ڕاپۆرت: قەیس وەیس:

ب تنێ‌ نەهـ رۆژیێن مایی و دێ‌ دەست ب وەرزێ‌ نوو یێ‌ خولا ستێرێن ئیراقێ‌ یا فوتبۆلێ‌ هێتە كرن ئەوا بڕیارە هەڤڕكیێن وێ‌ ل 14 ڤێ‌ مەهێ‌ ب پشكدارییا 20 یانەیان ژ وانا چار یانەیێن كوردستانی پشكدارن، بەرهەڤییێن وان دكەمپا ڕاهێنانێ ل ناڤخوە و دەرڤە دا هاتینە ئەنجامدان.
دهۆك د قووناغا بەرهەڤیان دایە
تیما فوتبۆلا یانەیا دهۆك پشتی ب دووماهی ئینانا كەمپا ڕاهێنانێ‌ ل وەلاتێ‌ توركیا و ئەنجامدانا چەند یاریێن هەڤالینی ئەڤە بۆ ماوەیێ چار رۆژە ڤەگەڕیایە و ل دهۆكێ‌ دەست ب بەرهەڤیێن دووماهیێ كرینە ئەوا ب سەرپەرشتییا ڕاهێنەرێ‌ ئیرانی یەحیا گۆلمحەمەد ئەوێ‌ شێوازەكێ‌ نوو و سەردەمیانە بەرنامەیێ خوە یێ‌ ڕاهێنانێ‌ بڕێڤەبریە، ل دووڤ ژێدەرێن رۆژنامەڤانی دماوەیێ بهێت دا دبیت هەتا دو یاریێن دی یێن هەڤالینی ل گەل یانەیێن پشكدار د خولێ‌ دا ئەنجامبدەت.
پێكهاتیێ دهۆكێ‌ كینە
بۆ وەرزێ‌ نوو تیما یانەیا دهۆك ب شێوەیەكێ‌ بەرچاڤ هاتیە گوهۆڕین دناڤا پێكهاتیێ خوە دا، ژ سەرجەمێ‌ گشتی یێن یاریزانێن وەرزێ‌ بۆری بتنێ‌ گرێبەستا 11 یاریزانان هاتبوونە نووكرن ئەو ژی، گۆلپارێزان ئەحمەد بەشار، زانا جوزەل، یاریزانان، بەیار ئەبۆبەكر، بلند ئازاد، ئەحمەد عەلی، یوسف ئیمام، سیابەند عەگید، ژیار ئیبراهیم، مستەفا نەواف، حەسەن عیماد و سەفا هادی، ژلایەكێ‌ دووڤە گرێبەست دگەل 16 یاریزانان ئیمزاكرییە ئەو ژی، گۆلپارێز كومەیل سەعدی، مەناف یونس، ڕێوان ئەمین، یونس حەموود، مەحموود مەواس، هادی سالح، رەزا ماجی، موهەنەد جەعاز، كارسان دۆسكی، ڕایكار سانتۆس، ئیكۆر هێنریك، سان مستەفا، سینا ئەسەدبەگ، محەمەد ڕەزا و ئاواد ئازاد.
زاخۆ هێشتا ل توركیایە
كەمپا تیما یانەیا زاخۆ ل وەلاتێ‌ توركیایە بەردەوامە ئەوا بڕیارە سوبەهی ب دووماهی هێت كو ئەڤە دێ‌ بیتە 15 رۆژە د ڕاهێنانێن بەردەوام دا خوە بەرهەڤكرن بۆ خولا ستێرێن ئیراقێ‌، دهێتە پێشبینیكرن د وەرزێ‌ ئەڤ سالە دا كوڕێن خابوری د جودابن ژ هەموو لایەكی ڤە، پشتی گوهۆڕینا دەستەیا كارگێرییا یانەیێ، دیسان گوهۆڕینا لۆگۆیێ خوە، دیسان كادرێ‌ ڕاهێنانێ‌ و كۆمەكا باش یا یاریزانان، ل دووڤ داخویانیێن سەرۆك یانەیێ چیا ئەمین دیاركرییە كو وەرزێ‌ ئەڤ سالە ئەو دێ‌ هەڤڕكیێ بۆ ئێك ژ ڕێزێن پێشیێ كەن و هەر یاریزانەكێ‌ ڕاهێنەر پێدڤی بیت ل دووڤ شیانان دێ‌ ئینە دناڤ تیمێ‌ دا.
