ئەڤرۆ نيوز:
پەیڤدارێ دەستەیا گەشت و گۆزارێ ل ھەرێما کوردستانێ ئاشکرا کر، پشتی ئازادکرنا مووسلێ کەرتێ گەشت و گۆزارێ ب تەمامی بەرەڤ پێش چویە، ئەڤ سالە نێزیکی سالێن 2012 و 2013 گەشتیاران سەرەدانا کوردستانێ کریە، ب تایبەت سنوورێ پارێزگەھا دھۆکێ، ژ بەرکو ل گەل پارێزگەھا نەینەوا یا ھەڤسنوورە و دبێژیت: ئەم پێشبینی دکەین رێژا ھاتنا گەشتیاران ل جەژنا قوربانێ دوجارکی ھندی جەژنا رەمەزانێ بیت.
نادر روستی، پەیڤدارێ دەستەیا گەشت و گۆزارێ ل ھەرێما کوردستانێ بۆ ئەڤرۆ خویا کر، ل دووڤ وان بەرھەڤیێن بۆ پێشوازیکرنا گەشتیاران ل جەژنا قوربانیا ئەڤ سالە ھاتینە کرن، ھاتنا گەشتیاران دێ ژ جەژنا رەمەزانێ پتر بیت، ب تایبەت گەشتیارێن سنوورێ پارێزگەھا نەینەوا و گۆت: “پشتی نەمانا داعش ل عیراقێ گەلەک گەشتیار دێ سەرەدانا کوردستانێ کەن و ژێرخانا ئابووریا کوردستانێ ب نەمانا داعش باشتر بوویە، نھا ژ بەر وێ ئارامیا ل کوردستانێ ھەی؛ رۆژانە گەلەک گەشتیار سەرەدانا کوردستانێ دکەن”.
روستی گۆتژی: “دیزاین بو دروستکرنا دو باژێڕێن گەشتیاری ل دھۆکێ؛ ل چیایێ زاوا و بەنداڤا دھۆکێ دێ ھێنە دروستکرن و دیزانێن وان ژی ھاتینە دروستکرن، دیسا چەند باژێڕێن دی یێن گەشتیاری ل پارێزگەھێن ھەولێر و سلێمانیێ دێ ھێنە دروستکرن، بەلێ پشتی بودجا کوردستانێ ژ لایێ حوکمەتا عیراقێ ڤە ھاتیە بڕین ئەو پڕۆژە ھاتنە راوەستاندن، لێ نوکە و پشتی نەمانا داعش و پێشڤەچوونا کەرتێ گەشت و گۆزارێ؛ ھەکە بودجە ھاتە دابینکرن دێ دەست ب وان باژێڕان ھێتە کرن”.
نادر روستی خویا ژی کر، دەما رەوشا ئابووری ل کوردستانێ باشتر لێھات دێ ھەردو باژێرێن گەشتیارێ یێن پارێزگەھا دھۆکێ ھێنە ب جھئینان، ژ بەرکو پێدڤیەکا سەرەکیا گەشت و گۆزارێ یە ل کوردستانێ و گۆت: “ئەم پێشبینی دکەین بۆ جەژنا قوربانێ رێژا ھاتنا گەشتیاران بۆ دھۆکێ 50% زێدە ببیت”.

ئه‌ڤرۆ نيوز:
فەرھاد ئەمین ئەترووشی، پارێزگەرێ دھۆکێ پێشوازیا رابەر سەدیق، وەزیرێ دارایی و ئابووری یێ حوکمەتا ھەرێما کوردستانێ ب وەکالەت کر و د ھەڤدیتنەکێ دا ھەردو لایان بەحسێ ھەڤکاریێ بۆ سەرکەفتنا کاری کرن و رێڤەبەرەکێ نوو بۆ گەنجینا دھۆکێ ھاتە دانان.
ژ لایێ خوەڤە وەزیرێ دارایی و ئابووری ب وەکالەت سوپاسیا کارگێڕیا پارێزگەھا دھۆکێ و پارێزگەری کر بۆ وێ پشتەڤانی و ھاریکاریا ئەو بۆ دەزگەھێن سەر ب وەزارەتا دارایی ڤە ل سنوورێ پارێزگەھا دھۆکێ دکەن و گۆت: “ژ ئەنجامێ وێ پشتەڤانیێ کارەکێ باش و سەرکەفتی یێ گرێدای وەزارەتا دارایی ل سنوورێ پارێزگەھێ دھێتە ئەنجامدان”.
ھەر د وێ ھەڤدیتنێ دا پارێزگەرێ دھۆکێ دوپات کر کو ھاریکاری و پشتەڤانیا کارگێڕیا پارێزگەھێ بۆ دەزگەھێن سەر ب وەزارەتێ ڤە پێخەمەت سەرکەفتنا کاری ل دووڤ قانوونێ دێ یا بەردەوام بیت.
د لایەکێ دیدا (کوڤان تەحسین) ل شوونا (ئەسما ئیبراھیم) وەکو رێڤەبەرێ نوو یێ گەنجینا دھۆکێ ب وەکالەت ھاتەدان و ھەردو لایان داکوکی ل سەر پشتەڤانیا رێڤەبەرێ نوو کر.

