ب ئامادەبوونا سەربەست لەزگین، بەرپرسێ مەكتەبا ڕێكخستنا پ. د. ك ل بەهدینان، زەعیم عەلی، ئەندامێ مەكتەبا سیاسیا پارتی، بەرپرسێن، حزبی و میری، كەسوكارێن خودێ ژێ‌ رازی و جەماوەرەكێ بەرچاڤ، ل رۆژا 3/6/2026 د ڕێوڕەسمەكێ‌ ژ هەژی دا تەرمێ‌ پێشمەرگەیێ‌ دێرین (عەبدولرەحمان پێداوی) ل گۆڕستانا گوندێ پێدە هاتە ڤەشارتن.
د ڕێوڕەسمان دا، بەرپرسێ مەكتەبا ڕێكخستنێ پەیڤەك پێشكێشكر و تێدا دیرۆكا خەبات و تێكۆشینا خودێ ژێ‌ رازی د ناڤ شۆڕەشێن ئیلۆن و گولانێ دا بلند هەلسەنگاند و ئاماژە ب ڕۆل و گاریكەریا وی كر، وەكو فەرماندەیەكێ شۆڕەشا ئیلۆنێ‌ و ئەندامەكێ كارا یێ سەركردایەتیا كاتی ل سەردەمێ شۆڕەشا گولانێ‌.
دیسا هەر ب هەلكەفتا مالئاڤاییا ێشمەرگەیێ‌ دێرین لیوا عەبدولرەحمان پێداوی، مەكتەبا ڕێكخستنا پ. د. ك ل بەهدینان پەیامەكا بەهیداریێ‌ بەلاڤكریە و تێدا هاتیە: «ب خەم و كۆڤانەكا مەزن ڤە، نووچەیێ مالئاڤاییا كادر و تێكۆشەڕێ دێرینێ گەلێ مە، ئەفسەر و فەرماندەیێ بەتالیۆنێ ل شۆڕەشا مەزنا ئیلۆنێ و ئەندامێ سەركردایەتیا كاتی و بەرپرسێ هەرێما دو، خودێ ژێ‌ رازی (عەبدولرەحمان پێداوی) گەهشتە مە، خودێ ژێ‌ رازی تێكۆشەڕ و فەرماندەیەكێ دلسۆز بوو، خزمەتەكا مەزن پێشكێشی بزاڤا ڕزگاریخوازیا گەلێ كوردستانێ و دۆزا ڕەوایا گەلێ كورد كریە».
خودێ‌ ژێ‌ رازی ل 1961 بوویە ئەندامێ ئێكەتیا قوتابیێن كوردستانێ و ل 1965 بوویە ئەندامێ پارتی، ل سالا 1971 كۆلیژا سەربازی ل بەغدا ب دوماهی ئینایە ب پلا میلازم و ئێكسەر پەیوەندی ب شۆڕشێ كریە و بوویە پێشمەرگە هەتا گەهەشتیە پلا فەرماندێ بەتالیۆنێ، ل سالا 1976 بوویە ئەندامێ سەركردایەتیا پارتی، ل سالا 1977 بوویە بەرپرسێ هەرێما دو یا پارتی.
پێشمەرێ‌ دێرین لیوا عەبدولرەحمان پێداوی ل رۆژا 2/7/2026 مالئاڤایی كر و ل رۆژا 3/6/2026 ب ئامادەبوونا هەژمارەكا بەرپرسێن میری و حزبی و سەربازی ل گۆڕستانا گوندێ پێدە هاتە ڤەشارتن.

