زنار تۆڤی:

هه‌ردو ده‌رهێنه‌رێن كورد، جبرائیل ئه‌بوبه‌كر و سامی كاكه‌، ب هه‌ردو كورته‌فلمێن «ده‌ریا هیڤیان» و « چیایێ بێده‌نگ»، ل فیستیڤالا نێڤده‌وله‌تییا فلمێن ئه‌حمه‌دئاباد ل وه‌لاتێ هندستانێ دێ هه‌ڤركیا ب ده‌ستڤه‌ئینانا خه‌لاتان كه‌ن.
جبرائیل ئه‌بوبه‌كر، ده‌رهێنه‌رێ كورته‌فلمێ «ده‌ریا هیڤیان» دیار كر: هه‌ردو كورته‌ فلمێن ده‌ریا هیڤیان كو ژ ده‌رهێنانا منه‌ و فلمێ چیایێ بیده‌نگ، ژ ده‌رهێنانا سامی كاكه‌یه‌، د ده‌مێ پتر ژ ساله‌كێ دا پشكداری د نێزیكی 60 فیستیڤالێن نێڤده‌وله‌تی دا كریه‌ و شیاینه‌ چه‌ندین خه‌لاتێن جودا بده‌ستڤه‌ بینن، كو ئه‌ڤه‌ ژی نیشانا ئاستێ باش یێ به‌رهه‌مان و شیانێن سینه‌ماكارێن كورده‌ دناڤ مه‌یدانا هونه‌ری دا.
ناڤهاتی گۆت ژی: فلمێ چیایێ بێده‌نگ، ژ لایێ من ڤه‌ بۆ فیستیڤالێن نێڤده‌وله‌تی هاتیه‌ هنارتن و ژ نوكه‌ وێڤه‌ فلمێن رێڤه‌به‌ریا سینه‌ما هه‌ولێرێ ب رێیا من بۆ فیستیڤالێن نێڤده‌وله‌تی دهێنه‌ هنارتن، ئه‌ڤه‌ ژی به‌لگه‌یه‌كه‌ ل سه‌ر گه‌شه‌یا سینه‌مایا كوردستانی و به‌رفره‌هبوونا ئاستێ ناساندنا به‌رهه‌مێن سینه‌مایی یێن كوردان ل سه‌ر ئاستێ جیهانی.
هێشتا دبێژیت: هه‌ردو فلم چیرۆكا مرۆڤان ڤه‌دگێرن، كو ب ئه‌گه‌رێ شه‌ری و نه‌ ئارامییێ نه‌چار دبن جهێ خۆ بجهبهێلن و ژ پێخه‌مه‌ت ڤه‌دیتنا ژیانه‌كا ئارام و پاشه‌رۆژه‌كا باشتر، رێكا كۆچكرنێ به‌ره‌ف ئورۆپاڤه‌ دچن، ئه‌و فلمه‌، ئێش، ئاواره‌یی، ده‌ربه‌ده‌ری و هیڤیا مرۆڤی بۆ ده‌ستپێكرنا ژیانێ ل جهه‌كێ ئارام به‌رچاڤ دكه‌ن.
ئه‌و ژی دیاركر: فیستیڤالا نێڤده‌وله‌تییا فلمێن ئه‌حمه‌دئاباد، ئێكه‌ ژ چالاكیێن سینه‌مایی یێن نوو ل باژێرێ ئه‌حمه‌دئاباد ل هه‌رێما گوجرات ل هندستانێ و ئارمانجا فیستیڤالێ پشته‌ڤانیكرنا فلمسازێن سه‌ربه‌خۆ، ده‌رهێنه‌رین نوو و هونه‌رمه‌ندێن جیهانی یه‌، بۆ ڤێ چه‌ندێ به‌رهه‌مێن خۆ ل سه‌ر پلاتفۆرمه‌كا نێڤده‌وله‌تی نیشان بده‌ن، هه‌روه‌سا ئه‌و فیستیڤاله‌ جۆرێن جودا یێن فلمان، وه‌كێ فلمێن كورت، فلمێن دریژ، به‌لگه‌فلم، فلمێن ئه‌نیمه‌یشن و فلمێن ئه‌زموونی وه‌ردگریت و خه‌لاتان دده‌ته‌ باشترین به‌رهه‌مێن سینه‌مایی، ئه‌ڤ فیستیڤاله‌ بزاڤان دكه‌ت په‌یوه‌ندیا دناڤبه‌را فلمسازێن ناڤخۆیی و نێڤده‌وله‌تی بهێز بكه‌ت و جهه‌كی بۆ گوهۆرینا ئه‌زموون و داهێنانان دابین بكه‌ت.
