ئەندامەكێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان راگەهاند: ئیراقا نوو ل سەر بنەمایێ هەڤسەنگی، هەڤپشكی و لهەڤهاتنێ هاتییە ئاڤاكرن، بەلێ مەژییەك پەیدا بوویە دڤێت وەلاتی ب رێیا زۆرینە و كێمینێ برێڤە ببەت.
د. زیرەك زێباری، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان گۆت: ئاراستەیەكێ خراب د جڤاتا نوونەرێن ئیراقێ دا دروست بوویە كو دڤێت هەڤسەنگی د ناڤ جڤاتێ دا نەمینیت؛ ب زۆرینەیەكا دروستكری ژ پێخەمەت بەرژەوەندیێن سیاسی، ژینگەها سیاسی یا جڤاتا نوونەرێن ئیراقێ تێك د دەن. بەردەوامیدان ب ڤی ئاراستەی دێ ئەنجامێن خراب ل سەر پاشەرۆژا جڤاتا نوونەران هەبن، چونكی ئەوا د بابەتێ سەرۆككۆمارێ ئیراقێ دا هاتییە كرن، شكاندنا هەموو پیڤەر و رێزگرتنا سیاسی بوو ل ئیراقێ.
د. زیرەك زێباری ئەو چەندە ژی گۆت: ئاراستەیەك پەیدا بوویە دڤێت زۆرینەیەكێ د جڤاتا نوونەرێن ئیراقێ دا دروست بكەت داكو هەر تشتێ بڤێت ئەنجام بدەت، ئەڤە ژی بەرۆڤاژی عورفێ سیاسی، رێككەفتنێن سیاسی و مافێ پێكهاتەیانە ل ئیراقێ. بۆ نموونە؛ د بابەتێ سەرۆككۆماری دا، زۆرینەیەك هاتە دروستكرن بێی كو ڤەگەرین بۆ حزبێن كوردستانی هەبیت، وان سەرۆككۆمارەك هەلبژارت كو نوونەراتیا گەلێ كوردستانێ ناكەت و وان ل بەرە ب وێ زۆرینەیێ پێنگاڤێن دی ژی د جڤاتا نوونەران دا بهاڤێژن، كو ئەڤە ژی نەئارامییا سیاسی و سەقایەكێ خراب یێ سیاسی دروست دكەت.
ناڤهاتی گۆت ژی: پارتی بایكۆتا كۆمبوونا جڤاتا نوونەرێن ئیراقێ كرییە، چونكی پارتی دزانیت ئەوا نوكە د جڤاتا نوونەرێن ئیراقێ دا هەی، نە خزمەتا ئیراقێ و نە ژی خزمەتا كوردستانێ و دەڤەرێ دكەت. دڤێت ئەو جڤات ڤەگەریتەڤە بۆ واقعێ سیاسی و نابیت رێككەفتنا چەند حزب و گرووپان ل پێكڤەژیانا سیاسی یا ئیراق و كوردستانێ بدەت. پارتی باش د مەرەما وان دگەهیت، وان دڤێت ب ڤێ زۆرینەیێ جڤاتا نوونەران بكەنە چەكێ تۆلڤەكرنێ و دەربازكرنا بڕیارێن نە لۆژیكی.

هەولێر، قائید میرۆ

جڤاتا نوونەرێن ئیراقێ خواندنا ئێكێ بۆ پڕۆژە قانوونا سەربازییا ب زۆری كر و ئەندامەكێ لیژنەیا ئاسایش و بەرەڤانیێ ژی ئاماژەكر، چو رێككەفتن نەهاتینەكرن بۆ دەركرنا ئەڤێ قانوونێ و دبێژیت، هەرچەندە دێ هەرێما كوردستانێ ژی ڤەگریت، بەلێ چو هەماهەنگی نینە د ناڤبەرا هەردو حوكمەتا ل دۆر پرۆسەیا سەربازییا ب زۆری ئەڤێ چەندێ ژی دێ كاریگەریێن خراب هەبن.