زاخۆ، دلۆڤان هالۆ:

گوهدار شێخۆ، سەرپەرشتێ ئیدارەیا سەربخوە یا زاخۆ د كۆڕبەندەكێ ئابووری دا د ناڤبەرا هەرێما كوردستانێ و وەلاتێ ئسپانیا دا، دیاركر، ڤی كۆڕبەندی دەرگەهەكێ نوو بۆ پێشڤەبرنا پەیوەندیێن د ناڤبەرا ئیدارەیا سەربخوە یا زاخۆ و هەرێما كاستیا و لیۆن، ب تایبەتی باژێڕێ ڤایادۆلید ڤەكر و دبێژیت: ئەم داخوازێ ژ بازرگان و وەبەرهێنەرێن ئسپانیا دكەین، بهێن وەبەرهێنانێ ل زاخۆ بكەن.
نڤهاتی گۆت: «دانوستاندنێن باش هاتنە كرن، كو ئیدارەیا سەربخوە یا زاخۆ و باژێڕێ ڤایادۆلید د چارچۆڤەیێ ڕێككەفتنا باژێڕێن دوستان دا ببنە دەستە خووشكێن هەڤدۆ، ئەڤ ڕێككەفتنە دێ ڕێكێ خوەش كەت، كو زاخۆ د بیاڤێن جودا دا وەكو خواندن و كەلتوور و گەشتوگوزار و چاندنێ دا مفای ژ ئەزموونا سەركەفتی یا ڤی باژێڕێ ئسپانی وەربگریت».
گۆت ژی:»زانكۆیا باژێڕێ ڤایادۆلید ئێكە ژ كەڤنترین زانكۆیان ل سەر ئاستێ وەلاتێ ئسپانیا، ژبەر ڤێ چەندێ هەماهەنگی د ڤی بیاڤی دا دێ بیتە ئەگەرێ ڤەگوهاستنا ئەزموونەكا زەنگین یا پەروەردەیێ بۆ هەرێما كوردستانێ، ئەم دێ كار كەین ژ بۆ وێ چەندێ، د پاشەڕۆژەكا نێزیك دا سەرۆكێ باژێڕڤانیا ڤایادۆلید ل ئیسپانیا داخواز بكەینە زاخۆ، دا كو ژ نێزیك دەلیڤەیان ببینیت و تێكگەهشتن بچنە د بیاڤێ بجهئینانێ دا».

هەولێر، قائید میرۆ:

بریكارێ وەزارەتا پەروەردەیێ ئاشكراكر، هەر پرسیارەكا شاش هەبیت د پۆلا 12 ئامادەیی دا، دێ قوتابی هێنە قەرەبووكرن و دبێژیت: پرسیار لسەر سێ ئاستان دهێنە بەلاڤكرن و ب تنێ هەژمارەكا كێم یا پرسیاران ب زەحمەتن، ئەو ژی بۆ زانینا ئاستێ قوتابیانە.
سەیوان عەلی، بریكارێ وەزارەتا پەروەردەیێ بۆ رۆژناما ئەڤرۆ دیاركر، پرسیارێن پۆلا 12 ئامادەیی ژ ئالیێ كەسێن بسپۆر دهێنە دانان و لیژنەیەكا تایبەت ب بەرهەڤكرنا پرسیاران هەیە، پرسیار لسەر سێ ئاستان ب سەناهی و ناڤنجی و ب زەحمەت دهێنە دانان، هەژمارەكا كێم یا پرسیارێن ب زەحمەت هەبوون، ئەو ژی بۆ دیاركرنا ئاستێ قوتابیانە.
سەیوان عەلی گۆت: «ئەگەر بهێت و شاشیەك د پرسیاران دا هەبیت، ژلایێ لیژنا بلند دێ پێداچوون بۆ هێتە كرن و ئەگەر دەركەفت شاشی تێدا هەیە، هەر بەرسیڤەك هاتبیتەدان ل هەلبژارتنێن پرسیارێ دی نمرە بۆ قوتابی هێنە دانان، چەندین جاران ژی شاشی پەیدابووینە و مافێ‌ قوتابی هاتیە پاراستن».