پێكهاتیێ زاخۆ ئاگرینە
جەماوەرێ‌ وەرزشی یێ یانەیا زاخۆ ل سەر پێكهاتیێ تیما خوە د گەشبینن دێ‌ تیمەكا ب هێز و هەڤڕك بیت، كارگێرییا یانەیێ ڕێژەیا 75% تیم گوهۆڕتییە، بتنێ‌ نەهـ یاریزان هێلان ئەو ژی هەر ئێك ژ گۆلپارێز عیماد عیسا و یاریزانان سیداد حاجی، ئەمجەد عەتوان، شڤان جەمیل، حەمید حاجی، ئۆرینیۆ، محەمەد عەلی عەبود، شێركۆ كەریم و ئالیۆ ئادەم، ژلایەكێ‌ دووڤە 15 یاریزان ئیناینە ئەوژی هەر ئێك ژ شیرۆزد تیمیرۆڤ گۆلكەرێ‌ وەرزێ‌ بۆری یێ‌ خولێ‌، هارۆن ئەحمەد، سفۆ مبۆلی، ئەسیر سالح، ئیبراهیما كۆنتی، ئیڤان ئاهیمبۆسیبوا، مستەفا سەعدۆن، موسێس ئاپیی، موقتەدا حەسەن، محەمەد غالب، موستەفا محەمەد، موسا عەلا، حەسەن عەباس، ناڤەند مەشود و دووماهیێ ستێرێ‌ هەلبژارتیێ ئیراقێ‌ ئاكام هاشم.
وەرزەكێ‌ ئاگرین و نە دیارە
لدۆر وەرزێ‌ نوو و بەرهەڤیێن تیما سەعەد عەبدولحەمید شرۆڤەكارێ‌ وەرزشی یێ خولا ستێرێن ئیراقێ‌ دیار كر دهێتە پێشبینیكرن وەرزێ‌ ئەڤ سالە جودا بیت ژ وەرزێن بۆری ژلایێ هەڤڕكییان و شێوازێ‌ ئەنجامدانا یارییان و دێ‌ ئاگرین بیت، لێ‌ ژبەر كاودانێن نوكە یێن رۆژهەلاتا ناڤەڕاست و ئیرانێ‌ پێشبینییا هەر گوهۆڕینەكێ‌ بكەین ژ وانا پاشئێخستن یان ڕاوەستاندنا خولێ‌ هەكە شەڕەك پەیدابوو.
هەروەسان ناڤهاتی گۆت: ل دووڤ ئەوا ئەم دبینن ئەڤە بۆ ماوەیێ زێدەتری سێ‌ حەفتیانە هەموو یانە بەرهەڤییان دكەن و گەهشتینە ئاستەكێ‌ باش ژبەركو خول یا نێزیك بووی تایبەت پشتی دانانا كەمپا ڕاهێنانی یێن دەرڤە و ناڤخوە، لێ‌ د نوكە دا پلانێن بەرهەڤیان هاتینە گوهۆڕین و ڕاهێنەرێن تیمان كار ل سەر چارەسەكرنا كێماتیان دكەن، ب تنێ‌ دێ‌ هزر د پلانێن تەكتیكی و هونەری دا كەن و بەرهەڤیێن چەستەیی گەهشتینە چو ڕێژە، دبیت چەند یاریێن هەڤالینی ژی بكەن، ب دیتنا من وەرزێ‌ ئەڤ سالە بۆ هندەك یانەیێن كوردستانی دێ‌ ب زەحمەت بن، لێ‌ دێ‌ بنە تیمێن هەڤڕك بۆ سەركەڤتنان، هیڤییا من ئەوە بابەتێ‌ دارایی كارتیكرنێ‌ ل سەر چو یانەیێن مە نەكەن و دا بشێن بەردەوامیێ بدەنە پشكدارییەكا سەرفەراز.

هەرهین محەمەد:

د داخویانیەکێ دا هەرمان محەمەد سالح مامۆستایێ کولیژا پەروەردەیا جەستەیی و زانستێن وەرزشی ل زانکۆیا دهۆک بۆ ئەڤرۆ گۆت: ل وەرزێ هاڤینێ دا، مەلەڤانگەها کۆلیژا مە دێ دبیتە مەلبەندەکێ سەرەکی بۆ ڕاهێنان کو فێرکرنا نڤشەکێ نوو ژ وەرزشڤانان ئەوا مامۆستا و ڕاهێنەرێن ئەکادیمی ل ڤێ کۆلیژێ سەرپەرشتیا خولێن تایبەت بۆ کور و کچان دکەن.
