قەیس وەیس:

چاڤەڕێ‌ دهێتە كرن ل دووماهییا ڤێ‌ حەفتیێ‌ هەڤڕكیێن وەرزێ‌ نوو یا قارەمانییا پایسكلڤانێن ئیراقێ‌ بۆ یانەیێن پلا نایاب ژ چارچووڤەیێ‌ قۆناغا ئێكێ‌ ل پایتەختێ‌ ئیراقێ‌ بەغدا بهێتە ئەنجامدان، ئەوا بڕیارە هەڤڕكی ل سەر ئاستێن پێشكەفتی، لاوان، تازەپێگەهشتی و كچان بیت، تیما لاوێن یانەیا دهۆك قارەمانا وەرزێ‌ 2023 دێ‌ پشكداربیت و هەڤڕكە بۆ پاراستنا ناسناڤێ‌ خوە.
ژبۆ زانینا دووماهی پێشهاتە و بەرهەڤیێن تیما دهۆكێ‌ د داخویانیەكێ‌ دا هشیار فەریق سەرپەرشتێ‌ تیمێ‌ بۆ رۆژنامەیا ئەڤرۆ گۆت: ل دووڤ بەرنامەیێ‌ قارەمانیێ‌ ئەوا دێ‌ ب چار گەڕان بیت بڕیارە ل 27ێ‌ ڤێ‌ مەهێ‌ دەست ب وەرزێ‌ نوو یا قارەمانییا ئیراقێ‌ بهێتە كرن، چاڤەڕێ‌ دهێتە كرن زێدەتری 35 یانەیێن وەرزشی ل سەر ئاستێن جودا یێن هەرێمێ‌ و ئیراقێ‌ پشكداربن، هەرچەندە تیما مە ل وەرزێ‌ بۆری سەر ئاستێ‌ تازەپێگەهشتییان شیابوون ناسناڤێ‌ قارەمانییا ئیراقێ‌ ب دەستڤە بینن پشتی د هەر چار قۆناغان دا رێزێن ئێكێ‌ هاتین، لێ‌ بۆ وەرزێ‌ ئەڤسالە ژیێ‌ یاریزانان بۆ ئاستێ‌ لاوان بلند بووینە لەوما ژی ئەم دێ‌ دۆبارە ب هەمان یاریزان لێ‌ دێ‌ بۆ ئاستێ‌ لاوان پشكداربن و ڕژدین بۆ پاراستنا ناسناڤێ‌ خوە.
هەروەسان ناڤهاتی كو هەمان دەمدا سەرۆكێ‌ لژنەیا دادڤانێن فدراسیۆنا ئیراقێ‌ یا پایسكلان گۆت: تیما پایسكلڤانێن دهۆكێ‌ دێ‌ ب سەرپەرشتییا ڕاهێنەرێ‌ خودان شیان تارق سەعید بیت كو ڕاهێنەرێ‌ هەلبژارتیێ‌ ئیراقێ‌ یە دگەل دا هەر شەش یاریزان بەرهەڤن ئەوێن ل وەرزێ‌ 2024ێ‌ ل سەر ئاستێ‌ تازەپێگەهشتییان ناسناڤێ‌ ئیراقێ‌ ب دەستڤە ئینایی ئەو ژی، یوسف جیهاد، محەمەد سادق نوری، ئیهاب عومەر، ئارام سەباح، ئاڤەند هشیار فەریق و عیسام عەلی، ڕاهێنانێن وان د نوكە دا توند تر لێهاتینە و بەرهەڤی گەهشتینە كۆپیتكێ‌ ب هیڤییا دەستڤە ئینانا رێزا ئێكێ‌ د قۆناغا ئێكێ‌ دا.
ژلایەكێ‌ دووڤە هشیار فەریق گۆت: كارگێرییا یانەیێ‌ هەر رۆژا ئێكێ‌ یا بەرهەڤییان ژبۆ پشتەڤانییا لاوێن تیما خوە یا پایسكلان بەردەوام بووینە، هەرچەندە دێ‌ وەرزێ‌ ئەڤ سالە هەڤڕكی دناڤبەرا یانەیان دا دژوارتر بیت ژبەركو پرانییا ئەوان یاریزانێن پشكدار خودان ئاست و شیان بووینە، لێ‌ ئەم ڕژدن ناسناڤێ‌ لاوان بۆ پارێزگەها دهۆكێ‌ بكەینە دیاری و گەشبینن ب هەبوونا كۆمەكا باش یا یاریزان و ڕاهێنەرێ‌ خودان شیان كو دێ‌ گەهینە ئارمانجا خوە.