رەمەزان زەكەریا:

رێڤەبەرێ ئاڤا بەردەڕەشێ‌ دیار كر، كاركرن د پڕۆژەیێ ستراتیژی یێ ئاڤا بەردەڕەشێ‌ دا بەردەوامە و بڕیارە بەری دەمێ‌ بۆ هاتیە دیاركرن، ب دوماهی بهێت.
ئەندازیار رێبەر نازم خۆرشید، رێڤەبەرێ ئاڤا بەردەڕەشێ‌ بۆ ئەڤرۆ گۆت: «لەز د كارێن پڕۆژەی دا دهێتە كرن، داكو ب زووترین دەم پرۆژە ب دوماهی بهێت و بكەڤیتە د خزمەتا وەلاتیان دا، ژ 18 عمبارێن ئاڤێ، نوكە كار د 16 عمباران دا دهێتە كرن».
گۆت ژی: «پڕۆژە ژ چەندین پشكان پێك دهێت: وەرگرێ ئاڤێ ژ زێی و وەستگەها پاقژكرنا ئاڤێ و بەلاڤكرنا وێ، پڕۆژە دێ شێت ئاڤێ بۆ سەنتەرێ‌ دەڤەرداریا بەردەڕەشێ‌ و هەر سێ ناوچەداریێن ب سەرڤە و هەموو گوندان ژی دابین بكەت، ب ڤێ چەندێ كێشەیا كێمئاڤیێ دێ ب تەمامی هێتە چارەسەركرن و 250 بیرێن ئاڤا ڤەخوارنێ ژی دێ هێنە گرتن».

دلۆڤان ئاكرەیی:

ڕێڤەبەرا ڕێك و پڕا ل پارێزگەها دهۆكێ دیاركر، گرنگیا پڕۆژەیێ سحێلا ئەوە كو بەری نوكە ئەڤ ڕێكە ب ڕێكا مرنێ دهاتە نیاسین، ژ بەر كو ب تنێ ئێك ساید بوو و هاتن و چوونا ترۆمبێلێن مەزن یێن بارهەڵگر و یێن وەلاتیان ب شێوەیەكێ گەلەك زێدە ل سەر بوو، د بوو ئەگەرێ ڕوودانێن دڵتەزێن و گیان ژ دەستدانا وەلاتیان و ب تەمامكرنا ڤی پڕۆژەی دێ گیانێ وەلاتیان هێتە پاراستن و گرنگیەكا مەزن ژی بۆ ڤەژاندنا بازرگانی هەیە.

ئەندازیار خەدیجە مەحەمەد، رێڤەبەرا رێك و پران ل پارێزگەها دهۆكێ بۆ رۆژنامەیا (ئەڤرۆ) سەبارەت پڕۆژەیێ ڕێكا باعەدرێ بۆ دهۆك ئاشكراكر، كارێن ڤی پڕۆژەی ب شێوەیەكێ گەلەك باش د چنە پێش و كار د هەمی 26 كیلۆمەترێن وێ دا دهێتە كرن و د قۆناغەكا باش دایە.
سەبارەت پڕۆژەیێ ڕێكا باعەدرێ بۆ شێخان دیاركر، ئەڤ ڕێیە ژی درێژاهیا وێ 7.5 كیلۆمەترن، كار ل سەر قێركرنا لایەكێ وێ دهێتە كرن و نوكە نێزیكی 4 كیلۆمەتران ژ ڤێ ڕێیێ هاتینە قێركرن و د ئەڤ سالە دا دێ ب دووماهی هێت و كەڤیتە خزمەتا ولاتیان.
ئەندازیار خەدیجە باس ل پڕۆژەیێ ڕێكا بەردەڕەش كر و گۆت: ئەڤ پڕۆژەیە ژی پێشتر ڕازەمەندی ل سەر هاتبوو كرن و بەڵێندەری دەست ب كارێ خۆ كربوو، ب تەنانەت ڕێژەیەكا كارێ كۆنكریتێ (نێزیكی 7%) ئەنجامدابوو، بەڵێ ژبەركو كوژمێ پارەی بۆ نەهاتبوو دابینكرن، بەڵێندەری دەست ژ كار بەردایە و كار ڕاوەستاندیە و نوكە وەزارەتا ئاڤەدانكرنێ ل هەرێمێ و پارێزگەها دهۆكێ ل سەر هێلێن بۆ ڤەدیتنا چارەسەریەكێ و دابینكرنا بودجەی دا كو پڕۆژە دووبارە بكەڤیتە د كار و خزمەتێ دا.