دهۆك، لەزگین جۆقی:

ئەندامەكا پەرلەمانێ ئیراقێ ژ فراكسیۆنا پارتی بۆ رۆژناما ئەڤرۆ دیار كر، ئەو شیاینە رازیبوونا وەزیرێ ساخلەمیا ئیراقێ بۆ ئاڤاكرنا بنگەهەكێ ساخلەمیێ و دابینكرنا ترۆمبێلێن ڤێراگەهشتنێ كو 24 دەمژمێران د خزمەتا نەخۆشان دا بن ل نەخۆشخانا سنوونێ وەربگرن.
ڤیان دەخیل، ئەنداما پەرلەمانێ ئیراقێ گۆت: «دەرچوویێن پەیمانگەها تەكنیكی كارگێری / پشكا كارگێریا نەخۆشخانەیان، ئاریشەیا دامەزراندنێ‌ هەبوو، ئەم شیاین رازیبوونا وەزیرێ ساخلەمیا ئیراقێ وەربگرین، بهێنە دامەزراندن، ئانكو بهێنە د ناڤ رێزبەندیا دامەزراندیێن وەزارەتا ساخلەمیا ئیراقێ دا، پشتی هەڤكاریێ ل گەل وەزارەتا خواندنا بلند و حكومەتا هەرێما كوردستانێ دكەن، بۆ ڤێ چەندێ ژی رێنمایێن تایبەت دێ هێنە دەرئێخستن، ئەو ژی د ناڤ كەرتێ ساخلەمیێ دا خزمەتێ‌ بكەن».
گۆتژی: «مە رازیبوون بۆ ئاڤاكرنا بنگەهەكێ ساخلەمیێ ل گوندێ سكینە ل دەڤەرداریا شنگالێ ژی وەرگرتیە».

رەمەزان زەكەریا:

ل سنۆرێ باژێرڤانیا ئاكرێ بەرهەڤی بۆ قووناغەكا نوو یا بەلاڤكرنا پارچەیێن ئەردی دهێتە كرن و ژ بلی سەنتەرێ‌ دەڤەرداریێ‌ ل ناوچەداریێن ب سەر ژی ڤە پارچەیێن ئەردی دێ‌ هێنە بەلاڤكرن.
باژێرڤانیا ئاكرێ دەست ب بەرهەڤیان كریە، بۆ قووناغەكا نوو یا بەلاڤكرنا پارچەیێن ئەردی ل سنۆرێ باژێرڤانیێ، ژبلی سەنتەرێ ئاكرێ، پارچەیێن ئەردی ل ناوچەداریێن بجیل و دینارتە و گردەسێن ژی، ئانكو ل گۆری كارتا زانیاریان دێ‌ هێنە بەلاڤكرن.
سالا بۆری باژێرڤانیا ئاكرێ لیستەكا ناڤان راگەهاند، یێن پارچەیێن ئەردی بۆ دەركەفتی، كو مامەلەیێن وان یێن سالێن 2011 – 2012 بوون، پتر ژ هزار ناڤان مابوون، ئەرد وەرنەگرتبوو، ئەوێن مایی ل سەنتەرێ دەڤەرداریا ئاكرێ دێ پارچەیێن ئەردی وەرگرن و یێن ناڤێن وان نوو هاتینە باژێرڤانیێ، ل سنۆرێ كارتا خوە یا زانیاریان دێ پارچەیێن ئەردی وەرگرن.

دهۆك، لەزگین جۆقی:

سەرۆكێ باژێرڤانییا شێخان راگەهاند، حكوومەتا هەرێما كوردستانێ ب گوژمێ 26ملیار دیناران ب درێژاهیا پتر هەشت كیلۆمەتران پرۆژێ جووت سایدێ شێخان ئەنجامدا ئەڤ پرۆژە دێ گەلەك ئاریشا چارەسەركەت.
خالد نەرمۆ، سەرۆكێ باژێرڤانیا شێخان راگەهاند، دەمی مەسرور بارزانی ، سەرۆكێ حكوومەتا هەرێما كوردستانێ بەری بنیاتێ پرۆژێ رێكا دهۆك وباعەدرێ دانای سەرەدانا پەرستگەها لالش كر وخەلكێ شێخان وئێدارا شێخان داخوازا چێكرنا جادەیا ناڤ سەنتەری شێخان دا كرن و دەملدەست سەرۆكێ حكوومەتا هەرێما كوردستانێ رازیبوون ل سەر چێكرنا پڕۆژەیێ جۆتسایدێ شێخان كر، نوكە پڕۆژە د قووناغێن دووماهیێ دایە و دێ گەلەك خزمەتا خەلكێ دەڤەرێ‌ كەت.
گۆتژی: «ئاریشەیا هاتنوچوونێ و قەرەبالغا ترۆمبێلان د ناڤ شێخان دا نامینت، ئەڤە پڕۆژەكێ گەلەكێ‌ گرنگە ژ لایێ حكوومەتا هەرێما كوردستانێ ڤە ل شێخان هاتیە چێكرن».