ئەڤرۆ نيوز:
ھشیار زێباری ئەندامێ مەکتەبا سیاسی یا پارتی راگەھاند؛ پارتی دخوازیت بەری رێفراندومێ پەڕلەمان کارا ببیت، لەوا ھەموو مەرجێن خوە لاداینە و نوکە ل گەل ئالییێن سیاسی د دانوستاندنێن گەرم دایە.
ھشیار زێباری نوونەرێ پارتی د جڤاتا بلندا ریفراندومێ دا، د داخویانیەکێ دا گۆت: ھەموو ئالییێن سیاسی ل گەل کاراکرنا پەڕلەمانی و ریفراندوما سەرخوەبوونێ نە، لەوا پارتی دخوازیت بەری رێفراندومێ پەڕلەمان کاراببیت، بۆ ڤێ یەکێ ژی ھەموو مەرجێن خوە لاداینە و دانوستاندنێن گەرم ل گەل ئالییێن سیاسی دەستپێکرینە و ئەو دانوستاندن گەھشتینە قۆناغەکا پێشکەفتی.
زێباری سەبارەت ریفراندومێ گۆت: دو جاران ب فەرمی نەتەوەیێن ئێکگرتی ل دۆر رێفراندومێ ھاتییە ھایدار کرن و جارەکێ ژی سکرتێرێ گشتی یێ un ھاتییە ئاگەھدار کرن، نوکە ژی ھەرێم دشێت بێی رۆلێ نەتەوەیێن ئێکگرتی ریفراندومەکا سەرکەفتی ئەنجام بدەت.

ئەڤرو نیوز ، نەوزاد هلۆری:

ئێڤارە درەنگی یا ئەڤرو ل مێحوەرێ دوزخورماتو یا سەر ب سنوورێ پارێزگەها کەرکوکێ ، چەکدارێن داعش هێرشەک بو سەر سەنگەرێن پێشمەرگەی ئینا ، بەلێ هێرشا وان هاتە شکاندن.

دڤی واریدا “هندرین رواندوزی “ژ هێزا پێشمەرگەی ل مێحوەرێ دوزخورماتو بۆ ئەڤرو نیوز گۆت: (دەوروبەرێن دەمژمێر 7:00 ئێڤاریا ئەڤرو چەکدارێن داعشێ هێرشەک بو سەنگەرێن پێشمەرگەی ل گوندێ زەرگە یا سەر ب مێحوەرێ دوزخورماتو ل سنوورێ پارێزگەها کەرکوک ئینا ، سوپاس بو خودێ هێزێن پێشمەرگەی شیان هێرشا وان بشکێنن)

زێدەتر گۆت :  (هەتا نها ناهێتە زانین کا زیانێن داعش چ نە ، بەلێ  ب مخانیڤە دوو پێشمەرگە شەهیدبوینە و ئێک ژی برینداربوویە)

ل گۆرەی زانیاریێن ئەڤرو نیوز شەهیدەک و ئەو پێشمەرگێ برینداربوی خەلکێ قەزا سورانن و شەهیدێ دن ژی خەلکێ گوندێ کەلات یا سەر ناحیا وەرتێ یا سەر ب قەزا رواندوزێ یە.

ئەڤرۆ نیوز، مەحمود نھێلی:
د بەردەوامیا بوردومانکرنا سنوورێ پارێزگەھا دھۆک ، ئەڤرۆ ژی فرۆکێن تورکیا گوندەکێ سنوورێ قەزا ئامێدیێ یا سەر ب پارێزگەھا دھۆک بوردومانکر و زیان گەھاندینە رەز و باغێت وان.

دڤی واریدا ” ھەیوار سەرگەلی” ئاکنجیێ گوندێ سەرگەلێ یا سەر ب ناحیا دێرەلوک ل سنوورێ قەزا ئامێدیێ بۆ ئەفرۆ نیوز گۆت: (ئێڤاریا ئەڤرۆ چەند فرۆکێن تورکیا دەردورێن گوندێ سەرگەلێ بوردومانکرن و د ئەنجامێ دا زیان گەھاندینە رەز و باغێن ھاولاتیان کو بتنێ ٣٠٠ میتران دویرێ سەنتەرێ گوندی بوویە و سەروکانیا ئاڤا ڤەخوارنێ دکەڤیتە وێرێ )
زێدەتر گۆت: ( سێ جاران گوندێ مە ھاتە بوردومانکرن و ترسەکا زور لدەف خەلکی پەیداکریە)
ئەڤ بوردومانکرنا فروکێن تورکی د دەمەکێ دایە کو دوھی ژی ل سنوورێ قەزا زاخۆ چوار وەلاتیێن سڤێل بریندارببون.

ئەڤرۆ نیوز ، نەوزاد هلۆری:

د روودانەکا ئاگر بەربوونێ ل دهۆکێ مەترسیەکا مەزن بو سەر ژیانا پولیس و کارمەندێن بەرەڤانیا باژێرێ دروست کر ، ئەڤە زێدەباری کو زیانێن ماددی گەهشتنە ئەوێ مالێ.

بێوار عەبدولعەزیز بەرپرسێ راگەهاندنا بەرەڤانیا باژێری ل دهۆکێ بو ئەڤرۆ نیوز گۆت: (ئەڤرو بەری نیڤرو روودانەکا ئاگری ل مالەکا دهۆکێ ل تاخێ گەلی دروست بو ، پولیس و کارمەندێن بەرەڤانیا باژێری شیان روودانێ کونترول بکەن بەلێ ژبەر هەبوونا هژمارەکا جورێن چەک و تەقەمەنیێن مینا کڵانشینکوف و ساجور و رومانە مەترسیەکا زور بو سەر گیانێ پولیس ۆ کارمەندێن مە دروست بو)

زێدەتر گۆت: (زیانێن زور ژی ب مالێ کەفتیە ، هەتا نها ئەگەرێن روودانێ ناهێنە زانین و بەرەڤانیا باژێری ڤەکولینەکێ ل سەر زیان و ئەگەرێن روودانێ دروست دکەت)