شیان مەهدی کانیسارکی
هەردەم دەنگێ کەنیێ بلند یێ مەیموونکێ و بەبەغای ب سەر گوندێ دکەفت، دۆل و نهالێن دەوروبەر تژی دەنگ دبوون. دەمێ گیانەوەرێن دی گوهـ ل ڤێ کەنیێ ببا بێی بابەتی بزانن وان ژی بەرددا کەنیێ و دبوو تیق تیقا وان. ل پەڕێ گوندی کەرەک دژیا کو بەری چەند سالان پەندڤانێ گوندی یێ وەغەرکری، ئەو ژ گوندی کربوو دەر، لێ ئەڤ سالە هێدی هێدی یێ مالا خوە نێزیکی گوندی دکەت. ئەڤ کەرە یێ بەرنیاسبوو ب دەبەنگی و دەنگ بلندیا خوە یا نەخوەش، ئەو چەند هەیڤ بوو ئێدی دناڤ هەمی دیواناندا یێ دیاربوو و ببوو «خوێ یا ناڤ هەمی گرارا».
ئێدی پشتی بۆرینا سالەکێ گیانەوەران ئاریشەیێن خوە برنە دەف وی و ئاخفتنا وی بۆ جهێ سەرنج و گرنگیپێدانا گوندێن دەوروبەر ژی! ئێدی ل بەر دەرگەهێ مالا وی تیڤاڕێزکا سرایێ یا دیاربوو، لێ ڕاوێژکارێن وی مەیموونکێ و بەبەغای زوی ب زوی ڕێک نەددا کەسێ ب ژۆر بکەڤن…و ب ڕێکەکا ڤەشارتی و پلانەکێ کەر ل سەر کورسیکێ ڕوینشت، هەر د وێ ڕۆژێدا ژ کەیفخوەشیا وەرگرتنا پاشایەتیێدا کۆمبوونەک ڕێکئێخست و ل سەرێ دیوانێ ڕوینشت و ب دەنگەکێ بلند گۆت: «ژ نوکە پێڤە ئەز دێ ڤی گوندی ب ڕێڤەبەم، هەر کەسەکێ ئەڤ بریارە ب دلی نەبیت، دەرگەهـ یێ ل تاقە! « هەمی ئامادەبوویی ب ئاخفتنا وی شۆک بوون، لێ کەسێ دەنگ ژ خوە نەئینا. ئێدی ڕۆژ بۆ ڕۆژێ ڕەوشەنبیر و هزرمەندرێن گوندی ئێک ئێکە مالێن خوە ژ گوندی بارکرن و چوون.
لێ ئەڤ تشتە هندی سەرێ دەرزیکێ بۆ کەری و هەڤکویفێن وی خەم نەبوو، سپێدەهیەکێ پشتی کەر ژ خەو هشیاربووی بریار دەرکر و فەرماندا «نامەیان بۆ کەرێن گوندێن دەوروبەر و هەمی جیهانێ فرێکەن، داکو بهێن ل گوندێ وان بژین». ڕۆژ بۆ ڕۆژێ کەر ل گوندی زێدەبوون ئێدی گوند زێدەبوو و بەرەڤ باژێربوونێ چوو، نوکەژی ئەو باژێر یێ بەرنیاسە ب باژێرێ کەران.
نيشاندان