دیدار، سالار محەمەد دۆسكی:

2 – 5

هەمان زیندانیێ‌ سیاسی و پێشمەرگەیێ‌ گولانێ‌ گۆت:  دەمێ‌  سەركردایەتی یا بەروەخت هاتیەدانان و دامەزراندن وی دەمی پسمامێ‌ منێ‌ خودێ‌ ژێ‌ رازی (فەخری) خواست بچنە گوندێ‌ گەلناسكێ‌، و گۆت سەركردایەتی یا بەروەخت هاتیە وێ‌ دەڤەرێ‌ و سادق گەلناسكی وی دەمی برایێ‌ عیسا وێرێ‌ بوو و ئەم ب شەڤ چووین گوندێ‌ گەلناسكێ‌ وی دەمی پێشمەرگە گەلەك یێ‌ كێم بوو و ئەم زڤرینە مال ڤە و گۆتنە مە دەنگی ژێ‌ نەهینن ژ بەر حوكمەتێ‌ و ئەڤە دەسپێكەك بوو بۆ چوونا من بۆ ناڤ حزبێ‌، دوڤدا هاتمە رێكخستن و ناڤێ‌ شانا مە (شەمال) بوو و رێكخستیێن من ل گوندێ‌ بێسرێ‌ (عەبدولكەریم رەئووف) بوو  و (سەعید یونس) و ل دهۆك ژی ( عەباس عومەر كەمەكی و مەجید بۆتی) و ب تەرەكتورێ‌ مە كەل و پەل دگەهاندە پێشمەرگە ب رێكا (محەمەد سالح بۆتی و فەریق فاروق)، پشتی دەمەكی من پیكەمەك كری وەك رێكخستی هاتمە ڤەگوهاستن ل گەل (محەمەد سالح بۆتی) هایداركرم كو مە رێكخستیەك هەیە ل مویسل خودانێ‌ عەلوەكا فێقی یە، و گۆتن كاغەزەكێ‌ بدەڤێ‌ و باوەری یا خوە پێ‌ بینە و ناڤێ‌ وی (یاسین شنگاری) بوو و جارەكێ‌ من سەرەدانەك بۆ كر وی خواست چەكەكی ب گەهینمێ‌ و گۆت سلاڤا ل (محەمەد سالح بۆتی) بكە و بێژێ‌ بوومن كلاشینكوفەكێ‌ چونكە گەلەكێن ئەمنێ‌ هەنە و گەلەك ئەزیەتێ‌ دگەهینە من و من گۆتێ‌ دێ‌ چەوا چەك گەهیتە دەستێ‌ تە ؟، گۆت بێژە پسمامێ‌ خوە من چەكەك ڤێت و من گەلەك پێدڤی پێ‌ هەیە، و پشتی ڤەگەریایمە دهۆكێ‌ و زڤریمە گوندی چوومە دەف (محەمەد سالح بۆتی) بابەت من بۆ شەرۆڤەكر و گۆت دێ‌ شێی چەكی گەهینیە مویسل؟، من گۆتێ‌ نوزانم دێ‌ چەوا گەهینم، (سەلامێ‌ روحانێ‌) ل گوندێ‌ گەرماڤا بوو وی گۆت ئەگەر بشێی ئەڤی بارێ‌ بیها بوومن بگەهیە مویسل حەسدكەم، من گۆتێ‌ بلا و (35) سندوقێن بیها ل پشتا گری من باركرن و شەهید (محەمەد سالح بۆتی) كلاشینكوفەكا ركێب پارچە پارچەكر و جارەكا دی مە سندوقێن خوە دانان و بابێ‌ منێ‌ خودێ‌ ژێ‌ رازی گۆت بۆچی هوون باری دانن، مە گۆتێ‌ مە خەلەت باركریە و مە چەكێ‌ خوە ب پارچە پارچەی كرە دناڤا سندوقەكێ‌ دا و مە دانا بنی و مە نیشان كر وی دەمی سالا 1984 بوو و حوكمەت گەلەك یا ئاریای بوو، و خەلكێ‌ دهۆكێ‌ باش دزانیت وی دەمی فیشەكەك حوكمەتێ‌ مرۆڤی دیتبا سێدارەدان بوو، ل بانگێ‌ سپێدێ‌ ب ترۆمبێلا خوە یا باركری هاتمە دەرێ‌ گەلیێ‌ دهۆكێ‌ و هەر پەیڤەكا عەرەبی ژی من نەزانی و بتنێ‌ من گۆتە ئێكی ب عەرەبی چ بێژنە بیها گۆت (سەفەرجە) پشتی گەهشتینە زالگەها گەلیێ‌ دهۆكێ‌ و پرسیار ژ من كر بۆ كیڤە من گۆتێ‌ مویسل گۆت هەرە، پشتی نێزیكی زالگەها مویسل بوویم كەفتمە دناڤا قەرەبالغەكا مەزن یا ترۆمبێلان دا و زنجیرا ترۆمبێلا گەلەك یا درێژ بوو و پشكنینەكا مەزن یا ترۆمبێلان یا دهێتەكرن،  و ئێدی ترومبێل كەفتنە پشت من و نەشێم بزڤرم ژی و نەچارم هێدی هێدی یی نێزیكی زالگەهێ‌ دبم و تاڤ شنی یا دەردكەڤیت و روح ژ قالبێ‌ من دەركەفت و گەهشتمە زالگەهێ‌ و پولیسەك هات ب زمانێ‌ عەرەبی گۆت ئەڤە چنە؟، ناڤێ‌ بیها ب عەرەبی ژ ترسا ژ بیرا من چوو و دەمەكی هاتە بیرا من و من ب عەرەبی گۆتێ‌ بیهن گۆت كیڤە چی؟