زاخۆ، دلۆڤان هالۆ:

دكتۆر عسمەت خابوور، بەرپرسێ ڕاگەهاندنا زانكۆیا دهۆك بۆ ڕۆژناما ئەڤرۆ دیاركر كو د پێنگاڤەكا دیرۆكی دا بۆ ئێكگرتن و ستانداردكرنا راستنڤیسا زمانێ كوردی، دوهی 24/9/2025 شاندەكێ هەڤپشك ب سەرۆكاتیا د. داود سلێمان ئەترووشی، سەرۆكێ زانكۆیا دهۆك و د. دیار عەبدولكەریم سەعید، سەرۆكێ زانكۆیا زاخۆ، ب ئامادەبوونا ئەندامێن لژنا بلندا پڕۆژەی، ب فەرمی «رێبەرێ راستنڤیسا زمانێ كوردی – زارێ كرمانجی ب تیپێن عەرەبی» پێشكێشی د. عەلی تەتەر، پارێزگارێ دهۆكێ كر.
بەرپرسێ ڕاگەهاندنا زانكۆیا دهۆك، ئاماژە ب وێ چەندێ ژی كر كو د ڕۆینشتنەكێ دا، د. داود سلێمان ئەترووشی، سەرۆكێ زانكۆیا دهۆك، باس ل قووناغێن پڕۆژەی كر و گۆت: «ئەم ژمێژە چاڤەرێی ڤێ چركەساتێ بووین».
سەرۆكێ زانكۆیێ گرنگیا ستراتیژی یا ڤی رێبەری بۆ پڕۆژەیێ نوو یێ ژیریا دەستكرد یا زارێ بادینی ل زانكۆیا دهۆك دیار كر، هەردیسا هندەك پێشنیارێن پراكتیكی بۆ بجهئینانا رێبەری پێشكێش كرن و سوپاسیا پشتەڤانیا پارێزگاری كر.
د. عسمەت گۆت: «د. عەلی تەتەر، پارێزگارێ دهۆكێ، سوپاسیێن گەرم ئاراستەی هەردو زانكۆیان و هەمی لایەنێن پشكدار كرن و ئەڤ پێنگاڤە ب «شۆرەشەك» د بیاڤێ زمان و رەوشەنبیریێ دا دا نیاسین».
پارێزگاری پشتەڤانیا تەمام یا پارێزگەها دهۆكێ بۆ ڤی پڕۆژەی دیار كر و گۆت: «ئەم ب تەمامی پشتەڤانین و دێ ڤی رێبەری بجهئینینن من چەندین نڤیسارێن فەرمی رەتكرینە ب تنێ، ژ بەركو شاشیێن ڕێنڤیسێ تێدا بوون، ئەڤ رێبەرە دێ هێتە چاپكرن و بەلاڤكرن و ل سەر هەمی سازیێن فەرمی هێتە بجهئینان».
بەرپرسێ ڕاگەهاندنا زانكۆیا دهۆك زێدەتر گۆت:»ئەڤ رێبەرە كو بەرهەمێ پرۆژەكێ هەڤپشك یێ زانكۆیێن دهۆك و زاخۆیە و ب پشكداریا هەژمارەكا سازیێن دی یێن رەوشەنبیری هاتیە ئامادەكرن، دهێتە هەژمارتن وەكو بنەمایەكێ نشتیمانی بۆ ئێكگرتنا نڤیسینا كرمانجی ل دەڤەرا بەهدینان».

زنار تۆڤی:

سەرۆكێ هەرێما كوردستانێ بڕیار دا گوندێ‌ ئاڤگەنیێ‌ یێ‌ سەر ب دەڤەرداریا باتیفا ڤە ببیتە ناوچەداری ل ئیدارەیا سەربخۆ یا زاخۆ.
فەرهاد مەحموود، دەڤەردارێ‌ باتیفا بۆ رۆژناما ئەڤرۆ دیاركر، گوندێ‌ ئاڤگەنیێ‌ بوویە ناوچەداری و سەر ب دەڤەرداریا باتیفا ڤە و گۆت: «نێزیكی 48 گوندان دێ‌ سەر ب وێ ناوچەداریێ‌ ڤە بن، ب ناوچەداریبوونا گوندێ‌ ئاڤگەنیێ‌ دێ شێین د هەموو بیاڤان دا پتر خزمەتا خەلكێ وێ دەڤەرێ بكەین».
ناڤهاتی گۆتژی: «نێچیرڤان بارزانی، سەرۆكێ‌ هەرێما كوردستانێ ل رۆژا 23/9/2025 فەرمانەكا هەرێمی بۆ ناوچەداریبوونا گوندێ‌ ئاڤگەنیێ‌ دەركر و ئیمزاكر».

