نوونەرێ نێچیرڤان بارزانی، سەرۆكێ هەرێما كوردستانێ، دلشاد شەهـاب و سەربەست لەزگین، ئەندامێ مەكتەبا سیاسیا پارتی و بەرپرسێ مەكتەبا رێكخستنا پارێزگەها دهـۆكێ‌ و د. عەلی تەتەر، پارێزگارێ دهـۆكێ و حەمید عەلی و د. ڤیان سلێمان هاریكارێن بەرپرسێ‌ مەكتەبا رێكخستنێ و هەژمارەكا دی یا بەرپرسێن پارێزگەها دهـۆكێ‌ و ئیدارا سەربخۆ یا زاخۆ پێشوازی ل تۆلایی هاتیمئۆغلۆ و تونجەر باكرهان، هەڤسەرۆكێن دەمپارتییێ و شاندەكێ پێڕا كر ل ئیبراهیم خەلیل.
هەرێما كوردستانێ مێڤانداریا برێڤەچوونا پێنگاڤەكا گرنگ و چاڕەنڤیساز و مێژوویی كر كو ئەو ژی پێنگاڤەكا رژدبوو، بۆ ئاشتیەكا گشتگیر ل وەلاتێ توركیا و ئێكەم قووناغا ڤێ پرۆسەیا ئاشتیێ ژی ل ناڤچەیەكا دیاریكریا هەرێما كوردستانێ برێڤەچوو.
جهـێ ئاماژێ یە، د هەمی قووناغان دا جەنابێ سەرۆك بارزانی وەكو سەركردەیەكێ ئاشتیخواز ئامادەیا خۆ نیشادایە بۆ ناڤبەینكاریێ و هەردەم رۆلەكێ مێژوویی و كاریگەر بۆ سەركەفتنا پرۆسەیا ئاشتیێ ل وەلاتێ توركیا ب تایبەت و ل رۆژهـەلاتا ناڤین ب گشتی گێڕایە.

زاخۆ، دلۆڤان هالۆ:

ڕێڤەبەرییا گشتی یا باژێڕڤانیان ل ئیدارەیا سەربخوە یا زاخۆ دیاركر كو ب گوژمێ پتر ژ 921 ملیۆن دیناران پڕۆژەیێ خزمەتگوزاری یێ چێكرنا جادەیان ل گوندێ خرابابكێ ل زاخۆ، قووناغا دویێ ل سەر پێشینەیا گەشەپێدانێ‌ یا ئیدارەیا سەربخوە یا زاخۆ و ژ لایێ كۆمپانیا ڕۆنیا ڤە دهێتە بجهئینان.
ڕێڤەبەرییا گشتی یا باژێڕڤانیان ل ئیدارەیا سەربخوە یا زاخۆ، ئاماژە ب وێ چەندێ ژی كر كو ئەڤ پڕۆژە د قووناغا دووماهیێ دایە و برگا رائێخستنێ ب تەخا بایندەری دەستپێكریە، جەخت ل كوالیتی و ب دوماهی هاتنا پڕۆژەی دهێتە كرن، كو د دەمێ خۆ یێ یاسایی دا ب دوماهی بهێت و بكەڤیتە د خزمەتا وەلاتیێن دەڤەرێ دا.

ب ئامادەبوونا ماجد سەید سالح و شەمعون شلیمون ئیشۆ، جێگرێن پارێزگارێ دهۆكێ و د. داود سلێمان، سەرۆكێ زانكۆیا دهۆك و پ. د. محەمەد حسێن، رێڤەبەرێ گشتی ل وەزارەتا خواندنا بلند و ڤەكۆلینێن زانستی و هەژمارەكا مامۆستایێن زانكۆیان، كۆڕبەندێ سێیێ یێ ئەركێ سێیەمێ زانكۆیا دهۆك و كارتێكرنێن جڤاكی 2025 ل ژێر درووشمێ «پێكڤە بەرەڤ جڤاكەكێ بەردەوام» هاتە گێڕان و تێدا بسپۆرێن ژ ئەكادیمیا و دامەزراوەیێن حكومی و رێكخراوێن نەحكومی و سەركردێن جڤاكی پشكدارببوون.
ئارمانج ژ كۆڕبەندی «بهێزكرنا هەڤكاریێ بوو د ناڤبەرا لایەنێن پشكدار دا» هەر د كۆڕبەندی دا هەولێن ستراتیژی و پشكداریێن زانكۆیا دهۆك بۆ پێشئێخستنا ئارمانجێن گەشەپێدانا بەردەوام یێن نەتەوەیێن ئێكگرتی SDGs هاتنە بەحسكرن و نیشادان.

رەمەزان زەكەریا:

ل سەنتەرێ ناوچەداریا دارەتۆ ل سنۆرێ دەڤەرداریا بەردەڕەشێ هەژمارەكا رێكێن ناڤخۆیی هاتنە قێركرن.
تەحسین عیسمەت، رێڤەبەرێ ناوچەداریا دارەتۆ ل سنۆرێ دەڤەرداریا بەردەڕەشێ بۆ ئەڤرۆ گۆت: «د چارچوڤێ ئەنجامدانا پڕۆژەیێن خزمەتگوزاری دا، ئەوێن ژ لایێ حكومەتا هەرێماكوردستانێ ڤە دهێنە بجهئینان، 13 هزار و 130 مەترێن دوجا یێن رێكێن د ناڤ ناوچەداریا دارەتۆ دا هاتینە قێركرن و كارێ وان ب دوماهی هاتیە».
ناڤبری گۆتژی: «ل دەمەكێ نێزیك دێ رێكا ناوچەداریا دارەتۆ بۆ گوندێ باوەران و رێكا گوندێ خارووك و گوندێ دالەرێ و گوندێ گربدەوێ نوێ دێ هێنە سەخبێركرن».

ئامێدیێ، مەحمود نهێلی:

ژ ئەگەرێ كێمبوونا ئاڤا هاڤینگەها ئاشەوا، كارتێكرن ل سەر كەرتێ گەشتوگوزار و چاندنێ ل چەند گوندان كریە، ئەڤ یەكە ژی بوویە ئەگەرێ نەرازیبوونێ ل نك خەلكێ وان گوندان و خودانێن جهێن گەشتیاری.
ئەلند ئەمیر كوكە، رێڤەبەرێ ناوچەدارییا سەرسنكێ بۆ رۆژناما ئەڤرۆ دیاركر، ئەوان ب هەڤكاری ل گەل رێڤەبەرییا گەشتوگوزارا ئامیدیێ و چەند سازیێن دی یێن دەڤەرێ ژ نێزیك دووڤچوون ل سەر ئاریشەیا ئاڤێ ل ئاشەوا كریە و لژنەك پێكئینایە و گۆت: «ئاریشەیا ئاڤێ د ناڤبەرا چەند گوندان و هەژمارەكا جهێن گەشتیاری دا ل سنۆرێ گوندێ ئاشەوا دروست بوویە».
گۆتژی: «ژ بۆ چارەسەركرنا ئاریشەیا ئاڤێ ل وێ دەڤەرێ مە ژ نێزیك سەرەدانا وان جهان كر، ژ بەركو ژێدەرێ ئاڤێ ل گوندێ ئاشەوا دهێت، ئەو لژنە دێ ب هووری دووڤچوونێ ل سەر ئاریشەیا ئاڤێ ل ئاشەوا و وان گوندان كەت، ئاریشە ژی ب تنێ ل سەر ئاڤا جهێن گەشتیاری و چاندنێ یە، ئاڤا ڤەخوارنێ یا دروستە و چو ئاریشە تێدا نینە».