ئەڤرۆ نیوز ، زنار تۆڤی :

فراکسیۆنا پارتی دیموکراتی کوردستان ل پەرلەمانێ عێراقێ هەلویستێ خوە یێ فەرمی ل سەر بریارا پەرلەمانێ عێراقێ یا هەلوەشاندنا کۆمسیۆنێ و دەنگێن تایبەت یێن هەرێمێ دیار کر و گوت ، پەرلەمانێ عێراقێ ئەو دەستهەلات نینن وێ بریارێ بدەت.

عەرەفات کەرەم سەرۆکێ فراکسیۆنا پارتی دیموکراتی کوردستان ل پەرلەمانێ عێراقێ د کۆنگرەکێ رۆژنامەڤانی دا راگەهاند ، نەدبوو پەرلەمانێ عێراقێ بریارا نە هژمارتنا دەنگێن تایبەت یێن هەرێما کوردستانێ بدەت ، ژبەر کو پەرلەمانی ئەو دەستهەلات نینن ، بەلکو دەستهەلاتێن هەلوەشاندنا پشکەکا دەنگان یان هەر کارەکێ دی یێ گرێدایی پرۆسا هژمارتنا دەنگان، د چارچووڤەیێ دەستهەلاتێن کۆمسیۆنا سەربەخۆ یا هەلبژارتنان دایە.

سەرۆکێ فراکسیۆنا پارتی گوتیه ژی ، ئەو ئەندامێن پەرلەمانێ عێراقێ یێن کو بریارا هەلوەشاندنا دەنگان داین ، هەر ب دەنگێ وەلاتیان گەهشتینە پەرلەمانی ، لەورا هەر کارەکێ ئەو دکەن ، پێدڤیە بۆ خزمەتا وەلاتیان بیت و هەروەسا نەدبوو پەرلەمان کۆمسیۆنا سەربەخۆ یا هەلبژارتنان ژی سر بکەت.

ئه‌ڤرۆنيوز:

سه‌ركرده‌كێ ره‌وتێ حيكمه‌ ب سه‌رۆكاتيا عه‌مار حه‌كيم ئاشكراركر كو رێككه‌فتنه‌ك دناڤبه‌را هه‌ر ئێك ژ هه‌ڤپه‌يمانيێن سائيرون ووه‌ته‌نيه‌ وحێكمه‌  دا بۆ پێكئينانا مه‌زنترين هه‌ڤپه‌يمانيا په‌رله‌مانى يا هاتيه‌ ئيمزاكرن كو 100 كورسيێن په‌رله‌مانى ب خوه‌ڤه‌ دگريت.

وى سه‌ركرده‌ى بۆ شه‌فه‌ق نيوز دياركر كو هه‌ر ئێك ژ عه‌مار حه‌كيم سه‌رۆكێ ره‌وتێ حيكمه‌، موقته‌دا سه‌در سه‌رۆكێ ليستا سائيرون وئه‌ياد عه‌لاوى سه‌رۆكێ هه‌ڤپه‌يمانيا وه‌ته‌نيه‌، ئيمزا ل سه‌ر پێكئينانا هه‌ڤپه‌يمانيه‌كێ كريه‌ كو هژمارا په‌رله‌مانتارێن وێ هه‌ڤپه‌يمانيێ دێ بنه‌ 100 ئه‌ندام ودبيته‌ مه‌زنترين كوتلا په‌رله‌مانى ل په‌رله‌مانێ عيراقێ يێ نوو دا.

وى سه‌ركردێ ره‌وتێ حيكمه‌ دياركر ژى كو دانوستاندن دبه‌رده‌وامن ل گه‌ل هه‌ڤپه‌يمانيا فه‌تح بۆ هاتنا وێ دناڤ وێ هه‌ڤپه‌يمانيا مه‌زن دا  ب مه‌ره‌ما پێكئينانا حوكمه‌تێ.

ئه‌ڤرۆ نیوز ، زنار تۆڤى :

ئه‌ندامه‌كێ به‌رێ یێ په‌رله‌مانێ عێراقێ بۆ ئه‌ڤرۆ نیوز دبێژیت : بۆ ڤێ قۆناغێ گه‌له‌ك باشتره‌ كورد ب ئێك شاند بچنه‌ به‌غدا ، هه‌ر چه‌نده‌ كێشا كوردستانێ ل گه‌ل به‌غدا نه‌كێشا حزبه‌كێ یان ژى یا لایه‌نه‌كێ یه‌ نه‌ یا لایه‌نه‌كێ دیتر ، له‌وما كێشێن هه‌رێما كوردستانێ ل گه‌ل حوكمه‌تا به‌غدا كێشێن هه‌موو خه‌لكێ كوردستانێ نه‌ ، هه‌روه‌سا ئه‌ڤرۆ هه‌موو خه‌لكێ كوردستانێ ژى حه‌ز دكه‌ن كورد ب ئێك تیم بچنه‌ به‌غدا دانوستاندنێ بكه‌ن ، دیسا دێ ده‌ستكه‌فتێن مه‌ وه‌كو هه‌رێم ژى پتر بن ، هه‌كه‌ وه‌كو ئێك شاند به‌ره‌ف به‌غدا بچین ، لێ مخابن ڤێ جارێ ژى كورد د هه‌ڤگرتى نابن ، هه‌ر چه‌نده‌ ئه‌و لایه‌نێن دڤێن كو ل به‌غدا دانوستاندنان بكه‌ن وه‌كو ئێك تیم ، هه‌تاكو نوكه‌ ب تنێ پارتى و ئێكه‌تى بووینه‌ و وان بریار دایه‌ پێكڤه‌ كار بكه‌ن ، لێ لایه‌نێن دیتر هه‌تا نوكه‌ ئێكلا نه‌بووینه‌ و بریارا خوه‌ نه‌دایه‌.

