ئامێدیێ، مەحمود نهێلی:

ب بەرهەڤبوونا بەرپرسێ لقێ 18 یێ‌ پارتی ل ئامێدیێ‌ و دەڤەردارێ ئامێدیێ و سەرۆكێ زانكۆییا دهۆك و هەژمارەكا بەرپرسێن حزبی و حكومی و جۆتیارێن دەڤەرێ، یەكەیا شیرەتكارییا چاندنێ ل كۆلیژا پەروەردا بنیات ل ئامێدییێ هاتە ڤەكرن.
د. داوود سلێمان ئەترووشی، سەرۆكێ زانكۆیا دهۆكێ بەحس ل گرنگییا ئەڤی سەنتەری كر و گۆت: «ئەڤە ئێكەمین پێنگاڤا مەیە بۆ دەرڤەی زانكۆیا دهۆكێ، ئەم هیڤیدارین بشێین ب رێكا ڤی سەنتەری خزمەتا خەلكێ دەڤەرێ ژ لایێ چاندنێ ڤە بكەین، ئەڤ سەنتەرە ببیتە ناڤەندەكا چالاك بۆ خزمەتكرنا جۆتیار و خەلكێ دەڤەرێ، دیسا ب رێكا ڤی سەنتەری ئاریشەیێن چاندنێ ب رێكا زانستی ببەینە ناڤ تاقیگەهێن خۆدا و بشێین ب ڤێ رێكێ چارەسەریێ بۆ پەیدا بكەین».
گۆتژی: «ئەڤە بۆ مە پێنگاڤەكا گرنگە و ب ئانەهیا خودێ هەكە مە دیت یا سەركەفتیە، ل جهێن دیتر ژی ئەڤ سەنتەرە دێ هێنە ڤەكرن».
دەربارەی ئاڤاهی ژی سەرۆكێ‌ زانكۆیا دهۆكێ‌ گۆت: «جهێ دلخۆشیێ یە ب بڕیارا سەرۆك بارزانی ئەڤ ئاڤاهیە بۆ كولیژا پەرواردا بنیات ل ئامێدیێ هاتیە ئاڤاكرن و بۆ سالا بهێت یا خواندنێ‌، قۆتابی ل ڤی ئاڤاهی دێ‌ خواندنا خوە دەستپێكەن».

دهۆك، لەزگین جۆقی:

رێڤەبەرێ كۆچ و كۆچبەران ل پارێزگەها دهۆكێ بۆ رۆژناما ئەڤرۆ ئاشكرا كر، هاریكاری بۆ ئاوارەیان كیمبووینە، ئەڤ سالە 70% هاریكاری كێمبووینە.
پیر دەیان، رێڤەبەرێ كۆچ و كۆچبەرێن پارێزگەها دهۆكێ دیاركر، نوكە حكومەتا هەرێما كوردستانێ خزمەتگوزاریێن د ناڤ كەمپێن سنۆرێ‌ پارێزگەها دهۆكێ‌ و ئیدارا سەربخۆ یا زاخۆ دا دابین دكەت، وەكو: راكرنا گلێشێ و دابینكرنا ئاڤا ڤەخوارنێ و پەروەردەیێ‌ و ساخلەمیێ و كەهرەبێ‌ و گۆت: «هاریكاریێن رێكخراوان وەكو جاران نەماینە و كێمبووینە».
گۆتژی: «سالا بهێت، رەنگە هاریكاریێن ئاوارەیان پتر كێم ببن، چونكی هەكە (un) هەڤكاریێ‌ نەكەت پتر بارگرانی ل سەر مە دروست دبیت».

زاخۆ، دلۆڤان هالۆ:

ئەندازیار ئەحمەد فاروق، سەرپەرشتێ پڕۆژەیێ جادەیا جگەرخوین بۆ سێمالكا بۆ ڕۆژناما ئەڤرۆ دیاركر كو جادەیا سەرەكی یا جگەرخوین بۆ سێمالكا ب درێژاهیا دو هزار و 600 مەتران دهێتە قیركرن و د قووناغێن دوماهیێ دایە و ل دەمەكێ نێزیك دێ كەڤیتە د خزمەتا خەلكی دا.
ناڤهاتی ئاماژە ب وێ چەندێ ژی كر كو كوالیتیا قێرێ‌ بۆ ڤێ جاددەیێ دهێتە بكارئینان ل دووڤ ستاندەردێن جیهانی نە و ل تاقیگەهان هاتیە تێستكرن و ب شێوەیەكێ سەركەفتیانە ل تاقیگەهێ هاتیە پەسەندكرن.

شێخان، بارزان مزووری:

ئەندازیار سەمیر رێكانی، سەرپەرشتێ پڕۆژەیێ جۆتسایدێ‌ شێخان بۆ لالشێ‌ بۆ رۆژناما ئەڤرۆ دیار كر، پڕۆژەیێ جۆتسایدێ‌ شێخان بۆ لالشێ‌ ب گوژمێ 28 ملیار دیناران و ب درێژاهیا هەشت كیلۆمەتران ل دووڤ دیزاینەكێ سەردەمیانە هاتیە دروستكرن.
ناڤبری گۆت: «پڕۆژە د قووناغێن دوماهیێ دایە، هەردو سایدان دو قاتێن قێری ب دوماهی هاتینە، د ڤێ حەفتیێ دا دێ قاتێ سێیێ یێ قێری بۆ هێتە كرن و كەڤیتە د خزمەتا وەلاتیان دا».
گۆتژی: «مزگینیێ د دەینە خەلكێ خۆ، كو ئەڤ پڕۆژە دێ خزمەتەكا باش و جوانیەكا جودا دەتە ڤێ دەڤەرێ، ب تایبەت سەرەدانكەرێن پەرستگەها لالشێ‌ و ئاكنجێن دەڤەرا ئەترووشێ‌«.

رەمەزان زەكەریا:

كاركرن ل سەر جۆتسایدێ‌ رێكا بەردەڕەشێ بۆ خەبات بەردەوامە و ب رەنگەكێ‌ سەردەمیانە دهێتە چێكرن.
ئەندازیار ئەحمەد تاهر زەینەل، رێڤەبەرێ پڕۆژەیێ رێكا بەردەڕەشێ‌ بۆ خەبات بۆ ئەڤرۆ گۆت: «ل سەر فەرمانا سەرۆكێ حكومەتا هەرێما كوردستانێ، پڕۆژەیێ رێكا بەردەڕەشێ بۆ خەبات ب درێژاهیا 35 كیلۆمەتران و ب گوژمێ 214 ملیار دیناران دهێتە بجهئینان».
گۆتژی: «پڕۆژە ب ستانداردەكێ نێڤدەولەتی دهێتە چێكرن و شێوازێ چێكرنا رێكێ ئۆتۆبانە و جۆتسایدە و هەر سایدەكی سێ ترۆمبێل دێ‌ شێن هاتنوچوونێ تێدا كەن و هەشت ئۆڤەرپاس ژی دكەڤنە د ناڤ پڕۆژەی دا».
ئەندازیار ئەحمەد زێدەتر گۆت: «دەمێ پڕۆژەی سێ سالن و كار تێدا بەردەوامە، ب فەرمانا سەرۆكی حكومەتا هەرێما كوردستانێ گوهۆڕین تێدا هاتنەكرن و رێك هاتنە بەرفرەهكرن، ب بەردەوامی ژ لایێ حكومەتا هەرێما كوردستانێ دووڤچوون ل سەر پڕۆژەی دهێتە كرن و كار تێدا بەردەوامە».