دۆڤچوون: قەیس وەیس

هەر پێنج یانەیێن كوردستانی گەڕا دویێ ژ خولا ستێرێن ئیراقێ‌ یا فوتبۆلێ‌ بێ‌ سەركەڤتن ب دووماهی ئینان ئەوێن ب وەكهەڤی دو وەكهەڤی و سێ‌ خوسارەتی د تۆمارا پشكدارییا خوە یا خولێ‌ دا نڤێسایی و جەماوەرێ‌ خوە بێ هیڤی كرین.
دهۆك بۆ یارییا دویێ سەرنەكەفت
تیما یانەیا دهۆك بەردەوامی دا وەكهەڤیێن خوە د خولێ‌ دا پشتی بۆ یارییا دویێ ل دووڤ ئێك ب ئەنجامێ‌ وەكهەڤی دناڤ ئەرد و یاریگەها خوە دا دەركەڤیت، د یارییا ئێكێ‌ دا بەرانبەر ئەلغراف ب گۆلەكێ‌ وەكهەڤبوو، د یارییا دویێ دا ئەو شەڤا دەربازبوویا شەمبیێ بەرانبەر تەلەبە ژی وەكهەڤی ئینا ب سێ‌ گۆلان، گۆلێن دهۆكێ‌ ژلایێ یاریزانان سەفا هادی د خولەكا هەشتێ‌ و یونس حەموود دخولەكا 40 و 49ێ‌ دا، یارییا بهێت یا دهۆكییان دێ‌ ل رۆژا چارشەمبییا بهێت بەرانبەر یانەیا نەفت ل پایتەختێ‌ ئیراقێ‌ بەغدا بیت..
زاخۆ خوسارەتی دا و چاڤ ل قەرەبوویێ یە
تیما یانەیا زاخۆ دەست ڤالان ژ باژێرێ‌ بەسرا ڤەگەریا ئەوا بەرانبەر یانەیا مینا ب دو گۆلان بەرانبەر گۆلەكێ‌ تووشی خوسارەتیێ بووین، گۆلا ئێكانە یا زاخۆیان ژلایێ پیشەكارێ‌ وێ‌ ئۆرینۆ هاتبوو تۆماركرن، یارییا بهێت ژ گەڕا سێیێ یا تیما زاخۆ دێ‌ سوبەهی رۆژا سێشەمبی یانەیا دیالا ل یاریگەها یانەیا دهۆكێ‌ مێڤان كەت و چاڤێ‌ وێ‌ ل قەرەبوویا خالێن گەڕا دویێ یە.
هەولێریان درووشمێ‌ هەڤڕكیێ بلندكرییە
تیما یانەیا هەولێر ئەوا د یارییا گەڕا دویێ دا دو خالێن گرنگ د خولەكا 90+3 د خال بەرانبەر مێڤانا خوە یانەیا جەوییە یا بەغدایی ژ دەستدایین، د نوكە دا خودانا چار خالایە سەرێ‌ لیستێ‌ دهێت و دروشمێ‌ هەڤڕكی بۆ ڕێزبەندیێ بلندكرییە، یارییا گەڕا سێیێ‌ دێ‌ بەرانبەر یانەیا كەرخ یا بەغدایی ل باژێرێ‌ بەغدا بیت ئەوا دێ‌ سوبەهی سێشەمبیێ هێتە كرن.
نەورۆز پێدڤی ب سەركەڤتنێ‌ یە
تیما یانەیا نەورۆز ئەوا د دو یاریێن بۆری دا بتنێ‌ ئێك خال هەیی ئەوژی د گەڕا ئێكێ‌ دابوو بەرانبەر جەوییە، یارییا گەڕا دویێ بەرانبەر ئەلغراف تووشی خوسارەتیێ بوو، بڕیارە ل چارشەمبییا بهێت ل پایتەختێ‌ ئیراقێ‌ بەغدا ببیتە مێڤانا یانەیا تەلەبە د یارییەكا دی یا بهێز دا، تیما نەورۆز پێدڤی ب سەركەڤتنێ‌ هەیە بۆ ڤەگەڕاندنا هەڤڕكیێ.
