چاڤەڕێ‌ دهێتە كرن ل دووماهییا ڤێ‌ مەهێ‌ دەست ب هەڤڕكیێن قارەمانییا پیلیستانگ ل سەر ئاستێ‌ تازەپێگەهشتیێن كچێن یانەیێن كوردستانێ‌ ل هەولێرا پایتەخت بهێتە كرن، ئەوا بڕیارە 15 یانە پشكداربن ژ وانا دو یانەیێن پارێزگەها دهۆكێ‌ دێ‌ هەڤڕكیێن بۆ ناسناڤێ‌ ئەڤ سالە كەن.
ل دۆر پشكدارییا یانەیا ئافرەتێن دهۆكێ‌ سەردار سالح سەرۆكێ‌ یانەیێ‌ بۆ رۆژنامەیا ئەڤرۆ گۆت: پشتی فدارسیۆنا فوتبۆلا كوردستانێ‌ بڕیاردایی ب ڕێكخستنا قارەمانییا كچێن كوردستانێ‌ ل بن ژیێ‌ 18 سالی بناڤێ‌ قارەمانییا پیلیستانگ ل 23ێ‌ ڤێ‌ مەهێ‌ بهێتە كرن، وەكو كارگێرییا یانەیێ‌ مە بڕیار دا تیما خوە یا تازەپێگەهشتییان بەرهەڤبكەین بۆ قارەمانیێ‌ ب سەرپەرشتییا كاپتن ئاراز سالح و هاریكارێ‌ وی كاپتن سیپەل شوكر و ڕاهێنەرا گۆلپارێزان دەریا یونس، دگەل یاریزانێن تازەپێگەهشتی كو هەموو ژی كچێن پارێزگەها دهۆكێ‌ نە.
هەروەسان ناڤهاتی گۆت: د ڤێ‌ حەفتیێ‌ دا دەست ب ڕاهێنانان هاتییە كرن و پلان هاتییە دانان بۆ قارەمانیێ‌ نە بتنێ‌ پشكداری و زێدەكرنا شارەزاهیی بلندكرنا ئاستێ‌ یاریزانان بیت بەلكو زێدەباری نەخشە پلان ژی بۆ ب دەستڤە ئینانا ناسناڤێ‌ دویێ‌ یێ‌ ئەڤ سالە بۆ پارێزگەها دهۆكێ‌ و یانەیا ئافرەتێن دهۆك پشتی دەستڤە ئینانا ناسناڤێ‌ خولا كچێن كوردستانێ‌ ل سەر ئاستێ‌ پێشكەڤتییان ئەوا د رۆژا پارێزگەهبوونا دهۆكێ‌ دا مە بۆ پارێزگەها خوە كرییە دیاری.
ژلایەكێ‌ دووڤە سەردار سالحی سۆپاسییا پارێزگارێ‌ دهۆكێ‌ كر و گەشبینە بۆ دەستكەڤتەكی و گۆت: پێنەڤێت پشكدارییا تیما مە د ڤێ‌ قارەمانیێ‌ دا هاتییە پشتی د. عەلی تەتەر پارێزگارێ‌ دهۆكێ‌ بەرهەڤییا خوە دیاركری پشتەڤانییا ڤێ‌ تیمێ‌ بكەت ژبەركو تاكە یانەیا ل سنۆرێ‌ پارێزگەها دهۆكێ‌ ل سەر ئاستێ‌ كچان یا پشكدارە و مە ژی هیڤی ئۆمێد هەنە و گەشبینن دێ‌ كچێن مە شێن ئاست و ئانجام گەهنە دەستكەڤتەكێ‌ دی یێ‌ كوردستانێ‌ بۆ وەرزێ‌ ئەڤ سالە.
بۆ زانین ل وەرزێ‌ ئەڤ سالە تیما یانەیا ئافرەتێن دهۆكێ‌ بۆ جارا دویێ‌ ل دووڤ ئێك و یا سێیێ‌ د دیرۆكا خوە دا ناسناڤێ‌ خولا فوتسالا كوردستانێ‌ ل سەر ئاستێ‌ پێشكەڤتیان ب دەستڤە ئینا و یاریزانا وێ‌ سیپەل شوكر بۆ سالا دویێ‌ ل دووڤ ئێك بوو گۆلكەرا خولێ‌، یا وەرزێ‌ بۆری 17 گۆل هەبوون و یا وەرزێ‌ ئەڤ سالە 28 گۆل تۆمار كربوون.

