ساڵح محه‌مه‌د ته‌یرۆ
هه‌كه مرۆڤ بهێت و ل سه‌ر كریارێن ب ناڤێن ئه‌نفالان رابوه‌ستیت، ئه‌وێن ژلا یێ رژێما به‌عسا شۆفێنى ڤه ل دژى گه‌لێ كوردستانێ هاتینه‌كرن، دشیان دایه ب هزاران چیرۆكێن تراجیدى و رۆمان و فلمێن پڕ خه‌م و كۆڤان دێ ل سه‌ر هێنه نڤیسین و تۆماركرن، هه‌ر چه‌نده گه‌له‌ك نڤیسه‌ر و دیرۆكنڤیسان ل سه‌ر ئه‌نفالكرنا گه‌لێ كوردستانێ نڤیسى یه، لێ ب هزرا من ئه‌ڤه هه‌مى دلۆپه‌كه ژ ده‌ریایه‌كى، یاكو من مه‌به‌ست ل ڤى بابه‌تى كو ئه‌ز ب خوه ئێكم ل به‌ر كریارا ئه‌نفالا به‌هدینان كه‌فتى كو ژلایێ رژێما به‌عس ڤه هه‌شته‌مین و دووماهیك ئه‌نفال بوو كو ل به‌ربوو ل رۆژا 25/8/1988 ل ده‌ڤه‌را به‌هدینان ده‌ست پێ بكه‌ت، لێ ل به‌ر راكێشانا هژماره‌یه‌كا زێده‌ترا سۆپا و جاش و چه‌ك ته‌قه‌مه‌نیان ب هزرا من ل 27/8/1988 هێرشێ ده‌ستپێكر.
وى ده‌مى ئه‌ز و مالباتا خوه ل گوندێ شنیێ ل ده‌ڤه‌را زێبارێ بووین كو ئه‌ڤ گونده ژى ل ناڤچه‌یێن ئازادكرى بوو و به‌رى ده‌ستپێكرنا ئه‌نفالا به‌هدینان ب چه‌ند رۆژه‌كێن كێم ئه‌م ژ لایێ هنده‌ك دلسۆز و كوردپه‌روه‌ران ڤه ل رۆژا 22/8/1988 ڤه هاتینه ئاگه‌هداركرن كو به‌رى دووماهیا هه‌یڤا هه‌شت دێ هێرشا رژێمێ بۆ ده‌ڤه‌رێن وه هێت واته كریارا ئه‌نفالا هه‌شت دێ ده‌ست پێكه‌ت، ڤێجا ب هه‌ر ره‌نگه‌كێ بیت خوه قورتال بكه‌ن و نابیت ب هیچ ره‌نگه‌كێ په‌یوه‌ندیێ ب حوكمه‌تێ ڤه بكه‌ن و خوه راده‌ستبكه‌ن، چونكو هیچ لێبۆرینه‌ك بۆ هه‌وه نینه و هه‌ر چه‌نده مه كه‌سى نه‌دڤیا كو خوه راده‌ست بكه‌ین.
مه ژى خوه به‌رهه‌ڤكر كو به‌ر ب سنۆرێن توركیا بره‌ڤین و بچین هه‌تاكو ژ مرنێ رزگارببین و ل رۆژا 24/8/1988 كو هینگى ئه‌م د مالا خوه دا 12 كه‌س بووین و ب تنێ مه سێ ده‌وار هه‌بوون و دایكا من ژیێ وێ حه‌فتێ ساڵ بوو و باب ژى ل هه‌شتێ سالیێ بۆرى بوو، واته پیره‌ژن و پیره‌مێر بوون، باب و دایكێن هه‌رچه‌نده دانعه‌مربوون، لێ د وێ هزرێ دا بوون كو دێ كارن ب پێیان هێدى هێدى به‌ر ب وان چیایێن بلند و دۆل و نهالێن ئاسى ڤه بهێن و خوه و زارۆیێن خوه ژ مرنێ رزگار كه‌ن، ب هه‌ر حال ب تنێ مه كارى ل وێ مالێ هنده‌ك خارنێ و نڤینێن نڤستنێ ل وان ده‌واران بار بكه‌ین و ل ده‌مێ ئه‌م ل ده‌راڤا شنیێ ده‌رباز بووین و هاتینه به‌رامبه‌ر گوندى ئێكسه‌ر چاڤێن دایكا من ب مالا وێ كه‌فت و دیت كو دێ ئه‌و مالا كو وێ پر ژ دل حه‌ز ژێ دكر هێلیت بێ خودان، قه‌ده‌ما وێ شكه‌ست و نه‌شیا ئێك پێنگاڤ بهاڤێژیت و ئه‌م نه‌چار بووین ئه‌وێ ژى ل سه‌ر بارێ ده‌واره‌كێ سیار بكه‌ین.
بۆ شه‌ڤێ مه خوه گه‌هانده گه‌لیێ بازێ و سپێدێ به‌ر ب چیایى شیرینێ سه‌ركه‌فتین و بۆ گوندێ داویدكا كو دكه‌ڤیته پشتا چیایێ شیرینێ و پاشى بۆ ماسته‌كا و ل رووبارێ بالندا ده‌رباز بووین و د گه‌لیه‌كێ را دچووین و به‌ر ب گوندێ ره‌زگه ل ده‌ڤه‌را رێكانیان كو ب راستى ب هزاران خه‌لك دره‌ڤین و دڤیان گیانێ خوه رزگار بكه‌ن و نالینا زارۆ و دانعه‌مر و نه‌خۆشان بوو، د ڤان كاودانێن زۆر نه‌خۆش و به‌رته‌نگ دا، هزره‌ك بۆ من هات و من گۆت: ئه‌ى خودێ ئه‌ڤى ملله‌تى چ تاوان كرى یه كو ب ڤى ره‌نگى تاوان و جینۆساید به‌رامبه‌ر بهێنه ئه‌نجامدان و كه‌س ژى د هه‌وارا وان دا نه‌هێت.
د شه‌ڤا 28 ل سه‌ر 29/8/1988 و ده‌مژمێر دو و نیڤێ به‌رى سپێدێ بوو، رپه‌رپا ده‌وارێن وان مالێن كو د گه‌ل مه‌دا بوون و ئه‌م ژى رابووینه‌ڤه و مه گۆت: ئه‌ڤه خێره؟، گۆتن: رابن و ئه‌ڤه هێرشا دوژمنى گه‌هشته گه‌لیێ بالندا و داكو خوه رزگار بكه‌ین، ب هه‌رحال ل وێ به‌ره‌سپێده‌یێ ئه‌م به‌ر ب چیایى سه‌ركه‌فتین و بۆ به‌رواریا رێیا گوندێ شه‌توونسى ل ده‌ڤه‌را دۆسكى ژۆرییان، ئها ل ڤێره من چه‌ند دیمه‌نه‌كێ پر ئێش و ژان دیت كو ئه‌وژى مرۆڤه‌ك هات یێ هه‌لوه‌شیایى و خه‌م و كۆڤان د ناڤ چاڤێن وى را د دیار و به‌رچاڤ بوون و ئه‌ز ژى یێ راوه‌ستایى و من دڤیا بێهنه‌كا سه‌رپێ بده‌م، ئه‌وى مرۆڤى پرسیاركر: ئه‌رێ هه‌وه چ هه‌سپ نه‌دیتنه؟، من ژى گۆتێ: خێره مام، چاڤێن وى ته ژى رۆندك بوون و گۆت: بابێ من ل سه‌ر هه‌سپى یێ گرێدایه و نزانم چ ب سه‌رى هاتى یه؟ نزانم هه‌سپ زڤریه‌ڤه و خوه ل رووبارى دایه یان د بن داره‌كێ را ئاسى بوویه!! ئه‌و چوو و ئه‌م ژى یێن به‌ر ب گوندێ نێروا سیتۆیێ ئۆره‌مارى ڤه دچین و ل رۆژهه‌لاتێ گه‌هشتینه گوندێ زێوه‌ى كو نیڤه‌ك به‌ر ب سنۆرێ كوردستانا توركیا دكه‌ڤیت و نیڤا دى به‌ر ب سنۆرێ كوردستانێ ڤه‌یه.
ل سپێده‌هیا 29/8 ئه‌و خه‌لكێ زۆر كو دڤیان ل گوندێ زێوه‌ی بێهنا خوه ڤه‌بده‌ن، پرۆپاگنده‌ك هاته گێران ژلایێ چه‌ند كه‌سێن به‌رژه‌وه‌ندیخواز و دوور ژ هه‌ر بهایه‌كێ مرۆڤایه‌تیێ كو گۆتن “سۆپایێ عیراقێ و جاش گه‌هشتنه وه” ،خه‌لك و زارۆیێن وان كره قێژى و هه‌وار به‌ر ب ناڤ عه‌ردێ كوردستانا توركیا ره‌ڤین و چووینه د ناڤ عه‌ردێ كوردستانا توركیا دا و هه‌ر چه‌نده جه‌ندرمه هاتنه د رێیا مه‌دا و زۆر هه‌ولدا كو نه‌چین، به‌لێ كى دێ كاریت رێ ل ڤێ هژمارا زۆرا خه‌لكى گریت كو مینا رۆژا حه‌شرێ بوو و ب هه‌ر ره‌نگه‌كێ بیت مه خوه گه‌هانده گوندێ ئه‌رتووش ل ناڤ ئاخا كورستانا توركیا دا.
دیسا سه‌رهاتیه‌كا راسته‌قینه كو مه دیتى، ئه‌وژى كو ده‌مێ وه‌لاتیه‌كێ خه‌لكێ ده‌ڤه‌را به‌رێ گاره‌یى دهێت و كۆمه‌كا زارۆیان هه‌بووینه و زۆربه‌یا وان ژى نه د وى ژیى دا بوون كو بكارن ئه‌و رێیا دوور و درێژ و یا ب ترس و سه‌هم ب پێیان بهێن، له‌وما نه‌چار دبیت كچه‌كا خوه ل شه‌ڤێ و د رێ بجه بهێلیت، مه‌فره‌زه‌كا حزبا شیوعى یا كوردستانێ سه‌رهه‌لى ڤێ زارۆیێ ل وێ شه‌ڤا تارى دبیت كو نالینا وێ یه و یا دگریت، ئێك ژ پێشمه‌رگه‌هێن وێ مه‌فره‌زێ چه‌كێ خوه دهاڤێژیت و ئه‌وێ كچى هه‌لدگریت و دگه‌ل خوه دئینیت و دهێته گوندێ ئه‌رتووش و ئه‌وێ كچێ ته‌سلیمى مالا شه‌عبان هه‌رنى دكه‌ت كو ئه‌و ژى ماله‌كا ئاواره و ده‌ربده‌ر بوو، پشتى بۆرینا حه‌فتیه‌كێ بابێ كچێ ل نك زارویێن شه‌عبانى را ده‌رباز دبیت و كچا وى دكه‌ته قیرَى و هه‌وار گازى دكه‌ت باب باب ب راستى دیمه‌نه‌كێ تراجیدى بوو، بابێ كچێ دهێته نك شه‌عبانى، شه‌عبان تۆره دبیت و پرسیارێ ژ وى كه‌سى دكه‌ت و دبێژیتێ: ته چ وژدان هه‌بوویه و تو ڤێ زارۆیا ساڤا و ل شه‌ڤا تارى ل رێیێ و بێخودان بهێلى؟، ئه‌و ژى دبێژیت: باوه‌ر بكه ب من نه‌دهات، چونكو من دو هه‌لگرتبوون و دایكا وێ ژى ده‌ستێ دوویان د ده‌ستى دا بوو.
ل دووماهیێ دبێژین چه‌ند خزمه‌تا كه‌سوكارێن ئه‌نفالكریێن ده‌ڤه‌را به‌هدینان بهێته‌كرن هه‌ر كێمه چونكو ب سه‌روه‌ت و مال و گیان ڤه پشته‌ڤانێن شۆره‌ش و پێشمه‌رگه‌یان بوو هه‌كه ئه‌و نه‌بان شۆره‌ش نه‌دبوون، لێ مخابن وه‌كى پێدڤى گرنگى ب كه‌سوكارێن ئه‌نفالكریێن به‌هدینان نه‌هاتیه‌دان و هه‌تا نها ژى یه‌ك ته‌رمێ وان نه‌هاتیه زڤراندن بۆ كوردستانێ و ده‌ڤه‌را به‌هدینان، هزاران سلاڤ ل سه‌ر گیانێ پاكژێ ئه‌نفالكریێن ده‌ڤه‌را به‌هدینان و ته‌ڤایا شه‌هید و ئه‌نفالكریێن كوردستانێ بن.
