دەوحە، قەیس وەیس:

پشتی ڤەقەتیانەكا درێژ بۆ ماوەیێ‌ دو مەهان بڕیارە ئەڤرۆ ل دەمژمێر 8:15 شەڤ تیما یانەیا دهۆك یارییا خوە ژ گەڕا پێنجێ‌ یا كۆما ئێكێ‌ كو دبیتە یارییا دویێ‌ ژ قۆناغا دویێ‌ یا قارەمانییا كۆپا كەنداڤی بۆ یانەیێن قارەمان یێن دەڤەرا كەنداڤی ل یاریگەها یانەیا دحێل ل وەلاتێ‌ قەتەر بیتە مێڤانا یانەیا ئەهلی سەنعا یا یەمەنی و بڕیارە ل 19ێ‌ ڤێ‌ مەهێ‌ یارییا خوە یا شەشێ‌ و دووماهیێ‌ ژ سیستەمێ‌ كۆما مێڤاندارییا زەفار یا عومانی بكەت ئەوا ئەڤرۆ دهەمان دەمدا یانەیا زەفار یا عومانی دێ‌ ل یاریگەها خوە مێڤاندارییا یانەیا نەسر یا ئیماراتی كەت.
سەركەفتنا ئەلهۆییان دێ‌ زێدەتر نێزیكی دەربازبوونێ‌ كەت
تیما یانەیا دهۆك نوونەرا ئێكانە یا ئیراقێ‌ و كوردستانێ‌ شیاییە د چار یاریێن بۆری ژ كۆما ئێكێ‌ دا سەركەفتنەكێ‌ بیمن بەرانبەر ئەهلی سەنعا و دو وەكهەڤییان دگەل نەسر و زەفار بینت لێ‌ د دووماهی یارییا خوە یا بەری دو مەهان دا كو دبیتە قۆناغا دویێ‌ بەرانبەر نەسر ب دو گۆلان بەرانبەر گۆلەكێ‌ تووشی خوسارەتیێ‌ بوو و د نوكە دا پێنج خال كۆمكریە ل رێزا دویێ‌ دهێت ئەوا نەسرا ئیماراتی ب10 خالان سەرێ‌ لیستێ‌ دهێت، زەفار ب چار خالان رێزا سێیێ‌ دهێت و ئەهلی سەنعا خودانا سێ‌ خالانە ل رێزا چارێ‌ دهێت، ئەلهۆیێن چیا دێ‌ بزاڤێ‌ كەن ب سەركەفتنا ئەڤرۆ زێدەتر خوە نێزكی دەربازبوونێ‌ بۆ قۆناغا چارێك دووماهیێ‌ و هەكە تیما زەفار دگەل نەسر خوسارەت بیت و دهۆك ب سەركەڤیت دێ‌ دەربازبوون مسۆگەر بیت، بۆ زانین د یارییا قۆناغا ئێكێ‌ دا ل یاریگەها خوە تیما دهۆكێ‌ ب دو گۆلان سەركەفتن ل سەر ئەهلی سەنعا ئینابوو.
كیش ئەلهۆیێن چیا پتر پشت بەستن ل سەر دهێتە كرن
ل دووڤ دووماهی لیستەیا تیما دهۆكێ‌ ئەوا وەكو شاند چووینە وەلاتێ‌ قەتر كو ژلایێ‌ ڕاهێنەرێ‌ تیمێ‌ مەسعۆد میرالی دێ‌ پشت گەرمیێ‌ ب كۆمەكا یاریزانێن خوە كەت تایبەت ئەوێن د یاریێن بۆری دا ئاستێن مەزن نیشان دایی و زێدەتر دێ‌ هزر د ڤان یاریزانان دا هێتە كرن پێكهاتینە ژ، گۆلپارێز، محەمەد سەلاح ئەوێ د سێ‌ یاریێن بۆری دا باشترین ئاست نیشان دایی و ئەسیست هەبووینە، هەروەسان بەرەڤانێن خوە بەیار ئەبۆبەكر، لۆكاس مۆسێس، سیابەند عەگید و مارلۆن كو بووینە دیوارێ‌ ب هێز یێن تیمێ‌، هەر دیسان هێلا ناڤین ب سەركێشییا ئەندازیارێ‌ دناڤ یاریگەهێ‌ دا هارون ئەحمەد، زانا عەلی، ئاكۆ، یانیك زاكێری و رۆبێن ئەكۆا، پێنەڤێت هێلا هێرشبرنێ‌ ژی هێزا كۆژەكە بۆ تیما بەرانبەر كو پێكهاتینە ژ پیتەر گۆرگیس و كەریم دەرویش كو دبیتە هێزەكا كۆم و خودان شیان دناڤا یاریگەهێ‌ دا.
