د داخویانیەکێ دا سەرۆکێ یانەیا زاخۆ یا وەرزشی بۆ رۆژنامەیا ئەڤرۆ دیار کر دێ پلێتێن یاریێن وەرزێ نوو یێ خولا ستێرێن ئیراقێ بۆ دەمێ سالەکێ ب کرێدەن و یێن یاریێن کەنداڤی و کوپا ئیراقێ ب کرێ نادەن.
زێدەتر عەمار فەرهاد ئاغا گۆت: ب مەرەما رێکخستنا هاتنا ژور و فروتنا پلێتان بۆ وەرزێ نوو یێ خولا ستێرێن ئیراقێ یا فوتبۆلێ دێ سەرئێک زێدەکرنەکا ئاشکەرا ب ئامادەبوونا لایەنێن پەیوەندیدار پلێتێن یاریگەهێ ب کرێ دەین بۆ دەمێ سالەکێ، بڤێ ڕێکێ زێدەتر هەڤسەنگی و بەرچاڤ روونی بۆ خەلکێ مە هەبیت داکو هەمی کەسێ مافێ پشکداریێ د ڤێ چەندێ دا هەبیت، مە بریار دایە بتنێ پلێتێن یاریێن وەرزێ نوو یا خولا ستێرێن ئیراقێ ب کرێ بدەین و یێن کەنداڤی و کوپا ئیراقێ ب ڕێیا مە بهێنە فروشتن داکو داهاتێ مە یێ جودا بن و ژێدەرێن مە زێدەتر لێبهێت ژبەرکو د نوکە دا مە پێدڤییەکا مەزن ب پارەیی هەیە هەتا کو بشێن وەرزەکێ سەرکەڤتی دەرباز بکەین.
ناڤبری گۆت ژی: د نوکە دا مە داهاتێ خوە پتر لێکریە و پێدڤیە ئەم ب رژدی کار ل سەر زێدەکرنا داهاتێ یانەیێ بکەین ژبەرکو خەرچکرنا پارەیی ژی د ڤی وەرزی دا دێ پتر لێهێت.

قەیس وەیس:

پشتی بۆرینا سێ‌ حەفتیان ژ بەرهەڤیێن یانەیێن ئیراقی و كوردستانی بۆ وەرزێ‌ نوو یا خولا ستێرێن ئیراقێ‌ یا فوتبۆلێ‌، ئەوێن هندەك یانە كەمپێن نافخوە دانانین و هندەك ژی بەر ب وەلاتێن دەوروبەر چووین ژبۆ باشترین بەرهەڤی بۆ خولێ‌، ل دووڤ پێزانین مە پرانییا یانەیان قووناغا بەرهەڤیێن دەستپێكی ب دووماهی ئیناینە و د نوكە دا قووناغا هەلسەنگاندنا ئاستێ‌ هونەر و تەكتیكی یە بەری دەست ب وەرزێ‌ نوو بهێتە كرن ئەوا بڕیارە ل 13ێ‌ ڤێ‌ مەهێ‌ هەڤڕكی بهێنە ئەنجامدان.
تیما یانەیا دهۆك ئەوا ئاستێ‌ بەرهەڤیێن خوە گەهاندینە كۆمپیتكێ‌ بۆماوەیێ‌ زێدەتری دو حەفتیان كەمپەكێ‌ ڕاهێنانێ‌ ل باژێرێ‌ پیرمام یا هەولێرا پایتەخت دانایی ڕێزێن تیمێ‌ ب ئینانا یاریزانان ب دووماهی ئینایە و چەند یاریێن هەڤالینی ژی ئەنجامداینە، ژلایێ‌ خوەڤە یانەیا زاخۆ ل هەولێرێ‌ یە و بڕیار هەبوو بەر ب كەمپەكێ‌ دەرڤە بچیت بۆ وەلاتێ‌ توركیا، ل دووڤ ژێدەرێن ڕۆژنامەڤانی ڕاهێنەرێ‌ زاخۆ یێ‌ قەتەری ویسام رزق دەست ژ یاریزان عەلا دالی بەرداییە پشتی ژ ئاستێ‌ نەڕازیبووی، زاخۆیی د وەرزێ‌ ئەڤسالە دا دێ‌ نوونەراتییا ئیراقێ‌ و كوردستانێ‌ د كۆپا كەنداڤی دا كەت ئەوا ل وەرزێ‌ بۆری دهۆك نوونەر بوو و شیابوو ناسناڤی ژی ب دەستڤەبینت.
لدۆر بەرهەڤی و ئەركێ‌ یانەیێن پارێزگەهێ‌ و كوردستانێ‌ سلێمان زەكی شرۆڤەكارێ‌ وەرزشی ل پارێزگەها دهۆكێ‌ بۆ رۆژنامەیا ئەڤرۆ گۆت: ل دووڤ بەرهەڤی و هاتنا یاریزانان بۆ یانەیێن ئیراقی و كوردستانی دبیت وەرزێ‌ ئەڤ سالە دێ‌ بۆ یانەیێن كوردستانی ب زەحمەت بیت هەڤڕكیێ‌ ل سەر ڕێزێن پێشیێ‌ بكەن، هەرچەندە بەرهەڤیێن دهۆك و زاخۆ دباشن، لێ‌ یێن هەولێر و نەورۆز د ئاستێ‌ پێدڤی دا نینن، لێ‌ گەلەك جاران هەبوویە مە پێشبینی دكر تیمەك ب ئینانا باشترین یاریزان و بەرهەڤییان لێ‌ دووماهیێ‌ نەگەهشتییە ڕێزێن پێشیێ‌، ئەڤچا دوور نینە هەر گوهۆڕینەك هەبیت، سەرباری یا ئەم دبینن كو یانەیێن وەكو شورتە، زەورا، ئەلگەرمە، تەلەبە و جەوییە كەمپێن دەرڤە داناینە و یاریزانێن باش ئیناینە، لەوما ژی هزردكەم دێ‌ وەرزێ‌ ئەڤ سالە بزەحمەبیت تایبەت بۆ یانەیێن كوردستانی.

تیما تایکواندۆیا یانەیا گارە شیا رێزێن پێشیێ بهێن و یاریزانێن وان کونترۆلا یێن ئێکێ هەتا سێیێ بۆ کێشێن جودا یێن قارەمانییا سلێمانیێ بۆ یانەیێن کوردستانی و ئیراقی ب دەستڤە بینن، د هەڤڕکیێن واندا ئەوا ل باژێرێ سلێمانیێ هاتییە کرن.
ئەنجامێن یاریزانان بڤی شێوەیی بوون، ل سەر ئاستێ بێشکەفتیان، هەر ئێک ژ دلناس یونس عەبدوللا 56کگم، زێوەر مشیر ئیسماعیل ٦٣کگم، ژێهات زین ئەلعابدین ٦٨کگم رێزێن ئێکێ بۆ کێشێن خوە هاتن، دیسان محەمەد دلێر خەلیل ٨٧کگم و رێناس یونس عەبدوللا ٥٨ کگم رێزێن دویێ هاتن، ل سەرئاستێ لاوان، هەر ئێک ژ سیلاڤ وەلید خالد ٤٢کگم کچا ئێکانە یا تیمێ، ئاڤأن سالح سلێمان ٤٨کگم رێزێن ئێکێ بۆ کێشێن خو هاتن، هەروەسان هەر ئێک ژ سالار ئەحمەد محەمەد ٤٥کگم، جەمیل سەگڤان جەمیل ٥١کگم ژی رێزێن دویێ بۆ کێشێن خۆ هاتن.
لدۆر ڤێ یەکێ شێروان بەشار سەرۆکێ یانەیا گارە یا وەرزشی بۆ رۆژنامەیا ئەڤرۆ گۆت: دەستخۆشیێ ل راهێنەر و یاریزانێن خوە دکەین کو ب سەرفەرازی شیان پشکداری د قارەمانیێ دا بکەن و رێزێن ئێکێ بهێن، پێنەڤێت ئەڤە ژی زەحمەتا وان یا چەندین سالە و شیانێن مەزن هەنە، بمخابنی ڤە ژبەر کاوادنێن نەباش یێن دارایی ل یانەیێ ئەم نەشێن یا پێدڤی بۆ بکەین، لەوما ژی هیڤییا مە ئەوە ژ پارێزگارێ دهۆکێ پشتەڤانییا یانەیا بکەت، ژبەرکو یانەیا گارە هەردەم بوویە ئەگەر وەرزشڤانێ دهۆکێ خۆ تێدا ببینت، هەکە پشتەڤانی هەبیت دێ مە تیمێن بهێز و هەڤرک ژی هەبن نە.
هەروەسان ناڤهاتی گۆت: ئەڤ کۆما یاریزانێن لاوان و پێشکەڤتیان ب سەرپەرشتییا راهێنەرەکێ خودان شیانن باشترین شێوە راهێنان پێ هاتینە کرن و شیانێن هەڤرکیێ یێن هەین و بتنێ تایکواندۆ بەلکو چەندین یاریێن دی ل سەر ئاستێ کوڕأن و کچان.