نووترين نووچه
- ب گرنگی دنێڕینە پێگەهێ هەرێما كوردستانێ
- مەسرور بارزانی و بەربژارێ ترەمپی بۆ شیرەتكارییا ئاسایشا نیشتمانییا ئەمریكی دووماهی پێشهاتان گەنگەشە دكەن
- ژ ناڤچوونا رژێما ئەسەدی و دەرئەنجامێن وێ دێ كارتێكرنێن ئەمنی و سیاسی ل سەر ئیراقێ هەبن
- دادگەهەكا بەغدا سكالایەكا وەزارەتا پەترۆلا ئیراقێ دژی هەرێمێ رەتكر
- سەرۆك بارزانی: ئێكەتییا ئافرەتێن كوردستانێ ئەزموونەكا سەركەفتییا پشكدارییا ئافرەتێ یە د ژیانا سیاسی و جڤاكییا كوردستانێ دا
- ئێكەتییا ئافرەتان هەڤپشكەكا سەرەكییە د گەشەپێدانا جڤاكەكێ مەدەنیدا
- ئێكەتییا ئافرەتان قوتابخانەیا پێگەهاندنا چەندین ئافرەتێن خودان شیان و سەركردە یە
- مەسرور بارزانی و وەزیرێ دەرڤەیێ بەحرەینێ پێشڤەبرنا پەیوەندییان د وارێن جۆرا و جۆر دا گەنگەشەكر
- میسال ئالۆسی: سەرۆك بارزانی دشێت هەموو ئالیێن سیاسی كۆمڤەكەت و چارەسەرییا كێشەیان بكەت
- سەرۆك بارزانی و شێخ عەبدوللا حمێدی عەجیل یاوەر رەوشا دەڤەرێن سنۆری یێن ئیراقێ و سووریێ گەنگەشەكر
سالح محه‌مه‌د ته‌يرۆ
سه‌رهاتیه‌كا بارزانیێ نه‌مر ل گه‌ل مالباتا شه‌هیده‌كێ قه‌هره‌مان
ساڵح محه‌مه‌د ته‌یرۆ
رێزگرتن ل مالبات و كه‌سوكارێن شه‌هیدێ راسته‌قینه ئه‌وێ گیانێ خوه یێ پیرۆز كرى یه قوربانى ل پێناڤ ئاخا پیرۆزا كوردستانێ ئه‌ركه‌كێ ئه‌خلاقى و ئاینى و نه‌ته‌وه‌یى و نیشتیمانى یه، ژبه‌ركو ئه‌م هه‌مى قه‌ردارێن وه‌لاتێ خوه بین شه‌هید قه‌ردارنى یه، له‌وما هه‌رده‌م بارزانیێ نه‌مر ب چاڤه‌كێ بلند به‌رێ خوه ددا كه‌سوكارێن شه‌هیدى و هه‌رده‌م ژى كه‌ره‌م دكر كو هه‌رچیا ئه‌م بۆ شه‌هیدى بكه‌ین، ئه‌م نه‌شێن مافێ وى ل سه‌ر خوه راكه‌ین، چونكو خوین یا دایى و گیانێ خوه یێ كریه قوربانى.
محه‌مه‌د شه‌ریف حه‌جى محه‌مه‌د شه‌ریف ئاكره‌یى كو ل سالا 1944 ێ ژدایكبوویه و ل سالا 1961 بوویه پێشمه‌رگه و ل ده‌ستپێكا سالا 1964 ل به‌ر دلسۆزى و باوه‌رى و كوردپه‌روه‌رى و وه‌لاتپارێزیا وى بوویه نێزیكترین كه‌سێ بارزانى نه‌مر بوویه و بۆ سه‌رێ زێده‌تر ل (11) سالان و ئه‌و ئه‌سپێ كو ل دۆل و نهالێن كوردستانێ بارزانیێ نه‌مر هاتنوچوون پێ دكر وه‌كو ئه‌مانه‌ته‌كێ پاراستى وه‌ردگریت و پاراستن و به‌رهه‌ڤكرنا ڤى ئه‌سپى بۆ هه‌ر جهه‌كێ بیت بۆ بارزانیێ نه‌مر دكه‌ڤیته ستویێ محه‌مه‌د شه‌ریف ئاكره‌یى دا.
ب هه‌ر حال محه‌مه‌د شه‌ریف ئاكره‌یى كو نوكه ژى یێ ساخه و د ژیان دا مایه كو فه‌ره چه‌ندین دیدار ل گه‌ل بهێته سازكرن ل دۆر ژین و ژیارا بارزانى و سه‌ره‌ده‌ریا وى و ته‌ڤایا خه‌سله‌تێن وى یێن مرۆڤایه‌تى ل گه‌ل ته‌خ و چینێن خه‌لكى و نفشێ نوى هه‌تاكو پتر سه‌رهه‌لى وێ زه‌حمه‌ت و ماندیبوونا بارزانى ببن.
هه‌ڤال و هه‌ڤسه‌نگه‌رێ بارزانیێ نه‌مر محه‌مه‌د شه‌ریف وه‌ها بۆ من ڤه‌گێرا و گۆت: ل به‌ریا نیڤرۆیه‌كێ من ژى قه‌ستا حاجى عومران كر و به‌رێ خوه د ده‌مێ كو پیره‌مێره‌كێ دانعه‌مر یێ روونشتى یه و چوویه د هزر و خه‌یالان دا و مرۆڤێ شه‌پرزه و ئالۆز یێ دیاره و من ژى پرسیارا وى دانه‌عه‌مرى كر: ته خێره مام و تو هۆ یێ ئالۆز و خه‌مگین و پیره‌مێرى ئاخینكه‌ك هه‌لكێشا و ب چاڤێن رۆندك ڤه بۆ من ڤه‌گێرا و گۆت: ل ئه‌ڤ ساله سالا (1965) كوڕێ من پیِشمه‌رگه‌كێ قه‌هره‌مان بوو و سه‌ر ب هێزا حاجی بیرۆخى ڤه بوو و ل چیایێ زۆزك هاتیه شه‌هیدكرن و شه‌ش زارۆ ل پاش خوه هێلاینه و بارودۆخێ ژیانا وان ژى یا به‌رته‌نگ و نه‌خۆشه، ئه‌ز ژى وه‌كى بابێ شه‌هیدى كو پیره‌مێره‌كێ دانعه‌مرم من قه‌ستا جهێن په‌یوه‌ندیدار كریه ل حاجى عومران بۆ درێژكرنا ده‌ستێ هاریكاریێ تاكو بكارم وان زارۆیێن شه‌هیدى ب خودان بكه‌م و ل ده‌مێ ئه‌ز هاتى من سێ دینار ڤێ بوون و ئه‌ڤه چه‌ند رۆژه ژى ل ڤێره مام و ئه‌و هاریكاریا بۆ زارۆیێن شه‌هیدى هاتیه‌كرن زۆر یا كێمه و خوزیان دخوازم من بارزانى دیتبا. ب راستى ده‌مێ من ئه‌ڤ دیمه‌نێ پڕ ئێش و ژان دیتى و گه‌له‌ك پێ دلته‌نگ بووم و من ژى گۆته بابێ شه‌هیدى ته دڤێت بۆته چ بكه‌م و سۆز بیت یامن شیان هه‌بن درێغیێ بۆته نه‌كه‌م و هیچ منه‌ت ژى تێدا نیه؟ بابێ شه‌هیدى سه‌رێ بلند ژێهه‌ل كر و به‌رێ خوه دا من و گۆت: خارزا هه‌كه ته پێ دروست ببیت من بگه‌هینه بارزانى. محه‌مه‌د شه‌ریفى درێژه ب ڤێ سه‌رهاتیا راسته‌قینه دا و گۆت: من ژى گۆتێ دێ رێیه‌كێ نیشا ته‌ده‌م، به‌لێ ل چ جهان به‌حسێ من نه‌كه‌یى و وى ژى گۆت: دێ تۆ ڤێ كه‌ره‌مێ ل گه‌ل مامێ خوه بكه و سۆزبیت دنێڤبه‌را مه‌دا بیت، من ژى ئه‌و بابێ شه‌هیدى ل گه‌ل خو بره نك حازم ئاكره‌یى كو هینگى، ئه‌و ژى ل سه‌ر بهێته لا بارزانى بوو و من ژى ته‌فسیل بۆ كاك حازمى گۆتن و وى ژى سكالایه‌كا (عه‌ریزه‌یه‌كا) رێكوپێك بۆ بارزانى نڤیسى ل سه‌ر ناڤێ بابێ شه‌هیدى و هه‌تا نوكه ژى برگه‌یه‌كا وێ سكالایێ ل بیرا منه ده‌مێ تێدا هاتى و گۆتیه بارزانى بویكا ته یا د مالا من دا و شه‌ش نه‌ڤیێت جه‌نابێ ته ژى هه‌نه و دبرسینه، پاش من گۆته وى بابه شه‌هیدى دێ چى یه فلان جهى ل سه‌ر رێیا بارزانى و ل پشتى بانگێ ئیڤارى بارزانى دێ هێته خارێ و سكالایا خوه بده‌ڤێ و جوامێرى ئه‌وا مه گۆتیێ جێ به‌جێ كر و ئه‌ز ژى چوومه‌ڤ باره‌گایێ بارزانى.
پشتى ئێڤارى بارزانى هاته خارێ بۆ باره‌گایێ حاجى عومران و ئه‌و بابێ شه‌هیدى ژى یێ ل سه‌ر رێیێ و ل ده‌مێ پاسه‌وانێن بارزانى دیتین ئێكسه‌ر قه‌ستا وى پیره‌مێرى كر و ل وێ گه‌نگه‌شه‌یێ دا بارزانى چاڤ ب پیره‌میرى دكه‌ڤن و دبێژیته پاسه‌وانا: ((بهێلن دا بهێته نك من و نه‌بنه رێگر ل خه‌لكى …))، ل ده‌مێ ئه‌و بابێ شه‌هیدى گه‌هشتى یه نك بارزانى و بارزانى خێرهاتن و پرسیارا حال و ئه‌حوالێ وى كرى بابێ شه‌هیدى سكالایا خوه ته‌سلیم ب بارزانى كر، ئاكره‌یى درێژه ب گۆتنا خوه‌دا و ئاخینه‌كه‌ك هه‌لكێشا و گۆت: بارزانى ژى سكالایا بابێ شه‌هیدى ڤه‌خواند، ئێكسه‌ر ل سه‌ر به‌ره‌كێ روونشته‌خارێ و ده‌مه‌كێ ما بێ ده‌نگ و هه‌ر به‌رێ خوه دا نامه‌یا بابێ شه‌هیدى، ئینا عه‌لى خه‌لیل پاسه‌وانێ بارزانى پرسیار ژ بارزانى كر و گۆتێ قوربان ئه‌ڤه چ سكالا بوو و داخوازا مامى چى یه؟ بارزانى كه‌ره‌م كرو گۆت: كاك عه‌لى باوه‌ر بكه هندى ئه‌ز دكه‌م نزانم دێ چاوا به‌رسڤا ئه‌ڤى بابێ شه‌هیدى ده‌م، چونكو یێ دبێژیت بویكا ته و شه‌ش نه‌ڤیێن ته یێن خانى دا و بارودۆخێ ژیانا وان زۆرێ نه‌خۆشه، ئینا بارزانیێ نه‌مر گۆته بابێ شه‌هیدى ل گه‌ل من وه‌ره دا بچینه باره‌گایى، پشتى گه‌هشتینه باره‌گایێ بارزانى ئاگه‌هداریا جهێن په‌یوه‌ندیدار كرن و ل وێرێ به‌رهه‌ڤكرن و گۆته وان هوون ڤى مرۆڤى دناسن؟ وان ژى گۆت: به‌لێ … بارزانى كه‌ره‌مكر و گۆت: هه‌رن (500) پێنج سه‌د دینارا و ده‌بانجه‌یه‌كێ بۆ زارۆكێن شه‌هیدى بینن و برنۆیه‌كا نوو ژى بده‌نه بابێ شه‌هیدى و هه‌یڤانه ژى ئه‌رزاقێ ڤێ مالباتا شه‌هیدى بچیته مالا وان و جاره‌كا دى ئه‌ڤ مالباتا شه‌هیدى قسویر حال نه‌بن و هه‌ر چیا ئه‌م بۆ شه‌هیدان بكه‌ین ناگه‌هیته دلۆپه‌كا خوینا شه‌هیدى. پشتى كو ئه‌و گۆژمه و ده‌بانجه و برنۆ ته‌سلیم ب وى بابه شه‌هیدى كرین، بابێ شه‌هیدى به‌رێ خوه داڤ بارزانى و گۆت: قوربان من چه‌ند كورێن دى و نه‌ڤى و ئه‌ز بخوه ژى یێ به‌رهه‌ڤم كو گیانێ خوه بكه‌مه قوربانى و شه‌هید ببم، ئها ب ڤى ره‌نگى بارزانیێ نه‌مر سه‌ره‌ده‌رى ل گه‌ل ته‌ڤایا ته‌خ و چینێن كوردستانێ دكرن و نه‌مازه مالبات و كه‌س و كارێن شه‌هیدان.
حزب بۆ ئارمانجێن نه‌ته‌وى و نیشتیمانى دهێنه ئاڤاكرن نه‌ك بۆ ..!