شێروان جەمال، ئەندامێ لیژنەیا ئاسایش و بەڕەڤانیێ ل جڤاتا نوونەرێن ئیراقێ بۆ رۆژنامەیا ئەڤرۆ گۆت» پڕۆژە پێشنیازەك ژئالیێ سەرۆكێ جڤاتا نوونەرێن ئیراقێ هاتیە بەرهەڤكرن ل دۆر ڤەگەڕیانا سەربازییا ب زۆری، بەلێ ب چو شێوەیەكی هەماهەنگی د ناڤبەرا سەرۆكایەتییا جڤاتا نوونەران و حوكمەتێ و سەرۆكێن فراكسیۆنێن ناڤا جڤاتێ نینە ل دۆر بەرهەڤكرنا ئەڤێ پڕۆژە پێشنیازێ، هەتا كۆمبوون ل گەل لیژنەیا ئاسایش و بەڕەڤانیێ نەهاتیەكرن و ئەم ئاگەهدار نەكرینە، ئەڤەژی دەستپێكەكا مەترسیدارە ل ئەڤێ خۆلا جڤاتا نوونەرێن ئیراقێ پەیدا دبیت، چونكە سەپاندنا ئیرادەیا خوە ژئالیێ سەرۆك و جێگرێ ئێكێ یێ جڤاتا نوونەرێن ئیراقێ دێ كاریگەریێن خراب هەبن، ب تایبەتی چو هەماهەنگی د ناڤبەرا هەرێما كوردستانێ و ئیراقێ دا نینە بۆ دەركرنا قانوونا سەربازییا ب زۆری، ئەڤەژی د دەمەكی دایە هەكە ئەو پڕۆژە قانوونە بهێتە پەسەندكرن دێ هەرێما كوردستانێ ژی ڤەگریت».
دیاركر ژی» پڕۆژە قانوونا سەربازییا ب زۆری دێ هەموو وەلاتییان ڤەگریت و رەهەندێن دارایی ژی هەنە، چونكە بودجەیەكا مەزن پێدڤییە بۆ ئەنجامدانا ئەڤێ پرۆسەیێ و دڤێت حوكمەتا ئیراقێ بەرهەڤییا خوە دیار بكەت بۆ مەزاختنا بودجەی، ئەز باوەرم دەربازكرنا ئەڤێ پڕۆژە قانوونێ بڤی شێوەی دێ كاریگەریێن خراب بۆ ئیراقێ هەبن».
ب گۆرەی ناڤەڕۆكا پڕۆژە قانوونا هاتییە پێشنیازكرن هەر وەلاتییەكێ نێر د ژیێ هەژدە سالیێ دێ ڤەگریت و ب زۆری چیتە سەربازیێ، كەسێن چو باوەرنامە نەبن دێ هەژدە هەیڤا خزمەتا سەربازیێ كەن و یێن دی ژی ب گۆرەی باوەرنامێ دەمێ وان یێ سەربازیێ كێمترە، هەروەسا ل دووڤ هەمان پڕۆژە قانوون ژبلی كەسێن ئێكانە و نەخۆشییا دووم درێژ هەی چو كەسەكێ دی ناهێتە لێبۆرین ژ سەربازییا ب زۆری و ب شێوەیەكێ نەچاری دڤێت خزمەتا سەربازی بكەن، مووچەیێ كەسێن دچنە خزمەتا سەربازیێ ژی دێ وەك مووچەیێ سەربازێن ئیراقێ بیت و هەرێما كوردستانێ ژی دێ ڤەگریت».
شێروان جەمالی ئاماژەكر» لیژنەیا ئاسایشێ و فراكسیۆنێن ناڤا جڤاتا نوونەران ژی پشكدار نەبووینە د بەرهەڤكرنا پڕۆژە قانوونا سەربازییا ب زۆری دت كو ئەڤە دەستپێكەكا مەترسیدارە هەر پڕۆژەیەكێ سەرۆكێ جڤاتا نوونەران و جێگرێ وی بخوازن دەرباز بكەن، خۆلا نوكە یا جڤاتا نوونەران زۆر خۆلەكا هەستیارە، ژ بەر كو كاركرنا جڤاتا نوونەرێن ئیراقێ بڤی دەستوداری دێ كارڤەدان هەبن، هەروەسا پەسەندكرنا پڕۆژە قانوونەكا هەستیار و گرنگ بێی هەبوونا هەماهەنگیێ ل گەل كۆتلەیێن سیاسی ئاماژەیێن مەترسیدارن ل ئەڤێ خۆلا جڤاتا نوونەران، هەكە پڕۆژە قانوونا سەربازییا ب زۆری سەربگریت و بهێتە پەسەندكرن ژی بجهئینانا وێ دێ گەلەك ب زەحمەت بیت».

