عەلی حاجی:

د پرێسکونگرەیەکێ رۆژنامەڤانی دا ل بارەگایێ یاریگەها زاخۆ یا نێڤدەولەتی دا یاریزانێ ڕه‌ڤه‌ندا كوردستانی ل ئۆرۆپا ژیلوان حەمەد یاریزانێ پێشتر یێ هەلبژارتیێ ئیراقێ و یانەیا هوڤێنهاین و مالمو بۆ ده‌زگه‌هێن ڕاگه‌هاندنێ هاتە نیشاندان.
د چارچووڤه‌یێ كۆنفرانسی دا ل دەستپێکێ عەمار فەرهاد سەرۆکێ یانه‌یا زاخۆ یا وەرزشی دیار کر لدووڤ وێ پلانا هاتیە دارێشتن ژلایێ دەستەیا کارگێریا یانەیێ ڤه‌ و دەستەکا راهێنەرێن تیما فوتبۆلێ ئه‌وا پشكدا د خولا ستێرێن ئیراقێ دا، ل هندەک جهان مە کێماسی هەبوون لەوما هەرزوو مە دەست ب دانوستاندنان کر بۆ چارەسەرکرنا وان جهان و ژیلوان حەمەد ئێک ژ وان یاریزانان بوو یێ دناڤ پلانا مە دا، ڤی یاریزانی سەربۆرەکا گەلەک باش هەیە دگەل هەلبژارتیێ ئیراقێ و یانەیێن ئۆرۆپا دا و پشکداری ل سەر ئاستێ یانەیێن مەزن دا کریە و هاتنا وی دێ شێت خزمەتەکا باش بۆ ڤێ یانەیێ کەت و وی ب خوە ژی دڤێت دناڤ یانەیا زاخۆ دا ئاستەکێ باشتر پێشکێش بکەت، د نوکە دا ل هەمی جهان مە یاریزانێن باش هەنە و یانەیا زاخۆ دێ شێت ب ئاستەکێ باشتر خوە دیار بکەت.
ژلایێ خوە یاریزانێ نوو یێ یانه‌یا زاخۆ ژیلوان حەمەد گۆت: گەلەک یانەیێن ئێراقێ پەیوەندی ب من کرن داکو رازی بم ب گرێبەستا وان لێ دڤی دەمی دا من دڤیا یاریێ بۆ یانەیا زاخۆ بکەم ژبەر هەبوونا ڤێ کارگێریا خودان شیان و جەماوەرێ وێ یێ مەزن و تیما وان یا رێک و پێک،د نوکە دا دلخوەشم ئەز دگەل ڤێ یانەیێ و دێ هەمی شیانان مەزێخم داکو بشێم خزمەتا ڤێ یانەیێ بکەم و ببینە تیمەکا ب هەڤرک ل سەر ناسناڤێ خولێ، ئەم ب حەماسم بۆ ئەنجامدانا ئێکەم یاری ب درێسێ یانەیا زاخۆ و دەمێن خوەش دێ ل پێشیا مە بن و پێدڤیە جەماوەرێ زاخۆ باشتر پشتەڤانیا ڤێ تیمێ بکەن ژبەرکو زاخۆ تیمەکا مەزن و رێک و پێک هەیە.
بۆ زانین تیما زاخۆ ل رێزا چارێ سه‌ر لیستا خولا پلا ستێرێن ئیراقێ دهێت ب كۆمكرنا 29 خالان ژ هه‌شت سه‌ركه‌فتن، پێنج وه‌كهه‌ڤی و سێ خوساره‌تی هه‌نه‌ ئه‌وا تیما زه‌ورا ب 32 خالان سه‌رێ لیستێ دهێت، وه‌رزێ ئه‌ڤ ساله‌ پلانا زاخۆ هاتییه‌ ڕاگه‌هاندن كو هه‌ڤڕكییه‌ بۆ ڕێزێن پێشیێ.

