مەكتەبا ڕێكخستنا پارتی دیموكراتی كوردستان ل پارێزگەها دهۆكێ ب هەلكەفتا 22 سالیا كارەساتا 1ی شواتێ بەیاننامەك بەلاڤكر و تێدا هاتیە: دوژمنێن مرۆڤایەتیێ و گەلێ كوردستانێ، جەژنا قوربانێ كرە دەلیڤە بۆ ئەنجامدانا تاوانەكا هۆڤانە دژی گەلێ مە و دو كریارێن خۆكوژی، ل بارەگایێ لقێ دو یێ پارتی و مەلبەندێ سێ‌ یێ ئێكەتیێ‌ ل هەولێرا پایتەخت ئەنجام دان.
ئاشكرا ژی كریە كو ئەڤ كارەساتە نەك ب تنێ برینەكا كوور بوو، بەلكو بەلگەیەكێ زەلال بوو، كو دوژمنێن مە چو جاران جوداهیێ د ناڤبەرا چو لایەن و ڕەنگێن جودا یێن كوردستانێ دا ناكەن، ئارمانجا وان ژناڤبرنا ئیرادە و دەستكەفتێن مللەتێ مە بوو، خوینا تێكەلكری یا سەركردە و كادر و پێشمەرگە و خەلكێ سڤیل یێ هەردو لایەنان، بوو هێڤێنێ بێ هێزكرنا پیلانێن دوژمنان.
د بەیاننامەیا مەكتەبا رێكخستنا پارتی دا هاتیە: «ئەم وەكو مەكتەبا ڕێكخستنا پارتی ل پارێزگەها دهۆكێ، د ڤێ بیرەوەریێ دا تەكەزیێ ل ئێكڕێزی و تەباییا تەڤایا هێز و لایەنێن سیاسی دكەین و ب ئێكانە ڕێیا پاراستنا هەرێما كوردستانێ و دەستكەفتێن گەلێ مە دزانین، ئێكڕێزیا ناڤ مالا كوردی مەزنترین وەفادارییە بۆ خوینا شەهیدێن 1ی شواتێ و هەمی شەهیدێن ڕێكا ڕزگاریخوازییا كوردستانێ».

دهۆك، لەزگین جۆقی:

رێڤەبەریا گشتییا ساخلەمیا پارێزگەها دهۆكێ راگەهاند، ل دووڤ راسپاردین جەنابێ سەرۆك بارزانی و ب هەڤكارییا دەزگەهێ خێرخوازیێ بارزانی، تیمێن رێڤەبەریا گشتی یا ساخلەمیا پارێزگەها دهۆكێ چارەسەریا هەژمارەكا مەزن یا نەخۆشان ل رۆژئاڤایێ كوردستانێ كریە.
رێڤەبەریا گشتیێ ساخلەمیا پارێزگەها دهۆكێ ئاشكرا ژی كریە كو ل گەل پێشهات و گوهۆڕینان و ڕەوشا سووریێ و ڕۆژئاڤایێ كوردستانێ، دەملدەست تیمێن ساخلەمیێ گەهشتنە رۆژئاڤا بۆ دابینكرن و پێشكێشكرنا خزمەتێن ساخلەمیێ بۆ نەخۆشان و هەتا نوكە ل سەر پێشكێشكرنا خزمەتێن ساخلەمیێ بۆ خەلكێ لیقەومایێ رۆژئاڤایێ‌ كوردستانێ دبەردەوامن.
ئاماژە ب وێ‌ چەندێ‌ ژی كریە كو ساخلەمیا پارێزگەها دهۆكێ چەندین پێدڤیێن نۆشداری و دەرمان ل گەل شاندێ ساخلەمیا پارێزگەها دهۆكێ بۆ رۆژئاڤایێ‌ كوردستانێ‌ هنارتینە و رۆژانە تیمێن ساخلەمیێ خزمەتێن هەمەجور پێشكیشێ نەخۆشان ل رۆژئاڤایێ كوردستانێ دكەن.
دیسا ل رۆژا 31/1/2026 دەزگەهێ خێرخوازیێ بارزانی هاریكاریێن ساخلەمیێ گەهاندنە نەخۆشخانا گەل ل قامشلۆ، كو ئەڤ هاریكاریێن ساخلەمیێ هەمی دەرمان و پێدڤیێن نۆشداری بوون.

رەمەزان زەكەریا:

لقێ‌ ئاكرێ یێ‌ ئێكەتیا قوتابی و لاوێن دیموكراتا كوردستانێ ل ژێر چاڤدێریا د. مەردان خدر، بەرپرسێ لقێ‌ نەهێ‌ پارتی و ب ئامادەبوونا كارگێرێن لقێ و هەژمارەكا زۆرا كادر و قوتابی و لاوێن دەڤەرێ، ب هەلكەفتا 39 سالیا مالئاڤاییا ئەندازیارێ‌ ئاشتیێ‌ ئدریس بارزانی، زنجیرەكا چالاكیێن كلتۆری و رەوشەنبیری ئەنجامدان.
ل دەسپێكێ‌ پێشانگەهەكا شێوەكاری و فۆتۆگرافی یا تایبەت ب وێنێن خەبات و تێكۆشینا ئدریس بارزانی هاتە ڤەكرن و چەندین وێنە و تابلۆ هاتبوونە نیشادان، كو دەربڕین ژ قووناغێن جودا یێن ژیان و خەباتا وی سەركردەیێ مەزن دكر، وەكو وەفایەك بۆ وێ مێژوویا پڕ سەروەری، كو تێدا هەمی ژییێ‌ خۆ پێشكێشی دۆزا رەوا یا گەلێ خۆ كربوو.
دیسا هەر ب هەمان هەلكەفت سمینارەك ل سەر رۆل و كاریگەریا ئدریس بارزانی، ل هۆلا بارەگایێ لقێ‌ نەهێ‌ پارتی ژ لایێ عەبدولعەزیز محسن بارزانی ل ژێر ناڤێ «ئدریس بارزانی د دەمێ بێ ئومێدیێ دا مەزنترین ئومێد بەخش بوو» هاتە پێشكێشكرن.
ناڤهاتی د سمینارا خۆ دا بەحس ل رۆلێ ئیدریس بارزانی د ئێكخستنا ناڤمالیا كوردی و چەسپاندنا تەباییێ و چەوانیا ب كارئینانا هزرا وی یا سیاسی بۆ ڤەكرنا دەرگەهێن ئومێدێ د دەمێن دژوار یێن شۆڕەشێ دا و پێگەهێ وی وەكو سەركردەیەكێ لێبۆردە و نیشتمانپەروەر كر.

ئامێدیێ، مەحمود نهێلی:

ژ بۆ زێدەتر خزمەتكرنا وەلاتیان و گەهاندنا پڕۆژەیێن خزمەتگوزاری بۆ گوند و كۆمەلگەهـ و ناوچەدارییان، پڕۆژەیێ چێكرنا جادەیێن ناڤخوە و قێركرنا وان ل سنۆرێ ناوچەدارییا شێلادزێ دهێتە بجهئینان.
رزگار عوبەید، رێڤەبەرێ ناوچەدارییا شێلادزێ بۆ رۆژناما ئەڤرۆ دیار كر، كابینەیا نەهێ‌ یا حكومەتا هەرێما كوردستانێ گرنگییەكا مەزن دایە پڕۆژەیێن خزمەتگوزاری بۆ هەموو دەڤەران و گۆت: «ئێك ژ وان پڕۆژەیێن گرنگێن ب ژیانا وەلاتیان ڤە گرێدای، پڕۆژەیێ چێكرن و قێركرنا هەژمارەكا زۆرا جادەیێن ناڤخوەیی یە ل سنۆرێ ناوچەدارییا شێلادزێ، كو ژلایێ كارگێریا پارێزگەها دهۆكێ ڤە ڕازیبوون ل سەر هاتبوون كرن».
دیار ژی كر، ژ بۆ ئەنجامدانا ڤی پڕۆژەی گوژمێ ئێك ملیار و 468 ملیۆن دینار هاتبوونە تەرخانكرن و گۆت: «ئەڤ پڕۆژەیە ژلایێ‌ ئەندازیارێن رێڤەبەریا گشتی یا باژێرڤانیێن پارێزگەها دهۆكێ‌ و باژێرڤانیا شێلادزێ ڤە سەرپەرشتی ل سەر دهێتە كرن و نوكە د قووناغێن دووماهیێ دایە، هندەك ژ وانا ژی ب دووماهی هاتینە و كەفتینە د خزمەتا خەلكێ دەڤەرێ دا».

زاخۆ، دلۆڤان هالۆ:

محەمەد سەدیق، بەرپرسێ نڤیسینگەها زاخۆ یا سەندیكا ڕۆژنامەنڤیسێن كوردستانێ بۆ ڕۆژناما ئەڤرۆ دیاركر كو ب ئامادەبوونا ئازاد حەمەد ئەمین، نەقیبێ سەندیكا ڕۆژنامەنڤیسێن كوردستانێ، خولەكا ڕۆژنامەڤانی یا سلامەتیا پیشەیی ژ لایێ نڤیسینگەها زاخۆ یا سەندیكا ڕۆژنامەنڤیسێن كوردستانێ ب هەڤكاری ل گەل فیدراسیۆنا نێڤدەولەتی یا ڕۆژنامەڤانان هاتە ڤەكرن.
ناڤهاتی ئاماژە ب وێ چەندێ ژی كر كو 22 ڕۆژنامەڤانێن زاخۆ پشكداری د ڤێ خولێ دا كر و ل دووڤ بەرنامەیەكێ رێكخستی و رێكوپێك ڕۆژانە وانەیێن تایبەت ل دۆر بابەتێ خوەپاراستنا ڕۆژنامەڤانان و سلامەتیا گیانێ وان د دەمێ شەر و كاودانێن تایبەت دا د هاتنە پێشكێشكرن و خول بۆ دەمێ دو ڕۆژان یا بەردەوام بوو.
محەمەد سەدیق گۆت: «ل دووماهیا خولێ باوەرنامەیێن نێڤدەولەتی یێن باوەرپێكری ل سەر پشكداربوویێن خولێ هاتنە بەلاڤكرن، پاشی د كۆنگرەیەكێ ڕۆژنامەڤانی دا نەقیبێ سەندیكا ڕۆژنامەنڤیسێن كوردستانێ بەحسێ گرنگیا خولێ و پاراستن و بەرەڤانیكرن ژ مافێن ڕۆژنامەڤانان كر».