هژمارەک ژ پارتی و هێزێن سیاسی یێن کوردستانی ل باژێرێ ئامەدێ یێ باکورێ کوردستانێ تازی بۆ شەهیدێن ڤێ دووماهیێ یێن رۆژهەلاتێ کوردستانێ دانان و هژمارەک زێدە ژ سیاسەتمەدار، نڤیسەر، چاڤدێرێن سیاسی و کەسایەتیێن کورد پشکداری د تازیێ د کرن و هەڤخەمیا خوە بۆ گەلێ کورد ل رۆژهەلاتێ کوردستانێ دیار کرن.
تازی ل ناڤەندا پارتا وەلاتپارێزێن کوردستانێ هاتە دانان و سیاسەتمەدارێن کورد دیار کرن، ئێرشێن ڤێ دووماهیێ یێ دەولەتا ئیرانێ ل دژی پێشمەرگێن رۆژهەلاتێ کوردستانێ شەرمزار دکەن، چونکی هێزێن کوردی یێن رۆژهەلاتێ کوردستانێ پشکەک ژ شەڕی نەبووینە و نها ئاگربەست د ناڤبەرا ئیرانێ و ئەمریکا دا هەیە و جهێ داخێ یە ئیران ئێرشی هەرێما کوردستانێ دکەت، ئەو یەک ب چو رەنگەکێ ناهێتە قەبوول کرن و دڤێت جڤاکێ نێڤدەولەتی ئێرشێن ئیرانێ شەرمزار بکەت و وەکو کوردێن باکورێ کوردستانێ ئەو هەڤخەمیا خوە بۆ گەلێ کورد ل رۆژهەلاتێ کوردستانێ دیار دکەن و ئێرشێن ئیرانێ ژی ب توندی شەرمزار دکەن.

سەرۆك مەسعود بارزانی، پەیامەكا پیرۆزباهیێ ئاراستەی عەممار حەكیمی دكەت ب هەلكەفتا دووبارە هەلبژارتنا وی وەكو سەرۆكێ باسكێ حیكمە یێ نیشتمانی.
د پەیاما سەرۆك بارزانی دا بۆ عەممار حەكیمی هاتیە: «ب هەلكەفتا دووبارە هەلبژارتنا هەوە وەكو سەرۆكێ باسكێ حیكمە، گەرمترین و جوانترین پیرۆزباهییان ل هەوە دكەین. داخوازێ ژ خودایێ مەزن دكەین هەر دەم سەركەفتی و رێ نیشاندەرێ هەوە بیت.»
ل رۆژا شەمبیێ 19/4/2026 باسكێ حیكمە یێ نیشتمانی ئەڤرۆ كۆنگرەیا خۆ یا گشتی بەست و تێدا ب كۆما دەنگان، عەممار حەكیم وەكو سەرۆكێ باسكی بۆ خولەكا دی هاتە هەلبژارتن.
عەممار حەكیم یێ كو ل سالا 2017ێ باسكێ حیكمە دامەزراندی، ئێكە ژ سەركردەیێن دیارێن د ناڤ هەڤپەیمانییا چوارچۆڤەیێ هەماهەنگیێ دا.
ئەڤ پیرۆزباهییە د دەمەكێ دایە كو ئالیێن سیاسی یێن ئیراقێ پشتی هەلبژارتنا سەرۆككۆماری، مژوولی دانوستاندنانە بۆ پێكئینانا كابینەیا نوو یا حوكمەتێ، هەرچەندە پارتی دیموكراتی كوردستان ژبەر نەرازیبوونا ل سەر پرۆسەیا هەلبژارتنا سەرۆككۆماری، بایكۆتا روونشتنێن جڤاتا نوونەران كریە.