بریاره‌ فیستیڤالا نێڤده‌وله‌تیا فلمێن ئه‌حمه‌دئاباد، ل 1 ی چریا ئێكێ یا 2026 ێ، ل باژێرێ ئه‌حمه‌دئاباد بهێته‌ گێران و بۆ ده‌مێ پێنج رۆژان دێ یا به‌رده‌وام بیت.

هەرهین محەمەد:

هونەرمەندێ شێوەکار حەمە هاشم د دیدارەکێ دا بۆ بەرپەڕێ هونەری یێ ڕۆژنامەیا ئەڤرۆ گۆت: ژ ژییەکێ بچووک، ڕەنگ و هێڵ بوونە پشکەک ژ ناسنامەیا من دەمێ من دیتی کو وشە و ئاخفتنێن هندەک جاران کورت دئینن بۆ دەربڕینێ ژ کویراتیا هەستان، ئازار و جوانیا دەوروبەرا، ڕەنگ بۆ زمانێ من ئێکێ و ئەز دشێم بێژم ئەڤ هەستە ژ قۆناغا سەرەتایی و بچووکاتیا من سەرهەڵدایە و د دەستپێکا کارکرنا من و ساڵێن خواندنێ ل پەیمانگەها هونەرێن جواندا گەشە کر و بوو زمانەکێ زیندی و ڕاستەقینە بۆ دەربڕینێ گۆت:ئەز باوەر ناکەم هونەر بهێتە سنوردارکرن ب ئێک پەیاما سەپاندی. ڕاستە ل پشت هەر کارەکێ هزرەک و ناڤرۆکەکا ڕوون هەیە (وەکی بابەتێ ئازادیێ، مرۆڤ دۆستیێ یان ژیانێ)، بەلێ ئەز گەلەک دڵخۆش دبم دەمێ بینەر ب ئازادی و ب ڕێکا دیدگەهـ، ئەزموون و هەستێن خۆ بچیتە د ناڤ کەڤاڵی دا و مانایێن نوو ژێ بپەژرینیت. هونەر ل وی خاڵی جوانتر دبیت دەمێ دبیتە موڵکێ بینەری ب خۆ.
هێشتاژی گۆت: کەڤاڵێن من ل سەر بنەمایێ تێکەڵەیەکێ ژ ئەزموونا ئەکادیمی و جیهانبینیا من یا ڕۆحی هاتینە ئاڤاکرن. گەشەسەندنا ئەڤی شێوازی پرۆسەیەکا بەردەوامە؛ د بنەڕەتدا ژ قوتابخانا ڕیالیزما ئەکادیمی دەست پێدکەت، بەلێ بۆ گەهشتنێ ب ناڤەڕۆکەکا کویرتر.
