زاخۆ، دلۆڤان هالۆ:

سەرۆكێ سەندیكا ڤەگۆهاستن و گەهاندنێ ل ئیدارەیا سەربخوە یا زاخۆ دیار كر، دێ باشترین تێرمینال ل سەر ئاستێ كوردستان و ئیراقێ ل زاخۆ هێتە دروستكرن.

بارزان مستەفا، سەرۆكێ سەندیكا ڤەگۆهاستن و گەهاندنێ ل ئیدارەیا سەربخوە یا زاخۆ بۆ ڕۆژناما ئەڤرۆ دیار كر، نوكە حۆكمەتا هەرێما كوردستانێ كار ل سەر دروستكرنا تێرمینالەكا تایبەت ل زاخۆ دكەت كو دێ باشترین تێرمینال بیت ل سەر ئاستێ كوردستان و ئیراقێ بهێتە دروستكرن.
ناڤهاتی ئاماژە ب وێ چەندێ ژی كر، ئەڤ تێرمینالە دێ یا تایبەت بیت ب هاتن و چوونا ڕێڤینگێن گەشتیاری و تڕۆمبێلێن ڤەگۆهاستنا گەشتیاران ڤە وەكو كۆستەر و مۆنشەیێن مەزن، چونكی ڕۆژانە كۆستەر و مۆنشەیێن مەزن دهێنە زاخۆ و ئەڤێ چەندێ ژی پێدڤی ب رێكخستنەكا باش هەیە كو هەموو تڕۆمبێل ل جهەكێ تایبەت وەكو تێڕمینالێ بهێنە ڕاوەستاندن.
گۆت ژی:»دروستكرنا ڤێ تێرمینالێ دێ چەندین ئاریشەیێن سنۆری و ژ دەرڤە و نافخۆ چارەسەركەت، چونكی د نوكە دا ئەو تڕۆمبێلە ل هندەك جهێن بەربەلاڤ و جیاواز دهێنە ڕاوەستاندن، ئەڤێ چەندێ ژی جۆرە نە ڕێكخستنەك لێ دیارە».

هەولێر، قائید میرۆ

سەرۆكێ ژۆرا بازرگانی و پیسەشازیا هەولێرێ ئاشكراكر، ئالۆزیێن دەڤەرێ و نە سەقامگیریا سیاسی ل ئیراقێ‌ كاریگەریێن نەرێنی كرینە سەر بازاڕی و لڤینێن بازرگانی سست بووینە هەروەسا دبێژیت: حۆكمەتا ئیراقێ‌ دۆلاری ئەرزان نادەتە بازرگانێن هەرێما كوردستانێ هەتا وی دەمێ پێگیریێ ب سیستەمێ ئەسكۆدا دكەن.

گەیلان حاجی سەعید، سەرۆكێ ژوورا بازرگانی و پیشەسازیا هەولێرێ بۆ رۆژناما ئەڤرۆ دیاركر «ل هەر وەلاتەكی و ئالۆزی و نەسەقامگیری هەبیت دێ كاریگەری ل سەر رەوشا ئابوری و بزاڤێن بازرگانی هەبیت، رەوشا ئالۆزا دەڤەرێ و گەفێن سەرۆكێ ئەمریكا بۆ ئیرانێ و ئالۆزیێن چەند رۆژێن بۆری ل سووریێ كاریگەری ل سەر كەرتێ بازرگانی پەیداكریە، واتە پشتی رەوشا نوكەیا دەڤەرێ سستیەك ب لڤینێن بازرگانی ڤە دیارە و كاریگەری هەبووە ل سەر هەرێما كوردستانێ و خەلك یێ دلگرانە، چونكە ئەم ئێك نەتەوەینە دگەل كوردێن رۆژئاڤا و سووریێ ژی وەلاتێ هەڤسنورە دگەل هەرێما كوردستانێ و ئیراقێ‌.
زێدەتر گۆت: ژلایێ سیاسی ڤە ژی رەوشا ئیراقێ‌ یا سەقامگیر نینە و ئاریشە د ناڤا پرۆسا سیاسی یا ئیراقێ‌ هەنە، ژبلی بابەتێ ئالۆزیێن دەڤەرێ و نە سەقامگیریا سیاسی ل ئیراقێ‌، حۆكمەتا بەغدا ب رێیا سیستەمێ ئەسیكۆدا ئاستەنگ بۆ بازرگانێن هەرێما كوردستانێ پەیداكرینە ئەڤە ژی ئاریشەیەكا دی یە هەمبەر كەرتێ بارزگانی، چونكو كاریگەریێن نەرێنی ل سەر كۆمپانیێن بازرگانی و لڤینێن بازاڕی پەیداكریە، مخابن ژبلی سیستەمێ ئەسیكۆدا ئیراقێ‌ پێناسا گومركی ژی گۆهۆڕیە و نوكە ب سیستەمێ نوویێ گومركی ل ئیراقێ‌ دهێتە جێبەجێكرن.
خویاژی كر، ل هەرێما كوردستانێ كار ب سیستەمێ ئەسیكۆدا ناهێتەكرن هەتا نوكە، بازرگان نەشێن ب رێیا بانكا ناڤەندی دۆلاری ب بهایێ فەرمیی وەر بگرن، ئەڤە ژی ئەگەرەكێ بهایێ كەلوپەلان د بازاڕی دا بلندبوویە.
گەیلان حاجی سەعید گۆت ژی «هەتا نوكە حۆكمەتا هەرێما كوردستانێ دگەل حۆكمەتا فیدڕال نەگەهشتیە رێكەفتنێ ل دۆر پێگیربوونا هەرێما كوردستانێ ب سیستەمێ ئەسیكۆدا، حوكمەتا فیدرال ژی بڕیار دایە هەر كۆمپانیەكا ب سیستەمێ ئەسیكۆدا كەلوپەلان نە ئینن بۆ ئیراق و هەرێما كوردستانێ نەشێن مفاداربن ل وەرگرتنا دۆلارێ ئەرزان ل بانكا ناڤەندی، ژلایەكێ دیڤە بازاڕ ب گشتی یا سەقامگیر نینە بۆ نموونە چەندین رۆژە بهایێ دۆلاری یێ جێگیر نینە و بەرەف بلندبوونێ یە، بێگومان دەمێ بهایێ دۆلاری ژی بلند دبیت بهایێ كەلوپەلان ژی بلند دبیت، چونكو كەلوپەل ل بازاڕێن جیهانێ ب دۆلار دهێنە كڕین و بهایێ دۆلاری راستەوخۆ كاریگەری ل سەر بهایێ كەلوپەلان هەیە، هەروەسا بهایێ كانزایان چ زێڕبیت یان زیڤ و ئاسن و مس بەردەوام یێ بەرەف بلندبوونێ ڤە دچن و بازاڕ د رەوشەكا نە سەقامگیردا دەربازدبیت.