ژ ئالیێ خۆڤە، نێچیرڤان بارزانی، سەرۆكێ هەرێما كوردستانێ و مەسرور بارزانی، سەرۆكێ حوكمەتا هەرێمێ، ب هەلكەفتا دووبارە هەلبژارتنا عەممار حەكیم وەك سەرۆكێ باسكێ حیكمە، پیرۆزباهی لێ كرن و هیڤیا سەركەفتنێ بۆ خواستن و دووپاتی ل سەر گرنگییا هەماهەنگیێ بۆ پاراستنا ئارامییا ئیراقێ كرن.

سەرۆكێ هەرێما كوردستانێ و سەرۆككۆمارێ توركیا ل د چارچۆڤەیێ كۆڕبەندا دیپلۆماسی یا ئەنتالیا كۆمبوون. د تویتەكێ دا نێچیرڤان بارزانی ئاماژە ب وێ چەندێ كریە، كو د كۆمبوونێ دا دانوستاندنێن جدی دەربارەی ب هێزكرنا هەماهەنگییا د ناڤبەرا توركیا، ئیراقێ و هەرێما كوردستانێ دا ئەنجام داینە.
نێچیرڤان بارزانی، سەرۆكێ هەرێما كوردستانێ د پۆستەكێ دا ل سەر تۆرا جڤاكی یا ئیكس (تویتەرا بەرێ) دەربارەی كۆمبوونا خۆ ل گەل رەجەب تەیب ئەردۆغان، سەرۆككۆمارێ توركیا نڤیسییە: «خۆشحال بووم كو ل ئەنتالیا چاڤێ من ب سەرۆك رەجەب تەیب ئەردۆغان كەفتی.»
سەرۆكێ هەرێما كوردستانێ دبێژیت: «مە دانوستاندنەكا جدی دەربارەی ب هێزكرنا هەماهەنگییا د ناڤبەرا توركیا، ئیراق و هەرێما كوردستانێ دا كر، و مە دیتن و بۆچوونێن خۆ ل سەر گوهۆڕینێن دەڤەرێ لێكگۆهارتن. مە دوپات كر كو هەر دو ئالی پێگیرین ب پێشئێخستنا ئارامییا دەڤەرێ وگەشەپێدان و ئاسایشا هەڤپشك.»
د تەوەرەكێ دی یێ كۆمبوونێ دا، ل دووف بەیاننامەیا سەرۆكاتییا هەرێما كوردستانێ، دووپاتی ل سەر بەرفەرهكرنا ئاسۆیێن هەماهەنگییا هەڤپشك د بوارێن جودا جودا دا هاتە كرن و هەر دو ئالییان دوپات كر، كو دیالۆگ باشترین رێكە بۆ چارەسەركرنا قەیرانان و پاراستنا بەرژەوەندیێن هەڤپشك.
سەرۆكاتییا هەرێما كوردستانێ ئەو چەندە ژی دیار كریە، كو چەند پرسێن دی یێن جهێ گرنگییا هەڤپشك، تەوەرەكێ دی یێ كۆمبوونێ بوون

دلشاد شەهاب، پەیڤدارێ سەرۆكاتییا هەرێما كوردستانێ راگەهاند: «بوونا هەرێما كوردستانێ د وان ناڤەندێن دیپلۆماسی دا كارتێكرن و رامانەكا تایبەت ب خۆ ڤە هەیە.» ئاماژە ب وێ چەندێ ژی كر كو د ڤێ شەڕێ دووماهیێ دا هاتە سەلماندن كو هەر روودانەك ل دەڤەرێ یان ل جیهانێ دێ كارتێكرنا گشتی هەبیت، لەوما دڤێت پرس ب گرنگییا هەمەلایەنە بهێنە وەرگرتن.