هەولێر، قائید میرۆ:

پەیڤدارێ وەزارەتا كار و كاروبارێن جڤاكی یا حوكمەتا هەرێما كوردستانێ‌ دیاركر، ل چاكسازیێن هەرێما كوردستانێ سەنتەرێن چارەسەركرنێ هاتینە ڤەكرن و هەتا نوكە 700 كەسێن ب تۆمەتا ب كارئینانا ماددەیێن هۆشبەر هاتینە حوكمدان؛ هاتینە چارەسەركرن.
ئاریان ئەحمەد، پەیڤدارێ وەزارەتا كار و كاروبارێن جڤاكی بۆ رۆژناما ئەڤرۆ دیاركر، ل هەموو چاكسازیێن هەرێما كوردستانێ سەنتەرێن چارەسەریێ بۆ كەسێن ماددەیێن هۆشبەر ب كار دئینن هاتینە ڤەكرن و گۆت: «هەتا نوكە پشكنین بۆ 700 ئالۆدەبوویان هاتیە كرن و ئەنجامێ وان دەرچوویە، لەشێ وان یێ پاقژە و هاتینە چارەسەركرن، سەنتەرەكێ‌ مەزن ل قەزا شەقلاوە دێ هێتە ڤەكرن و كەسێن ب تۆمەتا ماددەیێن هۆشبەر دهێنە حوكمدان ل ئەڤی سەنتەری بهێنە چارەسەركرن».
ئاریان ئەحمەد گۆتژی: «مخابن هەژمارەكا سنێلەیان ژی تووشی ب كارئینانا ماددەیێن هۆشبەر بووینە و نوكە ل چاكسازیا ژنان و زارۆكان دهێنە چارەسەركرن، چونكی ل ئەڤێ چاكسازیێ ژی سەنتەرێ چارەسەركرنێ هاتیە ڤەكرن، رۆژانە كەسێن ئالۆدەبووی دهێنە چارەسەركرن ب مەرەما رزگاركرنا وان كەسان ژ مەترسیێن ماددەیێن هۆشبەر».

دلۆڤان ئاكرەیی

رێڤەبەرێ ئەندازیاریا پاركان ل دهۆكێ دیار كر، ل دهۆكێ ١٢ پارك و ١٤٥ باخچە هەنە، دو پارك ژی ب كەرتێ تایبەت هاتینە دان و گۆت: رێ ب چو كەس و لایەنەكی ناهێتە دان زێدەگاڤیێ ل سەر ئەردێ پارك و باخچەیان بكەن، رۆژانە ب رێیا ٧٠٠ فەرمانبەر و كرێكاران سەخبێریا ڤان پاڕك و باخچەیان دهێتە كرن.

