ئه‌ڤرۆ نيوز:

پشتى جڤاتا وه‌زيرێن عيراقێ راگه‌هاند كو سوبه‌هى بهێنڤه‌دانا فه‌رمى يه‌ ل سه‌رانسه‌رى عيراقێ، ئاخفتنكه‌رێ ب ناڤێ حوكمه‌تا هه‌رێما كوردستانێ راگه‌هاند كو ئه‌و بهێنڤه‌دان دێ ل هه‌رێما كوردستانێ ژى هه‌بيت.

د ڤێ ده‌ربارێ دا سه‌فين دزه‌ى ئاخفتنكه‌رێ ب ناڤێ حوكمه‌تا هه‌رێما كوردستانێ د داخۆيانيه‌كێ دا بۆ ئه‌ڤرۆ نيوز راگه‌هاند كو سوبه‌هى ل سه‌رانسه‌رى هه‌رێما كوردستانێ ژى بهێنڤه‌دانا فه‌رمى يه‌.

پشتر جڤاتا سه‌رۆكاتيا وه‌زيران ل عيراقێ د به‌ياننامه‌كێ دا راگه‌هاند كو ب مه‌ره‌ما هه‌لبژارتنان و ب رێڤه‌چوونا وان ب ره‌نگه‌كێ باش و سه‌ركه‌فتيانه‌ ل 12ى گۆلانا 2018ێ، ل رۆژا ب دووڤ دا ژى ل سه‌ر داخوازا سه‌رۆك وه‌زيرێن عيراقێ بهێنڤه‌دانا فه‌رمى ل هه‌موو عيراقێ هاته‌ راگه‌هاندن.

ئه‌ڤرۆ نيوز:

ئه‌ڤرۆ سپێدێ پارێزگارێ دهۆكێ ل قوتابخانا سيه‌نا ل باژێرێ دهۆكێ ده‌نگێ خوه‌ و پاشان ژى كۆنگره‌كێ رۆژنامه‌ڤانى ئه‌نجام دا و تێدا ئاشكه‌را كر كو ل ده‌سپێكا هه‌وا هه‌لبژارتنان كێشه‌ هه‌بووينه‌، به‌لێ نوكه‌ ره‌وش باشتره‌ و نێزيكى 95% ئاريشه‌ هاتينه چاره‌كرن.

پارێزگارێ دهۆكێ راگه‌هاند كو تشتى كه‌فتيه‌ سه‌ر ملێن لژنا ئه‌منى يا پارێزگه‌هێ هه‌موو هاتينه‌ ئه‌نجام دان و ژ وى لايى ڤه‌ پرۆسه‌ گه‌له‌ك ب رێك و پێكى يا ب رێڤه‌ دچيت، به‌لێ جهێ داخێ يه‌ ژ به‌ر كارنه‌كرنا ئاميران ل گه‌ل ويستگه‌هان وه‌لاتى نه‌شياينه‌ ده‌نگێ خوه‌ بده‌ن، هه‌ر چه‌نده‌ پتريا وان يێن هاتينه‌ چاره‌كرن و تشته‌كێ گه‌له‌ك كێم يێ ماى ئه‌و ژى دێ چاره‌ بيت.

فه‌رهاد ئه‌ترووشى، پارێزگارێ دهۆكێ راگه‌هاند كو دو ده‌مژمێرێن ئێكێ يێن ده‌نگدانێ ل 75 بنگه‌هێن ده‌نگدانێ كێشه‌ هه‌بووينه‌، به‌لێ ئه‌و كێشه‌ 95%ێ هاتيه‌ چاره‌كرن

ل پارێزگه‌ها دهۆكێ 716 هزار و 300 كه‌سان مافێ ده‌نگدانێ هه‌يه‌ و ل سه‌ر 256 بنگه‌هـ و 1664 ويستگه‌هان هاتينه‌ به‌لاڤكرن و د ده‌نگدانا تايبه‌ت ژى دا 50 هزار كه‌سان مافێ ده‌نگدانێ هه‌بوو. ده‌رباره‌ى ئاواران ژى 200 هزار كه‌سان مافێ ده‌نگدانێ هه‌يه‌ و 61 بنگه‌هێن دانگدانێ بۆ هاتينه‌ دابينكرن.