د دووماهی خولەكا یاریێ‌ دا ستێرێ‌ یانەیا زاخۆ وو هەلبژارتیێ‌ ئیراقێ‌ موراد عەلی شیا تیما بەر ب سەركەفتنەكا دیرۆكی و دەربازبوون بەر ب چارگۆشەیا زێرین ببەت پشتی شیایی ب تۆماركرنا سێ‌ خالێن دووماهیێ‌ 3PTS تیما خوە بەر ب سەركەفتنەكا گرنگ بەرانبەر هەڤڕكا خوە یانەیا دیجلە ئەلجامعە ب 88 خالان بەرانبەر 86 خالان ژ چارچووڤەیێ‌ گەڕا 19ێ‌ و دووماهییا قۆناغا ئێكێ‌ یا خولا پیشەكارێن ئیراقێ‌ ئەوا ل ئێكشەمبییا بۆری ل هۆلا گرتییا بنگەهێ وەرزش و لاوێن زاخۆ هاتییە كرن.
ل دور ڤێ‌ یەكێ‌ جوتیار عەلی هاریكارێ‌ راهێنەرێ‌ یانەیا زاخۆ دیار كر ئەڤ سەركەفتنە گرنگترین ئەنجامێن وان بوو د خولێ‌ دا ژبەركو یا ڤەبر بوو ژبۆ دەستڤە ئینانا رێزێن پێشیێ‌ و چارگۆشەیا زێرین كو ئێكسەر تیم دەربازبتە قۆناغا دویێ‌ بێ‌ چو كارتیكرن ل سەر ئەنجامێ وێ بكەت، سۆپاسییا جەماوەرێ‌ خوە یێ‌ دلسۆز دكەین كو هژمارە ئێك بوون دناڤ یاریگەهێ‌ دا و ئەگەرێن بلندكرنا مۆرالا یاریزانان بوو و بەر ب سەركەفتنان دبەین.
بۆ زانین تیما یانەیا زاخۆ پێشڤە هاتە ڕێزا چارێ‌ ب كۆمكرنا 29 خالان، ئەوا یانەیا دیفاع ئەلجەوی سەرێ‌ لیستێ‌ دهێت ب35 خالان، دیجلە ئەلجامعە ب32 خالان رێزا دویێ‌ و ئەلشورتە ب30 خالان رێزا سێیێ‌ دهێت.

پشتی ب فەرمی هاتییە ڕاگەهاندن كۆمەكا یاریزانێن تیما فوتبۆلا یانەیا سێمێلێ‌ هێلاینە، یانە هاتە دەنگ و دیار كر ئەو دێ‌ بزاڤێن چارەسەركرنا ئەوێ‌ ئاریشەیێ‌ كەن و ب هیچ ڕەنگەكی خوە ژ خولا پلا ئێكا كوردستانێ‌ نا ڤەكێشن.
د داخویانییا خوە دا پەروەر حسێن جێگرێ‌ سەرۆك یانەیا سێمێلێ‌ ئەڤچەندە پشتراست كر و گۆت: پشتی نەدانا مووچەیێ‌ یاریزانێن مە یێن فوتبۆلێ‌ بۆ ماوەیێ‌ سێ‌ مەهان هەتا نەهـ یاریزانان یێن پیشەكار و دەرڤەیی باژێرێ‌ سێمێلێ‌ بایكۆت ڕاگەهاند بوو و هندەك ژ وانا نڤێسارێن دەست ژ بەردانا خوە ژ تیمێ‌ وەرگرتبوون ل دووڤ داخوازییا وان ئەڤچەندە ژی بوو ئەگەر كارتیكرن ل سەر پێكهاتیێ‌ تیما مە بكەت، سەرباری داخوازییا مە ژبۆ مانا وان و بهنفرەهـبن، ژبەركو حوكمەتا هەرێما كوردستانێ‌ بڕیارا مەزاختنا پارەیی پێدڤی بۆ تیمێ‌ دایە بتنێ‌ رێكارێن كێم ماینە و دێ‌ ئەو كۆژمەیێ‌ پشتەڤانیێ‌ بۆ مە هێتە دان، لێ‌ بزاڤێن مە بێ‌ مفا بوون و مە دەستبەردارییا وان دایە ڤێ‌.
ژلایەكێ‌ دووڤە ناڤهاتی ڕەدكر ئەو خوە ژ خولێ‌ ڤەكێشن لێ‌ ئارمانجا وان هاتییە گوهۆڕین و گۆت: ب هیچ ڕەنگەكی ئەم خوە ژ خولا كوردستانێ‌ نا ڤەكێشین خوە هەكە، دێ‌ بزاڤێ‌ كەین یاریزانێن گەنج ل سەر تیمێ‌ زێدەبكەین، لێ‌ ژبەركو كاودانێن دارایی د باش نینن و چوونا كۆمەكا یاریزانێن پیشەكار و خودان شیان یێن دەرڤەیی سێمێلێ‌، ئەم نەچارین پلانا خوە ژ هەڤڕكیێ‌ بۆ پلێتا دەربازبوونێ‌ بەر ب پلا نایاب بۆ بزاڤێن مانا خوە د خولێ‌ دا پارێزین، لێ‌ بۆ هەر یارییەكێ‌ ژی دێ‌ شەڕی بۆ سەركەفتنێ‌ كەین.