كاپتنێ‌ تیمێ‌: یارییا ئەڤرۆ گەلەكا و دێ‌ مزگینیا سەركەفتنێ‌ دەینە پشتەڤانان
ل دۆر دووماهی بەرهەڤیێن تیما دهۆكێ‌ بەرانبەر ئەهلی سەنعا جاسم محەمەد حاجی سەرپەرشتێ‌ تیمێ‌ بۆ رۆژنامەیا ئەڤرۆ گۆت: پشتی ڤەقەتیانێ‌ و پشكدارییا تیما مە د خولا ستێرێن ئیراقێ‌ دا ئەڤرۆ مە یارییەكا ب هێز یا هەی و تا ڕادەیەكی یا چارەنڤیسە بۆ دەربازبوونێ‌، هەموو یاریزان بەرهەڤن و ئەم یێن هاتینە قەتەر بۆ سەركەفتنێ‌ و مزگینیێ‌ بدەینە پشتەڤانان، یا گرنگ ئەو یاریزانێن مە یێن كاریگەر ئەم شیان ل سەر تیمێ‌ زێدەكەین و ببنە هێزەك بۆ تیمێ‌، ل دووڤ پلانێن هاتینە دانان ڕاهێنەری هەموو بەرهەڤیێن خوە كرینە، ب هیڤییا وێ‌ یەكێ‌ د یارییا ئەڤرۆ دا بشێن یا پێدڤی یاریزان ئەنجامبدەین و مۆرالا وان یا بلندە بۆ سەركەفتنێ‌ و گەشبینن دێ‌ دلێ‌ پشتەڤانێن خوە ب ئەنجامەكێ‌ دلخوەشكەر كەیف خوەشكەین.
شرۆڤەكارەكێ‌ وەرزشی بۆچوونا خوە هەبوو
ژلایێ‌ خوەڤە وەحید رەشید شرۆڤەكارێ‌ وەرزشی ل پارێزگەها دهۆكێ‌ و ڕاهێنەرێ‌ بەرنیاس یێ‌ یارییا فوتبۆلێ‌ گۆت: د نوكە دا كاودانێن تیما دهۆكێ‌ د باش ب مۆرالەكا بلندن و دەرۆنەكێ‌ بەرهەڤ بۆ یاریێ یا هەی، ژبەركو ئاست و ئەنجامێن وێ‌ گەلەك د باشن د خولا ستێرێن ئیراقێ‌ دا، یا گرنگتر لێكتێگەهشتن دناڤبەرا یاریزانان دا یاهەیی، یارییەكا گرنگە و تا ڕادەیەكی یا چارەنڤیسە و پلێتا دویێ‌ یا دەربازبوونێ‌، دبیت تیما دهۆكێ‌ ئاستەنگێن هونەری و تەكتیكی بەرانبەر تیما هەڤڕك ببین لێ‌ دێ‌ هەموو بزاڤان كەت ڤێ‌ سەركەفتنێ‌ بینت ژبۆ گەشتكرن و دووڤدا دەربازبوون، یارییا ئەڤرۆ ژ دەرڤەیی یاریگەها خوە یە و دێ‌ شەڕێ‌ بۆ سێ‌ خالان كەت دا بشێن یارییا دووماهیێ‌ دناڤ ئەردێ‌ خوە دا دیارییەكا جوان بدەتە پشتەڤانێن خوە بەرانبەر یانەیا ئەهلی سەنعا، یا پێدڤی ل سەر یاریزانی د سەقایێ‌ یاریگەهێ‌ دابن و ئاگەهی ژ خوە هەبن گرنگ ئەوە دهۆك خوە بێ‌ ئۆمێد نەكەت و یاریزان ژی مەغرور نەبن هەتا دووماهی چركە نە هێلین چ گۆل بهێنە كرن ودبەرانبەر دا گۆلان تۆماربكەن، ئەم چاڤەرێ‌ سەركەفتنا تیما خوە ینە و مزگینییەكا دی یا سەركەفتنان بدەنە مە.
