سوسمان عومەر ئەحمەد

ل بن سیبەرا ئەوێ دارا ژ بهارا خوە کەتی، دگەل قەهوەکا تەحل، شەڕەنیخا هزرێن مامۆستایێ دەستپێکرن، هەستەكێ زۆر خەریب و ڤەگەڕیان بۆ دەمەکێ ب ژان، قۆرگەك كو ژ دەرهاڤێشتنا خەم و پەریشانییەكا هندە مەزن ژ گوهلێبوونێ نزانت چ بێژیت، ب نەچاری بێدەنگ و مەلویل گوهدانێ بۆ دكەت.
مامۆستایێ قەهوەیا خوە ڤەخوار و د ناخێ خوە دا گۆت: ئەڤێ ڕۆژێ ژی ئەز دێ چم، بەلكی ژ گێلەشۆیا ئەڤێ دنیایێ ب دویماهیک بم بۆ هەتاهەتایێ! و بەرەڤ ڕێكا كاری چوو، د دەمەکێ دا دێمەکێ نازك و بچووک د ڕێكا خوە دا دیت، د چاڤێن ئەوێ یێن شین دا بارانەكا بهێز دباری و باڕوڤەیان پرچا ئەوێ یا قەهواییی بۆ لایێ خوە دبر، مامۆستایێ گۆتێ كچكا جوان ناڤێ تە چییە؟ گۆت: ناڤێ من پەرییە، مامۆستایێ گۆتێ پەری چ بوو تە بكەم، پەرییێ گۆت: د ئەڤێ ژیانێ دا چوومە گەلەك جهان بەلێ چ جهـ وەكێ دلێ من پاک نەبوون! هەمی كەسان ئەز پالدام بۆ ژیانەكا نەخوەش و ئەز نەچارم كاری بۆ خێزانا خوە بكەم، هاریكارییا من بکە، دەمێ پەرییێ ئەڤ ئاخڤتنە گۆتین، مامۆستایێ خوەزی خواست نوکە دو چەنگ ھەبان و فڕیبا بۆ ئەسمانی و پیێن خوە ل سەر ئەڤێ دونیاییێ ڕاکربان، یا کو بتنێ مرۆڤێن خراب ل سەر پشتا خوە د ڕاوستینیت و ھەمی مرۆڤێن باش دادعویریت و دشکێنیت.
ددەمەکێ دا مامۆستایێ پەری هەمبێز كر، بارانا خەمێن ئەوێ ڕاوەستییا، پەرییێ گۆتە مامۆستایێ من دڤێت ژ هەمی كەسان دویربم و ھەر جھەکێ بلند ھەبیت بۆ ئەوێرێ بفڕم، ل ئەوی جهی نە کەسێ لێ ببینم و نە دەنگێ کەسێ بھێتە گۆهێن من، دگەل سروشتی ژیابام نە دگەل ئێش و ژانێن مرۆڤان، دگەل تیشکێن ڕۆژێ من سەما کربا، دگەل ستێران نڤستبام و من ھەمی تشت ژبیرکربان! مامۆستایێ گۆت: پەری من خوە دناڤ برینا تە دا دیت، ئەو برینا بۆ من بوویە ئارامی، ئەگەر هەرڕۆژ ئەوێ برینێ نەبینم وەک خەیال دێ ڕێکێن من چەپ بن! و مامۆستا چوو.

