ل ڕۆژا ئێكشەمبی، 6 ئیلونا 2026، ئێكەم ڕۆژا بەهییا عەبدولواحد ئیبراهیم شێخ عەبدولسەلام بارزانی ل بارزان هاتە بڕێڤەبرن.
هەر ئێك ژ سەرۆك بارزانی؛ نێچیرڤان بارزانی، سەرۆكێ هەرێما كوردستانێ؛ مەسرور بارزانی، سەرۆكێ حوكمەتا هەرێما كوردستانێ و دەهان بەرپرسێن حكومی و حزبی د پشكداری د بەهیێ دا كر.
ڕۆژا ئەینی، 4 ئیلونا 2026، سەرۆك بارزانی د پەیامەكێ دا مالئاڤاهییا برایێ مەزنێ بنەمالا وان، (عەبدولواحد ئیبراهیم شێخ عەبدولسەلام بارزانی) ڕاگەهاند.
سەرۆك بارزانی گۆت ژی، خودێ ژێ ڕازی نەڤیێ ڕێبەرێ نیشتمانی و ئایینی، شێخ عەبدولسەلام بارزانی بوو و نموونەیێ دینداری، خودێپەرستی، چاكخوازی و كەسایەتییەكێ دیار و مەزن د ناڤ بنەمالا وان دا بوو.

سەرۆكێ دەولەتا ئیماراتێ و جێگرێن وی، ب هەلكەفتا مالئاڤاهییا عەبدولواحید ئیبراهیم شێخ عەبدولسەلام بارزانی، سەرەخوەشی ئاڕاستەی سەرۆك بارزانی كرن.
شێخ محەممەد بن زاید ئال نەهیان، سەرۆكێ ئیماراتێ، شێخ محەممەد بن راشد ئال مەكتووم، جێگرێ سەرۆكێ ئیماراتێ و سەرۆكوەزیرێن ئیماراتێ و حاكمێ دوبەی، هەروەسا شێخ مەنسور بن زاید ئال نەهیان، جێگرێ سەرۆكێ ئیماراتێ و جێگرێ سەرۆكوەزیران و سەرۆكێ دیوانا سەرۆكایەتیێ، بروسكەیەكا سەرەخوەشیێ ئاڕاستەی سەرۆك بارزانی كرن.
د وێ بروسكەیێ دا، سەركردەیێن ئیماراتێ هەڤخەمی و سەرەخوەشیا خوە یا كوور بۆ مالئاڤاهییا عەبدولواحد ئیبراهیم شێخ عەبدولسەلام بارزانی، برایێ مەزنێ بنەمالا بارزانی، دەربڕییە و هەڤسۆزییا خوە بۆ بنەمالا بارزانی نیشادا.

زاخۆ، دلۆڤان هالۆ:

ئەڤرۆ ل دەمژمێر ٥ی ئێڤاری ل هۆلا شەهیدان ل باژێڕڤانیا زاخۆ، ب ئامادەبوونا دکتۆر سالار ئۆسمان بەرپرسێ بەشێ ڕەوشەنبیری و ڕاگەهاندنا پارتی دیمۆکراتی کوردستان و ئەندامێن بەشی و مشیر محەمەد دەڤەردارێ زاخۆ، و ڕێڤەبەرێن دامودەزگەهێن حزبی و حکۆمی یێن پارێزگەها دهۆکێ و ئیدارەیا سەربخوە یا زاخۆ، د ڕێوڕەسمەکێ تایبەت و ژ هەژی دا ل ژێر دروشمێ ئاوازەکا شرین دناڤ پێلێن خابیری دا ڕێز ل هۆزانڤانێ کورد (مستەفا حسێن) هاتە گرتن.
ل دەستپێکا ڕێوڕەسمێ ئامادەبوویی خۆلەکەکێ بەرامبەر گیانێ پاکێ شەهیدان و سەروەرێ وان بارزانیێ نەمر و کاك ئیدریسێ هەردەم ساخ ڕاوەستیان، پاشان دیکیۆمێنتاریەك ل سەر وێستگەهێن ژین و ژیارا هۆزانڤانی هاتە پێشکێشکرن، پاشان پەیڤا بەشێ ڕەوشەنبیری و ڕاگەهاندنا پارتی دیمۆکراتی کوردستان ژ لایێ دکتۆر سالار ئۆسمان بەرپرسێ بەشێ ڕەوشەنبیری و ڕاگەهاندنا پارتی دیمۆکراتی کوردستان ب ڤی رەنگێ ل خوارێ هاتە خواندن.

