سالار محەمەد دۆسكی:

1- 3

پێشمەرگە و زیندانییەكێ‌ سیاسی بەحسێ‌ سەربورا ژیانا خوە یا پێشمەرگاتیێ‌ و زیندانێن رژێمێن توركیا و بەعسییا دكەت، و چەوا هاتە زیندانكرن و چەوا ژ كنفا سێدارێ‌ رزگار بوو.
زیندانیێ‌ سیاسی كامل یاسین محەمەد زێوا شێخ پیرامووس دۆسكی، د دیدارەكێ‌ دا ل گەل رۆژنامەیا ئەڤرۆ گۆت: پشتی تێكچوونا شۆڕەشا ئیلۆنێ‌ ل سالا 1975 و دەسپێكا شۆڕەشا گولانێ‌ ل سالا 1975 و هاتنا چەكدارێن پارتی دیموكراتی كوردستان بۆ دەڤەرێ‌ و دروستكرنا رێكخستنێن پارتی ب شێوەكێ‌ باشتر، ب سەرپەرشتیا سەركردایەتی یا بەروەخت یا وی سەردەمی، ئەز هینگی قوتابی بووم ل قوتابخانا بامەرنێ‌، و جوگرافییا دەڤەرێ‌ و تایبەت یا گوندێ‌ مە كو دناڤ چیا دا بوویە، جهێ‌ ڤەحواندنا پێشمەرگەی بوویە و دیسا گەلەك پێشمەرگە ل گوندێ‌ مە دناڤا شۆڕەشێ‌ دا بووینە و پێشتر و ب رێكا پێشمەرگەیێ‌ هەر دو شۆڕەشا (مستەفا مزیری) هاتمە رێكخستن و مە دەست ب كارێ‌ رێكخستنێ‌ كر، وەك پێشتر مە ئاماژە پێكری كو ئەڤە دەسپێكەكا رێكخستنێن پارتی بوو خوە نووكرە ڤە، و نێزیكی سالەكێ‌ مە كارێ‌ رێكخستنێ‌ كر، زێدەتر بەلاڤووكێن بوومە دهاتن مە دناڤ رێكخستنێن نهێنی دا بەلاڤدكر و دیسا پرۆپاكندا شۆڕەشا نوو یا گولانێ‌ كر دناڤا خەلكی دا وی دەمی خەلكێ‌ مە بێ‌ ئومێدیەك ل دەف پەیدا ب بوو و هەست ب شكەستنێ‌ دكر وی دەمی تهێنی دروستبوونا شۆڕەشێ‌ بوون، و ژ ئەنجامێ‌ كارێ‌ مە هەر ب رێكا هەڤالەكی شانا مە هاتە ئاشكراكرن، و ئەو جهێ‌ بریار ژێ‌ دەركەفتی هەڤالەكێ‌ مە ل وێرێ‌ بوو و ئەم ئاگەهداركرین كو شانا مە هاتیە ئاشكراكرن، و فەرمانا دەستەسەركرنا مە دەركەفتی یە وی دەمی ئەم ل قوتابخانێ‌ بووین، و خوش بەختانە وانا سیێ‌ مە ل قوتابخانێ‌ تەمامكر و وانا چارێ‌ مە نەكر و مە خوە قورتالكر، و خوە گەهاندە دەڤەرێن ئازادكری، و ل دورێن گوندێ‌ مە مەفرەزەكا پێشمەرگەی هەبوو و مە خوە گەهاندێ‌ و هەر ب رێكا ئەوان پێشمەرگا مە پەیوەندی ب حوكمەتا ئیراقێ‌ كر، و مە گۆت ئەگەر چ تشتێ‌ گران ل سەر مە نەبیت جارەكا دی دێ‌ ڤەگەرینە دەڤەرێن خوە و ناڤ كەس و كارێن خوە، و پشتی چەند رۆژان بەرسڤ ل سەر داخازا مە بوومە هات كو ئەگەر بزڤرن دێ‌ هێنە دەستەسەركرن، و دێ‌ كەڤنە ئاریشێن مەزن و ئەم نەچار بووین ئەم ماینە ل گەل وێ‌ مەفرەزا پێشمەرگەی و ئەو پێشمەرگە زێدەتر مرۆڤێن مە بوون ژ گوندێ‌ (غلبیشێ‌) بوون و ئەم ماینە ل گەل ئەوان پێشمەرگان و هەتا ئەم دەربازی ئیرانێ‌ بووین و ئەم بووینە پێشمەرگە بووینە زێرەڤانێن مەرقەدێ‌ ملا مستەفا بارزانی ل ئیرانێ‌ و پشتی چەند سالان ئەم ماینە ل وێرێ‌ ئەم هاتینە راسپاردین بۆ ئینانا چەكی ژ سوریێ‌ و پشتی ئەم چووینە سوریێ‌ سنور و سنور و مە چەك وەرگرت و ئەم هاتین دا هێینە سنورێ‌ لقێ‌ ئێك و هەر ب دەستێ‌ هندەك كەسانێن خوە فرۆش ئەم كەفتینە دەستێ‌ حوكمەتا توركیا و نێزیكی دو سالان ئەم هاتینە زیندانكرن ل زیندانێن (دیاربكەر و شەمزینان) زیندانەكا گەلەك نەخوش بوو و چ رەوشتێ‌ بەشەریەتێ‌ ل دەف حوكمەتا توركان نەبوو و ئەشكەنجێن هەر دژوار ل گەل مە دهاتنە بكارئینان و سەرەدەریا نە مرۆڤانە ل گەل مە دهاتەكرن.