د داخویانیەكێ‌ دا سەعەد حافز شرۆڤەكارێ‌ وەرزشی و دیار دناڤا خولا ستێرێن ئیراقێ‌ دا گۆت: ئەنجامێن گەڕا دویێ سەرنجراكێش بوون خوسارەتییا شورتە بەرانبەر گەرمە، وەكهەڤییا زەورا بەرانبەر كەربەلا، جەولان بەرانبەر كەرخ، ژلایەكێ‌ دووڤە یاریێن بهێز دهۆك و تەلەبە، هەولێر و جەوییە، ئەڤە نیشانە كو خولا ستێرێن ئیراقێ‌ دەستپێكەكا بهێز یا هاتیە دیتن، سەرباری هێشتا زوویە بۆ هەلسەنگاندنا ئاستێ‌ هونەری و تەكتیكی یێ یانەیان د خولێ‌ دا ژبەركو بتنێ‌ دو گەڕ چووینە لێ‌ پێشبینییا مە ئەوە كو هەڤڕكییەكا ب هێز دهێتە كرن بۆ سەركەڤتنان، ئەنجامێن سوپرایز و نە چاڤەڕێ‌ كری سرۆشتییە د دەستپێكا خولێ‌ دا، هیڤییا مە ئەوە یاری بۆ یاری باشتر بینن.
یاریێن گەڕا سێیێ‌ دێ‌ بڤی شێوەیی بن.
یاریێن رۆژا سێشەمبی 25- 8-2026
كەرخ- هەولێر، یاریگەها شەرار حەیدەر، دەمژمێر 6:30 مەغرەب.
زاخۆ- دیالا، یاریگەها دهۆكێ‌، دەمژمێر 6:45 مەغرەب.
جەولان- شورتە، یاریگەها جەولان، دەمژمێژ 6:45 مەغرەب.
زەورا- نەفت میسان، یاریگەها زەورا، دەمژمێر نەهی شەڤ.
یاریێن رۆژا چارشەمبی 26-8-2026
نەفت- دهۆك، یاریگەها شەرار حەیدەر، دەمژمێر 6:30 مەغرەب.
كارەبا- ئەلگەرمە، یاریكەها زەورا، دەمژمێر 6:45 مەغرەب.
مینا- ئەلغراف، یاریگەها فەیحا، دەمژمێر نەهی شەڤ.
مووسل- كەربەلا، یاریگەها شەهید فرانسۆ حەریری، دەمژمێر نەهی شەڤ.
تەلەبە- نەورۆز، یاریگەها شەرار حەیدەر، دەمژمێر 9:45 شەڤ.

تیما باسكێت بۆلا یانەیا زاخۆ ناسناڤێ‌ خولا ئیراقێ‌ یا پیشەكاران ژ دەستدا پشتی ژ سەرجەمێ‌ چار یارییان تووشی سێ‌ خوسارەتیان بوو بەرانبەر یانەیا دیفاع ئەلجەوی یا بەغدایی ئەوا شیایی بۆ سالا دویێ ل دووڤ ئێك ناسناڤێ‌ خولێ‌ ب دەستڤە بینیت، د چارچووڤەیێ زنجیرەیا قووناغا فینالا خولێ‌ هاتیە كرن.
گشت ئەنجامێن فینالێ‌ چەوابوون.
ل دووڤ ڕێنمایێن خولێ‌ هەردو یانەیێن دگەهنە فینالێ‌ دێ‌ پێنج یاریان كەن ژبۆ ئێكلاكرنا ناسناڤێ‌ خولێ‌، ئەو یانەیا زێدەتر سەركەڤتنان بنیت دێ‌ بیتە قارەمان، یانەیا دیفاع ئەلجەوی هەلگرا ناسناڤێ‌ وەرزێ‌ بۆری شیا سێ‌ سەركەڤتنان بەرانبەر سەركەڤتنەكێ‌ بۆ زاخۆ ب دەستڤە بینیت ئانكو پێدڤی ب یارییا پێنجێ‌ نە كر و ئەنجامێن وان بڤی شێوەیی بوون.
د یارییا ئێكێ‌ دا تیما زاخۆ تووشی خوسارەتیێ بوو ب 70 خالان بەرانبەر 73ێ‌ خالان.
د یارییا دویێ دا ئەوا ل یاریگەها زاخۆ هاتیە كرن تووشی خوسارەتییا دویێ بوو ب 76 خالان بەرانبەر 86 خالان.
دیارییا سێیێ‌ دا زاخۆ ڤەگەڕیا هەڤڕكیێ و گەشكرنا هیڤییان ب ئەنجامێ‌ 90 خالان بەرانبەر 78 خالان سەركەڤتن ئینا.
د یارییا چارێ‌ دا ئەوا ل زاخۆ هاتییە كرن یانەیا دیفاع ئەلجوی ناسناڤی بۆ خوە ئێكلاكر و ب سەركەڤت 80 خالان بەرانبەر 77 خالان.