دلۆڤان ئاكرەیی

وەزیرا چاندنا هەرێمێ دیار كر، د كابینا نەهێ یا حوكمەتا هەرێما كوردستانێ دا، ڕێژەیا وەبەرهێنانێ د كەرتێ چاندنێ دا بۆ نێزیكی 10% بلند بوویە و ل هەرێما كوردستانێ ستراتیژیەتا پێشێخستنا كەرتێ چاندنێ هەیە، كو پشكەكە ژ سیاسەتا كابینا نەهێ.

بێگەرد تاڵەبانی، وەزیرا چاندنێ و ژێدەرێن ئاڤێ ل هەرێما كوردستانێ بۆ رۆژنامەیا ئەڤرۆ گۆت: بەری دەستبكاربوونا كابینا نەهێ یا حۆكمەتا هەرێما كوردستانێ، رێژەیا وەبەرهێنانێ د كەرتێ چاندنێ دا ژ 1.5% بۆ 1.8% دەرباز نەدبوو، لێ د نوكەدا ل گۆرەی داتایێن دەستەیا وەبەرهێنانێ، رێژەیا وەبەرهێنانێ د كەرتێ چاندنێ دا بۆ نێزیكی 10% بلند بوویە و ئەڤ داتایە وێ چەندێ د سەلمینێن كو وەبەرهێنەر ل ناڤخۆ و دەرڤەی كوردستانێ باوەریەكا هێز ب ستراتیژییا گەشەپێدانا كەرتێ چاندنێ ل هەرێما كوردستانێ هەیە، كو ئەڤە پشكەكە ژ سیاسەتا كابینا نەهێ یا حوكمەتا هەرێما كوردستانێ.
وەزیرا چاندنێ و ژێدەرێن ئاڤێ ل هەرێما كوردستانێ دووپاتی ل سەر وێ چەندێ كر كو كابینا نەهێ یا حوكمەتا هەرێما كوردستانێ پیتەكێ مەزن ب پڕۆژەیێن چاندنێ دایە و وەزارەتا مە گرنگی ب سیاسەتا چاندنا زیرەك پەیڕەو كریە، ب هاریكاریا تەكنەلۆژیایا سەردەم و ئامیرێن چاندنێ یێن هەڤچەرخ د بیاڤێ بەرهەمئینانا بەرهەمێن چاندنێ دا، ب ڕێكا بكارئینانا كێمترین ئاڤ و كێمترین رووبەرێ ئەردی و بدەستڤەئینانا بلندترین بڕێ بەرهەمی.
وەزیرا چاندنێ ئەو چەندە ژی دیار كر: حوكمەتا هەرێما كوردستانێ پلانا درێژخایەن بۆ كۆمكرنا ئاڤێ هەیە و چەندین پڕۆژە جێبەجێ كرینە، ژ وان ژی پۆند و دەریاچە و بكارئینانا سیستەمێن پێشكەفتی یێن ئاڤدانێ بۆ كێمكرنا ب هەدەرچوونا ئاڤێ، كۆ ڤان گاڤان ژی دێ مفایەكێ باش بۆ جوتیار و بەرهەمێن وان هەبیت.