د. سالار عوسمان، بەرپرسێ بەشێ ڕەوشەنبیری و ڕاگەهاندنا پ. د. ك، ب ئامادەبوونا هەژمارەكا ئەندام و هەڤالێن بەشی، دوهی 23/7/2025 پێشوازی ل د. خانزاد ئەحمەد، ئەمیندارا گشتی یا ئەنجوومەنێ بلند یێ‌ خانمان و گەشەپێدانێ‌ و شاندێ دەل دا كر.
د دیدارەكێ‌ دا، دانوستاند ل دۆر كاریگەریا ڕاگەهاندنێ‌ ل سەر پرسێن گرێدای مافێن ئافرەتان هاتە كرن، هەروەسا ب هووری تیشك ئێخستە سەر پێنگاڤێن پێشئێخستنا ماف و بهێزكرنا ڕۆل و پێگەهێ‌ خانمێن كوردستانێ‌، كو ڕاگەهاندن د ڤێ‌ ناڤبەینێ‌ دا ڕۆلەكێ‌ كارا و گرنگ دبینیت، ب ئاراستەیێ‌ زێدەتر ئاشتیا.
د. سالار عوسمان، پشتەڤانیا بەشێ ڕەوشەنبیری و ڕاگەهاندنێ‌ بۆ ئەنجوومەنێ بلند یێ‌ خانمان و گەشەپێدانێ‌ دووپاتكر و گۆت: «مە باوەریەكا كویر ب پاراستنا مافێن ئافرەتێ‌ هەیە، ب تایبەت د پڕۆژە و چالاكیێن مە یێن بهێن دا، یێن گرێدای ب بیاڤێن رەوشەنبیری و ڕاگەهاندنێ‌ دێ‌ پتر كاری ل سەر كەین».

سالانە ل رۆژا 31/7 جینۆسایدكرنا هەشت هزار بارزانیان ب رەنگێن جودا دهێتە ساخكرن، ئەڤ سالە 42 سالیا جینۆسایدكرنا بارزانیان وەكو سالێن بۆری ب رەنگەكێ نۆرمال دێ هێتە ساخكرن.
كەریم كاوە، رێڤەبەرێ گشتیێ شەهید و ئەنفالكریان ل ئیدارا سەربخۆ یا سۆران بۆ ئەڤرۆ گۆت: «سالانە بیرەوەریا جینۆسایدكرنا هەشت هزار بارزانیان ب رەنگێن جودا هاتیە ساخكرن، ئەو سالێن روفات هاتینە زڤڕاندن، رێورەسمێن مەزن هاتنە ئەنجامدان و سالێن دی ژی ب رەنگێن تایبەت هاتینە ساخكرن».
ناڤبری گۆتژی: «سالانە ب بەرهەڤبوونا بەرپرسێن سیاسی و حكومی و كەسوكارێن جینۆسایدكریان رێورەسم دهێنە ئەنجامدان، ئەم هەموو پێكڤە خزمەتا مێهڤانێن رێورەسمان دكەین ب سەرپەرشتیا نڤیسنگەها مەلا مستەفا بارزانی، نوكە ژی بەرهەڤی دهێنە كرن، كو رێورەسمەك ژ لایێ خەلكی ڤە، وەكو وەفاداریەك بۆ جینۆسایدكریان بهێتە ئەنجامدان».
كەریم زێدەتر گۆت: «ل رۆژا 31/7/1983 رژێما بەعسا ئیراقێ ب چەندین قووناغان هەشت هزار بارزانی جینۆسایدكرن و هەتا نوكە روفاتێن هەموویان بۆ بارزان نەهاتینە زڤڕاندن، ب تنێ‌ روفاتێن 696 ئەنفالان هاتینە زڤڕاندن و ل گۆڕستانەكا تایبەت ل بارزان هاتینە ڤەشارتن».