هەروەسان ناڤهاتی گۆت: ئەڤ خولە ب ئاوایەکی ڕێکخستی هاتینە بەلاڤکرن کو ڕاهێنەرێن زەلام سەرپەرشتیا پۆلێن کورکان دکەن و مامۆستایێن ئافرەت سەرپەرشتیا پۆلێن کچکان دکەن ب ڕۆژ و دەمژمێرێن جودا، لدووڤ زانیاریان، زێدەتری ١١٠ قوتابیان (نێزیکی ٥٠ کور و ٦٠ کچ) ل سەر میلاکێ وەزارەتا خوێندنا بلند و زانکۆیا دهۆکێ د ڤان خولان دا ڕاهێنانێ دکەن.
هەرمانی گۆت ژی: ئەم وەکۆ مامۆستا و ڕاهێنەر ڕۆلێ خۆ دگێڕین دا کو ڤێ یاریێ ئاڤا بکەین، بەلێ بۆ ئەنجامێن مەزن و ئاستێ بلند، پێدڤی یا مە ب پشتەڤانیا بەردەوام و یانەیێن وەرزشی هەیە و سەرەڕای هەبوونا بەهرەداران، ئاستێ گشتیی یێ یارییا مەلەڤانیێ ل پارێزگەها دهۆکێ نەگەهشتییە ئاستەکێ بلند کو بگەهیتە ئەنجامێن بەرچاڤ ل سەر ئاستێ هەرێمێ یان ئیراقێ، شیکاریا مەیدانی دیار دکەت کو سێ ئەگەرێن سەرەکی هەنە کو بووینە ڕێگر بەرامبەر گەشەکرنا ڤێ وەرزشێ.
ژلایەکێ دووڤە ناڤهاتی ئەوچەندە ژی گۆت: ئاستەنگا هەرە مەزن کو وەکۆ ڕێگرەکا بنەڕەتی دهێتە هژمارتن، نەبوونا داھاتێ دارایی و گرێبەستێن داراییە بۆ یاریزانان، دەما یاریزانەک ببینیت کو چ پاشەڕۆژەکا دارایی یان پیشەیی د ڤێ وەرزشێ دا نینە، دڵسۆزی و ورەیا وی دێ دابەزێت، یان خەرجکرنا دەم و سەرمایەیەکێ زێدە ب بێی بەرهەمەکێ دیار، وەستیانا دەروونی دروست دکەت و ل ئەنجامدا، گەلەک ژ یاریزانێن بەهرەدار نەچار دبن یاریێ بجهـ بهێلن و ڕوو ب کارێن دی بکەن دا کو ژیانا خۆ پێ بڕێڤە ببەن. ئەڤە ژی دبتە ئەگەر کو یارییا مەلەڤانیێ ل دەڤەرێ هەمبەر وەلاتێن پێشکەفتی د پاشکەوتنێ دا بمیلیت.

د نووترین داخویانییا خوە دا یێ‌ ئوسترالی گێرهام ئارنۆلد ڕاهێنەرێ‌ هەلبژارتیێ ئیراقێ‌ بۆ دەزگەهێن ڕاگەهاندنێ‌ دیار كر ئەو ب هیچ ڕەنگەكی ڕازی نابیت ڕاهێنەرەك ژ ئیراقێ‌ كار دگەل بكەت و ئەو دێ‌ كادرێ‌ خوە دانیت.
د درێژاهییا داخویانییا خوە دا گۆت: دگەل فدراسیۆنا فوتبۆلا ئیراقێ‌ دانۆستاندن كریە و ڕژدن بەردەوامبم ل سەر كارێ‌ خوە، ئەز ژی پێخوەشحالم دگەل ئیراقێ‌ كاربكەم ژبەركو وەلاتەكێ‌ وەرزشڤانن و شیانێن هەین، من مەرج و بەرنامەیێ خوە پێشكێشی فدراسیۆنێ‌ كربوو، پشتەڤانێن پرۆژەیێ منن بۆ كۆپا كەنداڤی و كۆپا ئاسیا، دێ‌ كارەكێ‌ باش كەین هەكە كاودان د سەقامگیر بن و هەڤكاری هەبیت.
ژلایەكێ‌ دووڤە ناڤهاتی گۆت: بەرۆڤاژی سالێن بۆری مە پلانێن باشتر هەنە، لەوما ژی من فدراسیۆن ئاگەهدار كرییە من نەڤێت چ ڕاهێنەرێن ئیراقی ل گەل من كار بكەن و ئەڤە ژی بۆ بەرژوەندییا تیمێ‌ یە و باشترین بەرهەڤیانە، لێ‌ هەبوونا ڕاوشكار و ڕێڤەبەر و سەرپەرشتێن تیمێ‌ ئەو سرۆشتییە خەلكێ‌ ئیراقێ‌ بن، ئەڤ داخوازییا من ب سێنگەكێ‌ بەرفرەهـ ژلایێ سەرۆكێ‌ فدراسیۆنێ‌ یونس مەحموودی ڤە هاتیە وەرگرتن و دێ‌ كارەكێ‌ سەركەڤتی كەین.