دلشاد شەهاب ڕاگەهاند كو پەیاما نێچیرڤان بارزانی دووپاتكرن بوو ل سەر رۆلێ هەرێما كوردستانێ د پاراستنا ئارامیێ دا. هەروەسا باسێ وان زیانان كر یێن كو گەهشتینە هەرێما كوردستانێ، د وەختەكی دا «ب كریار و ب گۆتارا فەرمی پشكەك نەبوویە ژ وێ ململانێ و شەڕی.»
دلشاد شەهاب هەروەسا ب گرنگی زانی ئاماژێ ب وێ چەندێ بدەت كو هێرشێن ل سەر هەرێما كوردستانێ ئێك ژ تەوەرێن كۆڕبەندا ئەنتالیا بوون و گۆت: «خالەكا كو بۆ هەرێما كوردستانێ گەلەك یا گرنگە هەموو ژێ ئاگەهدار بن؛ ئەو ژی ئەو هێرشێن نەڕەوا نە یێن كو دهێنە سەر هەرێما كوردستانێ، بێی كو چو ئەگەر هەبن. ب تایبەتی ژی ئەو هێرشێن ژ ئالیێ میلیشیایێن نەیاسایی ڤە ل ناڤ ئیراقێ دهێنە سەر هەرێما كوردستانێ.»
پەیڤدارێ سەرۆكاتییا هەرێما كوردستانێ راگەهاند ژی، پێگەهێ هەرێما كوردستانێ یێ ڕێزلێگرتی یە و پشكداربوویێن كۆڕبەندا ئەنتالیا دەستخۆشی ل رۆلێ ئەرێنی و كارتێكرنا نێچیرڤان بارزانی كریە.
پێنجەمین كۆڕبەندا دیپلۆماسی یا ئەنتالیا ل رۆژێن 17 هەتا 19ی نیسانا 2026ێ بڕێڤەچوو. نێزیكی پێنج هزار كەسایەتی ژ 150 وەلاتان پشكداری تێدا كریە. پتر ژ پێنج هزار كەسایەتی ب فەرمی هاتینە داخوازكرن كو نێچیرڤان بارزانی، سەرۆكێ هەرێما كوردستانێ ئێك ژ وان كەسانە. نێزیكی 20 بەرپرسێن بلندێن وەلاتان و حوكمەتێن وەلاتان، 15 جێگرێن سەرۆكی، پتر ژ 50 وەزیرێن وەلاتان كو 40 ژ وان وەزیرێن دەرڤەبوون، ل گەل نوێنەرێن 75 رێكخراو و كۆمەلێن نێڤدەولەتی د وی كۆڕبەندێ دا پشكداربوون. ژ سالا 2021ێ ڤە سالانە ب پشكدارییا سەركردە و بەرپرسێن بلند و بیرمەندێن نێڤدەولەتی دهێتە ئەنجامدان. نێچیرڤان بارزانی بۆ جارا چارێ یە تێدا پشكدار دبیت.

فراكسیۆنا پارتی دیموكراتی كوردستان ل جڤاتا نوونەرێن ئیراقێ، ب فەرمی بڕیارا بایكۆتكرنا كۆمبوونێن جڤاتا نوونەران تا دەمەكێ نەدیار راگەهاند. ئەڤ هەلوەستێ فراكسیۆنێ پشتی وێ چەندێ دهێت كو ئالیێن سیاسی یێن بەغدا ب بنپێكرنا دەستووری، یاسایێ و پشتگوهئێخستنا بنەمایێن سەرەكی یێن (هەڤپشكی، هەڤسەنگی و لهەڤهاتنێ) دهێنە تومەتباركرن، كو بنەمایێن بنەڕەتی یێن ئیراقا نوو نە.
فراكسیۆنا پارتی دیموكراتی كوردستان ل جڤاتا نوونەرێن ئیراقێ، د بەیاننامەیەكا فەرمی دا، هەلوەستێ خۆ یێ دوماهیێ بەرامبەر رەوشا نوكە یا جڤاتا نوونەران راگەهاند و بڕیار دا ب شێوەیەكێ ڤەكری و تا دەمەكێ نەدیار، بایكۆتا هەموو كۆمبوونێن جڤاتا نوونەران بكەت.
