نیشتیمانی یێن پارتی و جەنابێ سەرۆك بارزانی و پلان و پێنگاڤێن سەرۆكاتییا هەرێمێ و حكومەتا هەرێما كوردستانێ ژ بۆ داكوكیكرن ل سەر پاراستنا دەستكەفت و مافێن دستۆری یێن هەرێمێ و خەلكێ كوردستانێ.
سەبارەت پرۆسەیا ئاشتیێ د ناڤبەرا توركیا و پەكەكێ دا بەرپرسێ لقێ گۆت: «پارتی پشتەڤانە و ئەڤ دەڤەرە پشكەكا گرنگە ژ وێ پرۆسەیێ و خەلكێ وێ پترین قوربانی ژ ئەگەرێ ڤی شەڕێ سەپاندی ل سەر دەڤەرێ داینە».
دیسا بەرپرسێ لقێ 18 پشتەڤانیا خوە بۆ هەموو لایەكی ژ بۆ خزمەتا گشتی دیاركر و گۆت: «مەزنترین پلە و پۆست، خزمەتكرنا خەلكی یە».

ب هاریكاری و پشتەڤانیا نڤیسینگەها رزگاربوویێن دەستێ داعشێ‌ یا حكومەتا هەریما كوردستانێ و دەستهەلاتداریا رۆژئاڤایێ كوردستانێ (ریهان حەجی حەمید) هاتە رزگاركرن و د ناڤ كەمپا ئێسیان دا ل سنۆرێ‌ دەڤەرداریا شێخان ب كەسوكارێن خۆ شادبوو.
حجی حەمید، خەلكێ خانوسۆرێ یە و بابێ ریهانێ یە بۆ رۆژناما ئەڤرۆ گۆت: «د ناڤا مالبالتا مە دا 77 كەس كەفت بوونە د دەستێ تیرۆرستێن داعشێ‌ دا، هەتا نوكە 39 كەس هاتینە رزگاركرن، ریهان ژی ئێك ژ وان رزگاربوویایە و ژیێ وێ 10 سال بوون، دەمێ كەفتیە د دەستێ داعشێ‌ دا.
ریهام حەجی، رزگاربوویا دەستێ داعشێ‌ بۆ رۆژناما ئەڤرۆ گۆت: «ئەز گەلەك یا كەیف خوشم پشتی بۆرینا 12 سالان ب كەسوكارێن خۆ شاد بوویم، بەلێ د هەمان دەم دا یا غەمبارم ژی، ژ بەركو پتریا كەسوكارێن خۆ نانیاسم، ب تنێ دەیك و باب و خووشك و برایێن خۆ دنیاسم، ژییێ من 10 سال بوون، دەمێ كەفتیە د دەستێ داعشێ‌ دا، وان دگۆتە من: تو بەحسی دەیك و بابێن خۆ بكەی یان بێژی دێ ڤەگەڕمە نك وان دێ تە كوژین، ئەز ژی ناچار بووم بێدەنگیێ هەلبژێرم».
ریهامێ‌ گۆتژی: «ئەز ل نك ئەبو بەكر بەغدادی بووم، دگۆتە من، دین و كەسوكارێن خۆ ژ بیر بكە، تو دێ بیە كچا مە ئەز نەچار بووم ل دووڤ ئاخڤتنا وان بچم».

رەمەزان زەكەریا:

پشتی 42 سالان هێشتا حكومەتا ئیراقێ‌ چو بۆ قەرەبووكرنا كەسوكارێن جینۆسایدا بارزانیان نەكریە، ئەڤە ئەركێ سەرەكیێ‌ حكومەتا ئیراقیێە ئەنجام بدەت، سەرەرای كو پەرلەمان و دادگەها بلندا تاوانێن ئیراقێ ب جینۆساید ناساندیە.
كەریم كاوە، رێڤەبەرێ‌ گشتیێ شەهید و ئەنفالكریان ل ئیدارا سەربخۆ یا سۆران بۆ ئەڤرۆ گۆت: «پشتی دەرچوونا بڕیارا دادگەهێ و پەرلەمانی، حكومەتا ئیراقێ هەتا نوكە، ئەو بەرپرسیاریەتیە هەلنەگرتیە، كو داخوازا لێبورینێ ژ گەلێ كوردستانێ بكەت».
ناڤبری گۆتژی: «گرنگ و پێدڤی بوو، حكومەتا ئیراقێ ژبلی داخوازا لێبورینێ، قەرەبوویا كەسوكارێن جینۆسایدان كربا، بەلێ چ پێنگاڤ نەهاڤێتینە، دیسا هەتا نوكە كار ب دەستووری نەكریە، كو تێدا هاتیە: ئەو تاوانێن دەرهەق خەلكێ كوردستانێ هاتینە كرن، بهێنە قەرەبووكرن و رەوشا وان بزڤڕینیتە بەری تاوانا جینۆسایدێ‌«.

هەولێر، قائید میرۆ:

بەرپرسەكێ وەزارەتا كارەبێ ئاشكرا كر، ب رێیا پڕۆژەكی بۆ سالا بهێت 500 مێگاواتێن كارەبێ دێ‌ زێدەبن و دبێژیت: ئەو كارەبا نوكە د چارچوڤێ پڕۆژەیێ رۆناهی دا دهێتە دابینكرن ل سەر حسابا وان دەڤەران نینە یێن پڕۆژەیێ 24 دەمژمێری نەگەهشتیێ.
فارس میرخان، رێڤەبەرێ بەرهەمئینانێ ل وەزارەتا كارەبێ بۆ رۆژناما ئەڤرۆ دیاركر، كار بۆ زێدەكرنا 500 مێگاواتێن كارەبێ دهێتە كرن و پشتی تەمامبوونێ ژی دێ ئەو 500 مێگاواتێن كارەبێ چنە د ناڤا تۆڕا نیشتیمانی دا و رێژا بەرهەمئینانێ زێدەبیت، چونكی ل گەل برێڤەچوونا پرۆسەیا كارەبا 24 دەمژمێری، بزاڤێن حوكمەتێ بۆ زێدەكرنا بەرهەمی ژی د بەردەوامن، پێشبینی دهێتە كرن ئەو 500 مێگاوات ل مەها ئادارا بهێت ب دوماهی بهێن».
فارس میرخان گۆتژی: «زێدەكرنا 500 مێگاواتێن كارەبێ دێ كاریگەری ل سەر پڕۆژەیێ رۆناهی هەبیت بۆ دابینكرنا كارەبا 24 دەمژمێری، ئەو كارەبا 24 دەمژمێری یا
د چارچوڤێ پڕۆژەیێ روناهی دا بۆ وەلاتیان دهێتە دابینكرنن ل سەر حسابا وان دەڤەران نینە یێن هێشتا كارەبا وانا نەبوویە 24 دەمژمێری، هەتا دوماهیا سالا داهاتی كارەبا 24 دەمژمێری دێ ل سەرانسەری هەرێما كوردستانێ هێتە بجهئینان».

زاخۆ، دلۆڤان هالۆ:

مقەدم جەمال هەسن، بەرپرسێ ڕێڤەبەرییا بەرگرییا شارستانی ل زاخۆ بۆ ڕۆژناما ئەڤرۆ دیاركر كو دوهی 26/7/2025 پەیوەندی ب ژوورا كۆنترۆلی هاتە كرن، كچەكا 21 سالی، كو خەلكا شنگالێ یە بناڤێ (س. س. ش) و ئاوارەیە و ئاكنجیە ل كەمپا چەممشكۆ ل سنۆرێ ئیدارەیا سەربخۆ یا زاخۆ، ل گوندێ چەممشكۆ د ڕووبارێ خابیری دا خەندقی.
بەرپرسێ ڕێڤەبەرییا بەرگرییا شارستانی ل زاخۆ، ئاماژە ب وێ چەندێ ژی كر كو ژ لایێ تیما نۆقمڤانێن بەرگرییا شارستانی ل زاخۆ لاشێ وێ ژ ئاڤێ هاتە دەرئێخستن و بۆ نەخوەشخانەیا داد ل زاهۆ هاتە هنارتن.