ده‌رباره‌ی بنگه‌هێن ل زاخو ئاریشه‌ تێدا هه‌ی گۆت : ل زاخۆ ژى هنده‌ك بنگه‌هان ده‌نگدان تێدا هاتیه‌ راوه‌ستان لێ‌ ئاریشه‌ هه‌بون و ئه‌ز ب خوه‌ ل گه‌ل قایمقامێ‌ زاخۆ ئاخفتیمه‌ كو هه‌ر ئامیره‌كێ‌ كار نه‌كه‌ت ئامیره‌كێ‌ دی ل جهی وی دانن و ئه‌و نوكه‌ به‌رده‌وام د په‌یوه‌ندیێ‌ دانه‌ دا چاره‌سه‌ر كه‌ن.

پارێزگارێ دهۆكێ خواست ژى كو وه‌لاتى قه‌ستا وان ويستگه‌هان بكه‌ن يێن كێشه‌ تێدا نه‌يى و ده‌نگێ خوه‌ ب وێرێ بده‌ن دا كو مافێ وان نه‌هێته‌ سۆتن ژ به‌ر كو ئه‌ڤ ئاميره‌ حه‌تا ده‌مه‌كێ دياركرى دشێن كار بكه‌ن.

ئه‌ڤرۆ نيوز:

به‌رپرسێ مه‌كته‌با هه‌لبژارتنێن لقا ئێك يا پارتى ديموكراتى كوردستان ل دهۆك راگه‌هاند كو ل دهۆكێ زێده‌ترى 30 بنگه‌هێن ده‌نگدانێ كێشا راوه‌ستيانا ئاميرێن ده‌نگدانێ يا هه‌يى و هه‌كه‌ كۆمسيۆن ب له‌ز كێشێ چاره‌ نه‌كه‌ت، خه‌لكه‌كێ زۆر دێ بێ به‌هر بيت.

خالد ئه‌حمه‌د، به‌رپرسێ مه‌كته‌با هه‌لبژارتنێن لقا ئێك يا پارتى ديموكراتى كوردستان، گۆت: “ل سنورێ پارێزگه‌ها دهۆكێ خه‌لكه‌كێ زۆر ب گه‌رمى روو دكه‌ته‌ سه‌ر سندوقێن ده‌نگدانێ، هه‌كه‌ بيت و كێشا راوه‌ستيانا ئاميرى ب له‌ز بهێته‌ چاره‌كرن، چاڤه‌رێى ئه‌نجامه‌كێ باشين”.

گۆتژى: “زێده‌ترى 30 بنگه‌هێن ده‌نگدانێ كێشا راوه‌ستيانا ئاميرێ ده‌نگدانێ هه‌يه‌، ژ به‌ر هندێ دخوازين كۆمسيۆن ب له‌ز د هه‌وارا چاره‌كرنا ئاريشان بكه‌ڤيت، هه‌كه‌ر نه‌ وه‌كو ده‌نگدانا تايبه‌ت خه‌لكه‌كێ زۆر دێ هێته‌ بێ به‌هر كرن ژ پرۆسا ده‌نگدانێ، هه‌كه‌ ئه‌و كێشه‌ نه‌بيت، رێژا پشكداريكرنێ دێ گه‌له‌ك يا زێده‌ بيت”.

ئه‌ڤرۆ نيوز:

ئه‌ڤرۆ سپێدێ هه‌لبژارتنێن گشتى ل عيراقێ و هه‌رێما كوردستانێ ده‌سپێكرن و ليسته‌ و قه‌وارێن سياسى و به‌ربژار دێ هه‌ڤركيێ ل سه‌ر 328 كورسيێن جڤاتا نوونه‌رێن عيراقێ كه‌ن.

ل كه‌مپێن ئاواران كێشێن جودا بۆ وان دروست كرينه‌ دا كو نه‌شێن ب ره‌نگه‌كێ دروست ده‌نگێ خوه‌ بده‌ن، هه‌ر وه‌كو باسم قاسم په‌يامنێرێ ئه‌ڤرۆ نيوز ل كه‌مپا كه‌به‌رتۆ ئێك راگه‌هاند: كێشێن زۆر بۆ ده‌نگده‌ران دروست كرينه‌ ژ ئاماده‌نه‌كرنا ليستێن ناڤان ب ده‌مه‌كێ زوو و نه‌هاتنا ناڤێن وان ل كه‌مپان و ده‌ركه‌فتنا ناڤێن وان ل ده‌رڤه‌ى كه‌مپان.

