ئه‌ڤرۆنيوز:

سه‌رۆكێ توركى ئاشكراكر كو ئه‌مريكا مۆله‌تا سێ رۆژان يا دايێ بۆ ئازادكرنا قه‌شه‌كێ ئه‌مريكى وگه‌فێن وێ چه‌ندێن دكه‌ت هه‌كه‌ قه‌شه‌ نه‌هێته‌ ئازادكرن دێ سزايێن خرابتر سه‌پينيت.

ره‌جه‌ب ته‌يب ئه‌ردۆگان، سه‌رۆكێ توركيا راگه‌هاند” ئه‌مريكا مۆله‌تا سێ رۆژان دانايه‌ بۆ وێ چه‌ندێ قه‌شه‌ (ئاندرۆ برانسۆن) كو ده‌مێ دو سالانه‌ يێ ده‌سته‌سه‌ركريه‌، ئازاد بكه‌ين”.

گۆت ژى” ئه‌مريكا ئه‌و مۆله‌ته‌ دايه‌ شانده‌كێ توركى كو ل حه‌فتيا بۆرى ل واشنتۆن بوو”.

ئه‌ردۆگانى دياركر” دۆنالد ترامپ گه‌فێن سه‌پاندنا سزايێن زێده‌تر ل سه‌ر توركيا كرينه‌ هه‌كه‌ قه‌شێ ئه‌مريكى نه‌هێته‌ ئازادكرن”.

دهێته‌ زانين بهايێ لێرێ توركى ل به‌رامبه‌ر دۆلارێ ئه‌مريكى داكه‌فتنه‌كا مه‌زن ب خوه‌ڤه‌ ديتيه‌ دچه‌ند رۆژێن بۆرى دا.

ئەڤرۆ نيوز:

وەزارەتا دەرڤە یا مەغربێ د داخۆیانیەکێ دا راگەھاند کو د چارچۆڤێ سزایێن ئەمریکا یێن ل سەر ئیرانێ وەلاتێ مە ژی دێ ھەموو پەیوەندیێن خوە یێن سیاسی و ئابووری ل گەل ئیرانێ دەتە راگرتن و ھەتا ئیران دەستان ژ ھەلویستێ خوە یێ خراب ل دژی جڤاکێ نێڤدەولەتی بەرنەدەت ئەم پێداچوونێ د ھەلویستێ خوە دا ناکەین.

د بەردەوامیا داخۆیانیێ دا ئەو یەک ژی ھاتیە دیار کرن کو د چارچۆڤێ ڤان سزایان دا وەلاتێ مە دێ ھەموو پەیوەندیێن بەنکی ل گەل ئیرانێ دەتە راگرتن و ئەم ھێڤیدارین کو وەلاتیێن مە ژی وەکو جاران سەرەدانا ئیرانێ نەکەن.

ئەڤرۆ نيوز:

عەلیرزا نوری زادە شارەزایێ کاروبارێ سیاسی یێ ئیرانی د داخۆیانیەکێ دا دیار دکەت کو سزادانا تورکیا و ئیرانێ ژ ئالیێ ئەمریکا ڤە نھا ب تەمامی د خزمەتا روسیا دایە، چونکو ئیران گەلەک تەنگاڤ بوویە و دێ نەچار بیت گەلەک داخوازیێن روسیا قەبوول کەت و ل ئالیێ دی دو رۆژ بەری نھا ئەردۆگانی ژی دیار کربوو کو تورکیا دێ ژ ھەڤپەیمانێن نوو گەریت کو دیارە ئارمانجا ئەردۆگانی روسیایە، ژ بەر ھندێ ژی سزایێن ئەمریکا یێن ل سەر تورکیا و ئیرانێ ڤان ھەر دو وەلاتان پتر بەر ب روسیا ڤە دبەت و روسیا مفادارێ ئێکێ یە.

ناڤبری ھەروەسا دیار دکەت کو چەندین سالن ئەمریکا ژ بەر سیاسەتا خوە یا ل دژی ھندەک وەلاتێن ھەرێمێ وەسا کریە کو روسیا ب ھێزتر ژ جاران بیت، بەری نھا ژی دەمێ ئەمریکا رێککەفتنا ئەتۆمی ل گەل ئیرانێ ئیمزا کری سعوودیە و چەندین وەلاتێن دی یێن عەرەبی خوە ژ ئەمریکا دوور کرن و بەرێ خوە دانە روسیا، نھا ژی ھەمان تشت ل دۆر ئیرانێ و تورکیا دوبارە دبیت و گۆت: (روسیا نەدشیا ھەڤڕکیا ئەمریکا بکەت، لێ سزادانا ھندەک وەلاتێن رۆژھەلاتا ناڤین ژ ئالیێ ئەمریکا ڤە وەسا کر کو ئەو خوە نێزیکی روسیا بکەن و سعوودیێ بەری نھا گەلەک چەک ژ روسیا کڕین و نھا تورکیا ژی دێ کڕیت و ئەڤە ھەموو د خزمەتا روسیا دانە).