هەرهین محەمەد:

فیتەرێن پێشەسازیا پشت پێشانگەهێن ترۆمبێلان گازندا ژ ئەوێ‌ چەندێ‌ دكەن كو چەند جادەیێن وان هاتینە قێركرن و جادەیێن دی ب نیڤەرۆ ماینە و ل وەرزێ‌ زڤستانێ‌ ئاریشە بۆ ئەوان دروست دبن. بەرپرسێ‌ راگەهاندنا باژێرڤانیا دهۆكێ‌ ژی دبێژیت: سالا بهێت ئەگەر رازی بوون بهێت جادەیێن ماین دێ‌ هێنە قێركرن.

چەلەنگ عیدو، نوونەرێ‌ فیتەرێن پێشەسازیا پشت پێشانگەهێن ترۆمبێلان بۆ رۆژنامەیا ئەڤرۆ دبێژیت: دەمێ‌ ئەڤ پێشاسازیە هاتیە چێكرن ل گەل رسوماتێن باژێرڤانیێ‌ دا پارەی ژ مە وەردگرن و ئەم ئەردی ئاڤا دكەین و حەقێ‌ سولینا و ئاڤێ‌ و پارێ‌ جادەیان ژی دایە، رێژەیا هەر ئێكی د گرێبەستێ‌ دا هاتبوو نڤیسین و هینگێ‌ كەس نەدشیا دوكانا خوە ئاڤاكەت هەكە مۆلەتا ئاڤاكرنێ‌ نەبا، پشتی هەموویان ژی ئاڤاكرین هەر جادەیێن مە نەهاتنە چێكرن و خزمەتگوزاری دكێمبوون و خەلەتی تێدا هەبوون.
زێدەتر گۆت: بۆ ئەڤان جادەیان پارێزگاری گۆت مە سیولە نینە و نێزیكی چوار ملیار دیناران هاتینە تەرخانكرن و 52 تاخن و ئەوان گۆت ئەڤ برە پارە ل سەرئێك مە نینە و رێكەفتن ئەو بوو دناڤبەرا مە و وان دا، مە گۆتێ‌ هەر جار بۆ مە ملیارەكێ‌ خەرج بكەن و بلا تاخێن مە ب چار یان پێنچ قوناغان بهێنە دروستكرن، پشتی ڤێ‌ رێكەفتنێ‌ مە رازیبوون ل سەر كر و ئەوان ژی رازی بوون كر و ئەوی ژی گۆت هوین بدەستێ‌ خوە پشكنین ببەن دا زویكا چێبیت و مە ژی پشكنینێن خوە برن و دانە ف بەلێندەرەكی و 10 جادە بۆ مە چێكرن وەكو قایمقامی و باژێرڤانی و یێن سەرەكی و یێن جادەیان پێكڤە گرێدەن و هەتا 30%مە مفا ژێ‌ دیت، بەلێ‌ هندەك ئاریشەێن دی بۆ مە پەیدا بوون و ئەڤ جادەیە چێبوون مە پێنچ جادەیێن دی هەنە دهێنە سەر ئەڤی جادێ‌ و هەموو ئاخن و ل زڤستانێ‌ ئاریشەیان بۆ مە پەیدادكەن.
خویاژی كر، مە دڤێت جارەكا دی قوناغا دووێ‌ دەستپێبكەنەڤە و هەكە ئەو جادەیێن دی بهێنە چێكرن پێشەسازیا مە دێ‌ گەلەك پێشكەڤیت و خەلكێ‌ ل پێشەسازیێ‌ كاردكەت رۆژانەیا خوە دڤێت و ئەم پشتەڤانێن حكومەتی ینە و ئەم یێن پاران ددەینە حكومەتێ‌ وەكو مولەت و باج و كریێن باژێرڤانیێ‌، ئەم یێن دەین و مە یا ئاڤاكری، هندەك فیتەران پارە كومڤەكرینە و ل سەر كیستێ‌ خوە جادەیا خوە كۆنكریتكریە، چونكو ئاڤ ژ دوكانێن وان نادەركەڤیت.
شێروان حەسەن ، بەرپرسێ‌ راگەهاندنا باژێرڤانیا دهۆكێ‌ گۆت: مە ل پێشەسازیا ل پشت پێشانگەهێن ترۆمبێلان ل قوناغا ئێكێ‌ نێزیكی شەش حەفت جادە هاتینە قێركرن و هەكە رازی بوون بهێت ئەو جادەێن ماین ل قوناغا دووێ‌ دێ‌ هێنە قێركرن و نە ب تنێ‌ جادەیێن پێسەسایێ‌، بەلكو یێن هەر تاخەكی نەهاتبنە قێركرن دێ‌ هێنە قێركرن و نوكە جادەیێن تاخێ‌ ئێتیتێ‌ و قەسارا و دانیال میتران دهێنە قێركرن، بەلێ‌ نوكە ل دووڤ پێدڤی دهێتە قێركرن و كا كیژ تاخ یێ‌ پێدڤیە ئەو دهێتە قێركرن و یا د شیانێن مە دا مە یا كری و خودێ‌ حەز بكەت سالا بهێت ئەگەر رازی بوون بهێت جادەیێن ماین دێ‌ هێنە قێركرن.

