ئه‌ڤرۆنيوز:
حوكمه‌تا توركيا ئه‌ڤرۆ سێشه‌مبى ب فه‌رمى دلته‌نگيا خوه‌ ل دۆر خوه‌نيشادانێن ئيرانێ راگه‌هاند وهوشدارى ژى دا.

پشتى پێنج رۆژان ژ به‌ردواميا خوه‌نيشادانێن ئيرانێ، كو ئه‌ڤرۆ 2/1/2018 زورترين كوشتى ل رێزا خوه‌نيشانده‌ران دا كه‌فتن وره‌وشا ته‌ناهيێ ل ته‌هرانێ راده‌ستى له‌شكرێ پاسداران هاته‌ كرن، حوكمه‌تا توركى ب فه‌رمى دلته‌نگيا خوه‌ ل دۆر خوه‌نيشادانێن ئيرانێ دياركر وراگه‌هاند، هه‌بوونا ته‌ناهيێ وسه‌قامگيريێ ل ئيرانێ بۆ توركيا گه‌له‌ك يا گرنگه‌.

وه‌زاره‌تا ده‌رڤه‌ يا توركى، دبه‌ياننامه‌كێ دا ل دۆر خوه‌نيشادانێن ئيرانێ، هيڤى خواست رێ ل هه‌لكێشانا روودانان بهێته‌ گرتن وئومێدێ وێ چه‌ندێ ژى خواست كو روودانێن ئيرانێ ژ ده‌ستێوه‌ردانا ده‌ره‌كى ددوور بن.

ل دووڤ پشكا عه‌ره‌بى يا ئاژانسا ئه‌نادۆل يا توركى،وه‌زاره‌تا ده‌رڤه‌ يا توركى راگه‌هانديه‌‌ كو توركيا نێگه‌رانيا خوه‌ ل دۆر به‌رده‌وامبوونا خوه‌نيشادانێن ئيرانێ ده‌ربرى كو ل 28/12/2017 ده‌ست پێكرين وتێدا چه‌ندين كه‌س هاتينه‌ كوشتن وزيان ب داموده‌زگه‌هێن حكومى كه‌فتين.

به‌يانناما وه‌زاره‌تا ده‌رڤه‌ يا توركى هه‌روه‌سا ئاماژه‌ ب وێ چه‌ندێ دايه‌ كو بۆ توركيا پاراستنا ئاراميا جڤاكى وسه‌قامگيريا ( ئيرانا دوست وبرا) گه‌له‌ك يا گرنگه‌ ودبێژيت” ل به‌رچاڤگرتنا رۆهنكرنا سه‌رۆك كۆمارا ئيرانێ حه‌سه‌ن رووحانى كو راگه‌هاندبوو ده‌ربرينا نه‌رازيبوونێ مافێ وه‌لاتيانه‌، به‌لێ پێدڤيه‌ زيان نه‌گه‌هيته‌ سامانێ گشتى، ودوێ باوه‌ريێ داينه‌ كو دڤێت دوورى توندوتيژيێ بن وپێدڤيه‌ ل دووڤ هاندانا ئاژاوه‌گێريێ نه‌چن وهيڤيدارين زووتر ئارامى ل وى وه‌لاتى ده‌سته‌به‌ر ببيت ورێ ل هه‌لكێشانا روودانان بهێته‌ گرتن وئه‌و روودانه‌ ژ ده‌ستێوه‌ردانا ده‌ره‌كى ددوور بن”.

ئه‌ڤرۆنيوز:

رێبه‌رێ بلند يێ ئيرانێ راگه‌هاند، دروودانێن ڤان چه‌ند رۆژان دا دوژمنێن ئيرانێ ب رێيێن جۆراوجۆر وبشيانێن ئابوورى وله‌شكرى وه‌كو چه‌ك وسياسه‌ت وهيزێن ئه‌منى دگه‌ل ئێكدا بوونه‌ هه‌ڤپه‌يمان تاكو كێشه‌ وئالۆزيان بۆ ئيرانێ دروست بكه‌ن وئاراميا وێ تێكبده‌ن.