ستێرێ‌ كوت دیڤۆاری یان دیۆماندی یاریزانێ‌ یانەیا لایپزیگ یا ئەلمانی كەڤتیە دناڤبەرا شەڕی بریكارێن وەرزش یێ خوە یێ كەسایەتی ئەوێن بەرێ‌ و یێن نوكەدا كو كارتیكرن ل سەر ڕیال مەدرید كرییە و بوویە ئەگەر ب هەبوونا سكالایەكا یاسایی كو بوویە ئەگەر ڕاگەهاندنا گرێبەستا وی بهێتە پاشئێخستن.
د ڕاپۆرتەكا تەسل دا یا تۆرا ESPN دیاركرییە پشتی دەنگۆیێ ئیمزاكرنا گرێبەستا وی ل گەل ڕیال مەدرید یا ئسپانی ب كۆژمەیێ 135 ملیۆن یۆرۆیان، چەند ئاستەنگ بۆ پەیدا بووینە ژ وانا یێن یاسایی نە و گەهشتنە لژنەیا پێڕابوونا و مافێن یاریزانان ل فیفایێ، ناكۆكی دناڤبەرا كۆمپانییا Maxidel Management بڕیكارێ‌ بەرێ‌ یێ یاریزانی و كۆمپانییا Roc Nation Sports بڕیكارێ‌ نوكە یێ یاریزانی ئەوێ‌ گرێبەست دناڤبەرا لایپزیك و ڕیالێ‌ ڕێكخستی، سەرباری یانەیا ڕیال ل دووڤ هەموو مەرجێن یاسایی گرێبەست بڕێڤەبرییە لێ‌ كۆمپانییا بەرێ‌ ماكسیدێل سكالا ل فیفایێ تۆماركرییە تێدا دیاركرییە كو مافێ‌ وان هاتیە پێشبلكرن و ڕیالێ‌ بێ وان ئەڤ پێنگاڤە هاڤێژتییە، ئەڤ سكالا وەكرییە فیفا یاریزانێ‌ دناڤا تیما ریالێ‌ دا زێدەنەكەت هەتا ئاریشە چارەسەربیت، ژلایێ خوەڤە ڕیالێ‌ ڕاگەهاند كو ئەوان چو پێزانین ل سەر ناكۆكییا هەردو كۆمپانیا نەبوویە و نە بەرپرسە ژ ئەوا روودەت، هەموو پێرابوون دگەل یانەیا وی ژی ب یاسایی هاتیە بڕێڤەبرن، بڕیارە ل دووماهییا ڤێ‌ حەفتیێ بابەتێ‌ یاریزانی ئێكلا بیت.

پشتی بۆ ماوەیێ سێ‌ حەفتیان ژ نە گەهشتنا چو ڕێكەڤتنان یانەیا بەرشەلۆنا یا ئسپانی نەچاربوو دەست ژ گۆلپارێزێ‌ خوە یێ ئەلمانی مارك ئەندرێی تیر شتیگن بەردەت و ب شێوەیێ گرێبەستا ئێك وەرز بەروەخت پێشكێشی یانەیا ئەیاكس ئەمستردام بكەت.
رۆژنامەیا ماركا یا ئسپانی بەلاڤكرییە د ماوەیێ سێ‌ حەفتیێن بۆری دا دانۆستاندنێن گۆلپارێزێ‌ ئەلمانی تێر شتیگن ل گەل یانەیا خوە بەرشەلۆنا نە گەهشتنە چو ڕێكەڤتنان ئەوێ‌ ڕەدكری مووچەیێ خوە كێم بكەت ئەوێ‌ گرێبەستا وی هەتا 2028ێ‌ یە، لەوما ژی بەرشەلۆنا نەچاربوو بۆ ماوەیێ ئێك وەرز ب شێوەیێ بەروەخت پێشكێشی یانەیا ئەیاكس ئەمستردام بكەت.
جوۆدس كرویف ڕێڤەبەرێ‌ تیما ئەیاكس ئەوچەندە دیار كر هاتنا تیر شتیگن هێزەكا مەزن دایە تیما وان و گۆت: ل دەستپیكێ‌ مە هزر نە دكر دێ‌ گۆلپارێزەكێ‌ ب ڤێ‌ قەبارێ‌ جیهانی دەستخوە ڤەئینن، لێ‌ هندەك جاران دەلیڤەیێن زێرین پەیدا دبن دڤێت مفایی ژێ‌ وەربگرین.