تایبەت:

ژێدەرەکێ تایبەت ژ کارگێریا یانەیا زاخۆ یا وەرزشی بۆ رۆژنامەیا ئەڤرۆ دیار کر ئەو دانوستاندنێ دانە دگەل سێ یاریزانێن نوو و بەر ب دووماهیێ ڤە چووینە.
زێدەتر وی ژێدەری گۆت: ئەم د دانوستاندنان دانە دگەل سێ یاریزانێن نوو ب تایبەتی یێن هێلا بەرەڤانیێ و هەتا نوکە ئەم دگەل یاریزانەکێ گەهشتینە رێکەڤتنا دووماهیێ و دێ د ماوەیێ دو رۆژێن داهاتی دا هێتە ڕاگەهاندن و ئەو یاریزانە پێشەکارە و هێلا بەرەڤانیێ یاریێ دکەت و د بنەرەت دا بەرازیلی یە و یاری ل خولا پلە دو یا بەرازیلی یاری کریە، هەر دیسان ئەم دگەل یاریزانەکێ ب رەگەز کامیرونی د دانوستاندنێ داینە و ل هێلا بەرەڤانیێ یاریێ دکەت و پێشتر یاری د قارەمانیەکا مەزن یا ئەوروپایێ دا یاری کریە و ل دژی کریستیانو رونالدو ژی یاری کریە و ئەم هەتا ڕادەیەکێ باش د دانوستاندنا داینە و کارەکێ باش دهێتە کرن گرێبەستا وی یاریزانی ژی بهێتە ئێکلا کرن.
وی ژێدەری گۆت ژی: هەر دیسان ئەم یاریزانەکێ دیتر یێ ب رەگەز ئیراقێ دانوستاندنان دکەین بۆ وێ یەکەیێ پەیوەندیێ ب تیما مە بکەت و ئەو یاریزانە چەند جهەکێن جودا یاریێ ئەنجام ددەت.