جێگرێ‌ سەرۆكێ‌ یانەیا سێمێلێ‌ هیڤی خواست جەماوەرێ‌ وەرزشی ژی یێ‌ یانەیێ‌ دگەل یانەیێ‌ هاریكاربن و بەردەوام پشتەڤانییا تیما خوە بكەن و گۆت: یانەیا سێمێل ب جەماوەرێ‌ خوە یا سەربلندە كو د خوەشی و نەخوەشیان دا پشتەڤان بووینە، وەكو كارگێری ژی یا د شیان دا بیت دێ‌ بەردەوام بزاڤێ‌ كەین ژبۆ پێشئێخستنا ئاستێ‌ وەرزشا یانەیێ‌ و پشتەڤانییا كوڕێن باژێرێ‌ خوە.
ل دووڤ پەیچێ‌ فەرمی یێ‌ یانەیا سێمێلێ‌ هەر ئێك ژ یاریزانان شێرزاد ئەحمەد، كاروان لوقمان، دلشاد ئیسماعیل، محەمەد یەعقوب، ئیبراهیم فەهمی، رەعەد محەمەد و یێ‌ نێجیری حەیز ولاوالی نڤێسارێن خوە یێن دەست بەردانێ‌ برینە و یانە هێلاینە پێخەمەت گرێبەست دگەل چەند یانەیێن دی.
بۆ زانین تیما یانەیا سێمێلێ‌ ب ئەنجامدانا حەفت یارییان 11 خال كۆمكرینە ژ سێ‌ سەركەفتن، دو وەكهەڤی و دو خوسارەتی هەنە ئەوا یانەیا هەلۆ ب كۆمكرنا 16 خالان سەرێ‌ لیستێ‌ دهێت.

ڕاپۆرتێن رۆژنامەڤانی ل ئۆرۆپا گرنگیەكا زێدە دایە بابەتێ‌ ستێرا بایرن میۆنخ جۆاشۆ كیمێچ، پشتی هەردو یانەیێن ریال مەدرید یا ئسپانی و لیڤەرپۆل یا ئنگلتەرایێ‌ ب رژدی هاتینە دناڤ دانۆستاندنان دا و دخوازن یاریزانێ‌ بایرنێ‌ ڕازیكەن ژبۆ ئیمزاكرنا گرێبەستێ‌ و هەر ئێك ژ لایێ‌ خوەڤە شەڕی بۆ دەستڤە ئینانا وی دكەت.
رۆژنامەیا CaughtOffsidیا ئەلمانی دیاركر جواشۆ كیمێچ گرێبەستا خوە دگەل یانەیا بایرنێ‌ نوو نەكرییە ئەوا بڕیارە ل هاڤینا ئەڤ سالە ب دووماهی بهێت، ئەڤچەندە دەڕگەهـ بۆ هەردو یانەیێن ریال مەدرید و لیڤەرپۆل ڤەكرییە و بزاڤێن ڕژد دكەن كو یاریزان رازیبیت ل سەر گرێبەستا وان لێ‌ هێتشا چ بڕیارێن فەرمی نەدایە.
ژلایەكێ‌ دووڤە رۆژنامەڤانێ‌ بەرنیاس فابرێزیۆ رۆمانۆ دۆپاتی ل سەر هەبوونا بزاڤێن مەزن دناڤبەرا هەردو یانەیێن ریال و لیڤەرپۆل لێ‌ پێشبینی دهێتە كرن دووماهیێ‌ كیمێچ گرێبەستا خوە نووبكەت و گیرۆبوونا بەرسڤێ‌ ژی ب هەبوونا دانۆستاندنێن نووكرنا گرێبەستێ‌ ڤە گرێدایە لێ‌ دوور نینە ئێك ژ یانەیێن دیاركری كیمێچی ب دەستخوەڤە بینت.