یاریزانێ‌ زاخۆ بۆ باشترین تۆماركەر
د ئاهنگا دانا خەلاتان ل سەر هەردو یانە و چەند یاریزانان، فدراسیۆنا باسكێت بۆلا ئیراقێ‌ ب فەرمی كوڕێ‌ پارێزگەها دهۆكێ‌ فەرید رەعدی یاریزانێ‌ یانەیا زاخۆ وەكو باشترین یاریزانێ‌ تۆمار كر Three-Point دەستنیشان كر و خەلاتێ‌ وەرزێ‌ 2025-2026 یێ‌ خولێ‌ پێشكێشی وی كر.
ل دۆر ڤێ‌ یەكێ‌ محەمەد رەحیم سەرۆكێ‌ فدراسیۆنا باسكێت بۆلا ئیراقێ‌ ب وەكالەت پیرۆزباهی ل هەردو یانەیان كر و گۆت: نە بتنێ‌ یانەیا دیفاع ئەلجەوی قارەمان بوو بەلكو یانەیا زاخۆ ژی قارەمان بوو، ژبەركو هەردو یانەیان باشترین ئاست و هەڤڕكی نیشان دا، پیرۆزباهییێ ل هەردو یانەیان دكەین، یا پێ كەیفخوەش بووین ڤەگەڕیانا گیانێ‌ وەرزشا باسكێت بۆلێ‌ بوو تایبەت ل یاریگەها زاخۆ كو براستی ژی دیاركرن ئەو نەمبەر وەنن، دەستخووشیێ ل بەرپرسێن وەرزشی ل كوردستانێ‌ و ئیدارا سەربەخوەیا زاخۆ دكەین كو هەڤكار و پشتەڤانێن مە بووینە، پێنەڤێت زاخۆ ڕێزا دویێ ئینا دێ‌ نوونەراتییا ئیراقێ‌ د قارەمانییەكا دەرڤە دا كەت، چو رۆژئاڤا ئاسیا یان عەرەبی، ژلایێ خوە یانەیا دیفاع ئەلجەوی دێ‌ ل كۆپا ئاسیا پشكداربیت.
ژلایێ خوەڤە فەرید رەعد خودانێ‌ خەلاتێ‌ باشترین تۆماركر و یاریزانێ‌ یانەیا زاخۆ گۆت: پیرۆزبیت ل یانەیا دیفاع ئەلجەوی، و پیرۆزە ل یانەیا مە ژی ڕێزا دویێ ب دەستڤە ئینایی، وەرزەكێ‌ ب هێز و زەحمەت بوو، سەرباری مە ناسناڤ د ڤیا لێ‌ ڕێزا دویێ ژی دەستكەڤتەكێ‌ نوویە و ب سانەهی نەبوویە هەتا ب گەهینە ڤێ‌ قووناغێ‌، سۆپاسییا كارگێرییا یانەیێ و جەماوەرێ‌ زاخۆ دكەین كو بەردەوام پشتەڤانێن مەبوون و ئەگەرێن دەربازبوونێ‌ بۆ فینالێ‌، هەتا دووماهی چركە مە شەرێ‌ سەركەفتنێ‌ دكر لێ‌ ئەڤە یارییە دهندەك چركەیان دا چەنس ناهێت، بۆ وەرزێ‌ بهێت و قارەمانیا دەرڤە گەشبینن دێ‌ باشتر ڤەگەرین و دوبارە شەڕی بۆ ناسناڤی كەین هەتا ب گەهینی.

ب شێوەیەکێ فەرمی دەستەیا گشتی کارگێرییا یانەیێ بۆ چار سالێن داهاتی ب ڕێیا هەلبژارتنان دەستنیشانکر ئەوا ژلایێ لژنەیەکا هەڤشک ژ ڕێڤەبەرییا گشتی یا وەرزشی ل هەرێما کوردستانێ و ڕێڤەبەریا وەرزشی ل پارێزگەها دهۆکێ ل هۆلا تایبەت ل ناحیا تەناهی هاتیە کرن.