عەلی حاجی:

د داخویانیەکێ دا سکرتێرێ یانەیا زاخۆ یا وەرزشی بۆ رۆژنامەیا ئەڤرۆ دیار کر وان لژنەیەکا تایبەت یا دەست نیشان کرن و ئینانا یاریزانان هاتیە پێکئینان و ئەو لژنەیە کارێ خوە دکەت.
زێدەتر هشیار شەهباز گۆت: لدووڤ وێ پلانا هاتیە دارێشتن ژلایێ دەستەیا کارگێریا یانەیا زاخۆ ڤە کو پێکئینانا لژنەیەکا تایبەتە یا دەست نیشان کرن و ئینانا یاریزانایە بۆ تیما مە ژ بۆ وەرزێ نوو یێ خولا ستێرێن ئیراقێ یا فوتبۆلێ، بێگومان د قوناغا ئێکێ دا دێ گرێبەستا وان یاریزانان هێتە نوو کرن یێن کو ڕاهێنەرێ مە عەبدولغەنی شەهد داخازا مانا وان یاریزانان کری، د نوکە دا گرێبەستا ئالیو ئادەمی هاتیە نوو کرن ودەمەک نێزیک دا دێ گرێبەستا هندەک یاریزانێن دیتر ژی هێتە نوو کرن.
هەروەسان ناڤهاتی گۆت: د ئەڤ سالە دا گەلەک دەم ل بەر دەست نینە و دەم گەلەک کێمە ژبەر هندێ پێدڤیە ئەم ب هویری کار بکەین داکو بشێن یاریزانێن باش پەیدا بکەین و گرێبەستێ دگەل دا ئیمزا بکەین،ئەم ناخوازین تیما خوە گەلەک گوهورینان تێدا بکەین ژبەرکو ئەو چەندە د بەرژەوەندیا مە دا نینە، نێزیکی ٦٠٪ دێ یاریزانێن تیما خوە پارێزین.
ناڤبری گۆت ژی: ئەم دانوستاندنێ داینە دگەل چەندین یاریزانێن باش و پێدڤیە تیمەکا ب هێزتر ژ وەرزێ بوری دروست بکەین و بۆ وەرزێ بهێت مە ئارمانجێن مەزنتر هەنە.
بۆ زانین تیما یانەیا زاخۆ بۆ وەرزێ ٢٠٢٤-٢٠٢٥ێ شیا ڕێزا سێیێ ل سەر ئاستێ خولا ستێرێن ئیراقێ بهێت پشتی ٧٢ خال کۆمکرین دیسان تا ڕادەیەکێ مەزن پلێتەکا پشکداریێ د قارەمانییەکا دەرڤە مسۆگەر کرییە.

شاهۆ فەرید:

د داخویانیەكێ‌ دا سەرۆكێ‌ فدراسیونا یارییا لەش جوانیێ‌ ل پارێزگەها دهۆكێ‌ بۆ رۆژنامەیا ئەڤرۆ دیار كر ڤەكرنا خولا ڕاهێنانێ‌ گەلەك یا گرنگ بوو و د دەمێ‌ خوە دا هاتییە و نابیت هیچ ڕاهێنەرەك بێ‌ باوەرنامە ل چ هولێن وەرزشی كاربكەت وەكو راهێنەرێ‌ هۆلێ‌، ئەوما ژی ئەڤ خولە ب چاڤدێریا لژنەیا ئۆلمپیا پارێزگەها دهۆكێ دگەل فدراسیونا یارییا لەش جوانیێ و شیانێن جەستەیی بهەڤكاری دگەل فێدراسیونا ئیراقێ بۆ 80 ڕاهێنەرێن هەردو رەگەزان چەندین وانە ب شێوازیێ پراتیكی و تیوریی دهێنە پێشكیشكرن.
زێدەتر عەلی حسێن دیاركر ئەڤە خولە ژ ئاستێ دەستپێكێ یە ب ڕێكا ئەڤێ باوەرنامەیێ ڕاهێنەر دێ ماف هەبیت پشكداری ل هەر شەش ئاستێن دووڤ دا كەت، وانەبێژێن ئەڤێ خولێ ژی خودان باوەرنامە یێن بلندن ژوان عومەر بورهان كو وانەبێژێ فێدراسیونا لەش جوانیا جیهانی A. F. B. B و د. چیاڤان محەمەد و د. نێڤییان یاسر ڤە دهێنە گۆتن، ماوەیێ خۆلێ چار رۆژان دێ ڤەكێشیت تێدا هەموو وانەیێن گرێدایی لەش جوانیێ و شیانێن جەستەیی هێنە گۆتن.
هەروەسان ناڤهاتی گۆت ژی: پشكدارێن خولێ ب مەرجەكی پشكداربوونە دڤیا یاریزانێن هولابن و شارەزاهی دراهێنانا دا هەبیت، وانە ل سەر خوراكێن خوارنێ و زانستێ راهێنەریێ و ئاڤاكرنا ماسولكێن لەشی و سالوخەتێن راهێنەریی ڤە گرێدایی، مەرەما ڤەكرنا ئەڤێ خولێ دڤێت راهێنەرێ هولێ هەلگریێ باوەرنامەیێ بیتن ژبەر كۆ مە لژنەكا دووڤچوونێ پێكئینابوو دیاربوو چەندین راهێنەر دبێ باوەرنامەنە، ل دووڤ داخوازیا وانا و یا مە سەرژمێریی بۆ كری دیار بۆ پێدڤییە ئەڤ خولە بهێتە ڤەكرن ئەڤی دەمی دا.

