رۆژنامەیەکا ئەمریکی دیار دکەت هەکە خوەنیشادانێن نها ل ئیرانێ بەرفرەهتر لێ بهێن دێ رێبەرێ ئیرانێ رەڤیت و چیتە رۆسیا و نها بەرهەڤیان ژی دکەت و پشتەڤانیا ترامپی وەسا کریە خەلکێ ئیرانێ د رژدن رژێما نها نەمینیت.

رۆژنامەیا نیویورک تایمز یا ئەمریکی د راپۆرتەکێ دا دیار کریە، پشتی دەستەسەرکرنا سەرۆکێ ڤینزۆیلا، رەوشەکا نوو ل جیهانێ و ب تایبەتی ژی ل رۆژهەلاتا ناڤین هاتیە پێش، ئەمریکا ب دەستەسەرکرنا مادۆرۆ دربەک مەزن ل ئیرانێ دا و نها خوەنیشادانێن ل ئیرانێ ژی بەرفرەهتر دبن و ئەمریکا پشتەڤانیێ ل خوەنیشادەران دکەت، بەری نها ژی خوەنیشادان هەبوون لێ ئەمریکا پشتەڤانی لێ نەکر، نها رەوشەک نوو هاتیە پێش و ترامپی هەتا نها دو جاران گەف ل بەرپرسێن ئیرانێ کرینە کو هەکە توندوتیژیێ ل دژی خوەنیشادەران بکار بینن دێ دەستێوەردانێ کەن و ئەو یەک ژی مۆرالەک گەلەک مەزن دایە خوەنیشادەران و چەند رۆژن خوەنیشادان ل گەلەک باژێرێن دی ژی بەلاڤ بووینە و نها رەوشا بەرپرسێن ئیرانێ گەلەک خرابە و رێبەرێ ئیرانێ بەرهەڤیان دکەت هەکە نەشیان خوەنیشادانان کۆنترۆل بکەن بڕەڤیت و بچیتە رۆسیا.
هەمان رۆژنامێ ئەو یەک ژی دیار کریە، ئەمریکا و ئسرائیل کار بۆ گوهۆڕینێن مەزن ل رۆژهەلاتا ناڤین دکەن و ب ژناڤچوونا رژێما ئیرانێ دێ گوهۆڕینێن گەلەک مەزن روو دەن، خەلکێ ئیرانێ ژ رژێما نها بێزار بووینە و خەلک داخوازا ئازادیێ و ژیانەکا خوەش و ئارام دکەن، لێ دەستهەلاتا نها یا ئیرانێ چو بەرنامە بۆ باشکرنا ژیانا وەلاتیان نینن، باوەریا وەلاتیان ب دەستهەلاتا نها نەمایە و ژ بەر ڤێ یەکی ژی ب پشتەڤانیا ئەمریکا و ئسرائیلێ دێ گوهۆڕینێن گەلەک مەزن ل ئیرانێ روو دەن، دهێتە چاڤەرێکرن خوەنیشادان بەرفرەهتر لێ بهێن و بگەهنە هەموو باژێرێن ئیرانێ.
ل ئالیێ رێکخستنا مافێن مرۆڤی یا رۆژهەلاتێ کوردستانێ ژی دیار کر د ئەنجاما خوەنیشادانێن چەند رۆژێن بۆری ل ئیرانێ و ل باژێرێن کرماشان و ئیلامێ دا هەتا نها ٨ وەلاتیێن کورد شەهید کەفتینە و گەلەک کەس ژی بریندارن و دوهی هێزێن ئێمناهیێ ل ئیلامێ گەلەک بزاڤ کرن هندەک ژ بریندارێن ل نەخوەشخانەیێ بڕەڤینن و خوەنیشادەران ژی ب بەران ئێرشی هێزێن ئێمناهێ کرن دا برینداران بپارێزن.
چاڤدێرێن سیاسی ژی دیار دکەن، ژ بەر شەڕێ ١٢ رۆژان یێ ل گەل ئسرائیلێ، دەستهەلاتا ئیرانێ گەلەک لاواز بوویە و خەلک ژ هێزێن ئێمناهیێ ناترسن و ل ئالیێ دی پشتەڤانیا ترامپی یا بۆ خوەنیشادەران ژی وەسا کریە خەلک رژد بن و خوەنیشادان ژی دێ بەرەهتر لێ هێن و دبیت د دەمەکێ نێزیک دا گوهۆڕینێن گەلەک مەزن ل ئیرانێ روو بدەن و ئەو یەک دێ کاریگەریا خوە ل هەموو رۆژهەلاتا ناڤین کەت.

سەرۆک کۆمارێ ئیرانێ مەسعود پزیشکیان د داخویانیەکێ دا دیار کر، داخوازیێن خەلکی ژ بۆ ژیانەکا ئارام و خوەش رەوانە، دڤێت حوکمەت و ئالیێن پەیوەندیدار گوهداریا خەلکی بکەن و نابیت توندوتیژی ل دژی خەلکی بهێتە بکارئینان، چونکی حوکمەت نەشێت ب زۆرێ خەلکی ئارام بکەت و دڤێت داخوازیێن وان بجه بینین و گرنگە رێ نەدەین رەوشا ناڤخوەیی یا ئیرانێ ئالۆزتر لێ بهێت.
سەرۆک کۆمارێ ئیرانێ داخواز ژ هێزێن ئێمناهێ ژی کر کو توندوتیژیێ ل دژی خوەنیشادەران بکار نەئینن و رێزێ ل داخوازیێن وان بگرن، چونکی توندوتیژی و کوشتنا وەلاتیان دێ بیتە ئەگەر رەوشا ئیرانێ گەلەک خرابتر لێ بهێت و وی دەمی کەس نەشێت رەوشێ کۆنترۆل بکەت.
ئەو یەک د دەمەکێ دایە کو د ئەنجاما خوەنیشادانێن ل ئیرانێ دا هەتا نها پتر ژ بیست وەلاتیێن سڤیل جانێ خوە ژ دەست داینە و گەلەک کەس ژی بریندارن و هێزێن ئێمناهیێ توندوتیژیێ ل دژی خوەنیشادەران بکار دئینن.

ناڤەندا چاڤدێریا مافێن مرۆڤی یا سووریێ دیار کر، چەند رۆژن ئەمریکا هێزێن زێدەتر رەوانەی بنگەهێن خوە یێن سەربازی ل رۆژئاڤایێ کوردستانێ کریە و ب تایبەتی ژی ل نێزیکی قامشلۆ و حەسەکێ چەندین بنگەهێن نوو هاتینە ئاڤا کرن و ئەو یەک ژی نیشا ددەت ئەمریکا جارێ نەڤێت هێزێن خوە ژ باکورێ سووریێ و دەڤەرێن کوردی ڤەکێشیت و دیارە ئەمریکا دڤێت زێدەتر ژ جاران پشتەڤانیا کوردان و ب تایبەتی ژی هێزێن سووریا دیموکرات بکەت.
هەمان ناڤەندێ ئەو یەک ژی دیار کریە بەری سەرێ سالێ ژی ئەمریکا چەکێن گەلەک گران و پێشکەفتی ل بنگەهێن خوە یێن ل رۆژئاڤایێ کوردستانێ بجه کرینە و ئەو یەک ژی بوویە جهێ دلخوەشیا خەلکێ کورد و پێکهاتەیێن دی یێن کو ل باکورێ سووریێ دژین، چونکی خەلک وەسا دبینن هەتا هێزێن ئەمریکا ل باکورێ سووریێ بمینن چو هێزەک نەشێت ئێرشی رۆژئاڤایێ کوردستانێ بکەت.