عەلی حاجی:

د دیدارەکێ دا یاریزانەکێ کیگ بۆکسینگا یانه‌یا زاخۆ بۆ رۆژنامەیا ئەڤرۆ دیار کر بۆ وی شانازیە بشێت ناسناڤێ ئیراقێ ب پارێزت و وی ئارمانجێن مەزن هەنە بۆ داهاتی تایبه‌ت پشكدار د قاره‌مانیێن نێڤده‌وله‌تی دا.
زێدەتر سیداد سەگڤان گۆت: هه‌رچه‌نده‌ ل سالا 2024ێ ژی من شیا بوو پلا ئێکێ ل سەر ئاستێ ئیراقێ بۆ کێشەیا 54 کگم دا فۆل كۆنتاك ب دەستخوەڤە بینم لێ قاره‌مانییا حه‌فتییا بۆری پشكدارییه‌كا تایبه‌ت بوو و هه‌ڤڕكییه‌كا دژوار بوو بتنێ دناڤبه‌را باشترین یاریزانێن ئیراقێ و هه‌لبژارتیێ وێ دا هاتبوو كرن و ب ناڤێ قاره‌مانییا سۆپه‌ر هاتبوو ڕێكخستن ژبه‌ركو هه‌موو یاریزان ل سه‌ر ئاستێ ئیراقێ سۆپه‌ر بوون.
هه‌روه‌سان ناڤهاتی گۆت: به‌ری پشكداربم من به‌رهه‌ڤیێن باش كربوون ژبه‌ر كو قاره‌مانییه‌كا دژواتر بوو لێ من باوەرییەکا مەزن ب خوە هەبوو کو دێ شێم وی کاری ئەنجام دەم و من شیا ژی رێزا ئێكێ ل سەر یٔاستێ یٔیراقێ د قارەمانیا سوپەر دا ب دەستخوەڤە بینم وهه‌ر ئێكسه‌ر پلێتا هەلبژارتیێ ئیراقێ وه‌كو یاریزانێ سه‌ره‌كی وه‌ربگرم، من شیانێن باشتر هەنە کو دێ شێم دەستکەڤتیێن باش دگەل هەلبژارتیێ ئیراقێ ب دەستخوەڤە بینن ژبەرکو ڕاهێنەرەکێ گەلەک باش هەیە و چاڤدێریا ئاستێ من دکەت.
ناڤبری گۆت ژی: د نوکە دا ئەم کار دکه‌ین بۆ بلند کرنا ئاستێ خوە بۆ قارەمانیێن دەرڤە و من پێدڤی ب پشتەڤانیەکا باشتر هەیە هەر چەندە یانه‌یا زاخۆ پشتەڤانیەکا باش ل من دکەت.