پەیڤا دکتۆر سالار ئۆسمان:
​تێکۆشەران، هونەرمەندان، ئەدیبان، بخێر بێن بۆ ئێک ژ وان ڕێوڕەسمێن پڕ ڕامان کو دبێژیتە مە مێژوو گرنگە و د ناڤ مێژوویێ ژی دا ڕۆلێ پەیڤێ زۆر گرنگە.
بخێر بێن بۆ ڕێوڕەسمەکێ کۆ دبێژیت چێنابیت تێکۆشەرێن خۆ ژ بیر بکەین و ب بێنازی سەر ب نێنە خوار.
بەخێر بێن بۆ ڕێوڕەسمەکێ کۆ دبێژیت ئەڤە مللەتێ زندییە د ڕێیا هەڵبەستێرا دکاریت خەما نیشتمانێ خۆ بنڤیسیت.
​بەخێر بێن بۆ ڕێوڕەسمەکێ ب واتا ل زاخۆیا دەلال، دەرگەهێ شۆڕشێ و زێدێ تێکۆشەران کو نوکە نموونەیەکا باڵایا ئاڤەدانیێ یە و لێرەوە دەستخۆشیێ ل ئیدارەیا سەربەخۆیا زاخۆ دەکەین و ئەڤێ نموونەیا باڵایا ئاڤەدانیێ دەکەینە نموونەیەکا باڵا بۆ هەموو کوردستانێ و د ڕێیا ئەڤێ نموونەیا باڵایا ئاڤەدانیێ دا دڤێت بۆ هەموو باژێرێن کوردستانێ بێژین: ئەڤە حکومەتا هەرێما کوردستانێ و پارتی دیموکراتی کوردستان و ڕێبازا بارزانییە کو دکاریت هەڵبەستڤانێن مەزن وەکی مامۆستا مستەفاحوسێن پێشکەشی دیرۆکێ بکەت و ئاڤەدانییا باڵا وەکی زاخۆ پێشکەشی مللەتێ کوردستانێ بکەت.
​هێژایان، ئەم د بەشێ ڕۆشنبیری و ڕاگەیاندنێ دا هەر ل هەولێرێ کارێن خۆ ناکەین، هەر ڕۆژەکێ ل دەڤەر و باژێر و باژێرۆکەکێین. بەری چەند ڕۆژەکان ل کەرکووک و گەرمیان و هەڵەبجە بوین و ئەڤڕۆ ل زاخۆین و ئێدی هەموو زێدەکێ کوردستانێ، هەموو ئاخەکا ئازیزا نیشتمانی زێدێ مە و زێدێ وەیە و دەڤێت هەموو ل هەموو پارچێن دی یێن کوردستانێ و تەنانەت د کوردێن دیاسپۆرا دا ژی وێ وێنەیا مەزنا نیشتمانی چێکەین کو پێ دەبێژن وێنەیا ڕێبازا بارزانی.
​مروڤێ مەزن، نڤیسەرێ مەزن، تێکۆشەرێ مەزن، ئەو بەڕێزن کو سنوربەزێنن، د سنوربەزینیێ دا دڤێن نیشتمانی ببینن. پەیڤ، شیعر، ئەدەبیات، هونەر، کلتور ژ بەر هندێ ب هێزن چونکی سنوربەزێنن و دڤێن بچنە د هەموو مالەکێ دا، بۆ هەموو بیرهاتنەکێ و بۆ هەموو هەست و تێگەهشتنان.
​ژ بەر هندێ د وان سەردانێن مە دا بۆ دەڤەرا بادینانا عەزیز و ڕێک بۆ زاخۆیا دەلال، مالا مامۆستا مەستەفا حوسێن بوو کو ل وێرێ مە پەیمان دا د خزمەتا وی دا بین، سێ کتێبان چاپ بکەین و دگەل دا ژی ڕێزلێنانەکێ پێشکەش بکەین ل وی باژێرێ وی کو پڕە ل بیرهاتنێن شیرین بۆ وی. ئەڤە بوو ب هاریکارییا هەموو لایەکێ بەتایبەت بنەمالا وی یابەڕێز شیاین ئەڤێ پەیمانا خۆ جێبەجێ بکەین و ئەڤڕۆ د خزمەتا وە دا ین.
​ئەم دێ بەردەوام بین،ل سەر سەردانا مالا نڤیسەران، هونەرمەندان، ئەدیبان ، د تەنشتا کارێ مە یێ میدیایی دا مە باوەریا هەی کارێ ڕۆشنبیری و بالێ ڕۆشنبیری بریتییە ژ ئەو باڵێ کو دکاریت فڕینەکا باشتر بۆ مە بکەتە دییاری.