ساڵح محه‌مه‌د ته‌یرۆ
ل هه‌ر وه‌لاته‌كێ دیمۆكراسى و پێشكه‌فتى دا حزب دهێنه ئاڤاكرن ل پێناڤ خزمه‌تكرنێ و ئامرازێن په‌یوه‌ندیانه د نێڤبه‌را هه‌ڤوه‌لاتى و ده‌ستهه‌لاتێ دا، ل وه‌لاتێن دكتاتۆرى ژى دا حزب دهێنه ئاڤاكرن و ده‌ست ب شۆره‌ش و خه‌بات و تێكۆشینێ دكه‌ن ل پێناڤ گوهۆرینا رژێمێ ل حوكمێ دكتاتۆرى بۆ حوكمێ دیمۆكراسى و ئاشتى و ئازادى و نه‌مانا زولم و سته‌مێ، هه‌لبه‌ت ل عیراقێ ژى هه‌ر زوى ب زوى هه‌ست ب ڤێ زولم و سته‌مێ هاته‌كرن ئه‌وا ل گه‌لێ كوردستانێ دهێته‌كرن، له‌وما بنه‌مالا بارزان ل ده‌سپێكا چه‌رخێ بیستێ ده‌ست ب بزاڤ و شۆره‌شێ كر و قوربانى ژى ل پێناڤ دان كو ل سالا 1914 شێخ عه‌بدولسه‌لام بارزانى پاتێ سێدارێ ماچیكر حه‌تاكو گه‌لێ كوردستانێ ب سه‌ربه‌ستى و سه‌رفیرازى بژیت، هه‌روه‌تۆڤ شۆره‌شێن بارزان یا ئێكێ و دوویێ و پاش پارتى دیمۆكراتى كوردستان ل سه‌ر ده‌ستێ بابێ روحى یێ نه‌ته‌وا كورد مسته‌فا بارزانى ل 16/8/1946 ئاڤاكر و به‌ره‌ڤانیه‌كا بێ وێنه ژى ل كۆمارا كوردستانێ ل رۆژهه‌لاتا كوردستانێ كر و بۆ زێده‌تر ل یازده سالان ژى ئاواره‌یى ئێكه‌تیا سۆڤیه‌تا به‌رێ بوو، پشتى شۆره‌شا 14 ته‌موزێ ل سالا 1958 ب سه‌ركه‌فتى و زڤرینا بارزانیێ نه‌مر ل گه‌ل هه‌ڤسه‌نگه‌رێن خوه ل ئێكه‌تیا سۆڤیه‌تێ و هه‌ول و بزاڤێن وى ب زمانێ دایه‌لۆكێ و ل سه‌ر مێزا گفتوگۆیان بۆ چاره‌سه‌ركرنا دۆزا ره‌وایا گه‌لێ كورد، لێ جهێ داخێ یه كو رژێما عیراقا وى سه‌رده‌مى بارزانیێ نه‌مر و سه‌ركردایه‌تیا شۆره‌شێ نه‌چاركرن كو شۆره‌شا مه‌زنا ئیلۆنێ ل 11/9/1961 ێ ده‌ست پێ بكه‌ن بۆ به‌ره‌ڤانیكرن ل ئاخا پیرۆزا كوردستانێ.
ب هه‌ر حال حه‌تاكو ژ بابه‌تێ خوه دوورنه‌كه‌ڤین، لێ جهێ داخێ یه كو هه‌ر ل گه‌رمه گه‌رما شۆره‌شا ئیلۆنا مه‌زن گرۆپه‌ك د نێڤ پارتى دیمۆكراتى كوردستان سه‌رهلدا ل دژى ئه‌ڤێ شۆره‌شێ و پیلان ل دووڤ پیلانێ دارێشتن و ل دووماهیێ بوونه چه‌ك هه‌لگرێن رژێمێ و پاش هاتنه ده‌ر بده‌ركرن بۆ ده‌وله‌ته‌كا هه‌ڤسوى .
یا خۆیایه ژى ل پشتى ئه‌و پیلانا نێڤده‌وله‌تى ل دژى شۆره‌شا مه‌زنا ئیلۆنا ل 6/3/1975 ل جه‌زائیر هاتیه واژوو كرن و بو ئه‌گه‌را هنگاڤتنا شۆره‌شێ، ئه‌ڤ هنگاڤتنا شۆره‌شێ پتر بوو فاكته‌ره‌ك بۆ دامه‌زراندنا چه‌ند رێكخراو و لایه‌نێن سیاسى ل كوردستانێ و ل دووڤ دا هه‌ر ئێك ل وان ناڤه‌ك ژى بۆ خوه دانا و بۆ لایه‌نه‌كێ سیاسى یێ كوردستانێ وه‌كى ئه‌و دبێژنه خوه، لێ ئه‌گه‌ر ئه‌م ب وژدانڤه ل سه‌ر خه‌بات و تێكۆشینا هنده‌ك ژ ڤان لایه‌نێن رابوه‌ستین و یا دیار و به‌رچاڤه كو ئارمانجا وان یا سه‌ره‌كى نه‌ك بۆ خزمه‌تكرنا دۆزا ره‌وایا گه‌لێ كوردستانێ بوویه، به‌لكو ژبۆى نه‌هێلانا لایه‌نێ به‌رامبه‌ر واته پارتى دیمۆكراتى كوردستان و بنه‌مالا بارزان بوویه، هه‌ر ل پشتى دامه‌زراندنا وان ده‌ست ب دارێشتنا پلانێن به‌رێ كره‌ڤه و ئاگرێ نه‌گریسێ شه‌رێ براكوژیێ خۆشكر و گه‌شكره‌ڤه و ل ژێرناڤێ بۆ نه‌هێلانا پاشماوێن ئاشبه‌تالا و قیادا موئه‌قه‌ت وه‌كى وان دگۆت و به‌لگه‌ه ل سه‌ر گۆتنا مه شه‌رێ كاره‌ساتا هه‌كارێ و ب ده‌هان شه‌رێن مالوێرانیێ…. هتد.
دیسا هه‌ر ل ناڤه‌ندا سالێن شێستان دا ده‌ست ب دارێشتنا هزرا توندره‌و و ئاڤاكرنا قوتابخانه‌یه‌ك ل سه‌ر ڤێ هزرا توندره‌و ل دژى پارتى دیمۆكراتى كوردستان و بنه‌مالا بارزان كو هه‌تا نوكه ژى ئه‌ڤ خوێندنگه‌ها دوور ل هه‌ستا نه‌ته‌وى و نیشتیمانى و وه‌لاتپارێزى یا به‌رده‌وامه و چه‌ندین گه‌نج و لاو قه‌هره‌مان ژى بوونه قوربانى ڤێ هزرا پیس و چه‌په‌ل كو ئه‌گه‌رێ دارێشتنا ڤێ هزرێ ئه‌و لایه‌نێ سیاسى یه ئه‌وێ مه ل سه‌ر ئاماژه‌پێدایى.
ل دووماهیێ فه‌ره كو ئاماژێ پێ بده‌ین كو حزب ل پێناڤ ئارمانجێن نه‌ته‌وى و نیشتیمانى دهێنه ئاڤاكرن و ئامرازه‌كه دنێڤبه‌ره هه‌ڤوه‌لاتى و ده‌ستهه‌لاتێ دا نه‌ك بۆ چاندنا هزرا دوژمنكارى و توندره‌وى و نه‌مانا لایه‌نێ به‌رامبه‌ر، لێ ل ڤى وه‌لاتى وه‌كى مه د دیرۆكێ دا خواندى و ئه‌م رۆژانه دبینین..!! هه‌ر چه‌نده سه‌ركه‌فتن ل ڤێ هزرێ بده‌ستڤه‌نه‌ئینایه، لێ بووینه ئه‌گه‌را دروستبوونا كاره‌ساتێن مه‌زن بۆ سه‌ر ڤى ملله‌تى و پاشخستنا ئارمانجا سه‌ره‌كى یاكو بزاڤا رزگاریخوازیا كورد یا راسته‌قینه كو خه‌بات و تێكۆشین و قوربانیدان ژێرا كرین و داین ل پێناڤ سه‌رخوه‌بوونا كوردستانێ و ژبلى ژده‌ستدانا ب سه‌دان قه‌هره‌مان و پێشمه‌رگه‌هێن دلسۆز..
كابینا نه‌هێ و به‌رنامێ چاكسازیێ.. لێ فه‌ره ژى ..!
ساڵح محه‌مه‌د ته‌یرۆ
هه‌لبه‌ت ل ڤێره ئه‌م نازڤرینه‌ڤه بۆ دیرۆكا هه‌لبژارتنا خولا په‌رله‌مانى بۆ كابینه‌یا نه‌هێ و سه‌ركه‌فتنا ڤى لایه‌نى و لایه‌نێ هه و ب ده‌ستڤه‌ئینانا پتریا كورسیان، چونكو هه‌ڤوه‌لاتیێ كوردستانى ل ڤێ چه‌ندێ بێزار و تێر بوویه ژبه‌ركو ئه‌ڤه زێده‌تر ژ شه‌ش هه‌یڤان ده‌رباز بوون وهند به‌حسێ ڤێ چه‌ندێ ل راگه‌هاندنێ هاتیه كرن، دیسا هه‌ڤوه‌لاتیێ كوردستانى باش و باش دزانیت كیژ لایه‌ن بسه‌ركه‌فتى یه و كیژ لایه‌ن بوویه ئاسته‌نگ بۆ پێكئینانا حوكمه‌تێ و كیژ لایه‌ن خودانێ بریارا خۆیه و كیژ لایه‌ن بریارا وێ د ده‌ستێن وێ دا نینه و ژ لایه‌نێن دى یێن ده‌ره‌كى وه‌ردگریت، دیسا شاره‌زا بوویه كۆ كیژ لایه‌نى سیاسى یێ كوردستانى باوه‌رى ب پرۆسیسا دیمۆكراسیه‌تێ و هه‌لبژارتنان هه‌یه و كیژ لایه‌نێ سیاسى یێ كوردستانى خوه ب خودان جوگرافیه‌كا مه‌زن و خوه ب خودان هێز و چه‌ك و دیرۆك و زه‌ندوباسك دزانیت و هه‌ر باوه‌رى ب پرسا دیمۆكراسیه‌تێ و هه‌لبژارتنان نینه و ل دووڤ دوئیداره‌یێ دگه‌رهێن حه‌تاكو پێگه‌ها هه‌رێما كوردستانێ به‌رامبه‌ر ده‌رڤه لاواز بكه‌ن و هیڤى و ئۆمێدێن ئاغایێن خوه جێ به‌جێ بكه‌ن! ب هه‌ر حال و ب هه‌ر ره‌نگه‌كێ بیت جهێ خۆشحالیێ یه كو هه‌ر سێ لایه‌نێن برى د هه‌لبژارتنان دا لایه‌نێ ئێكێ پارتى دیمۆكراتى كوردستان و لایه‌نێ دوویێ ئێكه‌تیا نیشتیمانیا كوردستانێ و لایه‌نێ سێیێ بزاڤا گۆڕان رێكه‌فتن بۆ پێكئینانا كابینه‌یا نه‌هێ یا حوكمه‌تا هه‌رێما كوردستانێ و ئه‌و ژى پشتى ب چه‌ندین هه‌یڤان و ب سه‌دان كۆمبوون و بهێنفره‌هیا پارتى دیمۆكراتى كوردستان، لێ زیان ل نیڤه‌كێ بزڤریته‌ڤه قازانج و مفایه و باشه، هه‌ر چه‌نده هه‌ر ئێك ژ ڤان لایه‌نێن سیاسى ئارمانجا وان و ل دووڤ پرۆگرامێ وان ئه‌وه كو به‌رنامه‌یێ چاكسازیێ خالا سه‌ره‌كى یه كو ئه‌ڤه ژى هیڤیا هه‌ر تاكه‌كێ كوردستانى یه یێ دلسۆز و نیشتیمانپه‌روه‌ر. خالا هه‌رى گرنگ و باش د به‌رنامه‌یێ چاكسازیا حوكمه‌تا نوو دا ئه‌وه كو ل دووڤ به‌رنامه‌یێ ڤان هه‌ر سێ لایه‌نێن سیاسى یێن كوردستانى كو ئه‌و ژى رێخستنا هێزا پێشمه‌رگه‌یه و هێزه‌كا نیشتیمانى و دوور ژ ته‌زكیا ڤى لایه‌نى و لایه‌نێ هه و فیفتى فیفتى بهێته ئاڤاكرن و ئه‌ڤ هێزه ببیته هێزه‌كا نیشتیمانى و ل دووڤ پره‌نسیپ و سیسته‌مێ ئه‌كادیمى یێ له‌شكرى یى زانستى بهێته رێخستن و دامه‌زراندن، هه‌لبه‌ت ئه‌ڤه هیڤى و ئومێدا ته‌ڤایا هه‌ڤوه‌لاتیێن كوردستانینه و نه‌مازه ئه‌وێن خودان هه‌سته‌كا نه‌ته‌وى و نیشتیمانى و وه‌لاتپارێزى بن. بێگومان دێ لایه‌نێن سیاسى ژى