ئه‌ڤرۆنيوز:
شيره‌تكارێ جڤاتا ئاسايشا هه‌رێما كوردستانێ، مه‌سرور بارزانى ئه‌ڤرۆ ئێكشه‌مبى 6/5/2018 دپێشوازيا جۆن وێلكس باليوزێ بريتانيا ل عيراقێ راگه‌هاند پشتى هه‌لبژارتنان دێ بزاڤێ كه‌ين وكار كه‌ين بۆ وێ چه‌ندێ ب هه‌ڤپه‌يمانيه‌كا ئێكگرتى وب ئێك هه‌لويست چينه‌ به‌غدا.

دديداره‌كێ دا كو مارتن وار كونسۆلێ گشتيێ بريتانيا ل هه‌رێما كوردستانێ به‌رهه‌ڤبووى، دووماهى پێشهاتێن ده‌ڤه‌رێ وپه‌يوه‌نديێن هه‌ولێرێ وبه‌غدا وهه‌لبژارتنێن گشتى وپێنگاڤێن پشتى راگه‌هاندنا ئه‌نجامێن وان هاته‌ به‌حسكرن.

مه‌سرور بارزانى سه‌ره‌راى به‌رچاڤكرنا بۆچوونێن خوه‌ وپێنگاڤێن پاشتر بۆ پاشه‌رۆژا سياسى وپێكئينانا حوكمه‌ته‌كا هه‌ڤپشكيا راسته‌قينه‌ ل عيراقێ، ئه‌و هه‌لبژارتنێن ب چاره‌نڤيسساز هژمارت وراگه‌هاند” پشتى هه‌لبژارتنان دێ بزاڤێ كه‌ين وكاركه‌ين بۆ وێ چه‌ندێ ب هه‌ڤپه‌يمانيه‌كا ئێكگرتى وب ئێك هه‌لويست چينه‌ به‌غدا”.

ئه‌ڤرۆنيوز:
وه‌زاره‌تا دارايى وئابوورى ل هه‌رێما كوردستانێ برياره‌كا نوو ل دوور وه‌رگرتنا مۆله‌تا بێ مووچه‌ ده‌ردكه‌ت.
وه‌زاره‌تا دارايى ب نڤيسارا خوه‌ يا هژمار 3615 ل 19/4/2018 به‌حسێ راستڤه‌كرنا خالا چارێ ژ رێنماييا هژمار 14 يا تايبه‌ت ب مۆله‌تا بێ مووچه‌ بۆ خودانێن پلێن تايبه‌ت دكه‌ت.
وه‌زاره‌تا دارايى دياركريه‌، ل رۆژا ده‌رچوونا ڤێ بريارێ هه‌ر كه‌سه‌ك ب پله‌يا وه‌زير داخوازا موله‌تا بێ مووچه‌ بكه‌ت، پێدڤيه‌ رازيبوونا جڤاتا وه‌زيران وه‌ربگريت.

ئه‌ڤرۆ نيوز:

ل مەخموور دەست ھەلاتدارێن عێراقێ رێکێ نادەن ئوفیسا لیستا 184 یا پارتی بھێتە ڤەکرن و بەرپرسەکێ پارتیژی دبێژیت، پارتی دێ ل نەینەوا و مەخموور کۆرسیێن بەرێ ئینیت و دەنگێن پارتی دێ زێدەبن ل ھەلبژارتنێن ڤێجارێ.

حەیدەر شێخ کەمال، کارگێڕێ لقێ پارتی ل مەخموور بۆ رۆژناما ئەڤرۆ گۆت” ئەڤا ئەم پێشبینی دکەین ل سنورێ قەزا مەخموور لیستا 184 یا پارتی دێ دەنگێن ئێکێ بدەستڤە ئینیت و لیستا ئێکێ بیت، ژبەرکو ژبلی کوردان وەلاتیێن عەرەبژی سۆزدایە دەنگێ وان ل رۆژا ھەلبژارتنان دێ بۆ لیستا پارتی بیت، چونکو ددەمێ ھێرشا داعش بۆسەر دەڤەرێ پارتی بەڕەڤانی ل ھەموو پێکھاتێن دەڤەرێ کریە و ھژمارەکا زۆرا ئاوارەیان حەواندینە، ژلایێ ئیداری ڤە قەزا مەخموور ب پێنج ناحیاڤە گرێدایی پارێزگەھا نەینەوایە، گورەی پێشبینیێن مە دێ پارتی ل نەینەوا کۆرسیێن بەرێ ئینیت و بگرە زێدەژی بکەت.