ل ڕۆژا چارشەمی 23- 7- 2025 ل ناوچەدارییا شێخان ب بەرهەڤبوونا د. سالار عوسمان بەرپرسێ پشکا رەوشەنبیری و ڕاگەهاندنێ و سالح حەیدەر بەرپرسێ لقێ 20 یێ پ.د.ک و هژمارەکا زۆر یا رەوشەنبیر و نڤیسەر و کەساتییێن ئۆلی و هونەرمەندان ئێکەمین سالڤەگەڕا دامەزراندنا تۆڕا مەدیایی یا شێخان هاتە ڕاگەهاندن. هەژییە ببێژین کو د. سالار عوسمان پەیڤەک پێشکێشکر ب درێژی بەحسێ پێکڤە ژیانێ ل دەڤەرا شێخان کر و پاشی چەند پارچە مۆزیک و ستران ژ لایێ تیپا شاریا یا هونەریڤە هاتنە پێشکێشکرن

دهۆك، لەزگین جۆقی:

ئەندامەكێ جڤاتا پارێزگەها نەینەوا راگەهاند، ڤەكرنا نەخۆشخانەیا لالاڤ دێ گەلەك ئاریشەیان چارەسەركەت و دبێژیت: نوكە رازیبوون هاتیە كرن، دوبارە ئەو نەخۆشخانەیە بكەڤیتە د خزمەتا نەخۆشان دا.
د. ئەحمەد نازم، ئەندامێ جڤاتا پارێزگەها نەینەوا بۆ رۆژناما ئەڤرۆ خویا كر، دەست ب بەرهەڤیێن ڤەكرنا نەخۆشخانەیا لالاڤ ل ناوچەداریا فەیدیێ هاتیە كرن و گۆت: «ب هزارەها كەس دێ ژ خزمەتێن نەخۆشخانەیا لالاڤ مفاداربن و گەلەك ئاریشەیان دێ چارەسەر كەت، هەمی خزمەتێن ساخلەمیێ بۆ نەخۆشان دێ د ناڤ دا هێنە دابینكرن».
نەخۆشخانەیا لالاڤ ل ناوچەداریا فەیدیێ ژ لایێ خێرخوازەكێ پارێزگەها دهۆكێ ب هەڤكاری و پشتەڤانیا حكومەتا هەرێما كوردستانێ هاتیە ئاڤاكرن.

هەولێر، قائید میرۆ:

بریكارا وەزارەتا كار و كاروبارێن جڤاكی یا حوكمەتا هەرێما كوردستانێ‌ ئاشكراكر، بانكا نێڤدەولەتی دێ هاریكاریا سێ‌ هزار و 200 خێزانێن دهۆكێ كەت و دبێژیت: ل دەستپێكێ ل پارێزگەها دهۆكێ هاریكاری دێ هێتە بەلاڤكرن و د دووڤ دا ل پارێزگەهێن دی ژی دێ‌ هێتە بەلاڤكرن.
زەكیا سەید سالح، بریكارا وەزارەتا كار و كاروبارێن جڤاكی بۆ رۆژناما ئەڤرۆ دیاركر، د چارچوڤێ هاریكاریێن بانكا نێڤدەولەتی دا، وەكی ئەزموون قووناغا ئێكێ ل پارێزگەها دهۆكێ دێ هێتە دەستپێكرن و هاریكاریا سێ هزار و 200 خێزانان دێ هێتە كرن و 20%ێ ژ وان ژی دێ بۆ خەلكێ پەنابەربیت و یا دی ژی بۆ خەلكێ خۆجهێ دەڤەرێ یە و گۆت: «رێنمایی بۆ ئەوان تەخێن ژ ئەڤێ هاریكاریێ دێ مفاداربن؛ هاتینە دەركرن، بۆ نموونە: كێم ئەندام و قوربانیێن توندوتیژیێ و كەسێن دانعەمر، جارێ وەكی ئەزموون دێ ل دهۆكێ هێتە بجهئینان و د دووڤ دا، پارێزگەهێن دی ژی دێ‌ ڤەگریت و پڕۆژە بەردەوامبیت».
زەكیا سەید سالح گۆتژی: «رێكخراوا یۆنسێف ژی هاریكاری بۆ قوتابیێن خێزانێن كێم ئەندام دابین كریە، ب سێ قووناغان هاریكاریا قوتابیان هاتیە كرن، هەر سێ هەیڤا جارەكێ 90 هزار دینار بۆ هاتینە مەزاختن، ل پارێزگەها دهۆكێ هزار و 678 كەس مفاداربووینە، بڕیارە ل پارێزگەها سلێمانیێ هاریكاری بۆ ئەڤان قوتابیان بهێتە كرن یێن ژ قوتابخانێ ڤەقەتیاین و خێزانێن كێم ئەندامن».