ئەڤرۆ

ستێرێ‌ گەنج یێ‌ مەغربی و یانەیا ریال مەدرید یا ئسپانی ئیبراهیم دییاز ڕەشبینییا خوە دیاركر كو هەكە دەلیڤەیێ‌ بدەن چوونا وی باشترە ژ مانا وی، ئەڤچەندە هات پشتی بۆرینا سێ‌ یارییان بێ‌ كۆ ڕاهێنەرێ‌ تیمێ‌ گرنگیێ‌ پێ‌ بدەت.
ئیبراهیم دییازی بۆ پەیچێ‌ یێ‌ ئسپانی e-noticies گۆت: هەرچەندە حەز دكەم دگەل ریال مەدرید بمینت یانەیەكا مەزنە و خودان دەستكەڤتن، لێ‌ پشتی بۆرینا سێ‌ حەفتییان و ڕاهێنەر چ گرنگیێ‌ ب من نەدەت ڕامانا وێ‌ یێ‌ سەرەكی نینم، لەوما مافێ‌ منە ژی داخواز بكەم ڕێكێ‌ بۆ من ڤەكەن، چوونا من باشترە ژ مانا من، لێ‌ هەكە گوهۆڕین پەیدابن دێ‌ مینم.
بۆ زانین هەر ئێك ژ یانەیێن بایرن میونخ، لیڤەركۆزن، یۆڤانتۆس، تۆتنهام، ئارسنال، مانچستەر ستی لڤێ‌ هاڤینێ‌ ئۆفەر پێشكێش كربوون یانەیا ڕیالێ‌ ڕەدكربوو بفرۆشیت.

شاهۆ فەرید:

د داخویانیەكا تایبەت دا پەروەر حسێن جێگرێ سەرۆكێ یانەیا سێمێلێ بۆ رۆژنامەیا ئەڤرۆ دیاركر: یاریگەها فوتبۆلێ‌ یانەیا سێمێلێ یا نوو رێژەیا هەشتێ ژ سەدێ دووماهیك هاتیە، یاریگەه ب شێوەیێ ئۆلمپی و مۆدرێن هاتیە چێكرن.
زێدەتر ناڤهاتی گۆت: كارەكێ‌ باش ل سەر یاریگەها نوو یا یانەیێ‌ دهێتە كرن تێدا جهێ نێزیكی دەه هزار پشتەڤانا دێ هەبیت، پەلوكێن روونشتینێ هەردو لایێن یاریگەهێ هەنە، بۆ قووناغێن دووڤ دا دێ یا مایی ژ یاریگەهێ تەمام بیت، ئەردێ یاریگەهێ ژی باشترین شێوە هاتیە ئامادەكرن، جهێ وێ‌ ژی گۆنجایە بۆ پشتەڤانێن یانەیێ‌ كو دكەڤیتە دناڤبەرا سێمێلێ و مسێریكێ دا ئەڤە رێكخوەشكەرە بۆ یاریزان و پشتەڤانان نیزیكتربوو دێ پتر قەستا یاریگەهێ كەن، مە هزر د ئەوێ چەندێ دا كریە بۆ قووناغێن بهێت ژبەر هەبوونا ئەردەكێ باش چەند یاریگەهێن راهێنان ژی ئامادەبكەین.
زێدەتر ناڤهاتی گۆت: بەرهەڤی هێشتا بۆ خولا پلا ئێك نە هاتینە كرن ئەوا بڕیارە ل چریا دویێ دەستپێبكەت، چونكۆ هەیڤا چریا ئێكێ دێ هەلبژارتنێن كارگێریا یانەیێ هێنە ئەنجامدان، دەستەیا نوو دێ تیمێ بەرهەڤ بیت، مە تیمەكا لاوان ژی بۆ خولێ ئامادەكریە سەرەرایی ئەنجامێن لاواز لێ ئەم شیاین چەند یاریزانان بۆ تیما هێلا پێشكەڤتیان یا سەرەكی سەربێخین، ئەڤ پێنگاڤا مە دێ مفایی گەهینتە مە بۆ خول و قارەمانێن بهێن، ئەكادیمیا یانەیێ زۆر باشی چاڤدێریا یاریزانان دكەت بۆ نڤشەكێ نوو بەرهەڤبكەین ژ یاریزانێن خودان شیان و ئاستەكێ بلند، سێمێل كانیكا بەرهەمئینانا یاریزانانە و گەشبینن دێ‌ وەرزێ‌ بهێت كۆمەكا دی یا یاریزانێن بەهرەمەند و خودان شیان هەبن.