ئه‌ڤرۆ سێشه‌مبى 2/1/2018 نڤيسينگه‌ها راگه‌هاندنێ يا رێبه‌رێ بلند يێ ئيرانێ (عه‌لى خامه‌نه‌ئى) ل دۆر روودانێن ڤێ دووماهيێ يێن ئيرانێ گۆت” دوژمن يێن كێشان دناڤ ئيرانێ دا دروست دكه‌ن ويێن ل دووڤ ده‌ليڤه‌كێ دگه‌ريێن بۆ گه‌هاندنا زيانان ب ئيرانێ”.

خامه‌نه‌ئى گۆت ژى” دروودانان ڤان چه‌ند رۆژان دا، دوژمن ب ئامرازێن جۆراوجۆر ژوان( پاره‌، چه‌ك، سياسه‌ت، ده‌زگه‌هێ ئه‌منى) وب هه‌موو شێوه‌كى بزاڤ يێن كرين كێشان بۆ ئيرانێ دروست بكه‌ن”.

دبێژيت ژى” سه‌باره‌ت ڤان گرژى وروودانان، دێ من هنده‌ك گۆتن ورۆهنكرن هه‌بن كو دده‌مێ خوه‌ دا دێ بۆ خه‌لكى رۆهن كه‌م”.

ئه‌ڤرۆنيوز:

سه‌نته‌رێ چالاكيێن خوه‌پاراستنێ يێ سه‌ر ب وه‌زاره‌تا ده‌رڤه‌يا ئه‌مريكى ڤه‌ دراپۆرته‌كا خوه‌ دا ئاماژێ ب وان گه‌فێن ل سالا 2018 دێ تووشى ئاسايشا ئه‌مريكا بن دكه‌ت كو ئه‌گه‌رێ شه‌ره‌كى دژى ئيرانێ زێده‌تر دكه‌ن.

پۆل ستريس، سه‌رۆكێ سه‌نته‌رى وسه‌رپه‌رشتێ راپۆرتێ ل دۆر وێ چه‌ندێ دبێژيت” قه‌يرانا ئيرانێ وكوريا باكوور مه‌زنترين قه‌يرانێن نێڤده‌وله‌تى نه‌ ودگه‌شه‌سه‌ندنه‌كا به‌رده‌وام ژى دانه‌”.

پۆل دياردكه‌ت كو پێدڤيه‌ ئه‌مريكا “بريارێن هشيارانه‌ بده‌ت” وخوه‌ ژ پێكدادانێن له‌شكرى بپارێزيت كو دبيت زيانان بگه‌هێننه‌ ئه‌مريكا ودبێژيت” پێنگاڤێن ژوى جۆرى دێ زيانان ب به‌رژه‌وه‌نديێن ئه‌مريكا گه‌هينيت”.

هه‌ڤده‌م هوشدارى ژى دا ژدروست بوونا شه‌ره‌كێ نوو ل سووريێ وئه‌گه‌رێ شكه‌ستنا حوكمه‌تا ئه‌فغانستانێ ژى كو دبيت ببيته‌ رێخوه‌شكه‌ره‌ك بۆ زێده‌بوونا تونديتيژيان ونه‌سه‌قامگيريا ده‌ڤه‌رێ.

سه‌باره‌ت ئيسرائيلێ ژى، راپۆرتا ناڤبرى پێشبينيا پێكدادانان دكه‌ت دناڤبه‌را له‌شكرێ ئيسرائيلێ وچه‌كدارێن حزبوللا يا لوبنانى كو ره‌نگه‌ ئه‌و پێكدادان ب دو سيناريۆيان رووبده‌ن سيناريۆيا ئێكێ دناڤبه‌را ئيسرائيلێ ولوبنانێ وسيناريۆيا دويێ ل سنورێن دناڤبه‌را ئيسرائيلێ وسووريێ.