یێن كوردستانى دێ شانازیێ ب ڤێ پێنگاڤا دره‌نگ هاتیه هاڤێتن كه‌ن. لێ فه‌ره ئه‌م د رێخستنا هێزا پێشمه‌رگه‌هێن كوردستانێ دا ئه‌م خاله‌كێ ژبیر نه‌كه‌ین كو ئه‌و ژى ئه‌وه كو ئه‌م هه‌مى كوردستانى یێن كوردپه‌روه‌ر و وه‌لاتپارێز و نیشتیمانپه‌روه‌ر باش دزانین كو د ناڤ هێزه‌كا پێشمه‌رگه‌هێن سه‌ر ب لایه‌نه‌كێ سیاسى یێ كوردستانى دا ب ده‌هان كه‌س و به‌رپرس و فه‌رمانده یێن خائین و خۆفرۆش و خاكفرۆش هه‌نه و ژمێژه نیه ژى مه‌زنترین خیانه‌ت ئه‌نجام دایى و د بنیات دا ئه‌ڤ كوتله‌یه یان گرۆپه یا دیار و ئاشكرایه كو خیانه‌تكارن و ب ده‌هان به‌لگه‌هێن زێندی ڤه، لێ فه‌ره ل كابینه‌یا نه‌هێ چو ده‌مه‌كێ ئه‌ڤ گرۆپه نه‌بنه جهێ باوه‌ریێ و نه دوور نه نێزیك چو پله و پۆسته‌یه‌كێ و نه‌مازه یێن له‌شكرێ كوردستانێ یێ ئێكگرتى ب ڤان كه‌سانه نه‌هێنه سپاردن و وه‌رگرتن، هه‌ر چه‌نده ل دووڤ پره‌نسیپێن ئه‌خلاقى و ئایینى و نه‌ته‌وى و نیشتیمانى و قانوونێن نێڤده‌وله‌تى ژى پێدڤى بوو ئه‌ڤ گرۆپه هاتبا دادگه‌ه كرن و ببانه په‌ندو عیبره‌ت، لێ ل به‌ر ئه‌گه‌را ل سه‌رى مه ئاماژه دایى نه‌شیان ئه‌ڤان خاكفرۆش و خائینان دادگه‌ه بكه‌ن، لێ خوه دكارن خانه‌نشین بكه‌ن و دوور بێخن ل ده‌ستهه‌لاتا وى لایه‌نى. چونكو ئه‌ڤ جۆره كه‌سێن ب شیرێ خیانه‌تێ هاتینه په‌روه‌رده كرن و بووینه داروده‌ستێن دوژمن و داگیركه‌رێن كوردستانێ مه‌حاله بكارن واز ل ڤى كارێ پیس و چه‌په‌ل بینن و شه‌ڕ ل سه‌ر شۆڤێ بیت باشتره ژ شه‌ر ل سه‌ر تۆڤى بیت. هه‌روه‌توڤ َ پێدڤیه بێژین ئه‌گه‌ر ئه‌و لایه‌نێ سیاسى یێ كوردستانێ باوه‌رى ب پرۆسا دیمركراسیه‌تى و هه‌لبژارتنان و ئه‌نجامێن وان نه‌بیت باشتره ئه‌وه داخوازا هه‌لبژارتنان نه‌كه‌ن و مینا عه‌شیره‌تێن به‌رێ كێشه‌یێن خوه چاره‌سه‌ربكه‌ن، دیسا به‌س بیت كو هوون خه‌لكى ب ده‌روونى و جه‌سته‌یى ب بانگه‌شه‌یێن هه‌لبژارتنان ماندى بكه‌ن و ژبلى وان خه‌رجیاتێن مه‌زن هوون لێ دمه‌زێخن، ژبه‌ر كو ئه‌و لایه‌نێ سیاسى و هه‌ر بێ شه‌رم و په‌رده دبێژیت: ئه‌گه‌ر ئه‌م ئێك كورسى ژى بینین ئه‌م یێن هه‌یى واته ئه‌م ده‌ستهه‌لاتێ ناده‌ینه‌ڤ كه‌س یان ژى دێ بینه دو ئیداره كو ئه‌ڤه ژى پیلانا دوژمن و داگیركه‌رێن كوردستانێ یه. دیسا خاله‌ك دن هه‌یه فه‌ره مرۆڤ ئاماژێ پێ بده‌ت كو ئه‌و ژى بۆچى رژد بوون ل سه‌ر دانانا جێگرێ دوویێ یێ سه‌رۆكێ هه‌رێما كوردستانێ كو ئه‌و ژى یێ وان بیت؟ مه‌به‌ستا وان ئه‌و نیه كو پتر خزمه‌تا هه‌ڤوه‌لاتى بهێته‌كرن، به‌لكو ئه‌وه كو ئه‌ڤ جێگره وێ ئیدارا وان برێڤه ببه‌ت نه‌ك سه‌رۆكێ هه‌رێمێ كو یێ پارتى دیمۆكراتى كوردستانه كو چاوا ل كابینه‌یێن بۆرى و ئه‌ز یێ پشتراستم ژ ئه‌ڤێ و یێن پشتى ڤێ ژى ده‌ستهه‌لاتداریا سه‌رۆكێ هه‌رێمێ و یێ حوكمه‌تا هه‌رێمێ هندى د ده‌ستێن پارتى دا بیت ل دێ گه‌له‌یى ده‌رباز نابیت و بلا ئه‌م خوه خه‌شیم نه‌كه‌ین، له‌وما پێشنیار دكه‌ین ل سه‌رۆكێ هه‌رێما كوردستانێ و سه‌رركێ حوكمه‌تا هه‌رێما كوردستانێ سه‌ره‌ده‌ریا و بریار و فه‌رمانێن وه پرۆژه و خزمه‌تگوزارى بۆ وێ ده‌ڤه‌رێ بلا ل دووڤ جیبه‌جێكرنا بریاران و فه‌رمانێن وه دابیت و هه‌ر كه‌سێ نه‌رازى ژى بلا بچیت پرسیار ب وى لایه‌نێ سیاسى بكه‌ت ئه‌وێ بوویه فاكته‌رێ ڤێ چه‌ندێ.
هه‌رێما كوردستانێ و پارتى كرێكارێن كوردستانێ
ساڵح محه‌مه‌د ته‌یرۆ
ئه‌گه‌ر هنده‌ك بزڤرینه‌ڤه بۆ دیرۆكا ئاڤاكرنا پارتا كرێكارێن كوردستانێ (پ .ك. ك) كو هه‌ر ل سالا (1978) ل سه‌ر هزرا ماركسى لینینی هاتیه ئاڤاكرن و ل هه‌مان سال دا و ل كۆنگرێ ئێكێ و ب به‌رهه‌ڤبوونا (23) ئه‌ندامان ناڤێ خوه گوهۆرى و كره پارتى كاركه‌رێن كوردستانێ (پ.ك .ك) و ل سالا 1984ده‌ست ب شه‌رێ چه‌كدارى ل دژى كۆمارا توركیا كر، هه‌ر چه‌نده ل ده‌سپێكا وێ و ب هه‌سته‌كا نه‌ته‌وى هاتنه د قادا خه‌باتێ دا و درووشمه‌كێ بلند ژى بلندكر كو ئه‌و ژى سه‌رخوه‌بوونا كوردستانا مه‌زن بوویه و ب هزاران ل گه‌نج و لاوێن كوردستانێ بۆ ڤێ مه‌به‌ستا نه‌ته‌وى و نیشتیمانى و ب باوه‌ریه‌كا پاقژ و موكم په‌یوه‌ندى ب رێخستنێن وێ كرن و هنده‌ك ژى بوونه گه‌ریلا.
هه‌ر چه‌نده ل ده‌سپێكا هه‌لگیرساندنا چه‌كداریا وان گه‌له‌ك لایه‌نێن سیاسى یێن كوردستانێ و نه‌مازه پارتى دیمۆكراتى كوردستانێ ده‌رگه‌هێن باره‌گایێن خوه ل سه‌ر سنۆران بۆ ڤه‌كرن و ل دووڤ شیانێن خوه یێن وى سه‌رده‌مى بوونه پشت و په‌نا یێن وان، لێ جهێ داخێ یه كو ل جهێ به‌رسڤا وان چاكیان و پالپشتیێ بده‌نه‌ڤه به‌رامبه‌ر ب پارتى دیمۆكراتى كوردستان چه‌ندین كادرێن ڤێ پارتى ل مه‌فره‌زه‌كێ دا ل سالێن هه‌شتیان ژ لایێ وانڤه دهێنه‌گرتن و هه‌تا نهۆ ژى دبێ سه‌روشوونن واته هه‌ر ل ده‌سپێكا دامه‌زراندنا ئه‌ڤێ پارتا كاركه‌رێن كوردستانێ باوه‌رى ب دۆزا ره‌وایا گه‌لێ كوردستانێ نه‌بوویه و ل دژى پرسا نه‌ته‌وى ونیشتیمانى و دیمۆكراسى و بۆچوونێن جودا جوودا بویه و ئه‌گه‌ر ئه‌ڤ پرس و بۆچوونه د به‌رژه‌وه‌ندیا گه‌لێ كوردستانێ ژى دا بن، دیسا ل دژى لایه‌نێن دى یێن سیاسى یێن كوردستانا باكوۆ راوه‌ستاینه و براكوژى ژى دگه‌ل دا ئه‌نجامدایه و هه‌ر كه‌س و لایه‌نێ دگه‌ل هزرا ئاپۆچى دا نه‌بیت ب خیانه‌تكار ژلایێ وانڤه دهێته هژمارتن، چونكو پارته‌كه باوه‌رى ب چ هزرێن دى نینه و پارته‌كا تاكره‌وى یه.
ئه‌گه‌ر مرۆڤ ب هوورتر ل سه‌ر سه‌ره‌ده‌ریا پارتا كه‌ركه‌رێن كوردستانێ رابوه‌ستیت كو هه‌ر ل ده‌سپێكا وێ هه‌تا نوكه نه‌شیاینه ئێك گوند ل كوردستانا باكۆر رزگار بكه‌ن و ژبلى نه‌شیاینه ڤى ئه‌ركى ئه‌نجامبده‌ن و د هه‌مان ده‌م دا بووینه فاكته‌رێن سه‌ره‌كى بۆ چوولكرن و وێرانكرنا ب هزاره‌ها گوندێن كوردستانا باكۆر، هه‌روه‌تۆڤ هه‌ر ل پشتى سه‌رهلدانا جه‌ماورێ كوردستانا باشۆر ل سالا 1991 ێ و هه‌لبژارتن و پێكئینانا په‌رله‌مانێ كوردستانێ و حوكمه‌تا هه‌رێما كوردستانێ ئه‌ڤ (پ.ك .ك) نه‌ك بوونه پالپشتین حوكمه‌تا هه‌رێما كوردستانێ به‌لكى ب فیتا دوژمن و داگیركه‌ران ل دژى ئه‌ڤێ ئه‌زموونا دیمۆكراسى راوه‌ستان و شه‌ر ژى ل سالا (1992 حه‌تا دووماهیا سالا 1999) ل سه‌ر خه‌لكێ هه‌رێما كوردستانێ سه‌پاند و ب سه‌دان پێشمه‌رگه و هه‌ڤوه‌لاتیێن باشۆرێ كوردستانێ ب ده‌ستێن وان هاتنه شه‌هیدكرن و برینداربوون و ژبلى ڤێ چه‌ندێ حه‌تا نوكه ژى ل گه‌ل بیت زێده‌تر ل (450) گوندێن كوردستانا باشور ل به‌ر وان هاتینه چۆلكرن كو خه‌لكێ ئه‌ڤان گوندان نكارن قه‌ستا گوندێن خوه بكه‌ن كو ئه‌ڤێ ژى زیانێن خوه یێن چاندنێ و ئابوورى و ئاڤه‌دانیا كوردستانێ هه‌نه.
ل ڤێ سه‌یرتر ئه‌وه خودانێ مالێ مال لێ حه‌رامه و هه‌ر كه‌سێ ب سه‌ره‌دان ژى قه‌ستا گوندێ خوه و ره‌زوباغ و بیستانێ خوه بكه‌ت تڤیا مووله‌تێ ژ گه‌ریلایێن ڤێ پارتا كاركه‌رێن كوردستانێ وه‌ربگریت و ژبلى وه‌رگرتنا گۆمرك و باجا، ل ڤێره چه‌ند پرسیار سه‌رێ خوه هه‌لدده‌ن، ئه‌رێ رزگاركرنا دیاربه‌كر و شه‌رناخ و وانێ و ماردینێ و باژێركێن دى یێن كوردستانا باكۆر كو نێزیكى (21) پارێزگه‌هن ب گوندێن خوه‌ڤه دێ ل گاره و مه‌تین و قه‌ندیلى و ناڤ گوندێن كوردستانا باشۆر را دێ هێنه رزگاركرن.