ئەندازیار كارۆان سالح رێڤەبەرێ ئەندازیاریا پاركان ل دهۆكێ بۆ رۆژنامەیا ئەڤرۆ گۆت: رۆژانە كرێكارێن مە ب رێیا ئەندازیارێن سەرپەرشت چاڤدێریا ١٤٥ باخچەیێن ناڤا تاخان و ١٠ پاركان و ژبلی پاركێن ئالۆكا و سەرهەلدان دكەن و ب رێیا بیرێن ئاڤێ ل پاركان سەخبێریا پاركان و ب رێیا هێلا ئاڤا گشتی ژی باخچەیێن ناڤا تاخان سەخبێر دكەن.
سەبارەت چاڤدێریا باخچە و پاركان و چاندنا دار و كەسكاتی و جۆرێن گولا ل وەرزێن جودا دا دیار كر: هەر رووبەرەكێ بۆ كەسكاتییێ دهێتە دیاركرن، ئەگەر دناڤبەرا ٥ هزار بۆ ٧ هزار مەترێن دوجادا بوو، دێ ب باخچە هێتە دانان و هەر رووبەرەكێ ب ١٠ هزار مەترێن زێدەتر بهێتە دیاركرن دێ ب پارك هێتە دانان و ئەو ب ڕێیا هەر سێ گۆلخانەیێن خۆ بەردەوام جۆرێن خێزانێن دارێن كاژ و چنار و سەبەحبەح دچینن و ئەڤ جورێن دارێن هەنێ ژ بەر بلندبوونا پلەیێن گەرمێ گونجاندنا وێ و پاراستنا وێ باشترە ژ هندەك جورێن دارێن دی.
ئەندازیار كارۆان سالح زێدەتر گۆت: ب مخابنیڤە ل هندەك پاركان وان یاریێن زارۆیان و ئامیرەیێن وەرزشی و تارتان بۆ پیادە و وەرزش كرنێ دانا بوون، بەلێ هەمی هاتینە ژناڤبرن و تێك چووینە، لەوما هزر ل سەخبێریا وان دهێتە كرن و گۆت: وان دو پاركێن دهۆكێ داینە كەرتێ تایبەت كۆ پاركا بارزانی و ئازادینە و ئەو لایەن سەخبێریا وان پاركان دكەن و ئەو ژی بەردەوام چاڤدێریا وان پاركان دكەن و ئەو كەسكاتییا د نوكە دا ل دهۆك دهێتە دیتن بەرهەمێ هاریكاریا خەلكێ دهۆكێ یە ل گەل مە و ئەگەر خەلك ل گەل مە یێ هاریكار نەبا نە دگەهشتە ڤێ قوناغێ.
ل دۆر گازندەیێن وەلاتییان ل سەر پارك و باخچەیان گۆت: چوونا ژورا هەمی پاركێن دهۆكێ بێ بەرامبەرە و پرانیا گازندە یێن بۆ مە دهێن ل سەر باخچەیێن ناڤا تاخانە كۆ هندەك كەس زێدەگاڤییان دكەن یان زارۆ د وان باخچەیاندا یاریا تەپا‌پێی دكەن و ئەڤ زێدەگاڤییێن هەنێ ژی ژ چو كەس و لایەنەكی نەهاتیە قەبولكرن كو دەست ب سەر پارك و باخچەیان بهێتە كرن و ب رێكا لایەنێن پەیوەندیدار و هێزن ئەمنی رێك ل هەر زێدەگاڤیەكێ هاتیە گرتن.

زاخۆ، دلۆڤان هالۆ:

ل ئیدارەیا سەربخوە یا زاخۆ ب گۆژمێ پتری ٤٠٠ ملیۆن دولاران پڕۆژەیێن پیشەسازی و وەبەرهێنانێ هاتینە بجهـئینان، د نوكە ژی دا كار ل سەر دورستكرنا پڕۆژێ ئەندەرپاسا پیشەسازی یا زاخۆ دهێتە كرن و د قوناغا دووماهیێ دایە.

هێژا محەمەد، جێگرێ سەرپەرشتێ ئیدارەیا سەربخوە یا زاخۆ بۆ ڕۆژناما ئەڤرۆ دیار كر، ب گۆژمێ پتری ٤٠٠ ملیۆن دولاران پڕۆژەیێن پیشەسازی و وەبەرهێنانێ ل ئیدارەیا سەربخوە یا زاخۆ هاتینە بجهـئینان و هندەك ژی دێ ژ نوو كەڤنە د قوناغا كاركرنێ دا، د نوكە دا كار ل سەر گەلەك پڕۆژەیان دهێتە كرن ب تایبەت پڕۆژەیێن پیشەسازی كو دێ گەلەك دەلیڤەیێن كاری پەیدا كەت، وەكو پڕۆژەیێن پیشەسازییا تڕۆمبێلان و پڕۆژەیێن وەبەرهێنانێ.
گۆت ژی:»پشتی ناحیا باتێلێ هاتیە ب سەر ئیدارەیا سەربخوە یا زاخۆ ڤە، گەلەك داخوازیا ڤەكرنا كارگەهان دهێتە كرن، بۆ ڤێ چەندێ هەمی ئاسانكاری هاتینە كرن، دا كو دەلیڤێن كاری بۆ خەلكێ بهێنە ڕەخساندن و وەبەرهێنەران ژی دەلیڤەیێن كاركرنێ هەبن».
ئیدریس عەبدوللا، جێگرێ سەرۆكێ باژێڕڤانیا زاخۆ گۆت:»ب گۆژمێ حەفت ملیاران پڕۆژێ دروستكرنا ئەندەرپاسا پیشەسازی بۆ جاددا تلكەبەرێ دهێتە دروستكرن و د قوناغا دووماهیێ یا چێكرنا دورگێن ناڤەندی دایە و بۆ ماوێ چار هەیڤێن دی دێ ب دووماهی هێت و چێكرنا جاددەیان ژی د قوناغا داپۆشكرنا بەرێن شكەستیدایە و پشتی هینگێ ژی دێ جاددە هێنە قیركرن».