په‌يامنێرێ ئه‌ڤرۆ نيوز گۆت: “ل كه‌مپا كه‌به‌رتۆ ئێك و دو، ناڤێن پتريا وه‌لاتيان ل ناڤ كه‌مپێ نه‌هاتينه‌ و پێدڤيه‌ سه‌ره‌دانا بنگه‌هێن دى ل سێمێل و ته‌ناهى بكه‌ن و ئه‌ڤه‌ ژى بارگرانى يه‌ بۆ ئاواران و دشيان دا نينه‌ بچنه‌ وان جهان.

ل سنورێ كه‌مپێن كه‌به‌رتۆ ئێك و دو نێزيكى 27 هزار خێزانان هه‌نه‌ و ژ وان ژى ژماره‌كا زۆر يا وه‌لاتيان مافێ ده‌نگدانێ هه‌يه‌.

ل كه‌مپا ئيسيان ژى ل سنورێ قه‌زا شێخان دو سێ ده‌مژمێرێن ده‌سپێكێ ژ هه‌لبژارتنان تۆمارێن ده‌نگده‌ران نه‌بوون و ده‌نگده‌ر نه‌دشيان ده‌نگێ خوه‌ بده‌ن و پاشان ژى هه‌مان ئاريشا ناڤان هه‌يه‌. ل كه‌مپا ئيسان ژى نێزيكى شه‌ش هزار كه‌سان هه‌نه‌ و ژماره‌كا زۆر ژ وان كه‌سان مافێ ده‌نگدانێ هه‌يه‌.

ل پارێزگه‌ها دهۆكێ 716 هزار و 300 كه‌سان مافێ ده‌نگدانێ هه‌يه‌ و ل سه‌ر 256 بنگه‌هـ و 1664 ويستگه‌هان هاتينه‌ به‌لاڤكرن و د ده‌نگدانا تايبه‌ت ژى دا 50 هزار كه‌سان مافێ ده‌نگدانێ هه‌بوو. ده‌رباره‌ى ئاواران ژى 200 هزار كه‌سان مافێ ده‌نگدانێ هه‌يه‌ و 61 بنگه‌هێن دانگدانێ بۆ هاتينه‌ دابينكرن.

ئه‌ڤرۆ نيوز:

به‌رپرسێ ئۆفيسا هه‌ولێر يا كۆمسيۆنا بلندا سه‌ربه‌خۆيا هه‌لبژارتنان ل عيراقێ روونكرنه‌كێ ل دۆر شێوازێ ده‌نگدانێ دده‌ت و ده‌نگده‌ران ئاگه‌هدار دكه‌ت كو به‌رى فۆرمێ بێخنه‌ ناڤ سندوقا ده‌نگدانێ په‌نجه‌مۆرێ نه‌كه‌ن، چونكو هه‌كه‌ فۆرمه‌ پيس بوو ئامير ناخوينيت.

عه‌لى قادر، به‌رپرسێ ئۆفيسا هه‌ولێر يا كۆمسيۆنا بلندا سه‌ربه‌خۆيا هه‌لبژارتنان ل عيراقێ د كۆنگره‌كێ رۆژنامه‌ڤانى دا راگه‌هاند كو ل سنورێ هه‌ولێرێ هه‌وا هه‌لبژارتنان ب ره‌نگه‌كێ باش يا ب رێڤه‌ دچيت و ل هنده‌ك بنگه‌هێن ده‌نگدانێ كێشێن هۆنه‌رى هه‌نه‌، تيمێن مه‌ مژوولى چاره‌سه‌ريێ نه‌”.

گۆتژى: “داخوازێ ژ ده‌نگده‌ران دكه‌ين كو به‌رى فورمێ بێخنه‌ ناڤ سندوقا ده‌نگدانێ په‌نجه‌مۆرێ نه‌كه‌ن، چونكو هه‌كه‌ فۆرمه‌ پيس بوو، ئامير ناخوينيت”.