ئەهلی سەنعا دووماهی دەلیڤەیە
تیما یانەیا ئەهلی سەنعا سێ‌ خال كۆمكرینە و دێ‌ شەڕی بۆ سێ‌ خالان كەت ژبەركو سەركەفتن دێ‌ بیتە دەلیڤەكا باش بۆ پێشڤەچوونێ‌ و هیڤێن دەربازبوونێ‌، لەوما ژی تیمەكا ب سانەهی نابیت بەرانبەر دهۆكێ‌، راهێنەرێ‌ وێ‌ یێ‌ ئوردنی ئیبراهیم حلمی دێ‌ پشت گەرمیێ‌ بۆ كۆمەكا یاریزانێن خوە كەت ژ وانا وەحید ئەلخیات، عەبدولفازل سۆانۆن، یۆسف ئەلحیمی و حەمزە مەحروس و وەرد سەلامە، د دووماهی داخویانیا خوە دا دیاركرییە ئەو دێ‌ بۆ سەركەفتنێ‌ یاریێ‌ كەن و گەشبینن و یارییا ئەڤرۆ دووماهی دەلیڤەیە بۆ هیڤیێن دەربازبوونێ‌.
پشتەڤانەكێ‌ دهۆكێ‌: مە باوەری ب تیما خوە هەیە دێ‌ سەركەڤن
ژلایێ‌ خوەڤە مشیر شەریف ئێك ژ پشتەڤانێن هەرە بەرچاڤ یێن یانەیا دهۆكێ‌ گەشبینییا خوە دیاركر تیما وان شیانێن هەین ژ ئاستەنگا ئەهلی سەنعا دەربازبن و گۆت: مە باوەری ب تیما خوە یا هەی كو دێ‌ سەركەفتنێ‌ ئینن و دەربازبوونێ‌ مسۆگەر كەین، هەرچەندە تیما مە ژ مە دوورە لێ‌ دلێ‌ مە دگەل دایە و چاڤەڕێ‌ یاریێ‌ نە ژبۆ پشتەڤانیێ‌ و مزگیینییا سەركەفتنێ‌، شانازیێ‌ ب تیما خوە دبەین كو د قارەمانیەكا دەرڤە دا یاریێ‌ دكەت و بیرەوەریێن بەری 12 سالا ڤەگەراندن دەمێ‌ د كۆپا ئێكەتییا ئاسیادا مە پشكداریێن مەزن هەبووینە.
شێوازێ‌ قارەمانیێ‌ و یانەیێن پشكدار
هەشت یانەیێن وەلاتێن كەنداڤی پشكداری قارەمانیێ‌ بووینە و هاتینە بەلاڤكرن ل سەر دو كۆمان، یاریێن وان ب شێوازێ‌ خول و سیستەمێ‌ دو قۆناغ دهێنە ئەنجامدان، دێ‌ یاریێن وان بەردەوامبن هەتا 25ێ‌ نیسانا بهێت كو دبیتە ژڤانێ‌ یارییا دووماهیێ‌.
كۆما ئێكێ‌ پێكهاتییە ژ: دهۆك، نەسر یا ئیماراتی، زەفار یا عومانی، ئەهلی سەنعا یا یەمەنی.
كۆما دویێ‌ پێكهاتییە ژ: عەرەبی یا قەتەری، ئیتفاق یا سعۆدیێ‌، ریفاع یا بەخرێنی، قادسییە یا كۆێتی.
پاداشت و خەلاتێن قارەمانیێ‌
بۆ زانین قارەمانا كۆپا كەنداڤی دێ‌ سێ‌ ملیۆن دۆلاران وەرگریت، خودانا رێزا دویێ‌ دێ‌ بیتە خودانا خەلاتێ‌ ئێك ملیۆن دۆلاران، باشترین یاریزانێ‌ كۆپا دێ‌ 50 هزار دۆلاران وەرگریت، باشترین گۆلپارێز دێ‌ خەلاتێ‌ 50 هزار دۆلاران وەرگریت، گۆلكەرێ‌ قارەمانیێ‌ ژی دێ‌ 50 هزار دۆلاران وەرگریت.
هەروەسان هەر یانەكا پشكدار دێ‌ سێ‌ هزار دۆلار بۆ هێنە مەزاختن وەكو پشتەڤانیەك، هەروەسان ئەو یانەیا دەربازبیتە قۆناغا پێش دووماهیێ‌- چارگۆشەیا زێرین- دێ‌ 100 هزار دۆلار بۆ هێنە دان، دیسان ئەو یانەیا گەشتەكێ‌ بەر ب وەلاتەكی بكەت بۆ ئەنجامدانا یارییا خوە ژ دەرڤەیی یاریگەها خوە دێ‌ 30 هزار دۆلار بۆ هێنە تەرخانكرن، دیسان بۆ هەر یانەیەكا سەركەفتنێ‌ بینت ژی 30 هزار دۆلار هاتینە دانان.