دهۆك، لەزگین جوقی

رێڤەبەرێ گشتیێ چاندنێ ل پارێزگەها دهۆكێ راگەهاند، د كابینا نەهێدا گەشەكا گەلەك مەزن د چاندنێ دا چێبوویە كو بەرهەمێ چاندنێ جوتیاران گەلەك زێدەبیت، ژبەر پشتەڤانیا حوكمەتا هەرێما كوردستانێ ساڵ بۆ سالێ بەرهەمێ چاندنێ ل پارێزگەها دهۆكێ زێدەدبیت.

ئەحمەد جەمیل، رێڤەبەرێ گشتیێ چاندنێ ل پارێزگەها دهۆكێ بۆ رۆژنامەیا ئەڤرۆ گوت: پەیداكرنا بازاڕی گرنگترین قۆناغە د پرۆسا چاندنێدا، بازاڕ بۆ بەرهەمێن جوتیارێن پارێزگەها دهۆكێ ل پارێزگەهێن ئیراقێ هاتیە ڤەكرن، هەتا هندەك جاران بەرهەمێ جوتیارێن پارێزگەها دهۆكێ بۆ دەرڤەی وەلاتی دهێتە رەوانەكرن و ئەڤە بوویە ئەگەر جوتیار پتر چاندنێ بكەن.
رێڤەبەرێ گشتیێ چاندنێ ل پارێزگەها دهۆكێ دیاركر، د كابینا نەهێدا گەشەكا گەلەك مەزن ل چاندنێ چێبوویە و جوتیاران بەرهەمێ چاندنێ گەلەك زێدە كرینە، ژبلی كێم هاتنا بارانێ جوتیاران دەست ژ چاندنێ بەرنەدایە و ب رێكا ئاڤەدانیێ بەردەوامی ب چاندنێ هاتیە دان و گۆت: پارێزگەها دهۆكێ یا ناڤدارە ب بەرهەمێ نافخۆ، ب مەرەما پەیداكرنا بازاڕی بۆ ڤی بەرهەمی ژی كابینا نەهێ یا حكوومەتا هەرێما كوردستانێ ئاسانكاریێن باش كرینە كۆ ئەڤسالە پتر ژ 81 هزار تەنێن بەرهەمێ خومالی ژ پارێزگەها دهۆكێ بۆ ناڤەراست و باشورێ ئیراقێ هاتینە هنارتن، ئەو بەرهەمێن سەرەكیێن پارێزگەها دهۆكێ بۆ باژێرێن ئیراقێ دهێتە هنارتن ژی پێكهاتینە ژ پتات و تەماتە و خیار و فلفل و شتی و خۆخ و باجان ڕەش و گوندور و مژمژە.