حەیدەر شێخ کەمال گۆتژی” چەندین لیستێن جودا پەیدابووینە بۆھەلبژارتنێن ئەڤسالە، بەلێ کۆرسیێن پارتی دێ ھەر بمینن، ژ بەر کو ھەڤڕک نینە، ئەڤە سەرەرای رێگریێن ل بەربژێرێن پارتی تێنەکرن بۆ بانگەشەیان ھەلبژارتنان، ھەتا ل سەنتەرێ قەزا مەخموور دەستھەلاتێن عێراقێ رێکێ نادەن ئوفیسا لیستا 184 یا پارتی بھێتە ڤەکرن و رێگریێن زۆر ھەنە ل ھەمبەر لیستا پارتی.

ئه‌ڤرۆ نيوز:

پشتی راگەھاندنا ھەڤپەیمانیا جمھور یا کو ژ ئاکپارتی و مەھەپێ پێک دھێت، د ناڤبەرا چار پارتێن دی یێن تورکیا دا ژی ھەڤپەیمانیا (ھوزور) ھاتە راگەھاندن کو سەرکێشیا وێ پارتا کۆماریا گەل (جەھەپە) دکەت و پارت و ئالیێن سیاسی یێن کوردی ژی دخوازن ھەڤپەیمانیەکا کوردی و دیمۆکراتیک ئاڤا بکەن و ب رەنگەکی ب ھێز و یەکگرتی پشکداریێ د ھەلبژارتنێن سەرۆک کۆماریێ و پەرلەمانی دا.

د ڤێ مژارێ دا مستەفا ئۆزچەلیک سەرۆکێ گشتی یێ پارتا ئازادیا کوردستانێ راگەھاند کو ھەڤدیتنا وان یا ل گەل پارتا دیمۆکراسیا گەلان باش دەرباز بوویە و گۆت: (مە داخوازێن خوە پێشکێشی ھەدەپێ کر و د چارچۆڤێ ١٥ خالێن کو وەک دۆسیا مە دا ھەدەپێ ئەم دخوازین ھەڤپەیمانیەکا بەرفرەە یا کوردی دروست بکەین و وەک پێنگاڤا یەکەم ھەڤدیتنا مە گەلەک ئەرێنی بوو و ئەم دێ چاڤەرێی بەرسڤا برایێن خوە یێن ھەدەپێ بین و ھێڤیدارین کو ئەم بشێین د ھەلبژارتنان دا ب رەنگەکی یەکگرتی و ب ھێز پشکداریێ بکەین).

پەروین بولدان ھەڤسەرۆکا پارتا دیمۆکراسیا گەلان ژی پشتی ھەڤدیتنا سەرۆک و نوونەرێن پێنج پارتێن کوردستانی ل بەر ئاڤاھیا پارتا خوە بۆ رۆژنامەڤانان راگەھاند کو ئەو ژ سەرەدانا پارتێن کوردی کەیفخوەش بووینە و گۆت: (بۆ ھەلبژارتنێن ٢٤ێ خزیرانێ زێدە وەخت نەمایە و د ڤێ قۆناغێ دا دروست کرنا ھەڤپەیمانیەکا بەرفرەە یا دیمۆکراتیک بۆ پاشەرۆژا گەلێ کورد گەلەکێ گرنگە و ب واتەیە و خالێن کو شاندێ پارتێن کوردی داینە مە ھەمو خالێن گرنگن و بۆ پاشەرۆژا کوردان د جھێ خوە دانە و ئەم پشتەڤانیا داخوازێن وان دکەین و دشێم بێژم کو ھەڤدیتنەکا گەلەک ئەرێنی و سەرکەڤتی پێک ھاتیە و د پاشەرۆژێ دا ئەم دێ ب بەرفرەھی ل سەر ڤێ مژارێ راوەستین).