و ڕەنگڤەدانا کێشەیێن مرۆڤایەتی و ڕۆحی، بەرەڤ جورەکێ ژ دەربڕینگەریێ (Expressionism) و ئەبستراکتێ دەربڕینگەر و تێکەڵکرنا هێما و ڕەهەندێن هەڤچەرخ گەشەکرییە گۆت:ژێدەرێ ئیلهاما من جۆراوجۆرە، بەلێ ژ هەمیان زێدەتر مرۆڤ، ئازار و هیڤییێن من دگەل سروشتێ دەولەمەندێ کوردستانێ بنەمایێن سەرەکین. دۆخێن دەرونی و ڕوودانێن ژیانێ کاریگەرییا وان یا ڕاستەقینە ل سەر هلبژارتنا ڕەنگان و پێکهاتا کەڤاڵێن من هەیە؛ جاران دیمەنەکێ سروشتی یان ڕوودانەکا ژیانێ دبیتە پرەک بۆ گەهاندنا پەیامەکا کویرتر، ب تایبەتی نەهامەتیێن کو ب درێژاهییا مێژوویێ ل سەر نەتەوا مە هەین، کارەساتێن ئانفال و هەلەبجە و گەلەکێن دی دبنە نیگەرانییا ڕۆحی و د کەڤاڵێن من دا ب ڕوونی دیارن، بەلێ هەمیشە هزر و هۆشا من ل جەم ئازادییا مرۆڤی یە.
حەمەیی گۆت ژی: مێژوو و کەلتۆر ل دەف من بتنێ بیرهاتنەکا مری یان کۆمەلەکا هێمایێن ئەرشیفکری نینن، بەڵکو ئەڤە خانەیا ئێکێ یا بوونێ و ڕەگ و ڕیشێن ڕۆحینە کو مرۆڤ ب ڕێکا وان خۆ دناسیت و د کارێن من یێن هونەری دا، ناسنامە نە وەک قەفەسەکە بۆ سنوردارکرنێ، بەڵکو وەک ژێدەرەکێ بێپایان یێ گەڕیانێ ل دووڤ مانایێ دهێتە سەحکرن؛ و ئەو جھە یێ کو تێدا دەمێ بووری و نوکە تێکەڵ دبن. دەمێ ڕەنگ و هێڵ ل سەر قوماشی تووشی ئێک دەبن، ئەڤە بتنێ دیمەنەکێ نانەخشینن، بەڵکو قەردارێن وێ مێژوویا پر ژ ئازار و وی کلتوورێ کویرن کو هەلگرێن کویراتیا مرۆڤینە ئەز ئەڤێ هزرێ دکەم کو هونەرمەند نەشێت د ئۆفساید یان ل دەرڤەی وێ ناسنامە و کەلتور بژێت ئەوێ خەم و خۆشیێن وی چەشتین؛ ژبەر هندێ کەڤاڵێن من بزاڤ کرینە بۆ زیندیکرنا وی زمانێ بەرزەبوویی یێ مێژوویێ، کو تێدا چیرۆکا مرۆڤایەتیێ ب ڕێکا فیلتەرێ ڕەسەنایەتیێ و داهێنانا هەڤچەرخ دیسان دهێتە خواندن.

عمران سلێمان بیبو

یا خویایه‌ د هه‌ر سه‌رده‌مه‌كی ده‌ و ل هه‌ر چه‌رخه‌كی هونه‌رێ شێوه‌كاری روله‌كی گرنگ ژ داهینان و گوهۆرینێ هه‌بوویه‌ دناڤ هه‌موو چینێن چڤاكی ده‌.
بێ خودانیا گه‌له‌ریا دهۆك دناڤ جڤاكه‌كی دوور ژ ره‌وشه‌نبیریا هونه‌رێ شێوه‌كاری و هه‌ر وه‌سا گرنگی نه‌دان ژ جهێن په‌یوه‌ندیدار دڤی بیاڤی ده‌.
جیهانا هونه‌رێ شێوەکاری پشكه‌كه‌ هه‌ره‌ گرنگه‌ دناڤ هه‌ر جڤاكه‌كی ده‌، ئه‌ڤجا پێدڤی یه‌ ل سه‌ر هه‌ر حكمرانیه‌كێ هاریكار بت دگه‌ل پێشڤه‌برنا ڤان بیاڤان ده‌، چونکی هه‌ر شارستانیه‌ته‌كه‌ پێشكه‌فتی به‌رێ خوە دده‌ته‌ ئه‌ڤی جورێ هونه‌ری ب ئاسته‌كی گه‌له‌ك بلند وب سه‌داها گه‌له‌رێن جورا و جور دناڤ هه‌ر باژێره‌كی وانده‌ هه‌ینه‌ و ئه‌و گه‌له‌ری پێك دهین ژ شینوار و كه‌له‌پور و سیاسه‌ت و ئایین و نه‌ته‌وه‌ و هه‌ڤچه‌رخ و مودیرن وهتد .