، من گۆتێ‌ مویسل گۆت وەرە خوار، من گۆت ب قورئان ب دووماهی تات و ئەڤە دێ‌ من گرن، پائیزەكا درەنگە و دونیا گەلەك یا سارە و ژ ترسا خوه ب من دا هاتە خوار و رەنگ ل  من نەما و هات و چوو و ب زمانێ‌ عەرەبی گۆت دێ‌ هندەك بیها دەیە مە و ئەز تێناگەهم چ بێژیت، ئێكێ‌ خەلكێ‌ هەولێرێ‌ هات و گۆت ئەڤان هندەك بیه دڤێن من گۆتێ‌ بخوە سندوقەكێ‌ بەن، گۆت نەخێر لەگەنەك ئینا و من تژی بیه كرنێ‌ و هەر گۆت بەسە من هەر كرنێ‌ و چووم و چەندەكێ‌ ژ زالگەهێ‌ دەربازبووم، و من گۆت هزار جارا سوپاس بۆ خودێ‌ ئەڤ جارە ژی دەربازبووم، و پیچەكێ‌ بهانا من هات و نێزیكی (تلعەدس و منارە) بووم من قودیكا ترۆمبێلا خوە دا دیت ترۆمبێلەكا پری چەكدار یا ب گلوپێن خوە من ئاگەهدار دكەت، كو راوستە و ترۆمبێلا خوە ب دانە ئالیەكی و جارەكا دی هشم بووم و من گۆت خلاس دێ‌ سێدارە بیت، و راوستیام و من دیت هاتننە خوار و ب دەنگەكێ‌ بلند و بزمانێ‌ عەرەبی گۆتن ئەڤە چیە؟، من ب عەرەبی گۆتێ‌ بیهێن، داخوازا پلێتا سەندیكایێ‌ ژ من كر، وی دەمی ب دو دیناران دهاتە برین و ئەگەر تە بارەك بربا مویسل دڤێت ئەو كاغەز ل گەل تە هەبا و ژ ترسا من ئەو كاغەز نەبربوو، من گۆتێ‌ من ژ بیركریە و گۆت سوار بە و بزڤرە و من گۆتێ‌ بۆ خاترا خودێ‌ ئەڤ جارە ل من ببورن، و گۆت پا پێنچ دینارا بدەمە من گۆتێ‌ سەرچاڤا وی دەمی مە بار ب دەهـ دیناران برنە مویسل و پێنچ دینار گەلەك بوون، و گۆت سندوقەكا بیها ژی بدەمە و من گۆتێ‌ سەرچاڤا من سندوقەكا ژ هەمیان لاوتر دایێ‌ و بتنێ‌ دا بەلا خوە ژمن ڤەكەن، و چووم بەرەف مویسل و دەمێ‌ گەهشتیمە گورەپانا قەپانێن فێقی نێزیكی (50) خودانێن عەلوان خوە ل ترۆمبێلا من دا و هەر ئێكێ‌ خوە ل سندوقەكێ‌ دا و هندی یێ‌ چاڤ ل (یاسینی) دكەم نابینم و من گۆت نافرۆشم دو زەلامێن ئەمنێ‌ هاتن و گۆت پێلە بلا بخوە بەن، و دڤێت ب فرۆشی و ناڤ بەینەكێ‌ (یاسین) من دیت گۆت كا سندوق من گۆتێ‌ رێزا بنی و هەتا سەحكریێ‌ مە دیت ترۆمبێلا ڤالە بوو، و هەر چ بیه نەمان و خودانێن عەلوا هەر هەمی برن و سندوقا چەكی بەرزە بوو، و هەر دو زەلامێن ئەمنێ‌ ل هنداڤ سەرێ‌ منن و هەر (یاسین) گۆت كیشكە؟، ئەو پتر ترسیا و ئەم هەر دو ل سندوقێ‌ گەریاین و مە ئەم دوانەكێ‌ چووین مە نەدیت و چووینە ئێكا دی مە دیت، و مە گۆتێ‌ برا ئەڤە تایبەت بۆ مالا ئینای و مە گۆتە یێ‌ ئەمنێ‌ ئەڤە بۆ مالا وی یا ئینای نە بوو فرۆتنێ‌ یە و ب چ حالێ‌ هەی مە سندوقا خوە ژێ‌ وەرگرت، و مە برە ژوور ڤە مە سەحكرێ‌ كلاشینوف یا تێدا دا، وی گۆت مالا تە تە كوشتم ب ساخی من گۆتێ‌ پانێ‌ ژ دهۆكێ‌ وەرە هەتا نوكە حالێ‌ من ئەڤە یە، من هەمی بیهێن خوە فرۆتن و پارێ‌ خوە وەرگرتن و كەیفا یاسین نگالی گەلەك هات، و گۆت ئەڤە دەغمەكا تایرێن ترۆمبێلێ‌ ژی وەك دیاری بووتە و ڤەگەریامە دهۆكێ‌ خودێ‌ ژێ‌ رازی (محەمەد سالح بۆتی و برایێ‌ من عیسا) ل گوندی هەر دو چاڤەرێی هاتنا منن، چونكە چ ژمن نوزانن و گەلەك كەیفا وان هات، و راستی ترسەكا مەزن بوو  تو چەكی بڤێ‌ رێكێ‌ بگەهینیە مویسل، و سوپاس بۆ خودێ‌ ئەم ب سلامەتی چووین و هاتین.