چاڤەڕێ‌ دهێتە كرن ئەڤرۆ چار یاریێن مایی ژ هەڤڕكیێن گەڕا 18ێ‌ و بەری دووماهییا قۆناغا ئێكێ‌ یا خولا ستێرێن ئیراقێ‌ یا فوتبۆلێ‌ بهێنە كرن، یانەیێن كوردستانی دێ‌ بەرانبەر یانەیێن بەغدایی و بەسرایی بن و یارییا دهۆك و تەلەبە هاتە پاشئێخستن.
زاخۆ ل بەغدایە و چاڤ ل سێ‌ خالانە
بڕیارە ئەڤرۆ ل دەمژمێر 2:30 پشتی نیڤرۆ تیما یانەیا زاخۆ ل یاریگەها ئەحمەد رازی ل پایتەختێ‌ ئیراقێ‌ بەغدا ببیتە مێڤانا یانەیا حدود د یارییەكا گرنگ دا بۆ كوڕێن خابوور ژبۆ پێشڤەچوونێ‌، زاخۆ خودانا 32 خالانە ل رێزا چارێ‌ دهێت ژ نەهـ سەركەفتن، پێنج وەكهەڤی و سێ‌ خوسارەتی هەنە، تیما مێڤاندار بتنێ‌ 10 خال كۆمكرینە رێزا 19ێ‌ و بەری دووماهیێ‌ دهێت، هەرچەندە وەكو رێزبەندی دبیت پێشبینییا سەركەفتنێ‌ بۆ زاخۆییان بیت لێ‌ ئەنجامێن وێ‌ یێن ڤێ‌ دووماهیێ‌ د هەردو یاریێن بۆری دا سەركەفت بوو ل سەر كارەبا و وەكهەڤی دگەل كەرخێ‌ ئینابوو، لەوما یارییا ئەڤرۆ بۆ كورێن خابووری ب سانەهی نابیت، لێ‌ داخویانییا سەرپەرشتێ‌ تیمێ‌ حەمید ئیسماعیل بۆ رۆژنامەیا ئەڤرۆ گەشبینی بۆ پشتەڤانێن زاخۆ پەیداكرییە كو یاریزان هەموو د بەرهەڤن ب مۆرالەكا بلند و دێ‌ شەڕی بۆ سەركەفتنێ‌ كەن پێخەمەت پاراستن و پێشڤەچوون بەر ب رێزبەندیێن باشتر.
گۆستاڤۆی گۆلكەرێ‌ تیمێ‌ یە
پشتی تۆماركرنا گۆلێن ڤێ‌ گەڕێ‌ هەردو ستێرێن یانەیا زاخۆ یێ‌ بەرازیلی گۆستاڤۆ هێنریك ب 10 گۆلان و یاریزانێ‌ هەلبژارتیێ‌ ئیراقێ‌ ئەمجەد عتوان ب تۆماركرنا نەهـ گۆلان ل رێزێن ئێكێ‌ و دویێ‌ ل سەر لیستا گۆلكەرێن تیما خوە دهێن، دیسان هەر ئێك، ناسر محەمەدو چار گۆل، هەر ئێك ژ ئەیۆب نناحی گۆلەك، محەمەد عەلی عەبۆد گۆلەك و موسێس گۆلەك، مەحمود فائیز گۆلەك تۆماركرینە كو سەرجەمێ‌ گۆلێن زاخۆ بووینە 27 گۆل د خولێ‌ دا.
هەولێر دێ‌ مێڤاندارییا جەوییە كەت و نەورۆز ل بەسرایە
پشتەڤانێن یانەیا هەولێر دەمژمێر 7:30 شەڤ چاڤەڕێ‌ دیدارا ئاگرین یا تیما خوەنە بەرانبەر یانەیا جەوییە د یارییەكا گرنگ و بهێز دا، كوڕێن كەلهە ومنارە رێزبەندییا شەشێ‌ نە ب28 خالان كود بینە خالێن هەشت سەركەفتن، چار وەكهەڤییان، جەوییە ب هەمان خالان لێ‌ رێزا حەفتێ‌ دهێت، ئانكو یارییەكا ئاگرینە، ژلایێ‌ خوەڤە یانەیا نەورۆز دێ‌ لدەمژمێر پێنجێ‌ ئێڤاری بیتە مێڤانا یانەیا مینا كو یارییەكا بسانەهی نابیت بۆ كوڕێن سلێمانیێ‌ ئەوێن 20 خال كۆمكرین ژ پێنج سەركەفتن و پێنج وەكهەڤییان رێزا 15ێ‌ دهێت، لێ‌ هەمان خال یێن مینایێ‌ نە رێزا 14ێ‌ دهێت، ئەڤ یارییە ژی ئاگرینە بۆ ڕێزبەندیێ‌.