زیندانییێ‌ سیاسی، كامل زێوەی زێدەتر بەحسێ‌ زیندانێن توركیا كر و گۆت: زیندانا توركیا دگۆتنێ‌ (بوشونولو) یا هەژمارە (5) كو پێك هاتبوو ژ (40) قائیشا و هەمی زیندانی رێكخستنێن پارتێن كوردستانا باكور بوون و جورێن ئەشكەنجەدانێ‌ هەبوون، و جورێن ئەشكەجەندانا هوڤانە ل گەل زیندانیان دهاتەكرن، وەك (بتلدانێ‌، كارەب كرنێ‌، كێڤل دانێ‌، هەلاویستنێ‌، فەلاقێ‌، لێدانێ‌) ژ هەمی جوران قوتان هەبوو، زیندانەك بوو بۆ مرنێ‌ دچوونە وێرێ‌ و ئەگەر كەسەكی زیندانەك كوشت با ژی رەنگە پلێن مەزنتر بوو هاتبانە، كو ئەڤی خزمەتەكا مەزن بۆ دەولەتا خوە ئەنجام دایە، دەمێ‌ ل دەسپپێكێ‌ هاتینە دەستەسەكرن ناڤێ‌ من ل گەل دو هەڤالێن من ژ حوكمەتا ئیراقێ‌ بۆ توركیا هاتبوون كو ئەڤە یێن مەنە و رادەستی مە بهێنەكرن و ئەڤە بوو ئەگەر پشتی دو سالان ل زیندانێن توركیا ڤە ئەم هاتینە راەستكرن بۆ حوكمەتا ئیراقێ‌ و ل ئیفادێن خوە ل گەل توركا مە دگۆتێ‌ ئەم نە ئیراقی نە و مەزانی ئەگەر ئەم بهێنە رادەستكرن دێ‌ سزایێ‌ مە گەلەك یێ‌ دژوار بیت بەلێ‌ رێكەفتن هاتەكرن و ل خالا ئیبراهیم خەلیل ئەم رادەستی حوكمەتا ئیراقێ‌ هاتینەكرن، و مولازمەكێ‌ خەلكێ‌ سێمێلێ‌ هاتە سەر سنوری ئەم ژ میتا توركیا وەرگرتین و ئەو مولازم ل هەوالگێری یا ئیراقێ‌ كاردكر، و دوڤدا ئەم ئینانە موخابراتا زاخوە و پاشی ئینا مە دهۆكێ‌ و پشتی دەمەكی ئێكسەر بۆ پارێزگەها مویسل هاتمە رەوانەكرن، و دوڤدا هاتمە رەوانەكرن بۆ هەوالگێری یا گشتی ل بەغدا، ل هەوالگێریا بەغدا مرۆڤ دزانیت چەوا مرۆڤ چوو تێڤە بەلێ‌ دەركەفتنا مرۆڤی ژ وی جهی گەلەك یا بزحمەت بوو، دناڤ زیندانێ‌ دا وەكی شكەفتا بوو گەلەك یا بترس و سەهم و جهێ‌ ڤەكولینێ‌ جهێ‌ مان و نەمانێ‌ بوو ، و ل وی جهی نێزیكی سێ‌ هەیڤان مامە ل ژورێن ڤەكولینێ‌ دا، رۆژەكێ‌ ئەز رویسكرم و ڤەكولین ل گەل من دهاتەكرن، كا چەوا چوویمە ناڤ پێشمەرگەی و چەوا چوومە ئیرانێ‌ و چەوا چوومە سوریێ‌ چەوا ل توركیا هاتمە دەستەسەكرن، و ڤەكولینەكا گەلەك هوویر ل گەل من دهاتەكرن و بەردەوام یێ‌ دهێمە ئەشكەنجەدان و دەستێن من كەلامچە كرینە و پێن من ژی دكەلامچەكرینە و ناڤ بەینەكێ‌ سندوقەك ل ژور بوو و سندوق كێشا قەپاخكێ‌ سندوقێ‌ ل سەر ڕاكر و مارەك ژێ‌ دەركەفت و ماری