چاڤدێرێن سیاسی دیار دکەن ئێدی نها بۆ ئسرائیلێ بابەت تنێ بەرنامێ ئەتۆمی یێ ئیرانێ نینە و ئسرائیلێ دڤێت ب هاریکاریا ئەمریکا و هندەک وەلاتێن دی یێن رۆژئاڤایی دستهەلاتا نها یا ئیرانێ بگوهۆڕیت و ژ بەر ڤێ یەکێ ژی چاڤەرێی ئەمریکا یە.
فەهیم تاشتەکین بسپۆرێ کاروبارێن سیاسی دیار کر، بەری نها ئسرائیل رازی بوو هەکە ئیران دەست ژ بەرنامەیێ خوە یێ ئەتۆمی بەردەت ئێرشی وی وەلاتی نەکەت، لێ ئێدی رەوش ب تەمامی هاتیە گوهۆڕین و نها ئسرائیلێ دڤێت دەستهەلاتا سیاسی یا ئیرانێ بگوهۆڕیت و ژ بەر ڤێ یەکێ ژی زێدەباری داخوازیا ئیرانێ یا بۆ دانوستاندنان لێ ئسرائیل ناهێلیت ترامپ تشتەکێ وەسا بکەت، ئانکو ئێدی رەوشەکا نوو هاتیە پێش و ئسرائیل ب هەموو رەنگەکێ کار دکەت دا دەستهەلاتا نها یا ئیرانێ ژناڤ ببەت، دیارە ئسرائیلێ بەرهەڤیێن خوە باش کرینە و بێگومان شیایە تا رادەیەکێ ژی نێزیکی ئارمانجێن خوە ببیت، لێ هێشتا زوویە مرۆڤ بەحسێ سەرکەفتنا ئسرائیلێ ژی بکەت.
د. مەجید حەقی بسپۆرێ کاروبارێن سیاسی ژی دیار کر، بەری نها بەرپرسێن ئیرانێ گەلەک جاران گەفا ژناڤبرنا ئسرائیلێ دکرن و دگۆتن دێ د ناڤ چەند رۆژان دا ئیسرائیلێ ژناڤ بەین، لێ نها دیار بوو تشتێ وان گۆتی تنێ ئاخڤتن بوون و ئسرائیلێ شیایە دربێن گەلەک مەزن ل ئیرانێ بدەت و گەلەک بەرپرسێن سەربازی هاتینە کوشتن و زیانێن زۆر ژی گەهشتینە بنگەهێن ئەتۆمی و وزێ یێ ئیرانێ، راستە ئیرانێ ژی زیان گەهاندیە ئسرائیلێ لێ ئەو یەک زیانێن وەسا مەزن نینن کو ببیتە ئاستەنگ ل هەمبەر ستراتیژیا شەڕی یا ئسرائیلێ.
گەلەک ژ بسپۆرێن سیاسی یێن رۆژئاڤایی و عەرەبی ژی وەسا دبینن، نها رەوشەکا نوو ل رۆژهەلاتا ناڤین هاتیە پێش و ئسرائیل دێ ترامپی نەچار کەت کو پشکداریێ د شەڕی دا بکەت، راستە وی دەمی دێ شەڕ بەرفرەهتر لێ هێت، لێ د هەمان دەمی دا دێ بۆ ئیرانێ گەلەک یا ب زەحمەت بیت کو بشێت بەردەوامیێ بدەتە شەڕی و دێ نەچار بیت هەموو داخوازیێن ئەمریکا قەبوول بکەت.
ل ئالیێ دی بەرپرسەکێ ئسرائیلێ دیار کریە دێ هەتا دو رۆژێن دی گوهۆڕینێن گەلەک مەزن روو دەن و ئەو دێ وەسا کەن ئیران نەشێت ئێدی موشەکان ژی بکار بینیت و ل هەمبەر دا دوهی فەرماندارەکێ ئیرانێ ژی دیار کر، هەتا نها ئیرانێ هێزا خوە یا راست نیشا ئسرائیلێ نەدایە، ئیرانێ هندەک موشەک هەنە دێ بکار ئینیت و دێ زیانێن زۆر مەزن گەهینتە ئسرائیلێ. ژ بەر ڤێ یەکێ ژی دهێتە چاڤەرێکرن کو د رۆژێن بهێت دا شەڕێ د ناڤبەرا هەر دو وەلاتان دا گەلەک دژاوارتر ببیت.
نيشاندان