چاڤەڕێ‌ دهێتە كرن ئەڤرۆ دەست ب یاریێن گەڕا 20ێ‌ ژ هەڤڕكیێن قۆناغا دویێ‌ یا خولا فوتبۆلا كوردستانێ‌ بۆ یانەیێن پلا نایابا كوردستانێ‌ ب ئەنجامدانا سێ‌ یاریێن ئاگرین و ب هێزن، بڕیارە هەموو یاری ل دەمژمێر 2:30 پشتی نیڤرۆ بهێنە كرن.
یانەیێن پارێزگەهێ‌ یاریێن ب هێز هەنە
ل یاریگەها دەلال تیما یانەیا زاخۆ دێ‌ دناڤ ئەرد و جەماوەرێ‌ خوە دا مێڤاندارییا یانەیا هەولێر د دێربیەكێ‌ گرنگ یێ‌ كوردستانی دا، كوڕێن خابووری خودان 34 خال ل رێزا سێیێ‌ دهێن ب نەهـ سەركەفتن، حەفت وەكهەڤی، د بەرانبەر دا كوڕێن كەلهە و منارە 23 خال كۆمكرینە ل رێزا نەهێ‌ دهێن، ئەڤ یارییە بۆ زاخۆییان گەلەك گرنگە ژبەركو سەركەفتن دێ‌ زێدەتر نێزیكی سەڕێ‌ لیستێ‌ كەت و دوور نینە دەرئەنجامێن تیمێن دی بهێتە سەرێ‌ لیستێ‌ ژی، ژلایێ‌ خوەڤە هەولێر دێ‌ بۆ پاراستنا جهێ‌ خوە كەت
ئاكرێ‌ دێ‌ بزاڤێن قەرەبوویا خالان كەت
تیما یانەیا ئاكرێ‌ دێ‌ دناڤ ئەرد و جەماوەرێ‌ خوە دا مێڤاندارییا یانەیا پیشەسازی كەت د یارییەكا گرنگ و ئاشت بوونا جەماوەرێ‌ خوە كەت ئەوا نوكە ب26 خالان رێزا شەشێ‌ دهێت ژ هەشت سەركەفتن و دو وەكهەڤییان لێ‌ ئەو ژبەر حەفت خوسارەتییان هیڤیێن پاراستنا ناسناڤێ‌ خوە یێ‌ وەرزێ‌ بۆری لاواز بووینە، د بەرانبەر دا یانەیا پیشەسازی ئەوا د حەفت یاریێن دەستپێكی دا سەرێ‌ لیست بوو د نوكە د ابتنێ‌ 20 خال هەنە رێزا 11ێ‌ دهێت.
ژ یاریێن دی یێن ڤێ‌ گەڕێ‌، ئەڤرۆ، برایەتی- پێشمەرگەیا هەولێر، سوبەهی سێ‌ شەمبی، دەربەندیخان- شەقلاوە، ڕزگاری- چوارقۆرنە، ڕانیە- سیروانی نوو، شێروانە ب سەركەفتی بەرانبەر سەیدسادق هاتییە هژمارتن پشتی خوەڤەكێشانا سەیدسادق ژ خولێ‌، هەروەسان دڤێ‌ گەڕێ‌ داه ندرین چاڤەڕێ‌ یە.
هەلوەستێ‌ رێزبەندییا گشتی یا خولێ‌ بڤی شێوەیە.
1- شێروانە 37 خال.
2- پێشمەرگەیا هەولێر 36 خال.
3- زاخۆ 34 خال.
4- برایەتی 26 خال.
5- ڕزگاری 26 خال.
6- ئاكرێ‌ 26 خال.
7- هندرین 23 خال.
8- سیروانی نوو 23 خال.
9- هەولێر 23 خال.
10- دەربەندیخان 22 خال.
11- پیشەسازی 20 خال.
12- ڕانیە 20 خال.
13- چوارقوڕنە 18 خال.
14- شەقلاوە 15 خال.
15- سەید سادق پێنج خال.

فدراسیۆنا فوتبۆلا ئەمریكا باكۆر و ناڤەڕاست كۆنكاكاڤ دادڤانێ‌ مەكسیكی ماركۆ ئەنتۆنیۆ ئۆرتێز نافا سزادا دەرئەنجامێ‌ داخوازیا وی یا ئیمزایێ‌ ژ لیۆنێل مێسی ستێرێ‌ میامی یا ئەمریكی، پشتی ب دووماهی هاتنا یارییا تیما ئەمریكی بەرانبەر سپۆرتینگ كانساس ستی یا مەكسیكی ژ چارچووڤەیێ‌ كۆپا قارەمانێن كۆنكاكاڤ.
پەیڤدارێ‌ فدراسیۆنا ناڤهاتی بۆ تۆڕا ئەی، سی، بی گۆت: ئەو كارێ‌ دادڤانی كری بەرۆڤاژی ڕێنمایێن فدراسیۆنێ‌ و لژنەیا دادڤانایە، ژبەركو نابیت دادڤان داخوازا چ تشتەكی ژ هەر یاریزانەكی بكەت چ پشتی یان بەری یاریێ‌ بیت، ژبەركو دهێتە هژمارتن خانا بەرتیلكرنێ‌ دا، دێ‌ ب تەسەلی دۆڤچوونا بابەتی هێتە كرن و سزایێن وێ‌ ژ بەرچاڤن.
تۆڕا ئەی، سی، بی ئەوچەندە دیاركر دادڤانێ‌ ماركۆ ئەنتۆنیۆ نڤێسارا لێبۆرینێ‌ بۆ فدراسیۆنا فوتبۆلا ئەمریكا هنارتییە و گۆتییە ژبەركو ئێك ژ خێزانا واندا خودان پێدڤیێن تایبەت و دخواست ئەز ئیمزاییا مێسی بۆ بینم.