جەمال سلێمان ڕێڤەبەرێ وەرزشی ل پارێزگەها دهۆکێ بۆ ئەڤرۆ گۆت: ل دووڤ بەرنامەیێ تایبەت ب هەلبژارتنێن یانەیێن کوردستانی ڤە دوهی هەلبژارتنێن یانەیا تەناهی ب شێوەیەکێ ئازادی وئارام ب ڕێڤەچوو، پشتی پرۆسەیا دەنگدانێ و ڤاڤارتنا ئەوان دەنگان ب دووماهی هاتی هەر ئێک ژ دیار مەهدی محەمەد بوو سەرۆک یانە، هەلکەت عسمەت سالح – جێگر، نێروە عوسمان حەسەن- سکرتێر، نێچیرڤان تەمەر محەمەد- ئەندام- دارایی، دیسان هەرئێک ژ ڕێوار ئیدریس،سەردار عوبەید ئیبراهیم، چیا شکری محەمەد، ریزا بەهرۆز محەمەد، رەیان کاوە سەلاح بوونە ئەندام.
ناڤهاتی گۆت ژی: گەرمترین پیرۆزباهییان ئاراستەی دەستەیا نوو دکەین هیڤیدارین د ئەرک و بەرپرسیارەتییا خوە دا بۆ چوار سالێن داهاتی یێن کارکرنێ سەرکەفتی و سەربلند بن د پێشئێخستنا ئاستێ وەرزشا یانەیێ.
بۆ زانین ل سەر ئاستێ پارێزگەها دهۆکێ ١٨ یانەیێن وەرزشی ل سنۆرێ پارێزگەها دهۆکێ هەنە، هەموو یانەیان ل سالا بۆری هەلبژارتنێن خوە ئەنجامداینە، دهێتە چاڤەرێ کرن یانەیا گارە و شێلادزێ ژی ل دەمەکێ نێزیک دا دەست ب هەلبژارتنێن خوە بکەن، هەربۆزانین یانەیا زاخۆ ژی هەتا نوکە کارگێرییا یانەیێ بەروەختە و دهێتە پێشبینیکرن ڕێڤەبەرییا گشتی یا وەرزشی ل هەرێما کوردستانێ ژڤانەکی بۆ هەلبژارتنێن وان ژی ب دانیت.

دپرێس كۆنفرانسەكێ‌ رۆژنامەڤانی دا یێ ئیرانی یەحیا گول محەمەد ڕاهێنەرێ‌ یانەیا دهۆكێ‌ ژ ئەنجامێ‌ یارییا تیما وی بەرانبەر یانەیا تەلەبە یێ ڕازییە ئەوا ژ چارچووڤەیێ گەڕا دویێ یا خولا ستێرێن ئیراقێ‌ هاتیە كرن تێدا تیما وی ب سێ‌ گۆلان بەرانبەر مێڤانا خوە تەلەبە وەكهەڤ بووی.
زێدەتر ناڤهاتی گۆت: یارییەكا جوان هاتە كرن و ئەوێن ئامادەبوویی خوەشی ژێ دیت، لێ‌ مخابن شاشییێن هێلا بەرەڤانیێ ئەگەرێن وەكهەڤیێ بوو، هەرچەندە مە ژی مفا ژ شاشییێن هێلا بەرەڤانییا تەلەبە وەرگرت، د نیڤا دویێ دا ئەو ئاستێ‌ وەكو نیڤا ئێكێ‌ دا دیار نەبوو، خالەك بەرانبەر یانەیەكا وەكو تەلەبە بەربژارەكا ب هێز بۆ ناسناڤی دبیتە ئەنجامەكێ‌ باش.
ژلایەكێ‌ دووڤە گۆت: سۆپاسییا پشتەڤانیێن دهۆكێ‌ دكەین كو ل یاریگەهێ‌ بەرهەڤبووین و پشتەڤانییەكا مەزن ل یانەیا خۆ دكەن، هەروەسان سۆپاس بۆ یاریزانێن مە كو پلانێن مە ب جهئینا سەرباری چەند شاشییێن پەیدابووین لێ‌ دڤێت ئەم ڕژدبین و بەردەوامبین بۆ باشتر.
ژلایێ‌ خوەڤە یێ ئیرانی عەلی مەنسوریا گۆت: یارییەكا جوان هاتە كرن و ب هەڤڕكی بوو، یا سەرنجراكێش بۆ من ئەو جەماوەرێ‌ ئێكجار مەزن ل یاریگەهێ‌ بەرهەڤبووین كو ئەوان ڕەوشەكا ئێكجار مەزن دا یاریگەهێ‌، یانەیا دهۆك جهێ‌ ڕێزگرتنێ‌ یە و تیمەكا ب هێزە و خودان شیانە، ئەم نێزیكی سەركەڤتنێ‌ بووین لێ‌ لەزاتی و شاشییا یاریزانان ژ دو خالان بێ‌ بەهركرین.