سندس سالح سلێڤانەیی:

باژێرڤانیا دهۆكێ بەری چەند رۆژان دەست ب چێكرنا وان جهان كریە یێن كو د لەهیێن بۆری دا زیان گەهشتینێ ب تایبەت ژی ل تاخێن بەرۆشكێ و نزاركێ. راگەهاندنا باژێرڤانیێ ژی دیاردكەت، هەر جهەكێ زیان گەهشتبنێ دوبارە دێ ژلایێ تیمێن وانڤە هێنە نووژەنكرن و سەخبێركرن و خەلكەك ژی ب ڤێ پێنگاڤی د دلخۆشن و داخوازا خزمەتێن زێدەتر دكەن.

حسێن سەبری، هاولاتیەكە مالا وی دكەڤیتە نێزیك رووباری هشكەڕۆ ل تاخێ بەرۆشكێ دبێژیت: ئەم گەلەك د كەیفخۆشین ب ڤێ پێنگاڤا باژێرڤانیێ، چونكو هەتا نوكە مەترسی ل سەر خانیێن مە هەبوو، لێ پشتی بەرفرەهكرنا رووباری پتر باوەری بۆ مە چێبوو كو ئەو چەندە دوبارە نابیت و هیڤیا من ئەوە رۆژەك بهێت ئەڤ رووبارە ببیتە جهەكێ گەشتیاری و خەلكەك بۆ دەم بۆراندنێ بهێنە سەر ڤی رووباری.
ئازاد حەمدی، وەلاتیەكێ تاخێ نزاركێ یە، دبێژیت: دەمێ لەهی رابووین پتریا شوستێن تاخێ مە، ب تایبەت ئەوێن دكەڤنە سەر جادەیا سەرەكی ژناڤ چووبوون و جهێ وان گەلەك كرێت ببوون، لێ ڤێ دووماهیێ جارەكا دی باژێرڤانیێ بۆ مە چێكرن و جوانیا وان زڤڕاندەڤە.
شێروان حەسەن، بەرپرسێ راگەهاندنێ ل سەرۆكاتیا باژێرڤانیا دهۆكێ دبێژیت: وان لەهیان گەلەك زیان گەهاندبوو باژێرێ مە، ب تایبەت ژی ل رووبارێ هشكەڕۆ ل تاخێ بەرۆشكێ و نزاركێ و پشتی ڤەدیتن بۆ وان جهان هاتیە كرن د پێنگاڤا ئێكێ دا دەست ب پاقژكرن و بەرفرەهكرنا رووباری هشكەڕۆ هاتە كرن، ژ بۆ هندێ دا مەترسیا دووبارە بوونا وان لەهیان ل سەر خانێن نێزیكی رووباری كێم ببیت، هەروەسا بەری چەند رۆژان دەست ب چێكرنا هندەك شوستان ژی هاتە كرن ل تاخێ نزاركێ كو لەهیان ژناڤ بربوون، نوكە ئەو ژی یێ دهێنە چێكرن و تیمێن باژێرڤانیێ دێ د بەردەوام بن هەتا هەموو جهێن زیان گەهشتیێ بهێنە چێكرن و داخوازا مە ژ وی خەلكی ئەوە ئەوێن مالێن وان دكەڤنە سەر رووبارێ هشكەڕۆ دگەل مە د هاریكاربن و گلێش و بەرمایكێن خوە یێن خانیان نەهاڤێژنە د رووباری دا.