خوە ستویێ‌ من و لەشێ‌ من ئالان وەل من كر و من ئاگەه ژ خوە نەما و پشتی دەمژمێرەكێ‌ من خوە دیت یێ‌ دناڤ بەتەنیەكێ‌ دا و ژورا خوە دا و نێزیكی چەند هەیڤان مامە دئەڤان كاودانێن نەخوش دا بەردەوام ڤەكولین و لێدان، و جورێن ئەشكەنجەدانا دژوار و پشتی چار هەیڤان ب ترۆمبێلەكێ‌ رادەستی ئەمنا گشتی ل بەغدا هاتمەكرن و ب رێكا ئەمنا گشتی ل بەغدا هاتمە رادەستكرن بۆ ئەمنا دهۆكێ‌ و پشتی زڤریمە ئەمنا دهۆك، دوبارە كەفتمە بەر ڤەكولینێن هوویر و دژوار و ئەو ئەشكەنجە ل گەل مە هاتەبكارئینان ل گەل مرۆڤان ناهێتە بكارئینان و شەرێ‌ دەروونی ل گەل مە هاتەكرن و ئەو ئەشكەنجەدان بوو مرۆڤ خوە ل بەر نەگرن وەك (هەلاویستن ، كێڤل، فەلاقە و كارەب) گەلەك جورێن دی هەبووینە و رۆژەكێ‌ ل ئەمنا دهۆكێ‌ گۆتن موجەهاتە هاتیە و چاڤێن من گرێدان و برم و هەتا بریمە بەر ژورا رێڤەبەرێ‌ ئەمنێ‌ و چاڤێن من ڤەكرن و من سەحكرێ‌ بابێ‌ من و مامێ‌ من و شێخ خالدێ‌ بامەرنی نە ئانكو باب و مامێ‌ من ب رێكا شێخ خالدی هاتینە دەف من و نێزیكی 30 خولەكان مامە ل دەف و ڤەگەراند مە جهێ‌ من و ئەو چوون ل زیندانا ئەمنا دهۆك هەر چ نڤین نەبوون تێدا بنڤی و نڤستن ل سەر كونكریتی بوو و خوارن ژی یا هوسا بوو مرۆڤ نە مریت و گەلەك جاران هوسا ئەشكەنجەدان هەبوو مرۆڤ نەدشیا خوارنێ‌ بخوەت و گەلەك جورێ‌، ئەشكەنجەدانێ‌ دهینە سەرێ‌ مرۆڤی ئێدی مرۆڤ ژ خوارنێ‌ دویر دكەفت و خوارن نەیا باش بوو و پشتی چەند هەیڤ دەرباز بوون و ئانكو ژ ئینان و برنا من بۆ ئەمنا و باژێران نێزیكی سالەكێ‌ ڤە كێشا وئەم سێ‌ كەس بووین (سلێمان و محەمەد سالح) ل گەل من بوون و رۆژانە ئەشكەنجەدان و ئەگەر نەبا ژی رۆژەكێ‌ كریاێن تێكدانا ددەروونی هەبوون. دوبارە ڤەگەراندمە ئەمنا گشتی ل بەغدا و پشتی دو رۆژان مایمە ل ئەمنا گشتی هاتمە رەوانەكرن بۆ دادگەها سەورە و دادگەه بتنێ‌ ناڤ بوو و نە دادگەهەك بوو پرسیار ژ تە دهاتنەكرن تە چ كریە و چەوایە و دادگەهەكا گەلەك هوڤانە بوو و (عواد بەندەر) سەرۆكێ‌ دادگەهێ‌ بوو و سزا ل سەر من هاتەدان ل سەر مادێ‌(157) ئەلیف كو سێدارەدان هەتا دمریت و هەر دو هەڤالێت من ژی ل گەل من ب هەمان سزا و ترۆمبێلەك هات و ئەم هاڤێتینە پشتێ‌ دا و ئەم هاتینە رەوانەكرن بۆ هولێن سێدارەدانێ.