موئه‌یه‌د ته‌ییب ئه‌و ئه‌ندامێ به‌رێ یێ په‌رله‌مانێ عێراقێ یه‌ زێده‌تر دبێژیت : نوكه‌ دوو جه‌مسه‌ر یێن ل به‌غدا چێبووین ، جه‌مسه‌ره‌ك موقته‌دا سه‌در و حه‌یده‌ر عه‌بادیه‌ ل گه‌ل هنده‌ك لایه‌نێن دیتر و جه‌مسه‌رێ دویێ ژى مالكى و هادى عامرى ل گه‌ل هنده‌ك لایه‌نێن دیترن ، هه‌ر چه‌نده‌ به‌رى نوكه‌ شیعان هه‌ڤالبه‌ندیا نیشتیمانى هه‌بوو ، هه‌موو شیعه‌ د ئێك فراكسیۆن دا پشكداربوون ، لێ نوكه‌ ئه‌و هه‌ڤالبه‌ندیه‌ دناڤبه‌را وان دا نه‌مایه‌ ، لێ ئه‌ڤ هه‌ردو لایه‌نه‌ یێ بزاڤێ دكه‌ن كو ببنه‌ فراكسیۆنا مه‌زنتر ، ژ پێخه‌مه‌ت ئه‌و پۆستێ سه‌رۆك وه‌زیران وه‌ربگرن و دانوستاندنێ ل گه‌ل لایه‌نێن دیتر ژى بكه‌ن ژبۆ پێكئینانا حوكمه‌تێ ، لێ وه‌كو دیار ڤێ جارێ سه‌درى و عه‌بادى پتر شه‌نسێ پێكئینانا حوكمه‌تا عێراقێ یێ هه‌یى ، لێ كوردان وه‌سا دایه‌ دیاركرن كو ئه‌م دێ ل گه‌ل وى بین یێ پتر دانپێدانێ ب مافێن گه‌لێ كوردستانێ بكه‌ت و داخوازیێن مه‌ بجه بینیت ، لێ من چو گه‌شبینى ب وان نینه‌ ، چونكى هه‌لویستێ هه‌ردو جه‌مسه‌ران چو جۆداهى ل هه‌مبه‌رى كوردان نینه‌ ، چونكى ئه‌و كێشێن هه‌تاكو نوكه‌ دناڤبه‌را هه‌رێما كوردستانێ و به‌غدا دا نه‌هاتینه‌ چاره‌سه‌ركرن و دێ وه‌كو خوه‌ مینن و چو ژ وان ناهێنه‌ چاره‌سه‌ركرن ، لێ دبیت پرسا بوودجه‌ى و مووچه‌ى بهێته‌ چاره‌سه‌كرن ، هه‌ر چه‌نده‌ په‌رله‌مانێ عێراقێ پشكا كوردان ژ 17% كریه‌ 21% ، هه‌روه‌سا هه‌كه‌ ئه‌م وه‌كو كورد بشێین پشكا خوه‌ بكه‌ینه‌ 17% دێ گه‌له‌كا باش بیت ، چونكى نوكه‌ ژى رێژا كورسیێن كوردا د په‌رله‌مانێ عێراقێ دا 17% یه‌ ، هه‌ر چه‌نده‌ د به‌رێ ژى دا رێژا ته‌خمینكرى یا كوردان پتر بوویه‌ ژ 17% ، له‌وما 12% نه‌ هه‌قیه‌كا مه‌زنه‌ ل گه‌لێ كوردستانێ هاتیه‌ كرن ، ئه‌ڤه‌ ژ بلى نه‌هه‌قیێن 16 ئوكتۆبه‌رێ ل گه‌لێ مه‌ هاتینه‌ كرن ، لێ دبیت بوودجه‌ و مووچه‌ بهێنه‌ چاره‌كرن و ئه‌نجامه‌ك هه‌بیت، لێ ده‌رباره‌ى بابه‌تێ سنوورێن هه‌رێمێ و مادێ 140 و گه‌له‌ك بابه‌تێن دیتر چو ژ وان هه‌ردو جه‌مسه‌ران نه‌ڤێن خوه‌ دڤان بابه‌تان بگه‌هینن و نه‌ د ئاماده‌نه‌ بۆ چاره‌سه‌ریێ ، هه‌ر چه‌نده‌ ئه‌و لایه‌ن د دانوستاندنان دا جۆره‌ نه‌رماتیه‌كێ نیشان دده‌ن ، لێ ده‌مێ ده‌ستهه‌لاتێ وه‌ردگرن ئه‌وان رێككه‌فتنێن به‌رێ بجه نائینن.