هەر د ڤێ ئێڤاریا ڕێزگرتنێ دا نڤیسەر و ڤەکۆلەر فەرهاد حاجی کورتە ڤەکۆلینەکا هزری ل دوور خزمەتا نیڤ چەرخی یا هۆزانڤانی بۆ ئەدەب و هۆزانا کوردی پێشکێشکر، پشتی هینگێ چەندین دەستێن گولان وەکی ڕێزگرتن پێشکێشی هۆزانڤانی هاتنە کرن، پاشان هۆزانڤانی گۆتارەك و چەندین هۆزانێن خوە یێن قەشەنگ پێشکێشی ئامادەبوویان کر.
هەر ب ڤێ هەلکەفتێ سێ پەرتووکێن هۆزانڤانی یێن ژ نوو چاپ بووین بناڤێن (هەلبەستە نیگار) و (دەرمانێ ڕشتی) و (پێتێن مشەختیێ) ل سەر ئامادەبوویان هاتنە بەلاڤکرن و ئیمزا کرن.
ژیانناما هۆزانڤان مستەفا حسێن
– مستەفا حسێن مستەفا ناسيارب (هێژا) ل سالا 1956ێ ل گوندێ ترکژا سلێڤانەيا هاتییە سەر دنیایێ.
– مامۆستا و هەلبەستڤانەکی دیارێ کورده.
– ل سالا 1979ێ خواندنا خۆ ل مالا مامۆستایان ل دهۆکێ ب دویماهی ئینایه.
– ل سالا 2019ێ ل باژێرێ زاخۆ هاتییە خانەنشینکرن.
– ل سالا 1973ێ دەست ب هەلبەستێ کرییه.
– ل سالێن 1974 – 1975ێ پشکداری د شۆڕەشێ دا کرییه و هۆزانێن وی ل ئێزگێ کوردی ل بەغدا هاتینه بەلاڤکرن.
– ل سالا 1978ێ بوویە ئەندامێ ئێکەتییا نڤیسەرێن کورد ل دهۆکێ.
– د سالێن هەشتییان دا ڕەدکرییە هەلبەستان بۆ ڕژێما بەعس بێژت.
– د سەرهەلدانا زاخۆ دا ل سالا 1991ێ ب هەلبەستێن حەماسی ڕۆلەکی دیار هەبییه.
– خۆدانێ 15 پەرتووکێن چاپکری یێن هەلبەست و ئەدەبییە ل سالێن (1994-2026)ێ.
بەرهەمێن نڤیسەری
– پپتێن مشەختیێ ب تیپێن لاتینی (هەلبەست) سالا 1994.
– پەسن و ڕەخنه (هەلبەست) سالا 2001.
– دیلۆک (ستراتێن دروین و دیلانان) سالا 2005.
– مێرگا خوینێ (هەلبەست) سالا 2008.
– دگەل چڕکان (هەلبەست) سالا 2012.
– گول دبه کول (هەلبەست) سالا 2013.
– لێ لێ مه دیتن لۆ لۆ (هەلبەست) سالا 2017.
– کا ئەو پەڕه (هەلبەست) سالا 2019.
– قەیرانا زەوقی (هەلبەست) سالا 2020.
– ڕۆنیا گەلان (هەلبەست) سالا 2021.
– مژا گۆریاران (هەلبەست) سالا 2023.
– خابیرێ زەلال (هەلبەست) سالا 2024.
– هەلبەسته نیگار (هەلبەست) سالا 2026.
– دەرمانێ ڕشتی (هەلبەست) سالا 2026.
– پپتێن مشەختیێ (هەلبەست) سالا 2026.