دیسا پێنگاڤه‌كا دى كو دگه‌ل پرسا نه‌ته‌وى ون یشتیمانى و ل ڤى چه‌رخێ پێشكه‌فتنێ و پرسا دیمۆكراسى ناگونجیێن كو ئه‌و ژى هنارتنا هزرا ئاپۆچى (تصدیر الفكر الابوچى) بۆ پشكێن دى یێن كوردستانێ كو ئێكه ژ ئارمانجێن پارتا كاركه‌رێن كوردستانێ بوویه و حه‌تا ئاسته‌كێ ژى شیاینه ڤێ ئارمانجێ بگه‌هینن بۆ نموونه دامه‌زراندنا ئێكه‌تى پاراستنى گه‌ل (یه‌په‌كه) بۆ كوردستانا رۆژئاڤا و ته‌ڤگه‌ر و یه‌په‌شه و یه‌په‌ژه بۆ كوردستانا باشۆر و پاك بۆ كوردستانا رۆژهه‌لات واته ئه‌ڤێ پارتى ژبلى هزرا تاكره‌وى یا ئاپۆچیان باوه‌رى ب هه‌ستا نه‌ته‌وى و نیشتیمانى و هزره‌كا دى نینه و ب تنێ دڤێن ئه‌و ده‌ستهه‌لات بن كو ره‌نگه ئه‌ڤه هزره ژى ژلایێ دوژمن و داگیركه‌رێن كوردستانێ بۆ هاتبیته دارێشتن، هه‌لبه‌ت ئارمانجا سه‌ره‌كیا داگیركه‌رێن كوردستانێ ژى هه‌ر ئه‌ڤه بوویه پتر پارچێن كوردستانێ بهێنه دابه‌شكرن و ملله‌تێ كورد نه‌گه‌هیته مافێن خوه یێن ره‌وا. هه‌ر ب هنارتنا ئه‌ڤێ هزرێ بوو ئه‌گه‌را هندێ كو چه‌ندین گه‌نج و لاوێن ڤان پارچێن كوردستانێ په‌یوه‌ندیێ ب وانڤه بكه‌ن یان ژى ب هه‌ر ره‌نگه‌كێ بیت ئه‌ڤان گه‌نج و لاوان بۆ خوه رابكێشن و ل قوتابخانه‌یا ئاپۆچیان په‌روه‌رده بكه‌ن و ل ڤێ ده‌ڤه‌رێ و ده‌ڤه‌را هه ب هه‌ده‌ر ب كوشتن بده‌ن و پشتى بۆرینا ب ده‌هان ساڵان ئاگه‌هداریا كه‌سوكارێن وان بكه‌ن كو كور و كچێن وه گیانێ خوه كریه گۆرى.
ڤێجا فه‌ره كو پارت و لایه‌نێن سیاسى یێن هه‌رێما كوردستانێ ل باشۆرێ كوردستانێ چاڤێن خوه ڤه بكه‌ن و باش د هزرا ڤێ پارتا كاركه‌رێن كوردستانێ بگه‌هن كو ژبلى زیان گه‌هاندنا په‌كه‌كێ بۆ دۆزا ره‌وایا گه‌لێ كوردستانێ هیچ مفایه‌كێ دى تێدا نیه و پێدڤى یه كابینا نوو یا حوكمه‌تا هه‌رێما كوردستانێ سنۆره‌كێ ژى بۆ دابنێن تاكو خه‌لكێ مه بزڤریته‌ڤه سه‌ر گوندێن خوه وده‌ست ب ئاڤه‌دانكرنا گوندان بهێته‌ڤكرن و ئه‌ڤ پارته ژى نه‌بیته فاكته‌ره‌ك كو حه‌فتیانه خه‌لكێ سڤیل یێن گوندێن كوردستانێ ب فرۆكێن رژێما توركیا شه‌هید نه‌بن و رژێما توركیا ژى ئه‌ڤێ پارتێ نه‌كه‌ته به‌لگه‌هه‌ك بۆ ئاگربارانكرنا هه‌ڤوه‌لاتیان.
كاره‌ساتا ئێكێ شوباتێ تاوانه‌كا مه‌زنه
ساڵح محه‌مه‌د ته‌یرۆ
به‌ریا (15) سالان و ل رۆژا 1/2/2004 ده‌ستێ ره‌شێ تیرۆرى گه‌هشته هه‌ڤلێرا پایته‌خت و هه‌ڤلێرا مرۆڤ په‌روه‌ریێ و پێكڤه‌ژیانێ كو د ئه‌نجامدا هژماره‌یه‌كا سه‌ركرده‌یێن قه‌هره‌مان و هه‌ڤوه‌لاتیێن بێگونه‌ه ل باره‌گایێن لقێ2 یا پارتى دیمۆكراتى كوردستان و مه‌لبه‌ندێ3 یێ ئێكه‌تیا نیشتیمانیا كوردستانێ شه‌هیدبوون و گه‌هشتنه كاروانێ نه‌مران.
هه‌لبه‌ت ئه‌م ل ڤان رۆژان دا یێن (15) مین سالڤه‌گه‌را كاره‌ساتا ئێكێ شوباتێ ئه‌وا ل (/1 شوباتێ/2004) دژین كو ل رۆژا ئێكى جه‌ژنا قوربانى ل هه‌ڤلێرا پایته‌خت یا هه‌رێما كوردستانێ و ل باره‌گایێ لقى2 یێ پارتى دیمۆكراتى كوردستان و مه‌لبه‌ندێ3 یێ ئێكه‌تیا نیشتیمانیا كوردستانى و ل وى ده‌مى كو ل پێشوازیا مێهڤانان دا بوون ب سه‌دان مرۆڤێن كوردپه‌وه‌ر و وه‌لاتپارێز و سه‌ركرده و كادر و پێشمه‌رگه‌هێن ماندى نه‌ناس و هه‌ڤوه‌لاتیێن بێگونه‌ه هاتنه شه‌هیدكرن و ب سه‌دان ژى هاتنه برینداركرن و ئه‌ڤ كاره ب ده‌ستێن مرۆڤكۆژ و تیرۆرستان هاتیه ئه‌نجامدان كو ب راستى ئه‌ڤێ كاره‌ساتا پڕ ئێش و خه‌م و كۆڤان هه‌ستا مرۆڤایه‌تى و ئه‌خلاقى و ئاینى هه‌ژاند، لێ بێگومان ئه‌و گه‌لێ خه‌بات و تێكۆشینێ ل پێناڤ مافێن گه‌لێ خوه دكه‌ت دڤیا قوربانیێ ژى بده‌ت و ئه‌ڤ جۆره كاره‌سات و روودانێن دلته‌زین ژى ل به‌رپه‌رێن دیرۆكا رزگاریخوازیا كوردستانێ و ب خامه‌كێ زێرین دهێنه تۆماركرن.
ئه‌گه‌ر ئه‌م ب وژدان ڤه بزڤزینه‌ڤه بۆ دیرۆكا پڕ سه‌روه‌ریا رزگاریخوازا كوردستانێ دێ بۆ مه ئاشكرا و دیاربیت كو هه‌رده‌م هه‌ولا تیرۆر و ترساندنێ ژ لایێ دوژمنان ڤه ل به‌رامبه‌ر ڤێ بزاڤێ و نه‌مازه سه‌ركردایه‌تیا وێ هاتیه‌كرن و ل وێ باوه‌ریێ دا بوون كو دێ دۆزا ره‌وایا گه‌لێ كوردستانێ لاواز بكه‌ن و ئه‌و هیڤى و ئۆمیدێن چه‌په‌ل یێن دوژمنكارى دێ جێ به‌جێكه‌ن. بێگومان د بزاڤێن ئازادیخوازێن گه‌لێن جیهانێ ژى تووشى ئه‌ڤان كار و كاره‌ساتێن تیرۆر و ترساندنێ بووینه و بووینه قوربانى ب گیان و ماڵ و سه‌روه‌ت و سامان و د ناڤ دا ب سه‌دان كه‌سێن مه‌زن و سه‌ركرده و خه‌لكێ بێگونه‌ه مینا زارۆ و ئافره‌ت و پیر و په‌كه‌فتى شه‌هید بووینه.
ب هه‌رحال گه‌لێ كورد ژى د بزاڤا ئازادیخوازا كوردستانێ مینا گه‌لێن دى تووشى ڤان كارێن تیرۆر و تیرۆرستى بووینه ڤێجا چ یێن ناڤخوه‌یى ده‌ره‌كى یان هه‌رێمى بن، ئه‌ڤه ژى دزڤریته‌ڤه بۆ ڤێ چه‌ندێ كو ب تنێ گونه‌ها گه‌لێ كوردستانى ئه‌و بوویه كو داخوازا مافێن خوه یێن ره‌وا كرى یه و ئه‌گه‌ر نه هیچ گونه‌هه‌كا دى نه‌بوویه. له‌وما زولم و سته‌مه‌كا مه‌زن و تیرۆریه‌كا ب كۆمه‌ڵ ل گه‌ل ئه‌ڤى ملله‌تى هاتیه‌كرن و نه‌مازه ل د سالێن حه‌فتێ و هه‌شتێیان دا ل چه‌رخێ سه‌ده‌یا بیستێ و ل سه‌رده‌مێ رژێما به‌عسا كه‌فتى وه‌كو (گرتن و زیندانیكرن و ئه‌شكه‌نجه‌دان، ئه‌نفال، كێمیابارانكرن و جینۆساید، ڤه‌گوهاستن، وێرانكرنا گوند و باژارێن كوردستانێ و…هتد) و دیسا هه‌ول و بزاڤێن تیرۆرستى یێن تاكانه ژى هه‌بووینه دژى گه‌لێ كوردستانێ و نه‌مازه سه‌ركرده‌یێن بزاڤا ئازادیخوازا كوردستانێ و به‌لگه‌ه ل سه‌ر گۆتنا مه ڤێ تیرۆرێ هه‌ولا تێرۆركرنا بابێ روحى یێ نه‌ته‌وا كورد بارزانیێ نه‌مر دایه ل (29/ئه‌یلۆلا/1971) په‌قاندنا باره‌گایێ بارزانیێ نه‌مر ب رێیا هنده‌ك كه‌سانێن سیخور و ل ژێر ناڤێ زاناییێن ئاینى، هه‌ر وه‌توف هه‌ولا تیرۆركرنا سه‌رۆكێ هێژا مه‌سعود بارزانى ل ڤیه‌نا پایته‌ختێ نه‌مسا و هه‌ولا تیرۆركرنا شه‌هیدێ سه‌ركرده و ئه‌ندازیارێ ئاشتیێ ئیدریس بارزانى ل پایته‌ختێ عیراقێ د سالێن حه‌فتیان دا.
د ده‌مه‌كێ دا كو ئه‌ڤێ یادا پر خه‌م و كۆڤان ساخ دكه‌ینه گه‌لێ كوردستانێ یێن د قووناغه‌كا هه‌ستیار دا ده‌رباز دبیت و ئه‌م یێن به‌ر ب پیكئینانا كابینا نوو یا نه‌هێ یا حوكمه‌تا هه‌رێما كوردستانێ ڤه دچین، له‌وما پێدڤى یه ئه‌ڤ یادو بیره‌وه‌ریى یه پتر ببنه هانده‌ر و پشته‌ڤان بۆ رێخستنا ناڤمالا كوردى و په‌ند و عیبره‌تان ژێ وه‌ربگرین.
ڤێجا بۆ سارێژكرنا برین و ئه‌ڤێ خه‌ما مه‌زن یا كاره‌ساتا ئێكێ شوباتێ ئێكده‌نگى و ئێككرێزى و ئێكهه‌لویستى و برایه‌تى و ته‌بایا رێزێن كورد و كوردستانیانه، چونكو هیچ ده‌مه‌كێ دوژمن و نه‌حه‌زێن كوردستانێ جوداهى دنێڤبه‌را لایه‌ن و ئایین و چین و توێژێن كوردستانێ دا نه‌كرى یه و هه‌رده‌م ب ئێك چاڤێ دوژمنكارى به‌رێ خوه دایێ و به‌لگه‌ه ل سه‌ر گۆتنا مه و ئه‌ڤ كاره‌ساته و چه‌ندین كاره‌ساتێن دى ئه‌وێن ژلایێ دوژمن و داگیركه‌رێن كوردستانێ ڤه ب سه‌رێ كورد و كوردستانیا ئیناین.
سه‌رۆك بارزانى هه‌ر ل پشتى ئه‌ڤێ كاره‌ساتێ د په‌یڤه‌كا خوه‌دا یا پڕ بها كه‌ره‌مكرى و گۆتى: (كوردستان مۆلگه‌ى تیرۆر و تیرۆرستانى بێ دین نییه و چوون میلله‌ته‌كه‌مان شه‌ڕى تیرۆر و دكتاتۆرى برده‌وه، ئه‌وهاژ … شه‌رى تیرۆر ده‌باته‌وه، بوویه ئه‌وانه‌ى هه‌لویستى دو ڕوویانه‌یان هه‌یه با به‌خۆیان دا بچنه‌وه، ئه‌وانه‌ى كو چاوساغیش بۆ تیرۆرستان ده‌كه‌ن، تووشى چاره‌نووسێكى ره‌شده‌بنه‌وه، ئه‌وسا ده‌زانن زه‌برى پێشمه‌رگه‌ى چه‌ند كاریگه‌ره …))
ڤێجا ب هه‌لكه‌فتا (15) مین سالڤه‌گه‌را كاره‌ساتا ئێكێ شوباتێ سه‌رێ رێزته‌قدیرێ دچه‌مینین بۆ گیانێ پاقژێ ئه‌ڤان شه‌هیدان و ته‌ڤایا شه‌هیدێن رزگاریخوازا كوردستانێ و سه‌رقافلێ كاروانێ شه‌هیدان بارزانیێ نه‌مر.
شۆڕش ل پێناڤ چاره‌سه‌ركرنا كێشه‌یا نه‌ته‌وه‌یى یه نه‌ك ..!