ناڤهاتى ئه‌و چه‌ند ژى دیاركر : د ڤێ قوناغێدا یا گرنگه‌ كورد خوه‌ نێزیكى سوننى یان بكه‌ن ، ئه‌ڤ چه‌نده‌ دێ بوو كورد و سوننى یان ژى یا باش بیت هه‌كه‌ هه‌ماهه‌نگیه‌ك دناڤبه‌را وان دا بهێته‌ كرن ، دیسا هه‌كه‌ هه‌ردو ئێك هه‌لویست بن ژبۆ پشكدارى كرنێ د حوكمه‌تا داهاتى دا دێ گه‌ه‌لكا باشتر بیت، چونكى هه‌كه‌ كورد و سوننى خوه‌ ژ پرۆسا سیاسى ڤه‌كێشن چو حوكمه‌ت ل عێراقێ ناهێنه‌ پێكئینان ، لێ یا دیاره‌ كورد هه‌موو ئێك هه‌لویست نابن ، دیسا سوننى یان ژى ئێك هه‌لویست نینه‌ ، لێ دێ یا باشتر بیت كو هه‌ماهه‌نگیه‌ك دناڤبه‌را كورد و سوننى و شیعان دا هه‌بیت ، لێ وه‌كو دیار حوكمه‌تا ڤێ جارێ دێ یا پرى كێشه‌ بیت.

موئه‌یه‌د ته‌ییب هێشتا دیاركر : هه‌كه‌ ڤێ جارێ هنده‌ك هێزێن سیاسى ببنه‌ ئوپۆزسیۆن ، دێ هێشتا كێشێن حوكمه‌تا عێراقێ مه‌زنتر لێ هێن ، چونكى هێشتا ئه‌م فێرى هندێ نه‌بووینه‌ كو هنده‌ك لایه‌ن دناڤ حوكمه‌تێ دابن و هنده‌ك ژى ببنه‌ ئوپۆزسیۆن ، هه‌ر چه‌نده‌ ئه‌ڤه‌ ل پرانیا وه‌لاتێن جیهانى هه‌نه‌ ، لێ هێشتا ئه‌ڤ چه‌نده‌ ل عێراقێ نه‌هاتیه‌ په‌یره‌و كرن ، له‌وما نوكه‌ ره‌وشا عێراقێ یا باش نینه‌ و پرۆسا سیاسى ل ڤى وه‌لاتى ل هه‌مبه‌رى ئه‌زموونه‌كا مه‌زن دایه‌ ، هه‌روه‌سا بێى كورد و سوننى یان حوكمه‌تا عێراقێ ناهێته‌ پێكئینان ، لێ پرس ئه‌وه‌ ڤێ جارێ دێ كورد ل حوكمه‌تا داهاتى دا چه‌ند ب ده‌ستڤه‌ ئینن ئه‌و یا گرنگه‌ ، چونكى به‌رى نوكه‌ ژى مه‌ پشكدارى د حوكمه‌تێن عێراقێ دا كریه‌ ، لێ هه‌تا نوكه‌ چو كێشێن مه‌ نه‌هاتینه‌ چاره‌سه‌ركرن ، له‌وما یا گرنگ ئه‌وه‌ بۆ كوردان كو دڤان چار سالان دا دێ چاوا شێن كێشێن خوه‌ ل گه‌ل به‌غدا چاره‌سه‌ر كه‌ین ، لێ ئه‌ز نه‌یێ گه‌شبینم كو كێشێن مه‌ بهێنه‌ چاره‌سه‌ركرن ، لێ ب تنێ كوردان رێیه‌ك هه‌یه‌ ، كو ئه‌و ژى پرسا ریفراندۆمێ یه‌ ، ده‌مێ كو 93% ژ خه‌لكێ كوردستانێ گوتیه‌ مه‌ سه‌رخوه‌بوون دڤێت ، هه‌ر چه‌نده‌ ئه‌م نه‌شیاین سه‌رخوه‌بوونێ ب ده‌ستڤه‌ بینیت ، ژبه‌ركو ره‌وشا جیهانێ و یا وه‌لاتێن هه‌رێمى ژى ل دژى داخوازیا مه‌ بوویه‌ ، لێ ب تنێ ب ڤێ رێكێ هه‌كه‌ جاره‌كادى ئه‌نجامێن ریفراندۆمێ بهێنه‌ ئه‌كتیفكرن ، دێ شێین گه‌هینه‌ مافێن خوه‌ ، لێ دڤێت ره‌وشا جیهانى و هه‌رێمى ژى ل گه‌ل مه‌بیت.