د بەیاننامەیێ دا هاتیە، ئەڤ بڕیارە وەكو نەرازیبوونەكێ دهێتە دەربڕین بەرامبەر وان «بنپێكرنێن دەستووری و یاسایی» یێن د ناڤ جڤاتا نوونەران دا رووددەن.
فراكسیۆنا پارتی ئاماژە ب وێ چەندێ كریە، كو بنەمایێن سەرەكی یێن پرۆسەیا سیاسی ل ئیراقێ، یێن كو ل سەر بنەمایێ (هەڤپشكیا راستەقینە، هەڤسەنگی د دەسهەلاتێ دا و لهەڤهاتنا نیشتمانی) هاتینە ئاڤاكرن، ب ئاشكرا هاتینە پشتگوهئێخستن.
فراكسیۆنا پارتی رۆهنكریە، كو بڕیارا بایكۆتكرنێ ل سەر بنەمایێ «رێنمایی و راسپاردەیێن سەركردایەتییا پارتی» بوویە، ئەڤە ژی وەكو كارڤەدانەك بەرامبەر وان بزاڤێن كو دخوازن شەرعییەتا پرۆسەیا سیاسی ل وەلاتی تێكبدەن.
د پشكەكا دی یا بەیاننامەیێ دا، فراكسیۆنا پارتی دووپات دكەت، كو «پاراستنا مافێن دەستووری یێن گەلێ كوردستانێ» هێلا سورە و ژ هەموو بەرژەوەندییێن سیاسی بلندترە.
ئەڤە ژی د دەمەكێ دایە، ل 11ی نیسانا 2026ێ، مەكتەبا سیاسی یا پارتی دیموكراتی كوردستان، د بەیاننامەیەكێ دا ئاماژە ب وێ چەندێ دابوو، كو بۆ هەلسەنگاندنا رەوشێ و راوێژكرنێ ل سەر پێنگاڤێن بهێت، پارتی بڕیار دایە هەردوو فراكسیۆنێن خۆ ل جڤاتا نوونەران و حوكمەتا فیدرالا ئیراقێ گازی هەرێما كوردستانێ بكەتەڤە.

هیوا گەیلانی، ئەندامێ كۆمیتەیا ناڤین یا پارتی دیموكراتی كوردستان د د داخۆیانییەكا رۆژنامەڤانیدا دا راگەهاند؛ دیتنا وان بۆ كەركووكێ رۆهن و ئاشكرایە و وی ب باژێڕێ پێكڤەژیانێ و پێكهاتەیان دزانن، لێ دوپاتی ل سەر وێ چەندێ كر كو ناسنامەیا كەركووكێ «كوردستانی»یە.
دەربارەی پرۆسەیا هەلبژارتنا سەرۆككۆماری و لێكگۆهارتنا پۆستێ پارێزگارێ كەركووكێ، گەیلانی ئاماژە ب وێ چەندێ كر، هەكە ئەم ڤەگەرین بۆ بۆری، دێ دیار بیت كی بوویە ئەگەر كو پارێزگارێ كەركووكێ نە كورد بیت. گۆت ژی: «د سالێن بۆری دا ژی مە پشكداری د دانانا پارێزگارێ كەركووكێ دا كرییە و مە پشتەڤانی لێ كرییە، وەك نەجمەدین كەریم كو ئەندامێ مەكتەبا سیاسی یا ئێكەتیێ بوو، مە پشتەڤانی لێ كرییە بۆ سەركەفتنا كارێن وی.»
وی ئەندامێ كۆمیتەیا ناڤین یا پارتی ئەو دەنگۆباسە رەتكرن كو دبێژن پارتی بوویە ئەگەر ئێكەتی كەركووكێ رادەست بكەت و گۆت: «ئەڤ دەنگۆباسە ب چو رەنگەكی راست نینن.»