سالح محه‌مه‌د ته‌یرۆ
گه‌ر مرۆڤ ب وژدانڤه ل سه‌ر دیرۆكا بزاڤا رزگاریخوازیا كوردستانێ رابوه‌ستیت، كو هه‌ر سه‌رهلدان و بزاڤ و شۆرشه‌ك هاتبیته‌كرن ل پێناڤ چاره‌سه‌ریا كێشه‌یا نه‌ته‌وا كورد بوویه و ب هزاران گه‌نج و لاوێن دلسۆزێن كوردستانێ ب چه‌ك و ته‌قه‌مه‌نیێن خوه‌ڤه و بێ به‌رامبه‌ر په‌یوه‌ندی ب وان سه‌رهلدان و شۆره‌شان كرى یه گیانێ خوه یێ پیرۆز ژى كرى یه قوربانى تاكو ملله‌تێ كورد ژى مینا ته‌ڤایا ملله‌تێن جیهانێ بگه‌هیته مافێن خوه یێن ره‌وا و ئه‌و ژى ب ئاشتى و ئازادى و سه‌رفیرازى بژیت، بێگومان ئه‌ڤ رزگاریخوازیا كوردستانێ ژى هه‌رده‌م ل رێكخراو پارتێن سیاسى هاتیه پێكئینان و رێڤه‌برنا وێ بزاڤێ كرى یه، چونكو هه‌ر لایه‌نه‌كێ سیاسى ل ده‌مێ دئێته دامه‌زراندن و دئێته مه‌یدانا خه‌بات و به‌رخودانێ په‌یره‌وپرۆگرامێ خوه هه‌یه و به‌ندا هه‌ره سه‌ره‌كێ یا وى لایه‌نى سیاسى خه‌باتكرن و تێكۆشین ل پێناڤ چاره‌سه‌ركرنا رێشه‌یى یا دۆزا ره‌وایا گه‌لێ كوردستانێ بوویه، چونكو هاتیه ئاڤاكرن و دامه‌زراندن وه‌كو لایه‌نه‌كێ نه‌ته‌وى و سیاسى نه‌ك كۆمپانیایه‌كا بازرگانى یه و بۆ ئارمانجه‌كا به‌رته‌سك یا حزبى و كه‌سۆكى و وه‌رگرتنا پۆسته و پله و پایه‌كێ یه. ئه‌گه‌ر مه‌به‌ستا هه‌ر لایه‌نه‌كێ سیاسى ل كوردستانێ د قادا خه‌بات و تێكۆشین و به‌رخودان و فیداكارى و قوربانیدانێ ب تنێ وه‌رگرتنا پۆسته و پله‌یان بوویه و هه‌وه خیانه‌ت و فێل ل ڤى ملله‌تى كرى یه و خه‌لكه‌ك ب سه‌ردا برى یه و ب هزاره‌ها گه‌نج و لاوێن ڤى ملله‌تى ب كوشتن دائینه و هه‌ر چه‌ند ئه‌وێن گیانێ خوه كرینه قوربانى و شه‌هید بووینه ئه‌و ب شه‌هید هاتینه تۆماركرن و شه‌هید بوونه، چونكو ب دله‌ك ساف و بۆ ئارمانجه‌كا نه‌ته‌وى و نیشتیمانى بووینه پێشمه‌رگه و په‌یوه‌ندى ب هه‌وه كرى یه.
پشتى زێده‌تر ل سێ هه‌یڤان هه‌لبژارتنێن په‌رله‌مانێ كوردستانێ هاتیه ئه‌نجامدان و پارتى دیمۆكراتى كوردستان شیایى زۆرینه‌یا كورسیان بده‌ستڤه بینیت و هه‌ر ل رۆژا پشتى راگه‌هاندنا ئه‌نجامێن هه‌لبژارتنان هه‌ول و بزاڤان دكه‌ت ل گه‌ل لایه‌نێن براوه‌یێن دوویێ كو ئێكه‌تیا نیشتیمانى یا كوردستانێ یه و سێیێ بزاڤا گۆران كو فه‌ره ب زووترین ده‌م حوكمه‌تا هه‌رێما كوردستانێ بهێته دامه‌زراندن و پارتى دیمۆكراتى كوردستان كاندیدێ سه‌رۆكاتیا هه‌رێمێ و سه‌رۆكێ حوكمه‌تێ ژى ده‌ستنیشانكرینه كو ئه‌و ژى نێچیرڤان بارزانى و مه‌سرۆر بارزانى یه، لێ جهێ داخێ یه كو لایه‌نێ دوویێ یێ براوه‌یێ هه‌لبژارتنان و د هه‌ر كۆمبوونه‌كێ دا ل گه‌ل لایه‌نێ براوه‌یێ ئێكێ كو ئه‌و ژى پارتى دیمۆكراتى كوردستانه ب مه‌رج و پاكێجه‌كا پله و پۆسته‌یان ڤێجا چ ل به‌غدا وه‌كو وه‌زاره‌تا داد یان ل كه‌ركووك وه‌كو پارێزگارى كه‌ركووك دئێنه پێش و دبێژن ئه‌گه‌ر ئه‌ڤ هه‌ردو پۆسته بۆمه نه‌بن ئه‌م پشكدارى د حوكمه‌تا هه‌رێما كوردستانێ دا ناكه‌ین و ب راستى سه‌یره!! ل ڤێره پرسیار دئێته پێش ئه‌رێ هوون حزبن یان كۆمپانیایه؟ ئه‌رێ ئارمانجا وه چاره‌سه‌ركرنا كێشه‌یا نه‌ته‌وێ كورده یان كارێ وه بازرگانى یه و بده‌ستڤه‌ئینانا پله و پۆست و وه‌رگرتنا پاره و گرێبه‌ستێن جۆراو جۆره؟ له‌وما فه‌ره ئه‌ڤ لایه‌نه خوه ئێكلا بكه‌ته‌ڤه، چونكو حزب یا جودایه ل گه‌ل كۆمپانیا و حزبێ ئارمانجێن نه‌ته‌وى و نیشتیمانى هه‌نه و كۆمپانیان یێن بازرگانى، ئه‌گه‌ر هوون حزب بنده‌ست ب كارێ نه‌ته‌وى نیشتیمانى بكه‌ن و ئه‌گه‌ر نه وه‌ختى ب هه‌روه نه‌بن و سه‌رى ل خه‌لكى نه‌شوێنن و بهێلن خه‌لكێ دى كارى نه‌ته‌وى و نیشتیمانى یێ خوه بكه‌ن و ب ناڤێ حزبا سیاسى و وه‌كو خودان كۆمپانیا و قۆنته‌رچیا كۆمبوونێن سیاسى نه‌كه‌ن و پاش ل سه‌ر شاشه‌یێن راگه‌هاندنێ خوه دیار بكه‌ن و بێژن كۆمبوونه‌كا ئه‌رینى بوو و كۆمبینێن مه دێ دبه‌رده‌وام بن، ل دووماهیێ پێدڤى یه ئاماژێ پێ بده‌ین كو هندى له‌ز بهێته‌كرن بۆ پێكئینانا حوكمه‌تا هه‌رێما كوردستانێ هێشتا هه‌ر كێمه ژ به‌ركو ده‌ڤه‌ر ل به‌رده‌م گورانكاریێن مه‌زن دایه و گۆرانكارى ژى ل سه‌ر شه‌ر فرۆشتنا وى لایه‌نى ل سه‌ر ڤى پۆسته‌یى و یێ هه و ڤى كه‌سێ و كه‌سێ هه ناهێنه‌راگرتن، هه‌لبه‌ت گوهۆرینێن سوبه‌هى ژى گه‌له‌ك و گه‌له‌ك مه‌زنترن ژ عه‌قلێ كۆمپانیا و بازرگان و به‌رژه‌وه‌ندیێن به‌رته‌نگ یێن حزبى و كه‌سى و بنه‌مالكى و خه‌لكێ مه ژى یێ ماندى و هوشیاره و باش سه‌رهه‌لى خواست و ڤیانێن وه بووینه و دزانن كیژ لایه‌ن ل گه‌ل چاره‌سه‌ركرنا كێشه‌یا نه‌ته‌وى ونیشتیمانى یه و خودان سه‌نگا خوه‌یه ل ده‌ڤه‌رێ و كیژ لایه‌ن به‌روڤاژى یه.
دو سه‌ره‌دانێن هه‌ڤدژ بۆ هه‌رێما كوردستانێ
ساڵح محه‌مه‌د ته‌یرۆ
خۆیایه كو د سیاسه‌تێ دا دوژمن و دۆستێ هه‌رده‌مكى نینه، به‌لكو ژیوار و به‌رژه‌وه‌ندیێن نه‌ته‌وى و نیشتیمانى و هنده‌ك جاران ژى یێن به‌رژه‌وه‌ندیخواز و بازرگانى چاوا دڤێن وه‌ها سه‌ره‌ده‌ریى د گه‌ل سیاسه‌تێ دا دكه‌ن، له‌وما دبینین دوهى دوژمن بوو و ئه‌ڤرۆ بوویه دوست و هه‌ڤال، هه‌لبه‌ت هه‌ر ژ ده‌سپێكا هه‌ول و بزاڤێن تیرۆرستێن داعش بۆ داگیركرنا حوكمه‌تا عیراقێ و ده‌ڤه‌رێن سونه‌نشێن ب گشتى و بزاڤكرن و هێرش ئینان بۆ سه‌ر ئاخا پیرۆزا كوردستانێ ل ده‌سپێكا هه‌یڤا شه‌ش سالا 2014 و حه‌تا ئاسته‌كێ ژى ل ده‌سپێكا پیلان و هێرشێن وان یێن درندانه شیان چه‌ند ده‌ڤه‌رێن عیراقێ و ده‌ڤه‌رێن كوردستانى یێن ده‌رڤه‌یى هه‌رێما كوردستانێ داگیر ژى بكه‌ن و چه‌ندین كاره‌ساتێن دوور ژ هه‌موو پره‌نسیپێن ئه‌خلاقى و ئاینى و مرۆڤایه‌تى ئه‌نجام بده‌ن و ل دووڤ خوه هێلان و نه‌مازه ژ سنۆرێ قه‌زا شنگال.
لێ پشتى كو ده‌وله‌تێن زلهێز گه‌هشتینه وێ قه‌ناعه‌تێ كو ئه‌ڤ رێكخراوا تیرۆریستیا داعش مه‌ترسیه‌كا مه‌زنن نه‌ك ل سه‌ر رۆژهه‌لاتا ناڤین به‌لكو ل سه‌ر جیهانێ و مرۆڤایه‌تیێ ژى هزر د چاوانیا به‌رگریكرنێ دا كرن كو چاوا دێ كارن ئه‌ڤێ رێكخراوا تیرۆریستى ژناڤببه‌ن. پێشمه‌رگه‌هێن قه‌هره‌مان ژى ب وان چه‌ك و ته‌قه‌مه‌نیێن سڤك لێ ب باوه‌ریه‌كا موكم و ب هه‌سته‌كا نه‌ته‌وى و نیشتیمانى شیان خوه‌را بگرن و به‌رخودانێ بكه‌ن و ئه‌ڤێ رێكخراوا تیرۆریستى یا داعش تێكبشكێنن و ل ده‌سپێكا هه‌لگیرساندنا ئه‌ڤێ شه‌رێ تیرۆریستى و ل سه‌ر بانگه‌شه‌یا سه‌رۆك بارزانى ده‌وله‌تێن زلهێز و ده‌وله‌ته‌كا هه‌ڤسوى هاتنه سه‌رخه‌تێ و پشته‌ڤانیا خوه بۆ هێزێن پێشمه‌رگه‌هێن قه‌هره‌مان دیاركرن و ب هێز و چه‌ك و لۆجیسكى بوونه پالپشت و پشته‌ڤانێن پێشمه‌رگه‌هێن قاره‌مان، ئه‌ڤ شه‌رێ هاتیه سه‌پاندن ب سه‌ر هه‌رێما كوردستانێ كو نێزیكى چار سالان ڤه‌كێشا و ب سه‌دان قاره‌مانان بۆ به‌ره‌ڤانیكرن ژ ئاخا پیرۆزا كوردستانێ و مرۆڤایه‌تیێ گیانێ خوه یێ پیرۆز كره قوربانى و شه‌هید بوون و ب هزاره‌هان ژى بوونه په‌ككه‌فتى لێ شیان كو ئه‌فسانه‌یا داعش تێكبشكێنن و ژناڤبه‌ن و مه‌ترسیا هه‌یى ل سه‌ر كوردستانێ نه‌هێلن و پێشمه‌رگه‌یى ب سیمبۆلا به‌ره‌ڤانیكرنێ ل مرۆڤایه‌تى ل جیهانى هاتنه نیاسین.