دناڤ هه‌ر كه‌له‌توره‌كی پێشكه‌فتی ده‌ ئه‌ڤ جوره‌ هونه‌ره‌ پارچه‌كه‌ هه‌ره‌ گرنگه‌ دناڤ جڤاكی ده‌ ژ باخچه‌یێن زاروكان بگره‌ و هه‌تا دگه‌هیته‌ ئاستێن بلند مینا زانكو و په‌یمانگه‌هان و هه‌موو چێنێن چڤاكی ،وهه‌ر وه‌سا زوربه‌یا باژێرێن پێشكه‌فتی ئه‌ڤ جوره‌ گه‌له‌ریانه‌ بوینه‌ ژێده‌ره‌كی هه‌ری ئابوری یێ گرنگ.
ئه‌ڤ هزرێن پر برامان و بێ ده‌نگ دناڤ چارچوڤه‌كی گرتی وبێ ده‌نك ده‌ پێتڤی یه‌ بشێوه‌یه‌كی جوان سه‌ره‌ده‌ری دگه‌ل بهیته‌ كرن دا به‌ره‌ف ئاسته‌كی بلند ڤه‌ بچت ، ئه‌گه‌ر نه‌ ژ ده‌ستدانا پارچه‌كه‌ هه‌ره‌ گرنگ یا شارستانیه‌تا ملله‌تێ مه‌یه‌ .
و یها ئاشكرایه‌ شوره‌شه‌كه‌ هشیاربوونا هه‌ر ملله‌ته‌كییه‌ وهه‌ستكرنه‌ك دناڤ ده‌رونێ هه‌ر تاكه‌كه‌سی ده‌ ژبو بده‌ستڤه‌ئینانا ناسنامه‌یا ملله‌تی وگوهورینێ به‌ره‌ڤ جیهانگێری ڤه‌ .
یا پێتڤی ویا گرنگ ل سه‌ر جهێن په‌یوه‌ندیدار بڤی بیاڤی ده‌ هاندانا جهێن په‌روه‌رده‌یێ وزانستی ل سه‌ر هه‌ر ئاسته‌كی بهێنه‌ هاندان ،چونكه‌ زوربه‌یا خه‌لكێ به‌رێ خو ددنه‌ ئه‌ڤان جهان جهه‌كی بێ مفا به‌لێ به‌روڤاژی وێ چه‌ندێ یه‌ .
مێژوویا مه‌ یه‌ پره‌ ژ سه‌ربوور و كه‌له‌پور و داستان و ئه‌فسانه‌ ژبلی سروشته‌كی جوان زوربه‌یا جاران دوژمنی هه‌ولا ژنابرنا ڤی كه‌له‌پور و ڤێ نلسنامێ كریه‌ به‌لێ برێكا هونه‌ری ئه‌ڤ ناسنامه‌ ژ ده‌ست نه‌چویه‌ وجاره‌كه‌دی هاتیه‌ وێنه‌كرن.
یا گرنگ وپێتڤی وه‌كو هه‌ر گه‌له‌ریه‌كا جیهانی مینا لوڤه‌ر ل فرنسا و شارستانیه‌ت ل قاهره‌ و سه‌داها ل ججهێن جودا جودا ل جیهانێ ئه‌م بزاڤا پێشڤه‌برنا ئه‌ڤان جهان بكه‌ین دا بشێوه‌یه‌كی جوان و نوخازا کەلتۆر وشارستانیه‌تا خوە نیشا جیهانێ بده‌ین.