د پشكەكا دی یا ئاخفتنێن خۆ دا، هیوا گەیلانی نەڕازیبوونا پارتی بەرامبەر شێوازێ دیاركرنا پارێزگارێ كەركووكێ دیار كر و راگەهاند: «بۆ مە گرنگ نینە ئەو كەسە كییە، تشتێ ل دەڤ مە گرنگ ئەوە هەموو ئالی ل سەر وێ چەندێ ئێكدەنگ بن كو ناسنامەیا كەركووكێ كوردستانییە.»
ئاماژە ب وێ چەندێ ژی كر، د بۆریدا، سەرەرای وێ چەندێ كو پترییا ئەندامێن جڤاتا پارێزگەها كەركووكێ پارتی بوون، لێ وان قەبوول كرییە پارێزگار ژ بەهرا ئێكەتیێ و ئەندامێ مەكتەبا سیاسی یا وێ حزبێ بیت.
هیوا گەیلانی گۆت ژی: «دەربارەی پەیوەندیێن مە ل گەل ئێكەتیێ، وەك هەموو ئالییەك دبینن، مخابن نە د باشن. ئەم وەك پارتی چو جاران دەرگەهێ دانوستاندنێ مە دانەخستییە، لێ ئێكەتیێ د پرۆسەیا هەلبژارتنا سەرۆككۆماری و پارێزگارێ كەركووكێ دا، یارییەكا مەترسیدار كر. د وێ پرۆسەیا وان كری دا، گەلێ كوردستانێ دۆراندنا سەرەكی كر، چونكی رێككەفتنا نهێنی ل سەر حیسابا مافێن گەلێ كوردستانێ هاتە كرن.»
باس ل وێ چەندێ ژی كر، دەربارەی سەرۆككۆماری، دڤێت سەرۆككۆمار نوونەراتییا گەلێ كوردستانێ ب هەموو پێكهاتەیێن وێ ڤە بكەت و پارێزەرێ دەستووری بیت، لێ مخابن نوكە نە ب وی رەنگییە و ئەو كەسایەتییێ نوكە نوونەراتییا هەرێما كوردستانێ ناكەت. پۆستێن سەرۆككۆماری و پارێزگارێ كەركووكێ ئێك پاكێج بوون و ب رێككەفتنا نهێنی د ناڤبەرا ئێكەتیێ و هندەك ئالیێن دی دا هاتە ئەنجامدان، كو ئەڤ چەندە د بەرژەوەندییا گشتی یا كوردان دا نینە.

سەرۆك بارزانی دوپات كر، كو كەركووك دڤێت ببیتە نموونەیا پێكڤەژیان و برایەتییا پێكهاتەیان. هەروەسا دبێژیت: ب چو رەنگەكی د گەل هندێ نینن كو ب رێكا بەردەوامیدان ب سەفەقاتێن مژەوی یێن هۆتێلا رەشید، یاری ب چارەنڤیسێ كەركووكییان بهێتە كرن.
سەرۆك مەسعود بارزانی پێشوازی ل ماكسیم رۆبین، كونسۆلێ گشتی یێ رووسیا ل هەولێرێ كر.
بارەگەهێ بارزانی بەلاڤ كر، د دیدارێ دا قونسلێ گشتی یێ رووسیا ل گەل دووپاتكرنێ ل سەر پەیوەندیێن ستراتیژی و درێژخایەن د ناڤبەرا وەلاتێ خۆ و هەرێما كوردستانێ دا، نرخاندن بۆ هەلوەستێن هەڤسەنگ یێن هەرێما كوردستانێ و پاراستنا ئارامیێ هەبوو.
قونسلێ گشتی یێ رووسیا راگەهاند: وەلاتێ وی گرنگییەكا مەزن ب پێگەهـ و كارتێكرنا سەرۆك بارزانی ددەت و هیڤی خواست پەیوەندیێن د ناڤبەرا رووسیا و هەرێما كوردستانێ دا گەشەكرنەكا زێدەتر ب خۆ ڤە ببینن.
هەروەسا دیتنا وەلاتێ خۆ دەربارەی گوهۆڕین و روودانێن دەڤەرێ بەرچاڤكر و ئاماژە ب وێ چەندێ كر، كو رووسیا دخوازیت بۆچوونا سەرۆك بارزانی ل سەر روودان و پێشهاتێن دەڤەرێ ب بزانیت.