ل ده‌مێ كو هه‌رێما كوردستانێ دگه‌رمه گه‌رما به‌ره‌ڤانیكرنێ دیسا حوكمه‌تا عیراقا فیدرال بۆدجه و مووچه‌یى هه‌رێما كوردستانێ برى و هه‌رێما كوردستانێ كه‌فته بن بارێ سه‌ختێ قه‌یرانا دارایى و سه‌ره‌راى هه‌ول و بزاڤێن حوكمه‌تا هه‌رێما كوردستان بۆ چاره‌سه‌ركرنا ڤان كێشه‌یێن د ناڤبه‌را هه‌رێمێ و عیراقێ دا و ژبلى ئه‌و شه‌رێ مه‌زن ئه‌وێ ژ لایێ تیرۆرستێن داعش ڤه ب سه‌ر گه‌لێ كوردستانێ دا هاتیه سه‌پاندن و ئه‌و كۆچا ئاواره‌یان بۆ هه‌رێما كوردستانێ، لێ سه‌ركه‌فتنێن مه‌زن ده‌ستێ پێشمه‌رگه‌یى هاتنه تۆماركرن و سه‌ركردایه‌تیا كوردى ب گشتى و نه‌مازه سه‌رۆك بارزانى هزر د پرسه‌كا دى یا نه‌ته‌وى و نیشتیمانى دا كر كو تاكه چاره‌سه‌ره بۆ كورد و كوردستانێ ل گه‌ل حوكمه‌تا عیراقا فیدرال، چونكو ئه‌گه‌ر ئه‌م نه‌شێن پێكڤه‌بژین خوه دكارین وه‌كو جیران پێكڤه بژین كو ئه‌و ژى پرسا ریفراندۆمێ بوو كو ل رۆژا 25/9/2017 هاتیه سازكرن و (93%) كوردستانێ ده‌نگ بۆ دایى.
لێ جهێ داخێ یه كو هه‌رده‌مێ كورد نێزیكى قووناغا سه‌رخوه‌بوونێ بووینه هنده‌ك ژ وان بووینه داروده‌ست و كرێگرتیێن دوژمن و داگیركه‌رێن كوردستانێ و پیلان و ئاسته‌نگ دارێشتینه و هه‌روه‌كى ل رۆژا 16 ئوكتوبه‌رێ ل كه‌ركووكێ هاتیه ئه‌نجامدان كو جهێ داخێ بوو هنده‌ك لایه‌نێن زلهێز ژى ئه‌وێن هه‌تا دوهى پشته‌ڤانێن مه بوون و بوونه پالپشتێن وێ خیانه‌تكاریا مه‌زن كو ب راستى خه‌نجه‌ره‌كا كوشنده بوو ل پشتا دۆزا ره‌وایا گه‌لێ كوردستانێ دایى. لێ دیسان ب هیمه‌ته‌كا سه‌رۆك بارزانى و پێشمه‌رگه‌هێن قه‌هره‌مان ئه‌و پیلانا مه‌زن ئه‌وا ل دژى ئه‌زموونا هه‌رێما كوردستانێ هاتیه دارێشتن هاته ژناڤبرن.
ب هه‌ر حال ل ڤان رۆژان دا پایته‌ختێ هه‌رێما كوردستانێ بوویه قیبلگه‌ها سه‌ره‌دانان كو رۆژ ب رۆژ یێن قه‌ستا كوردستانێ دكه‌ن و گه‌هشتینه وێ قه‌ناعه‌تێ كو گرنگیا هه‌رێما كوردستانێ و نه‌مازه سه‌رۆك بارزانى كو بوویه مه‌رجه‌عه‌كێ مه‌زن بۆ گه‌لێ كوردستانێ ل ده‌ڤه‌رێ چه‌ند یێ مه‌زنه، هاتنا مایك پۆمپیۆ وه‌زیرێ ده‌رڤه‌یى ئه‌مریكا و پاش وه‌زیرێ ده‌رڤه‌یى ئیرانى جه‌واد زه‌ریف بۆ هه‌رێما كوردستانێ كو هه‌لگرێن دو په‌یامێن هه‌ڤدژ بوون بۆ به‌رپرسێن هه‌رێمێ، ژ ئالیه‌كێ ڤه ئه‌مریكا ب په‌رسێن هه‌رێمێ گۆتى یه دڤیا پابه‌ندێن سزایێن ئه‌مریكا بن بۆ سه‌ر ئیرانێ ب تایبه‌ت رێ گرتن ل چوونا نه‌فتێ بۆ ئیرانێ كو ئه‌ڤه ژى بۆ ده‌ستهه‌لاتداریا حوكمه‌تا هه‌رێما كوردستانێ یا گران و ب زه‌حمه‌ته ژبه‌لكوو مه بڤێت یان نه‌ڤێت ئیران ده‌وله‌ته‌كا جیرانه و یارییه‌كا مه‌زن ژى یا ل ڤێ ده‌ڤه‌رێ دكه‌ت و ژبلى ب سه‌دان كیلۆمه‌تران ئه‌م هه‌ڤسنۆرین. دیسا د هه‌مان ده‌م دا ئیران یا دبێژیته هه‌رێما كوردستانێ نابیت زۆر ب گۆتنێن ئه‌مریكا بكه‌ن و ئه‌م جیرانێن هه‌ر ده‌مكى یێن وه‌ینه و ژ كاودانێن سه‌خت و دژوار ده‌رگه‌هێن مه بوو وه دڤه‌كرى بووینه ژ هه‌موو ئالیه‌كێ ڤه و باشتر ژى ئه‌وه په‌یوه‌ندیێن مه ژ هه‌موو ئالیه‌كێڤه به‌ر ب پێشڤه ببه‌ین و نه‌هێلین هیچ لایه‌ن و كه‌س ئه‌ڤان په‌یوه‌ندیان ئالۆز بكه‌ت، چونكو ب ئالۆزیا ئه‌ڤان په‌یوه‌ندیان ئه‌م هه‌ردو دێ زیانبه‌خش بین.
هه‌لبه‌ت گه‌له‌ك گۆتن و بۆچوون هه‌نه كو چاوا هه‌رێما كوردستانێ سه‌ره‌ده‌ریێ د گه‌ل ڤان كاودانان دا بكه‌ت، ب هزر و بۆچوونێن من دڤیا ب وى ره‌نگى و شێوه‌یى سیاسه‌ت بهێته‌كرن كو ل چارچووڤێ ستراتیژیه‌تا ئه‌مریكا بیت ل ده‌ڤه‌رێ ب وێ رامانێ ل پرس و مه‌سه‌لێن ستراتیژى یا گشتى یا ئه‌مریكا دا بیت و ب گۆتنێن وان بكه‌ین لێ ب به‌رامبه‌ر دا داخوازا گره‌نتیێ لێ بكه‌ین ب تایبه‌ت ده‌رباره‌ى ده‌ڤه‌رێن ناكۆكى ل سه‌ر هه‌یى و په‌ند و عیبره‌تان ل روودانێن 16 ئوكتوبه‌رێ وه‌ربگرین كو چاوا هه‌ر ئه‌ڤ ده‌وله‌تا زلهێز بوو بوویه پشته‌ڤان بۆ وى گرۆپێ خیانه‌تكار و ل گه‌ل سۆپا و حه‌شدا شه‌عبى هێرش بۆ هه‌رێما كوردستانى ئینایى.
لێ ئه‌ڤ پابه‌ندبوونه ب ئه‌مریكا ب وێ رامانێ نینه كو هه‌رێما كوردستانێ دژایه‌تیا ئیرانێ بكه‌ت، به‌لكى دڤیا په‌یوه‌ندیێن باش ژى د گه‌ل ئیرانێ هه‌بن و زۆر ئاسایى یه ل هنده‌ك پرسان جوداهیه‌ك هه‌بیت ل گه‌ل ئیرانێ ب تایبه‌ت ده‌رباره‌ى ئه‌و سزایێن ئابوورى ئه‌وێن ئه‌مریكا خستیه سه‌ر ئیرانێ، چونكو یا خۆیا و ئاشكرایه كو كورد نكاریت ل هه‌موو پرس و مه‌سه‌لاندا دنێڤبه‌را ئه‌مریكا و ئیرانێ بالانسى رابگریت، ژ به‌ركو ل وى سه‌رده‌مى ئه‌و ژى دێ بالانسى راگرن، ئه‌ڤه ژى ژ بیرا مه نه‌چیت كو هنگى ئه‌گه‌ر كورد كه‌ڤنه به‌ر هه‌ر هه‌ره‌شه‌یه‌كێ، فه‌ره ئه‌م گله‌یى ژ ئه‌مریكا نه‌كه‌ین كو بۆچى مه ناپارێزیت وه‌كو روودانێن 16 ئوكتوبه‌رێ، ئه‌ڤێ ژى باش بزانین كو ئه‌مریكا زۆر بژارده و به‌دیلێن دیتر هه‌نه ل عیراقێ بۆ رووبه‌روونه‌ڤا ئیرانێ ئه‌گه‌ر كورد پابه‌ندى سزایێن ئه‌مریكا ژى نه‌بیت ل سه‌ر ئیرانێ, ڤێجا فه‌ره زۆر دهوشیار بین ب عه‌قل و مه‌نتق سیاسه‌تێ ل گه‌ل واقعێ ئه‌ڤرۆ كو ده‌ڤه‌ر تێ دا ده‌رباز دبیت بكه‌ین و ئه‌گه‌ر نه پاش په‌شیمانى ب ده‌رد ناخۆت…
پارتى و به‌ربژاركرنا نێچیرڤان و مه‌سرۆر بارزانى
سالح محه‌مه‌د ته‌یرۆ
ئه‌گه‌ر مرۆڤ ب هوورى ل سه‌ر پره‌نسیپێن پارتى دیمۆكراتى كوردستان و ئارمانجا وێ یا نه‌ته‌وى و نیشتیمانى و دووربین و ئێكگرتیا وێ یا ب هێز و توكمه رابوه‌ستین دێ بینین كو پارتیه‌كا ئێكگرتى بوویه و هه‌ر چه‌نده بیر و بۆچوونێن جودا هه‌نه و ئه‌ڤه ژى د پرۆسێسا دیمۆكراسیه‌تێ دا مافه‌كێ سروشتى و ره‌وایه، لێ هیچ ده‌مه‌كێ نه‌بوویه كوتله و كوتله‌بازى كو ئه‌ڤه ژى دزڤریته‌ڤه بۆ ئیكگرتنا د ناڤ مالا بارزان دا و هه‌ر ئه‌ڤ ئێكگرتنه ژى دبیته فاكته‌رى سه‌ره‌كى كو پارتى دیمۆكراتى كوردستان پارته‌كا ئێكگرتى بیت، هه‌روه‌تۆف پارته‌كا موئه‌سساتى یه و سه‌ركرده‌یێن كارێزما و بسپۆر و شاره‌زا پێدگه‌هینیت، یا خۆیایه ژى هه‌ر ب ڤێ ئێكگرتنێ ژى شیایه و شایسته‌یه ژى كو سه‌ركێشیا دۆزا ره‌وایا گه‌لێ كوردستانێ بكه‌ت و خه‌لكێ زۆرینه‌یێ كوردستانێ ژى ئه‌ڤێ پارتێ ب پیشره‌وا خوه بزانن و ژبلى هه‌لویستێ وێ یێ نه‌ته‌وى و نیشتیمانى و دیرۆكا وێ یا تژى سه‌روه‌رى و خه‌بات و تێكۆشین و به‌رخودان و قوربانیدان.
هه‌ر چه‌نده ئه‌ڤه ژ مێژه‌یه كو هنده‌ك كه‌س و لایه‌ن خه‌ونێن خۆش و یێن خۆشترێ ب پارتى دیمۆكراتى كوردستانڤه دبینن و ل وێ باوه‌رى و هیڤیێ بوون كو شیرازێ تێكچوونێ و ناكۆكیێ د نێڤبه‌را پارتى و بنه‌مالا بارزان دا هه‌یه و زۆر ل وان ژى فیلم و سیناریۆ بۆ خوه پێڤه دروست دكرن و نان و پیڤاز ب ڤى بابه‌تێ هیچ ئه‌سل و بنیات بوونه پێ دخوارن، لێ پێشینان راست گۆتى یه ((ئاش ل خیاله‌كێ و ئاشه‌ڤان ل خیاله‌كێ)).
دیسا ل وێ قه‌ناعه‌تێ دا بوون كو پارتى دیمۆكراتى كوردستان ژى وه‌كو وان كۆمپانیه‌كه بۆ دابه‌شكرنا پله و پۆست و پله‌یێن سیاسى و به‌رژه‌وه‌ندیێن ئابوورى و ل سه‌ر ڤان به‌رژه‌وه‌ندیان دێ پارتى په‌رت و بلاڤ بیت و هه‌روه‌كى ل سنۆرێ وان روودایى.