قەیس وەیس:

هەردو یانەیێن زاخۆ و ئاكرێ‌ دەربازبوونا خوە بۆ قۆناغا دویێ‌ یا خولا كوردستانێ‌ بۆ یاریزانێن ل بن 20 سالی دا ل سەر ئاستێ‌ لاوان مسۆگەر كرن، پشتی د كۆما پارێزگەها دهۆكێ‌ دا دو سەركەڤتن ل دووڤ ئێك ئینایین و ڕێزێن ئێكێ‌ و دویێ‌ هاتن بەری ب دووماهی هاتنا سیستەمێ‌ كۆمان ب ئێك گەڕ، د هەڤڕكیێن واندا ئەوا 28 یانە پشكدارن و هاتینە بەلاڤكرن ل سەر شەش كۆمان، هەر كۆمەكێ‌ دو یانە دێ‌ دەربازبنە قۆناغا دویێ‌، ئەوا یاریێن وان ل دووڤ شێوازێ‌ خول ئێك گەڕ دهێنە كرن.
ژ چارچووڤەیێ‌ كۆما ئێكێ‌ لاوێن یانەیا زاخۆ دو یاری ئەنجامداینە هەردو سەركەڤتن بووینە ل سەر یانەیێن سێمێل و تەناهی ئینایە، هەروەسان یانەیا ئاكرێ‌ سەركەڤتن ل سەر هەمان یانە ئیناینە، هەردو یانەیێن زاخۆ و ئاكرێ‌ رێزێن ئێكێ‌ و دویێ‌ هاتینە ب شەش خالان و دەربازبوونا خوە مسۆگەر كرییە، یارییا بهێت یا گەڕا سێیێ‌ دێ‌ بۆ دەستڤەئینانا ڕێزا ئێكێ‌ بیت ئەوا دێ‌ ل پێنچ شەمبییا بهێت دەستپێكەت، ژلایێ‌ خوەڤە هەردو یانەیێن تەناهی و سێمێل پلێتا دەربازبوونێ‌ بۆ قۆناغا دویێ‌ ژ دەستدان و ئەنجامێ‌ یارییا بهێت چو ژ هەلوەستی نا گوهۆڕیت.

جەماوەر و پشتەڤانێن وەرزشی ل جیهانێ‌ چاڤەڕێ‌ یارییەكا گرنگ و ئاگرینە ئەوا دێ‌ دناڤبەرا دو چەمسەڕێن وەرزشی یانەیا ریال مەدرید یا ئسپانی و یانەیا پاریس سانجێرمان یا فرەنسی ژ چارچووڤەیێ‌ یارییا پێش دووماهییا مۆندیالا یانەیێن جیهانی ئەوا دێ‌ ل دەمژمێر 10ی شەڤ یاریگەها میتلایڤ ل وەلاتێ‌ ئەمریكا هێتە كرن.
ئەڤ یارییە دهێتە هژمارتن یا 13 دناڤبەرا هەردو یانەیان دا، د یاریێن بۆریدا ڕیالێ‌ شیابوو پێنج سەركەڤتنان بینت، دبەرانبەردا پاریسێ‌ چار سەركەڤتن هەبووینەو سێ‌ وەكهەڤی هاتینە د سێ‌ قارەمانیێن جودا دا چامپیۆنز، كۆپا فدراسیۆنا ئۆرۆپا و كۆپا كۆپایێن ئۆرۆپا ئەڤ قارەمانییە ل 1999ێ‌، مەزنترین سەركەڤتن یا پاریسێ‌ بوو ل كۆپا فدراسیۆنا ئۆرۆپا یا سالا 1993ێ‌ ئەوا 4-1 ب دووماهی هاتی، لێ‌ ریالێ‌ د سێ‌ یارییان دا 3-1 سەركەڤتن ل سەر ئیناینە.
یانەیا ریال مەدرید دەربازبوو ڤێ‌ قۆناغێ‌ پشتی ب سەركەڤتی ل سەر یانەیا دۆرتمۆند یا ئەلمانی ب گۆلەكێ‌ بێ‌ بەرانبەر، ژلایێ‌ خوەڤە پاریس سانجێرمان ل سەر كیستی یانەیا بایرن میۆنخ یا ئەلمانی گەهشتە ڤێ‌ قۆناغێ‌ پشتی ب سەركەڤتی ب دو گۆلان بێ‌ بەرانبەر، بۆ ڤێ‌ یاریێ‌ یێ‌ پۆلەندی سیمۆن مارسینیاك دێ‌ بیتە دادڤانێ‌ ئێكێ‌ بۆ بڕێڤەبرنا یاریێ‌.