ژ ئالیێ خۆ ڤە، سەرۆك بارزانی دووپاتی ل سەر بهێزكرنا پەیوەندیێن دیرۆكی یێن د ناڤبەرا هەرێما كوردستانێ و رووسیا دا كر.
هەروەسا ئاماژە ب دووماهی پێشهات و گوهۆرینێن دەڤەرێ كر و راگەهاند: كو هەرێما كوردستانێ چو جاران ل گەل هەبوونا شەڕ و ئالۆزییان نەبوویە و چو ئاریشە ب رێكا شەڕ و هەڤڕكیێن سەربازی چارەسەر نابن و دڤێت گرفت ب رێكا دانوستاندن و دیپلۆماسییەتێ بهێنە چارەسەركرن.
سەرۆك بارزانی دوپاتی ل سەر وێ چەندێ كر، كو هەرێما كوردستانێ چو جاران پشكەك نەبوویە و نابیت ژ وان شەڕ و پێكدادانێن ل دەڤەرێ هەین، و پشتەڤانی ل چو ئالۆزییەكا سەربازی و شەڕەكی ل دەڤەرێ نەكریە.
هەڤدەم ئەڤە ژی دیار كر، «مخابن سەرەرای وان هەلوەستێن رۆهن و ئاشكەرا یێن مە، ستەمەكا مەزن ل هەرێمێ هاتییە كرن و ژبەر هێرشێن بەرفرەهـ یێن مووشەكی و درۆنی، هەژمارەكا وەلاتیێن هەرێمێ شەهید و بریندار بووینە».
سەرۆك بارزانی د پشكەكا دی یا ئاخفتنێن خۆ دا، دەربارەی پرسا پارێزگەها كەركووكێ گۆت: ب دیتنا مە دڤێت كەركووك ببیتە نموونەیا پێكڤەژیان و برایەتییا پێكهاتەیان، و پارتی هەردەم ل گەل مافێ هەمی پێكهاتەیان بوویە و گەلەك جاران ژ پێخەمەت پێكهاتەیان و خەلكێ دی ژ مافێ خۆ خۆش بوویە و قوربانی ب دەستكەفتێن خۆ داینە.
ئەو چەندە ژی دووپات كر، كو ب چو رەنگەكی ل گەل هندێ نینن ب رێكا بەردەوامیدان ب سەفەقاتێن گوماناوی یێن هۆتێلا رەشید، یاری ب ئیرادەیا دەنگدەرێن كەركووكێ و چارەنڤیسێ كەركووكییان بهێتە كرن.

سەرۆك مەسعود بارزانی د پەیامەكێ دا ب هەلكەفتا سالڤەگەرا كیمیابارانكرنا دەڤەرێن بالیسان و شێخ وەسانان و دۆلا خۆشناوەتی دیار كر، كو ئەو تاوانە بوو ئەگەرێ شەهیدبوون و برینداربوونا هژمارەكا مەزن یا وەلاتیێن بێگونەهێن وێ دەڤەرێ. سەرۆك بارزانی ئاماژە ب وێ چەندێ كر كو ئەڤ تاوانە دەسپێكا پرۆسەیا كیمیابارانكرنا وەلاتیێن سڤیل و بەردەوامییا سیاسەتا قڕكرن و ژناڤبرنا گەلێ مە بوو.
سەرۆك بارزانی رۆناهی ئێخستە سەر دڕنداتییا رژێما وی سەردەمی و گۆت: «رژێم ب تنێ ب وێ كیمیابارانێ نەڕاوەستا، بەلكو ب دەهان بریندارێن وێ كارەساتێ پشتی دەستەسەركرنێ، ب شێوەیەكێ گەلەك دڕندانە ب ساخی بن ئاخ كرن، بیرهاتن و ئازارێن ڤێ تاوانێ و هەموو وان كارەساتێن ب سەر گەلێ كوردستانێ دا هاتین، چو جاران پشتگصهـ ناهاڤێژین و ژ بیر ناكەین.»