لێ جڤاتا سه‌ركردایه‌تیا پارتى و بریارا سه‌ركردایه‌تیا پارتى دیمۆكراتى كوردستان و ب سه‌رپه‌رشتیا سه‌رۆك بارزانى ل رۆژا 3/12/2018 و ب ئێك بریار و به‌لێ ب ئێك بریار نێچیرڤان بارزانى بۆ سه‌رۆكایه‌تیا هه‌رێما كوردستانێ هاته به‌ربژاركرن و مه‌سرۆر بارزانى بۆ سه‌رۆكێ حوكمه‌تا هه‌رێما كوردستانێ و به‌رسڤا وان پرۆپاگنده و قسه و قسه‌لۆكان داڤه كو پارتى دیمۆكراتى كوردستان پارته‌كا ئێكگرتى یه ل كادرێ خوارى و حه‌تا دگه‌هیته سه‌ركردایه‌تیێ و بنه‌مالا بارزان و بریار ژى بریار سه‌رۆك بارزانى یه كو ته‌ڤایا كادر و ئه‌ندامێن پارتى و بنه‌مالا بارزان و مرۆڤێن نیشتیمانپه‌روه‌ر و نه‌ته‌وه‌په‌رست و وه‌لاتپارێز و رزگاریخواز و كورد و كوردستانیێن راسته‌قینه و مافخواز ئه‌ڤى رێبه‌ر و سه‌ركرده‌یێ كارێزما ب رێبه‌ر و سه‌ركرده‌یێ خوه دزانن و بریارا وى ب بریارا خوه دزانن، گۆته وان خودان هزرێن دوور ژ راستیێ و چ بنیات بوونه چاوا یێن به‌رى هه‌وه ئه‌و خه‌ون و خیال بنگورگرن و هوون ژى دێ ب وان خه‌ونێن حێشترێ ڤه و ب وان كولوكه‌سه‌رانڤه چنه بنگۆرى، ل ڤێ هزرێ خرابتر ئه‌وه كو ئه‌ڤ كه‌س و لایه‌نێن د ڤێ هزرا خه‌یالى دا دژین پشتى راگه‌هاندنا بریارا كاندیدكرنا به‌ربژارێن پارتى بۆ سه‌رۆكایه‌تیا هه‌رێمێ و حوكمه‌تێ هه‌وار هه‌وارا وانه گوایه نابیت ئه‌ڤ هه‌ردو سه‌رۆكایه‌تیى یه بۆ پارتى دیمۆكراتى كوردستان بن، ب راستى سه‌یره و نزا ئه‌ڤ كه‌س و لایه‌نه ل چ گه‌ردۆن دژین ئه‌گه‌ر نه مافه‌كێ ره‌وایێ پارتى یه كو سه‌رۆكێ حوكمه‌تێ یێ وێ بیت، چونكو ئێكه‌م پارتا براوه‌یه ل هه‌لبژارتنێن په‌رله‌مانێ كوردستانێ و خودانێ (45) كورسیانه، یا دى ژى چ كه‌س ولایه‌نه‌كێ دى مافێ هندێ نینه بریارێ ل جهێ پارتى بده‌ت بۆ به‌ربژیرێن وێ، ئه‌رێ سه‌ركردایه‌تیا پارتى و كادر و ئه‌ندام و جه‌ماورێ وێ درازینه ب ڤان بریاران، هوون بۆچى ل به‌ر ناچن و ناله نالا وه‌یه؟
یا دى ژى بۆً سه‌رۆكایه‌تیا هه‌رێما كوردستانێ دپشت راستین چ ل ناڤ په‌رله‌مانى یان ل ده‌رڤه‌یى په‌رله‌مانى هه‌لبژارتن بهێنه‌كرن بۆ سه‌رۆكایه‌تیا هه‌رێمێ دێ سه‌ركه‌فتن هه‌ر بۆ كاندیدێ پارتى دیمۆكراتى كوردستان و رێبازا پیرۆزا بارزانیێ نه‌مر بیت.
فه‌ره ئاماژێ پێ بده‌م كو ئه‌وێن دوهى شیایى ئارامی و ته‌ناهیێ ل كوردستانێ به‌رجه‌سته بكه‌ن و بپارێزن و به‌ره‌ڤانیێ ل ئاخا پیرۆزا كوردستانێ بكه‌ن و د سه‌نگه‌رێن به‌رخودانێ دا بوین و پیلانێن دوژمن و داگیركه‌رێن كوردستانێ ژناڤببه‌ن و جاره‌كادى كوردستانێ ل وێ هێرشا خیانه‌تكارى و خوه‌فرۆشیێ قورتال بكه‌ن و جاره‌كا دى په‌یوه‌ندیێن حوكمه‌تا هه‌رێما كوردستانێ و یا ناڤه‌ندیا به‌غدا بزڤرینه‌ڤه به‌ریا رێكه‌فتنا خیانه‌تكارى یا 16 ئوكتوبه‌را سالا 2017، د پشتراستین كو دێ كوردستانێ به‌ر ب كوردستانه‌كا بهێزڤه به‌ن، چونكو ئه‌ڤه درووشمێ پارتى دیمۆكراتى كوردستان بوو ل هه‌لبژارتنێن په‌رله‌مانێ كوردستانێ و ب كریار ژى دێ ئه‌ڤ درووشمه هێته جێبه‌جێكرن، ژ به‌ر كو پارتى دیمۆكراتى كوردستان درووشمه‌كێ هه‌لناگریت ئه‌گه‌ر د شیانێن وێ دا نه‌بیت و دێ ل پاشه‌رۆژێ دا دێ دیار بیت.
ئه‌ڤه‌یه پارتى دیمۆكراتى كوردستان و ئه‌ڤه‌یه بریارا وێ، گوهدان و پێگیریا كادرێن پارتى ب بریارا وێ به‌رژه‌وه‌ندیا كورد و كوردستانێ یه ڤێجا ل پارتیێن بنه‌مالا بارزان ده‌ست پێ دكه‌ت بۆ هه‌مى ئورگان و دامه‌زراوێن وێ و كادر و ئه‌ندام و جه‌ماورێ وێ. ل دووماهیێ هیڤیا سه‌ركه‌فتنێ بۆ هه‌ردو كاندیدان نێچیرڤان بارزانى بۆ سه‌رۆكایه‌تیا هه‌رێما كوردستانێ و مه‌سرۆر بارزانى بۆ سه‌رۆكێ حوكمه‌تا هه‌رێما كوردستانێ دخوازین.
سه‌ره‌دانا بارزانى بۆ به‌غدا نیشا سه‌نگ و پێگه‌ها سیاسى یا وى یه
ساڵح محه‌مه‌د ته‌یرۆ
هه‌كه بزڤرینه وان پیلان و ئاسته‌نگێن هاتینه دانان و دارێشتن ژ لایى دوژمن و داگیركه‌رێن كوردستانێ چ ل ناڤخوه‌یى و هه‌رێمى و ده‌رڤه ل دژى رێبازا پیرۆزا پارتى دیمۆكراتى كوردستان و بارزانیێ نه‌مر ب گشتى و ب تایبه‌ت ل دژى سه‌رۆك بارزانى كو وێ باوه‌ریێ دا بوون و ب وێ خه‌یالا خاڤ دێ كارن ب ڤان پیلانێن خوه‌فرۆشیێ گۆرى بۆ پارتى كۆڵن و د گه‌ل جه‌نازه‌یى ژى به‌ر ب گورستانێ ڤه بچن و سۆره‌تا فاتیحه ژى دێ ل سه‌ر پارتى خوینن، لێ نه‌زانى و نه‌ڤیا بزانن ژى كو ئه‌ڤرۆ سه‌رده‌مێ پێشكه‌فتنا ته‌كنولوژیایه و خه‌لكێ كوردستانێ یێ هوشیاره و باش دزانن كینه به‌ره‌ڤانیێ ژ ئاخا پیرۆزا كوردستانێ كرى یه و دكه‌ن و خوه ب خودانێن ئه‌زموونا هه‌رێما كوردستانێ دزانن و ل به‌رپرسیاره‌تیا نه‌ته‌وى و نیشتیمانى ژى راناكه‌ن و هه‌لگرێن په‌یاما راسته‌قینه یا دۆزا ره‌وایا گه‌لێ كورده كو ئه‌و ژى پارتى دیمۆكراتى كوردستانه و سه‌رۆك بارزانى یه …
پارتى دیمۆكراتى كوردستان و سه‌رۆك بارزانى خوه ل به‌ر وان پیلان و شه‌رخواز و خوه‌فرۆشان نه‌چه‌ماند و هه‌تا ب هیمه‌تا پێشمه‌رگه‌هێن قه‌هره‌مان و ب سه‌رپه‌رشتیا سه‌رۆك بارزانى كوردستان و قه‌وارا وێ یا دستوورى و قانوونى و دۆز و داخوازیێن گه‌لێ كوردستانێ یێن ره‌وا ب زیندى هێلاینه‌ڤه و پیلانێن شه‌رخواز و خیانه‌تكار و خوه‌فرۆشان شكه‌ستنێ پێ بینین و ب كارێزمایا نێچیرڤان بارزانى سه‌رۆكێ حوكمه‌تا هه‌رێما كوردستانێ كو د هه‌مان ده‌م دا جێگرێ پارتى دیمۆكراتى كوردستانه و بۆ ئه‌گه‌را سه‌ركه‌فتن و پاراستنا ئه‌زمۆنا هه‌رێما كوردستانێ ژ هه‌مى ئالیه‌كێڤه و خه‌لكێ كوردستانێ ل وێ قووناغا سه‌خت و دژوار رزگاركر، چونكو ئارمانجا وێ پیلانا مه‌زن ئه‌و بوویه كو حوكمه‌ته‌ك نه‌مینیت ب ناڤێ هه‌رێما كوردستانێ و جاره‌كا دى ببێژن پارێزگه‌هێن باكۆرى (محافڤات شمال العراق).
هه‌ر ژ پشتى راگه‌هاندنا ئه‌نجامێن هه‌لبژارتنێن نوونه‌رێن جڤاتا عیراقا فیدرال كو ل 25/گولانا /2018 هاتیه ئه‌نجامدان و پارتى دیمۆكراتى كوردستان شیا (25) كورسیان بده‌ستڤه‌بینیت بۆ جڤاتا نوونه‌رێن عیراقا فیدرال و بوویه پارتیا ئێكه‌م ل سه‌ر ئاستێ عیراقا فیدرال، دیسا ل هه‌لبژارتنێن په‌رله‌مانێ كوردستانێ ژى كو ل (30/ ئیلۆنا /2018) هاتیه ئه‌نجامدان، دیسا پارتى شیا (45) كورسیان بده‌ستڤه‌بینیت و ژبلى ئه‌و فرت و فیلێن ل ده‌نگێن پارتى دیمۆكراتى كوردستان هاتینه كرن ل هه‌ردو هه‌لبژارتنان دا.
پشتى ڤان ئه‌نجامێن ڤان هه‌لبژارتنان دوژمن و داگیركه‌رێن كوردستان و ئه‌وێن بووینه هه‌ڤسه‌نگه‌رێن وان ژى هه‌ولدا كو بخودا بچنه‌ڤه و گه‌هشتنه وێ باوه‌ریێ كو ئه‌و پیلانێن وان داناین تووشى شكه‌ستنێ بوون و ئه‌و معادلاتێن وان هزر ژى بۆ دكر د شاش بوون و هاتنه بنگۆركرن و ئه‌و هێزێن زلهێزێن ده‌رڤه ژى یێن بووینه پشته‌ڤانى ڤێ پیلانێ په‌شیمان ببنه‌ڤه كو مه‌حاله پارتى ژناڤبچیت، ژ به‌ر ڤێ چه‌ندێ ل پشتى ئه‌نجامێن هه‌لبژارتنان هه‌ولێر بوو قیبله‌ها سه‌ره‌دانێن شاندێن حوكمه‌تا ناڤه‌ندى و یێن ده‌رڤه ژى و گه‌هشتنه وێ باوه‌ریێ كلیلا چاره‌سه‌ریا كێشه‌یێن د نێڤبه‌را حوكمه‌تا عیراقا فیدرال و هه‌رێما كوردستانێ و ئارامى و ته‌بایى و پێكڤه‌ژیان یا د ده‌ستێ سه‌رۆك بارزانى و ل هه‌ڤلێر و پیرمام و سه‌رێ بلنددا نه‌ك ژ لایه‌كێ دى یێ كوردستانێ دایه، هه‌ر شانده‌كا بیانى و هه‌رێمى و عیراقى ژى سه‌رى ل هه‌ڤلێر دابیت داخوازكرى یه كو سه‌رۆك بارزانى سه‌ره‌دانا به‌غدا بكه‌ت بۆ چاره‌سه‌ریا كێشه‌یێن د نێڤبه‌را حوكمه‌تا به‌غدا و هه‌رێما كوردستانێ، له‌وما و بۆ به‌رژه‌وه‌ندیا گشتى كو هه‌رده‌م پارتى دیمۆكراتى كوردستان و سه‌رۆك بارزانى به‌رژه‌وه‌ندیا گشتى ل پێش به‌رژه‌وه‌ندیا به‌رته‌نگا حزبایه‌تى دانایه و سه‌رۆك بارزانى زڤریه‌ڤه بۆ ناڤ سه‌نته‌رێ بریاردانێ ل عیراقا فیدرال و ئه‌ڤه ژى نیشانێ سه‌نگ و پێگه‌ها سیاسى و دیبلۆماسى یا سه‌رۆك بارزانى یه ل سه‌ر ئاستێ ناڤخوه‌یى و ده‌رڤه، ل دووماهیێ فه‌ره ئاماژێ بده‌مه گرنگیا پێگه‌ها هه‌رێما كوردستانێ ل سیاسه‌تا نێڤده‌وله‌تى بۆ قووناغێن داهاتى و دپشتراستین كو پاشه رۆژا كوردستانێ دێ گه‌شتر و بهێزتر كه‌ڤیت و دیرۆك ژى دلۆڤانیێ ب كه‌س دا نابه‌ت و ئه‌و خیانه‌تكار و خوه‌فرۆش ژى دێ كه‌ڤنه به‌رنه‌فره‌تا دیرۆكێ و سه‌ركه‌فتن ژى دێ بۆ ئیراده‌یا گه‌لێ كوردستانێ بیت …
نيشاندان
WP Facebook Auto Publish Powered By : XYZScripts.com