زوھێر کورەمارکی

ل سەر خاترا عەشقا تە
بێی کو مەلەڤانیا بزانم
ئەز ھاتمە دناڤ پلێن دەریایا چاڤێن تەدا
پلێن وان ئەز ئینام و ئەز برم
وەلێ من گوھ نەدایێ
من خۆ بداڤێن پرچا تەڤە کرە مویچرک
سەرێ ھەسپێ ھەستێن عەشقا خۆ،
دناڤ زڤڕۆک و پێلادا ھاژۆت
من دەست ژ ھیڤییێن گەھشتنێ بەرنەدان
من شەڕەکێ مەزن و دژوار دگەل پێلانکر
سەخمەراتی تە و ھەر دو چاڤا،
من دزانی تە دڤیا رۆژا من ببەیە ئاڤا
ب دانانا چەند مەکر و پیلانا؟
لێ من پیلانێن تە ژناڤبرن و ..
دەست ژ ئارمانجا بەرنەدا
ئەز ھەرێ مۆکۆڕبووم لسەر نێچیر و راڤا
تە ھزر دکر ئەز پارییەکێ بساناھیمە
دێ من ھێلییە لسەر دەراڤا
ھندی من گۆتە تە و ھیڤی ژ تەکرن
وەرە سەر رێکا راستە
دەستا ژ دفن بلندیا بەردە
یێ بیرەکێ بکۆلیت ئەو دێ کەڤیت تێدا
ھۆسا دێ رۆژا خۆ زوی بەیە ئاڤا
تە گوھ نەدا پیرا شیرەتا،
ڤێجا تو چووی و کەفتییە داڤا
ژنوو نە ئێ و نەکە چ ھیڤی و لاڤا؟
عەشقا تە !
دفەرھەنگا مندا نەما چوو ئاڤا
ئێدی ئەز د سەر ھەمان ئاڤا
رووباری ڕا دەرباز نابم
ھەرە تو لسەر رێکا خۆ
ئەز ژی لسەر رێکا خۆ
رەنجا مە ھەمی ب بەر ئاڤێ دا چوو
ئێدی ژ خۆنە سەلکێن گول و سلاڤا !

دلۆڤان هالۆ

جار حەزێن تە گەرمن
وەکی پەلێن ئاگرینە
تو گەلەك حە ز ژ من دکەی
ژ دل و جان
من ب بەرسینگێ خۆڤە
هەمبێز دکەی
ب پەیڤێن خۆ یێن شرین
من ژ ڤێ دونیایێ
دەردکەی
ئەڤینا مە
ژ یا مەم و زینێ
دژوارتر و ب هێزتر لێ دکەی
جار ژی
حەزێن تە سارن
سەرخۆش و هارن
کەرب و کین
ژ چاڤێن تە دفڕن
ئەز ژ ئاوڕیێن چاڤێن تە
دترسم
لاواز دبم
ژار دبم
ژ دلۆڤانیا تە
بێ هیڤی دبم
من تۆبەیە
ئێدی ل بەرامبەری تە
ئەز چاڤێن خۆ
ژ سەر ئێك ڕاکەم
و بێژمە تە
ئەز حەز ژ تە دکەم.

قەهرەمان عەبدوللا بەرواری

کەنی ل پەی کەنیێ..
د لیوانکا ڤێ شانەیێ دا پان دبوو،
دەستێن بچویک گول هەمبێز دکرن
دەستێن بچویکتر پێنۆس باوەش دکرن
ل قولاچکەکا پڕی شھ دا..
زارۆکەکی رۆندکێن ڤەشارتی فرشک دکرن.

د دلدا دگۆت: کانێ ناڤێ من؟
بۆچی مامۆستا من نابینن؟
ما ئەز هندی مێری زەرکێ مە!
یان ئەز رێڤنگێ هەلاویستییێ داڤەرستێ مە!
ل مال بابێ من دگۆت: تو قارەمانی،
بەلێ ئەڤرۆ ئەز نەقارەمانم
هەمی گڕنژین و پەسنان..
هەمی شەمالک و چەژنان..
ئەز د ناڤدا نینم،
دەستقوتانێ بتنێ د دلێ خۆ دا دبینم
خاتوینکەکا بچویک.. بچویک..
دەڤێ خۆ هێدی هێدی ..
ئینا بەر گوهێ وی و گۆتێ:
تو ژ مە هەمیان جوانتر وێنەیا دکێشی!
زارۆک گڕنژی،
وی زانی دیاری هەمی گاڤان نەکاغەزن
وی زانی دیاری نە دەستقوتانێن ب لەز و بەزن
زارۆک زڤری ڤە،
د سینگێ وی دا هزار دیاری،
ول سەر دێمێ وی ستێرەکا گەش دکەت هەواری.