پەیڤدارێ ئاکپارتیێ دیار دکەت، نها تورکیا کەفتیە د قۆناغەکا گەلەک گرنگ و چارەنڤیسساز دا، کار بۆ ئاشتیێ دهێتە کرن، ئەڤ نەورۆزە دێ کاریگەریا خوە ل هەموو دەڤەرێ کەت و دێ سەرۆک کۆمار ژی پشکداریێ د ئاهەنگا نەورۆزێ دا کەت.
عومەر چەلیک پەیڤدارێ ئاکپارتیێ د داخویانیەکێ دا بۆ دەزگەهێن راگەهاندنا تورکیا دیار کر، ب سالانە ژ بەر شەڕی زیانێن گەلەک مەزن گەهشتینە تورکیا، نها کار بۆ ئاشتیێ و نەمانا شەڕی دهێتە کرن، تورکیا دڤێت هەموو پرسێن خوە چارەسەر بکەت و ببیتە وەلاتەک هەر بهێز و کاریگەر ل رۆژهەلاتا ناڤین و گۆت: (بێگومان نها ل هەموو تورکیا بەرهەڤی بۆ جەژنا نەورۆزێ دهێنە کرن، نەورۆز جەژنا ئاشتیێ، براتیێ و پێکڤەژیانێ یە، ئەڤ نەورۆزە دێ گەلەک یا گرنگ بیت، چونکی دێ بیتە نەورۆزا ئاشتیێ و براتیێ، نها بەرهەڤیێن گەلەک باش ل هەموو تورکیا بۆ جەژنا نەورۆزێ دهێنە کرن و سەرۆک کۆمار رەجەب تەیب ئەردۆغان ژی دێ پشکداریێ د ئاهەنگا نەورۆزێ دا کەت و دێ پەیامێن گەلەک گرنگ دەتە خەلکێ تورکیا).
سەبارەت ب قۆناغا ئاشتیێ یا ل تورکیا ژی پەیڤدارێ ئاکپارتیێ دیار کر، هەموو وەلاتیێن تورکیا دخوازن ئێدی شەڕ و توندوتیژی نەمینیت، ژ بۆ ڤێ یەکێ ژی هەتا نها کارێن گەلەک باش هاتینە کرن و قۆناغەکا باش دەستپێکریە و وەکو ئاکپارتی مە دڤێت پەکەکە دەست ژ چەکی بەردەت و خوە هلوەشینیت دا ئێدی دووماهی ب توندوتیژیێ بهێت و گۆت: (بێگومان دەمێ چەک هاتنە دانان و پەکەکێ خوە هلوەشاند دێ زەمینە بۆ ئاشتیێ، چارەسەریێ و پێشڤەبرنا دیموکراسیێ ل تورکیا خوەش بیت، دەمێ توندوتیژی نەمینیت دێ هەموو پرسێن تورکیا هێنە چارەسەر کرن و دێ تورکیا بهێز کەڤیت، ژ بۆ ڤێ یەکێ ژی وەکو ئاکپارتی ئەم کار دکەین و دڤێت پەکەکە ژی د زووترین دەم دا خوە هلوەشینیت و دەست ژ چەکی ژی بەردەت).
عومەر چەلیک سەبارەت ب پەیوەندیێن تورکیا ل گەل ئەمریکا و وەلاتێن ئێکەتیا ئۆرۆپا ژی دیار کر، وان دڤێت پەیوەندیێن باش ل گەل ئەمریکا و ئێکەتیا ئۆرۆپا هەبن، هەموو وەلاتێن جیهانێ هەست ب رۆلێ گرنگ یێ تورکیا بۆ دەڤەرێ و جیهانێ کرینە، ژ بۆ ئاگربەستا ئۆکرانیایێ و چارەسەرکرنا پرسێن دی یێن دەڤەرێ ژی تورکیا رۆلەک گەلەک گرنگ دگێریت و ئەو یەک ژی نیشا ددەت تورکیا خودان پێگەهەک بهێزە.
ئەڤ نەورۆزە بۆ تورکیا گەلەک یا گرنگ و دیرۆکی یە
نيشاندان