دهۆك، دلۆڤان ئاكرەیی:

پەیڤدارا كۆمسیۆنا بلندا سەربخۆ یا هەلبژارتنێن ئیراقێ دیاركر، ل گەل وەزارەتا پەروەردەیێن ئیراقێ و هەرێمێ هەماهەنگی دەستپێكریە، دا كو ژ ڕۆژا 5ی چریا دویێ هەتا 13ی هەمان هەیڤ قوتابخانەیان ڕادەستی وان بكەن، دا كو ژ لایێ تەكنیكی و لۆجستی ڤە ب تمامی بهێنە ئامادەكرن.
پەیڤدارا كۆمسیۆنێ‌ بۆ رۆژنامەیا ئەڤرۆ گۆت: «بۆ ڕۆژا دەنگدانا تایبەت و گشتی پێدڤی ب نێزیكی 9 هزار و 539 قوتابخانەیانە، كو پێدڤیە بەری دەمی هەمی بهێنە ئامادەكرن و كارتا بایۆمەتری، ئێكە ژ مەرجێن سەرەكی یێن دەنگدانێ، چو كەس نەشێت بێی وێ كارتێ دەنگ بدەت، لەو دوهی رۆژا چارشەمبی 24/9/2025، كۆمسیۆنا هەلبژارتنان د درێژاهیا ڕۆژێن حەفتیێ دا، ب ڕێكا هزار و 79 بنگەهێن تۆماركرنێ، دێ دەست ب بەلاڤكرنا كارتا بایۆمەتری یا دەنگدەران كەت».

رەمەزان زەكەریا:

حكومەتا هەرێما كوردستانێ رۆمالا تاوانان ل كەنالێن راگەهاندنێ و تۆڕێن جڤاكی قەدەغەكریە و نابیت دەمێ روودانەك دروست دبیت چو دەزگەهێن راگەهاندنێ رۆمال بكەن.
حاكم ئازاد حەمەد ئەمین، نەقیبێ سەندیكا رۆژنامەڤانێن كوردستانێ گۆت: «ئەم پشتەڤانیێ ل ڤێ‌ بڕیارا حكومەتا هەرێما كوردستانێ دكەین، وەكو سەندیكا رۆژنامەڤانێن كوردستانێ ل گەل رێكخستن و چارەسەریێ داینەن ب تایبەتی ل سەر وان بابەتێن یاسایەك نینە چارەسەر بكەت، كو هندەك كەس هەبن ب كەیفا خوە یاریا ب قەدەرێ و ئاشتیا جڤاكیا خەلكێ كوردستانێ بكەن، مە دڤێت ژوورەكا ئۆپەراسیۆنێ بهێتە دروستكرن وەك دەستەیا مافێ‌ مرۆڤ و وەزارەتا ناڤخۆ و وەزارەتا رۆشنبیری و داخوازكارێ گشتی بۆ وێ چەندێ بشێین پشتەڤانیا حكومەتێ بكەین و حكومەت ژی پشتەڤان بیت بۆ بجهئینانا میكانیزما بڕیارێ».
ناڤبری گۆتژی: «بۆ رێكسختن و پیشەیانەیا كاریێ راگەهاندنێ، پشتەڤانیا بڕیارا حكومەتا هەرێما كوردستانێ دكەین، بۆ وێ چەندێ كارێ راگەهاندنێ ب ئەتەكێتێن رۆژنامەڤانی بهێتە ئەنجامدان».

دهۆك، لەزگین جۆقی:

رێڤەبەرێ ناوچەداریا فەیدیێ بۆ رۆژناما ئەڤرۆ دیار كر، حكومەتا هەرێما كوردستانێ هەژمارەكا مەزن یا پڕۆژەیێن خزمەتگوزاری ل ناوچەداریا فەیدیێ ئەنجامداینە.
عادل ئەمین، رێڤەبەرێ ناوچەداریا فەیدیێ گۆت: «حكومەتا هەرێما كوردستانێ 63 پڕۆژەیێن خزمەتگوزاری ب گوژمێ پتر ژ 100 ملیار دیناران ئەنجامداینە، نوكە چەندین پڕۆژە د قووناغێن بجهئینانێ دانە، دیسا هندەك پڕۆژە ب دوماهی هاتینە و كەڤتینە د خزمەتا خەلكی دا، ل سنۆرێ ناوچەداریا فەیدیێ بەردەوام پڕۆژە بۆ خزمەتكرنا خەلكێ دەڤەرا فەیدیێ دهێنە چێكرن».
گۆتژی: «كار ل سەر پڕۆژەیێ جۆتسایدێ ناوچەداریا فەیدیێ بەردەوامە هەمی جادە دێ بیتە جۆتساید، ئەڤە پڕۆژەكێ گرنگە نوكە د قووناغێن چێكرنێ دایە».

ل سەر ڕاسپاردێن د. عەلی تەتەر، پارێزگارێ دهۆكێ هەوێن پاقژكرنا ژینگەهێ ل سەرانسەری پارێزگەها دهۆكێ دەستپێكرینە.
ل رۆژا 23/9/2025 و ل ژێر درووشمێ «ژینگەهـ مالا مەیە، پاقژ راگرتنا وێ ئەركێ مە هەمیانە» رێڤەبەریا ناوچەداریا زاویتە ب هەمی رێڤەبەری و فەرمانبەرڤە ب پشكداریا پتری 200 فەرمانبەران، زێدەباری گەنجین خوبەخش ل سنۆرێ ناحیێ دەست ب هەوەكا بەرفرهـ كر، بو ڕاكرنا بەرمایكێن ل رەخ و دۆرێن جادەیێن سەرەكی و پاقژكرنا ژینگەها زاویتە، خواست هەمی خەلكێ دەڤەرێ و گەشتیار و سەیرانی جهێن خۆ پاقژ ڕاگرن، هەروەسا داخواز ژ جهێن گەشتیاری یێن گشتی و تایبەت كر بەرمایكان بداننە وان جهێن هاتینە دەستنیشانكرن.